॥ અષ્ટમઃ સર્ગઃ ॥
॥ વિલક્ષ્યલક્ષ્મીપતિઃ ॥
અથ કથમપિ યામિનીં વિનીય સ્મરશરજર્જરિતાપિ સા પ્રભાતે ।
અનુનયવચનં વદંતમગ્રે પ્રણતમપિ પ્રિયમાહ સાભ્યસૂયમ્ ॥ 49 ॥
॥ ગીતં 17 ॥
રજનિજનિતગુરુજાગરરાગકષાયિતમલસનિવેશમ્ ।
વહતિ નયનમનુરાગમિવ સ્ફુટમુદિતરસાભિનિવેશમ્ ॥
હરિહરિ યાહિ માધવ યાહિ કેશવ મા વદ કૈતવવાદં તામનુસર સરસીરુહલોચન યા તવ હરતિ વિષાદમ્ ॥ 50 ॥
કજ્જલમલિનવિલોચનચુંબનવિરચિતનીલિમરૂપમ્ ।
દશનવસનમરુણં તવ કૃષ્ણ તનોતિ તનોરનુરૂપમ્ ॥ 2 ॥
વપુરનુહરતિ તવ સ્મરસંગરખરનખરક્ષતરેખમ્ ।
મરકતશકલકલિતકલધૌતલિપિરેવ રતિજયલેખમ્ ॥ 3 ॥
ચરણકમલગલદલક્તકસિક્તમિદં તવ હૃદયમુદારમ્ ।
દર્શયતીવ બહિર્મદનદ્રુમનવકિસલયપરિવારમ્ ॥ 4 ॥
દશનપદં ભવદધરગતં મમ જનયતિ ચેતસિ ખેદમ્ ।
કથયતિ કથમધુનાપિ મયા સહ તવ વપુરેતદભેદમ્ ॥ 5 ॥
બહિરિવ મલિનતરં તવ કૃષ્ણ મનોઽપિ ભવિષ્યતિ નૂનમ્ ।
કથમથ વંચયસે જનમનુગતમસમશરજ્વરદૂનમ્ ॥ 6 ॥
ભ્રમતિ ભવાનબલાકવલાય વનેષુ કિમત્ર વિચિત્રમ્ ।
પ્રથયતિ પૂતનિકૈવ વધૂવધનિર્દયબાલચરિત્રમ્ ॥ 7 ॥
શ્રીજયદેવભણિતરતિવંચિતખંડિતયુવતિવિલાપમ્ ।
શૃણુત સુધામધુરં વિબુધા વિબુધાલયતોઽપિ દુરાપમ્ ॥ 8 ॥
તદેવં પશ્યંત્યાઃ પ્રસરદનુરાગં બહિરિવ પ્રિયાપાદાલક્તચ્છુરિતમરુણચ્છાયહૃદયમ્ ।
મમાદ્ય પ્રખ્યાતપ્રણયભરભંગેન કિતવ ત્વદાલોકઃ શોકાદપિ કિમપિ લજ્જાં જનયતિ ॥ 50 ॥
॥ ઇતિ ગીતગોવિંદે ખંડિતાવર્ણને વિલક્ષ્યલક્ષ્મીપતિર્નામ અષ્ઠમઃ સર્ગઃ ॥