ગોપ્ય ઊચુઃ ।
જયતિ તેઽધિકં જન્મના વ્રજઃ
શ્રયત ઇંદિરા શશ્વદત્ર હિ ।
દયિત દૃશ્યતાં દિક્ષુ તાવકા-
સ્ત્વયિ ધૃતાસવસ્ત્વાં વિચિન્વતે ॥ 1॥
શરદુદાશયે સાધુજાતસ-
ત્સરસિજોદરશ્રીમુષા દૃશા ।
સુરતનાથ તેઽશુલ્કદાસિકા
વરદ નિઘ્નતો નેહ કિં વધઃ ॥ 2॥
વિષજલાપ્યયાદ્વ્યાલરાક્ષસા-
દ્વર્ષમારુતાદ્વૈદ્યુતાનલાત્ ।
વૃષમયાત્મજાદ્વિશ્વતોભયા-
દૃષભ તે વયં રક્ષિતા મુહુઃ ॥ 3॥
ન ખલુ ગોપિકાનંદનો ભવા-
નખિલદેહિનામંતરાત્મદૃક્ ।
વિખનસાર્થિતો વિશ્વગુપ્તયે
સખ ઉદેયિવાન્સાત્વતાં કુલે ॥ 4॥
વિરચિતાભયં વૃષ્ણિધુર્ય તે
ચરણમીયુષાં સંસૃતેર્ભયાત્ ।
કરસરોરુહં કાંત કામદં
શિરસિ ધેહિ નઃ શ્રીકરગ્રહમ્ ॥ 5॥
વ્રજજનાર્તિહન્વીર યોષિતાં
નિજજનસ્મયધ્વંસનસ્મિત ।
ભજ સખે ભવત્કિંકરીઃ સ્મ નો
જલરુહાનનં ચારુ દર્શય ॥ 6॥
પ્રણતદેહિનાં પાપકર્શનં
તૃણચરાનુગં શ્રીનિકેતનમ્ ।
ફણિફણાર્પિતં તે પદાંબુજં
કૃણુ કુચેષુ નઃ કૃંધિ હૃચ્છયમ્ ॥ 7॥
મધુરયા ગિરા વલ્ગુવાક્યયા
બુધમનોજ્ઞયા પુષ્કરેક્ષણ ।
વિધિકરીરિમા વીર મુહ્યતી-
રધરસીધુનાઽઽપ્યાયયસ્વ નઃ ॥ 8॥
તવ કથામૃતં તપ્તજીવનં
કવિભિરીડિતં કલ્મષાપહમ્ ।
શ્રવણમંગલં શ્રીમદાતતં
ભુવિ ગૃણંતિ તે ભૂરિદા જનાઃ ॥ 9॥
પ્રહસિતં પ્રિય પ્રેમવીક્ષણં
વિહરણં ચ તે ધ્યાનમંગલમ્ ।
રહસિ સંવિદો યા હૃદિસ્પૃશઃ
કુહક નો મનઃ ક્ષોભયંતિ હિ ॥ 10॥
ચલસિ યદ્વ્રજાચ્ચારયન્પશૂન્
નલિનસુંદરં નાથ તે પદમ્ ।
શિલતૃણાંકુરૈઃ સીદતીતિ નઃ
કલિલતાં મનઃ કાંત ગચ્છતિ ॥ 11॥
દિનપરિક્ષયે નીલકુંતલૈ-
ર્વનરુહાનનં બિભ્રદાવૃતમ્ ।
ઘનરજસ્વલં દર્શયન્મુહુ-
ર્મનસિ નઃ સ્મરં વીર યચ્છસિ ॥ 12॥
પ્રણતકામદં પદ્મજાર્ચિતં
ધરણિમંડનં ધ્યેયમાપદિ ।
ચરણપંકજં શંતમં ચ તે
રમણ નઃ સ્તનેષ્વર્પયાધિહન્ ॥ 13॥
સુરતવર્ધનં શોકનાશનં
સ્વરિતવેણુના સુષ્ઠુ ચુંબિતમ્ ।
ઇતરરાગવિસ્મારણં નૃણાં
વિતર વીર નસ્તેઽધરામૃતમ્ ॥ 14॥
અટતિ યદ્ભવાનહ્નિ કાનનં
ત્રુટિર્યુગાયતે ત્વામપશ્યતામ્ ।
કુટિલકુંતલં શ્રીમુખં ચ તે
જડ ઉદીક્ષતાં પક્ષ્મકૃદ્દૃશામ્ ॥ 15॥
પતિસુતાન્વયભ્રાતૃબાંધવા-
નતિવિલંઘ્ય તેઽંત્યચ્યુતાગતાઃ ।
ગતિવિદસ્તવોદ્ગીતમોહિતાઃ
કિતવ યોષિતઃ કસ્ત્યજેન્નિશિ ॥ 16॥
રહસિ સંવિદં હૃચ્છયોદયં
પ્રહસિતાનનં પ્રેમવીક્ષણમ્ ।
બૃહદુરઃ શ્રિયો વીક્ષ્ય ધામ તે
મુહુરતિસ્પૃહા મુહ્યતે મનઃ ॥ 17॥
વ્રજવનૌકસાં વ્યક્તિરંગ તે
વૃજિનહંત્ર્યલં વિશ્વમંગલમ્ ।
ત્યજ મનાક્ ચ નસ્ત્વત્સ્પૃહાત્મનાં
સ્વજનહૃદ્રુજાં યન્નિષૂદનમ્ ॥ 18॥
યત્તે સુજાતચરણાંબુરુહં સ્તનેષ
ભીતાઃ શનૈઃ પ્રિય દધીમહિ કર્કશેષુ ।
તેનાટવીમટસિ તદ્વ્યથતે ન કિંસ્વિત્
કૂર્પાદિભિર્ભ્રમતિ ધીર્ભવદાયુષાં નઃ ॥ 19॥
ઇતિ શ્રીમદ્ભાગવત મહાપુરાણે પારમહંસ્યાં સંહિતાયાં
દશમસ્કંધે પૂર્વાર્ધે રાસક્રીડાયાં ગોપીગીતં નામૈકત્રિંશોઽધ્યાયઃ ॥