ચંદ્રશેખર ચંદ્રશેખર ચંદ્રશેખર પાહિમામ્ ।
ચંદ્રશેખર ચંદ્રશેખર ચંદ્રશેખર રક્ષમામ્ ॥
રત્નસાનુ શરાસનં રજતાદ્રિ શૃંગ નિકેતનં
શિંજિનીકૃત પન્નગેશ્વર મચ્યુતાનલ સાયકમ્ ।
ક્ષિપ્રદગ્દ પુરત્રયં ત્રિદશાલયૈ-રભિવંદિતં
ચંદ્રશેખરમાશ્રયે મમ કિં કરિષ્યતિ વૈ યમઃ ॥ 1 ॥
પંચપાદપ પુષ્પગંધ પદાંબુજ દ્વયશોભિતં
ફાલલોચન જાતપાવક દગ્ધ મન્મધ વિગ્રહમ્ ।
ભસ્મદિગ્ધ કળેબરં ભવનાશનં ભવ મવ્યયં
ચંદ્રશેખર ચંદ્રશેખર ચંદ્રશેખર રક્ષમામ્ ॥ 2 ॥
મત્તવારણ મુખ્યચર્મ કૃતોત્તરીય મનોહરં
પંકજાસન પદ્મલોચન પૂજિતાંઘ્રિ સરોરુહમ્ ।
દેવ સિંધુ તરંગ શ્રીકર સિક્ત શુભ્ર જટાધરં
ચંદ્રશેખર ચંદ્રશેખર ચંદ્રશેખર પાહિમામ્ ॥ 3 ॥
યક્ષ રાજસખં ભગાક્ષ હરં ભુજંગ વિભૂષણમ્
શૈલરાજ સુતા પરિષ્કૃત ચારુવામ કળેબરમ્ ।
ક્ષેળ નીલગળં પરશ્વધ ધારિણં મૃગધારિણમ્
ચંદ્રશેખર ચંદ્રશેખર ચંદ્રશેખર પાહિમામ્ ॥ 4 ॥
કુંડલીકૃત કુંડલીશ્વર કુંડલં વૃષવાહનં
નારદાદિ મુનીશ્વર સ્તુતવૈભવં ભુવનેશ્વરમ્ ।
અંધકાંતક માશ્રિતામર પાદપં શમનાંતકં
ચંદ્રશેખર ચંદ્રશેખર ચંદ્રશેખર રક્ષમામ્ ॥ 5 ॥
ભેષજં ભવરોગિણા મખિલાપદા મપહારિણં
દક્ષયજ્ઞ વિનાશનં ત્રિગુણાત્મકં ત્રિવિલોચનમ્ ।
ભક્તિ મુક્તિ ફલપ્રદં સકલાઘ સંઘ નિબર્હણં
ચંદ્રશેખર ચંદ્રશેખર ચંદ્રશેખર રક્ષમામ્ ॥ 6 ॥
ભક્તવત્સલ-મર્ચિતં નિધિમક્ષયં હરિદંબરં
સર્વભૂત પતિં પરાત્પર-મપ્રમેય મનુત્તમમ્ ।
સોમવારિન ભૂહુતાશન સોમ પાદ્યખિલાકૃતિં
ચંદ્રશેખર ચંદ્રશેખર ચંદ્રશેખર પાહિમામ્ ॥ 7 ॥
વિશ્વસૃષ્ટિ વિધાયકં પુનરેવપાલન તત્પરં
સંહરં તમપિ પ્રપંચ મશેષલોક નિવાસિનમ્ ।
ક્રીડયંત મહર્નિશં ગણનાથ યૂથ સમન્વિતં
ચંદ્રશેખર ચંદ્રશેખર ચંદ્રશેખર રક્ષમામ્ ॥ 8 ॥
મૃત્યુભીત મૃકંડુસૂનુકૃતસ્તવં શિવસન્નિધૌ
યત્ર કુત્ર ચ યઃ પઠેન્ન હિ તસ્ય મૃત્યુભયં ભવેત્ ।
પૂર્ણમાયુરરોગતામખિલાર્થસંપદમાદરં
ચંદ્રશેખર એવ તસ્ય દદાતિ મુક્તિમયત્નતઃ ॥ 9 ॥