અસ્યાઃ ચાક્ષુષીવિદ્યાયાઃ અહિર્બુધ્ન્ય ઋષિઃ । ગાયત્રી છંદઃ । સૂર્યો દેવતા । ચક્ષુરોગનિવૃત્તયે જપે વિનિયોગઃ ।
ઓં ચક્ષુશ્ચક્ષુશ્ચક્ષુઃ તેજઃ સ્થિરો ભવ । માં પાહિ પાહિ । ત્વરિતં ચક્ષુરોગાન્ શમય શમય । મમ જાતરૂપં તેજો દર્શય દર્શય । યથાહં અંધો ન સ્યાં તથા કલ્પય કલ્પય । કલ્યાણં કુરુ કુરુ । યાનિ મમ પૂર્વજન્મોપાર્જિતાનિ ચક્ષુઃ પ્રતિરોધક દુષ્કૃતાનિ સર્વાણિ નિર્મૂલય નિર્મૂલય ।
ઓં નમઃ ચક્ષુસ્તેજોદાત્રે દિવ્યાય ભાસ્કરાય । ઓં નમઃ કરુણાકરાયાઽમૃતાય । ઓં નમઃ સૂર્યાય । ઓં નમો ભગવતે સૂર્યાયાક્ષિતેજસે નમઃ । ખેચરાય નમઃ । મહતે નમઃ । રજસે નમઃ । તમસે નમઃ । અસતો મા સદ્ગમય । તમસો મા જ્યોતિર્ગમય । મૃત્યોર્મા અમૃતં ગમય । ઉષ્ણો ભગવાન્ શુચિરૂપઃ । હંસો ભગવાન્ શુચિરપ્રતિરૂપઃ ।
ય ઇમાં ચક્ષુષ્મતીં વિદ્યાં બ્રાહ્મણો નિત્યમધીતે ન તસ્ય અક્ષિરોગો ભવતિ । ન તસ્ય કુલે અંધો ભવતિ । અષ્ટૌ બ્રાહ્મણાન્ ગ્રાહયિત્વા વિદ્યાસિદ્ધિર્ભવતિ ।
વિશ્વરૂપં ઘૃણિનં જાતવેદસં હિરણ્મયં પુરુષં જ્યોતીરૂપં તપંતં સહસ્રરશ્મિઃ શતધાવર્તમાનઃ । પુરઃ પ્રજાનામુદયત્યેષ સૂર્યઃ ।
ઓં નમો ભગવતે આદિત્યાય અક્ષિતેજસે અહો વાહિનિ વાહિનિ સ્વાહા ।
[ઓં નમો ભગવતે આદિત્યાય સૂર્યાયાહો વાહિન્યહોવાહિની સ્વાહા ।]