સાંદ્રાનંદાવબોધાત્મકમનુપમિતં કાલદેશાવધિભ્યાં
નિર્મુક્તં નિત્યમુક્તં નિગમશતસહસ્રેણ નિર્ભાસ્યમાનમ્ ।
અસ્પષ્ટં દૃષ્ટમાત્રે પુનરુરુપુરુષાર્થાત્મકં બ્રહ્મ તત્વં
તત્તાવદ્ભાતિ સાક્ષાદ્ ગુરુપવનપુરે હંત ભાગ્યં જનાનામ્ ॥ 1 ॥
એવંદુર્લભ્યવસ્તુન્યપિ સુલભતયા હસ્તલબ્ધે યદન્યત્
તન્વા વાચા ધિયા વા ભજતિ બત જનઃ ક્ષુદ્રતૈવ સ્ફુટેયમ્ ।
એતે તાવદ્વયં તુ સ્થિરતરમનસા વિશ્વપીડાપહત્યૈ
નિશ્શેષાત્માનમેનં ગુરુપવનપુરાધીશમેવાશ્રયામઃ ॥ 2 ॥
સત્ત્વં યત્તત્ પરાભ્યામપરિકલનતો નિર્મલં તેન તાવત્
ભૂતૈર્ભૂતેંદ્રિયૈસ્તે વપુરિતિ બહુશઃ શ્રૂયતે વ્યાસવાક્યમ્।
તત્ સ્વચ્છ્ત્વાદ્યદાચ્છાદિતપરસુખચિદ્ગર્ભનિર્ભાસરૂપં
તસ્મિન્ ધન્યા રમંતે શ્રુતિમતિમધુરે સુગ્રહે વિગ્રહે તે ॥ 3 ॥
નિષ્કંપે નિત્યપૂર્ણે નિરવધિપરમાનંદપીયૂષરૂપે
નિર્લીનાનેકમુક્તાવલિસુભગતમે નિર્મલબ્રહ્મસિંધૌ ।
કલ્લોલોલ્લાસતુલ્યં ખલુ વિમલતરં સત્ત્વમાહુસ્તદાત્મા
કસ્માન્નો નિષ્કલસ્ત્વં સકલ ઇતિ વચસ્ત્વત્કલાસ્વેવ ભૂમન્ ॥ 4 ॥
નિર્વ્યાપારોઽપિ નિષ્કારણમજ ભજસે યત્ક્રિયામીક્ષણાખ્યાં
તેનૈવોદેતિ લીના પ્રકૃતિરસતિકલ્પાઽપિ કલ્પાદિકાલે।
તસ્યાઃ સંશુદ્ધમંશં કમપિ તમતિરોધાયકં સત્ત્વરૂપં
સ ત્વં ધૃત્વા દધાસિ સ્વમહિમવિભવાકુંઠ વૈકુંઠ રૂપં॥5॥
તત્તે પ્રત્યગ્રધારાધરલલિતકલાયાવલીકેલિકારં
લાવણ્યસ્યૈકસારં સુકૃતિજનદૃશાં પૂર્ણપુણ્યાવતારમ્।
લક્ષ્મીનિશ્શંકલીલાનિલયનમમૃતસ્યંદસંદોહમંતઃ
સિંચત્ સંચિંતકાનાં વપુરનુકલયે મારુતાગારનાથ ॥6॥
કષ્ટા તે સૃષ્ટિચેષ્ટા બહુતરભવખેદાવહા જીવભાજા-
મિત્યેવં પૂર્વમાલોચિતમજિત મયા નૈવમદ્યાભિજાને।
નોચેજ્જીવાઃ કથં વા મધુરતરમિદં ત્વદ્વપુશ્ચિદ્રસાર્દ્રં
નેત્રૈઃ શ્રોત્રૈશ્ચ પીત્વા પરમરસસુધાંભોધિપૂરે રમેરન્॥7॥
નમ્રાણાં સન્નિધત્તે સતતમપિ પુરસ્તૈરનભ્યર્થિતાન –
પ્યર્થાન્ કામાનજસ્રં વિતરતિ પરમાનંદસાંદ્રાં ગતિં ચ।
ઇત્થં નિશ્શેષલભ્યો નિરવધિકફલઃ પારિજાતો હરે ત્વં
ક્ષુદ્રં તં શક્રવાટીદ્રુમમભિલષતિ વ્યર્થમર્થિવ્રજોઽયમ્॥8॥
કારુણ્યાત્કામમન્યં દદતિ ખલુ પરે સ્વાત્મદસ્ત્વં વિશેષા-
દૈશ્વર્યાદીશતેઽન્યે જગતિ પરજને સ્વાત્મનોઽપીશ્વરસ્ત્વમ્।
ત્વય્યુચ્ચૈરારમંતિ પ્રતિપદમધુરે ચેતનાઃ સ્ફીતભાગ્યા-
સ્ત્વં ચાત્મારામ એવેત્યતુલગુણગણાધાર શૌરે નમસ્તે॥9॥
ઐશ્વર્યં શંકરાદીશ્વરવિનિયમનં વિશ્વતેજોહરાણાં
તેજસ્સંહારિ વીર્યં વિમલમપિ યશો નિસ્પૃહૈશ્ચોપગીતમ્।
અંગાસંગા સદા શ્રીરખિલવિદસિ ન ક્વાપિ તે સંગવાર્તા
તદ્વાતાગારવાસિન્ મુરહર ભગવચ્છબ્દમુખ્યાશ્રયોઽસિ॥10॥