અગ્રે પશ્યામિ તેજો નિબિડતરકલાયાવલીલોભનીયં
પીયૂષાપ્લાવિતોઽહં તદનુ તદુદરે દિવ્યકૈશોરવેષમ્ ।
તારુણ્યારંભરમ્યં પરમસુખરસાસ્વાદરોમાંચિતાંગૈ-
રાવીતં નારદાદ્યૈર્વિલસદુપનિષત્સુંદરીમંડલૈશ્ચ ॥1॥
નીલાભં કુંચિતાગ્રં ઘનમમલતરં સંયતં ચારુભંગ્યા
રત્નોત્તંસાભિરામં વલયિતમુદયચ્ચંદ્રકૈઃ પિંછજાલૈઃ ।
મંદારસ્રઙ્નિવીતં તવ પૃથુકબરીભારમાલોકયેઽહં
સ્નિગ્ધશ્વેતોર્ધ્વપુંડ્રામપિ ચ સુલલિતાં ફાલબાલેંદુવીથીમ્ ॥2
હૃદ્યં પૂર્ણાનુકંપાર્ણવમૃદુલહરીચંચલભ્રૂવિલાસૈ-
રાનીલસ્નિગ્ધપક્ષ્માવલિપરિલસિતં નેત્રયુગ્મં વિભો તે ।
સાંદ્રચ્છાયં વિશાલારુણકમલદલાકારમામુગ્ધતારં
કારુણ્યાલોકલીલાશિશિરિતભુવનં ક્ષિપ્યતાં મય્યનાથે ॥3॥
ઉત્તુંગોલ્લાસિનાસં હરિમણિમુકુરપ્રોલ્લસદ્ગંડપાલી-
વ્યાલોલત્કર્ણપાશાંચિતમકરમણીકુંડલદ્વંદ્વદીપ્રમ્ ।
ઉન્મીલદ્દંતપંક્તિસ્ફુરદરુણતરચ્છાયબિંબાધરાંતઃ-
પ્રીતિપ્રસ્યંદિમંદસ્મિતમધુરતરં વક્ત્રમુદ્ભાસતાં મે ॥4॥
બાહુદ્વંદ્વેન રત્નોજ્જ્વલવલયભૃતા શોણપાણિપ્રવાલે-
નોપાત્તાં વેણુનાલી પ્રસૃતનખમયૂખાંગુલીસંગશારામ્ ।
કૃત્વા વક્ત્રારવિંદે સુમધુરવિકસદ્રાગમુદ્ભાવ્યમાનૈઃ
શબ્દબ્રહ્મામૃતૈસ્ત્વં શિશિરિતભુવનૈઃ સિંચ મે કર્ણવીથીમ્ ॥5॥
ઉત્સર્પત્કૌસ્તુભશ્રીતતિભિરરુણિતં કોમલં કંઠદેશં
વક્ષઃ શ્રીવત્સરમ્યં તરલતરસમુદ્દીપ્રહારપ્રતાનમ્ ।
નાનાવર્ણપ્રસૂનાવલિકિસલયિનીં વન્યમાલાં વિલોલ-
લ્લોલંબાં લંબમાનામુરસિ તવ તથા ભાવયે રત્નમાલામ્ ॥6॥
અંગે પંચાંગરાગૈરતિશયવિકસત્સૌરભાકૃષ્ટલોકં
લીનાનેકત્રિલોકીવિતતિમપિ કૃશાં બિભ્રતં મધ્યવલ્લીમ્ ।
શક્રાશ્મન્યસ્તતપ્તોજ્જ્વલકનકનિભં પીતચેલં દધાનં
ધ્યાયામો દીપ્તરશ્મિસ્ફુટમણિરશનાકિંકિણીમંડિતં ત્વામ્ ॥7॥
ઊરૂ ચારૂ તવોરૂ ઘનમસૃણરુચૌ ચિત્તચોરૌ રમાયાઃ
વિશ્વક્ષોભં વિશંક્ય ધ્રુવમનિશમુભૌ પીતચેલાવૃતાંગૌ ।
આનમ્રાણાં પુરસ્તાન્ન્યસનધૃતસમસ્તાર્થપાલીસમુદ્ગ-
ચ્છાયં જાનુદ્વયં ચ ક્રમપૃથુલમનોજ્ઞે ચ જંઘે નિષેવે ॥8॥
મંજીરં મંજુનાદૈરિવ પદભજનં શ્રેય ઇત્યાલપંતં
પાદાગ્રં ભ્રાંતિમજ્જત્પ્રણતજનમનોમંદરોદ્ધારકૂર્મમ્ ।
ઉત્તુંગાતામ્રરાજન્નખરહિમકરજ્યોત્સ્નયા ચાઽશ્રિતાનાં
સંતાપધ્વાંતહંત્રીં તતિમનુકલયે મંગલામંગુલીનામ્ ॥9॥
યોગીંદ્રાણાં ત્વદંગેષ્વધિકસુમધુરં મુક્તિભાજાં નિવાસો
ભક્તાનાં કામવર્ષદ્યુતરુકિસલયં નાથ તે પાદમૂલમ્ ।
નિત્યં ચિત્તસ્થિતં મે પવનપુરપતે કૃષ્ણ કારુણ્યસિંધો
હૃત્વા નિશ્શેષતાપાન્ પ્રદિશતુ પરમાનંદસંદોહલક્ષ્મીમ્ ॥10॥
અજ્ઞાત્વા તે મહત્વં યદિહ નિગદિતં વિશ્વનાથ ક્ષમેથાઃ
સ્તોત્રં ચૈતત્સહસ્રોત્તરમધિકતરં ત્વત્પ્રસાદાય ભૂયાત્ ।
દ્વેધા નારાયણીયં શ્રુતિષુ ચ જનુષા સ્તુત્યતાવર્ણનેન
સ્ફીતં લીલાવતારૈરિદમિહ કુરુતામાયુરારોગ્યસૌખ્યમ્ ॥11॥