સૂર્યસ્પર્ધિકિરીટમૂર્ધ્વતિલકપ્રોદ્ભાસિફાલાંતરં
કારુણ્યાકુલનેત્રમાર્દ્રહસિતોલ્લાસં સુનાસાપુટમ્।
ગંડોદ્યન્મકરાભકુંડલયુગં કંઠોજ્વલત્કૌસ્તુભં
ત્વદ્રૂપં વનમાલ્યહારપટલશ્રીવત્સદીપ્રં ભજે॥1॥
કેયૂરાંગદકંકણોત્તમમહારત્નાંગુલીયાંકિત-
શ્રીમદ્બાહુચતુષ્કસંગતગદાશંખારિપંકેરુહામ્ ।
કાંચિત્ કાંચનકાંચિલાંચ્છિતલસત્પીતાંબરાલંબિની-
માલંબે વિમલાંબુજદ્યુતિપદાં મૂર્તિં તવાર્તિચ્છિદમ્ ॥2॥
યત્ત્ત્રૈલોક્યમહીયસોઽપિ મહિતં સમ્મોહનં મોહનાત્
કાંતં કાંતિનિધાનતોઽપિ મધુરં માધુર્યધુર્યાદપિ ।
સૌંદર્યોત્તરતોઽપિ સુંદરતરં ત્વદ્રૂપમાશ્ચર્યતોઽ-
પ્યાશ્ચર્યં ભુવને ન કસ્ય કુતુકં પુષ્ણાતિ વિષ્ણો વિભો ॥3॥
તત્તાદૃઙ્મધુરાત્મકં તવ વપુઃ સંપ્રાપ્ય સંપન્મયી
સા દેવી પરમોત્સુકા ચિરતરં નાસ્તે સ્વભક્તેષ્વપિ ।
તેનાસ્યા બત કષ્ટમચ્યુત વિભો ત્વદ્રૂપમાનોજ્ઞક –
પ્રેમસ્થૈર્યમયાદચાપલબલાચ્ચાપલ્યવાર્તોદભૂત્ ॥4॥
લક્ષ્મીસ્તાવકરામણીયકહૃતૈવેયં પરેષ્વસ્થિરે-
ત્યસ્મિન્નન્યદપિ પ્રમાણમધુના વક્ષ્યામિ લક્ષ્મીપતે ।
યે ત્વદ્ધ્યાનગુણાનુકીર્તનરસાસક્તા હિ ભક્તા જના-
સ્તેષ્વેષા વસતિ સ્થિરૈવ દયિતપ્રસ્તાવદત્તાદરા ॥5॥
એવંભૂતમનોજ્ઞતાનવસુધાનિષ્યંદસંદોહનં
ત્વદ્રૂપં પરચિદ્રસાયનમયં ચેતોહરં શૃણ્વતામ્ ।
સદ્યઃ પ્રેરયતે મતિં મદયતે રોમાંચયત્યંગકં
વ્યાસિંચત્યપિ શીતવાષ્પવિસરૈરાનંદમૂર્છોદ્ભવૈઃ ॥6॥
એવંભૂતતયા હિ ભક્ત્યભિહિતો યોગસ્સ યોગદ્વયાત્
કર્મજ્ઞાનમયાત્ ભૃશોત્તમતરો યોગીશ્વરૈર્ગીયતે ।
સૌંદર્યૈકરસાત્મકે ત્વયિ ખલુ પ્રેમપ્રકર્ષાત્મિકા
ભક્તિર્નિશ્રમમેવ વિશ્વપુરુષૈર્લભ્યા રમાવલ્લભ ॥7॥
નિષ્કામં નિયતસ્વધર્મચરણં યત્ કર્મયોગાભિધં
તદ્દૂરેત્યફલં યદૌપનિષદજ્ઞાનોપલભ્યં પુનઃ ।
તત્ત્વવ્યક્તતયા સુદુર્ગમતરં ચિત્તસ્ય તસ્માદ્વિભો
ત્વત્પ્રેમાત્મકભક્તિરેવ સતતં સ્વાદીયસી શ્રેયસી ॥8॥
અત્યાયાસકરાણિ કર્મપટલાન્યાચર્ય નિર્યન્મલા
બોધે ભક્તિપથેઽથવાઽપ્યુચિતતામાયાંતિ કિં તાવતા ।
ક્લિષ્ટ્વા તર્કપથે પરં તવ વપુર્બ્રહ્માખ્યમન્યે પુન-
શ્ચિત્તાર્દ્રત્વમૃતે વિચિંત્ય બહુભિસ્સિદ્ધ્યંતિ જન્માંતરૈઃ ॥9॥
ત્વદ્ભક્તિસ્તુ કથારસામૃતઝરીનિર્મજ્જનેન સ્વયં
સિદ્ધ્યંતી વિમલપ્રબોધપદવીમક્લેશતસ્તન્વતી ।
સદ્યસ્સિદ્ધિકરી જયત્યયિ વિભો સૈવાસ્તુ મે ત્વત્પદ-
પ્રેમપ્રૌઢિરસાર્દ્રતા દ્રુતતરં વાતાલયાધીશ્વર ॥10॥