પ્રિયવ્રતસ્ય પ્રિયપુત્રભૂતા-
દાગ્નીધ્રરાજાદુદિતો હિ નાભિઃ ।
ત્વાં દૃષ્ટવાનિષ્ટદમિષ્ટિમધ્યે
તવૈવ તુષ્ટ્યૈ કૃતયજ્ઞકર્મા ॥1॥
અભિષ્ટુતસ્તત્ર મુનીશ્વરૈસ્ત્વં
રાજ્ઞઃ સ્વતુલ્યં સુતમર્થ્યમાનઃ ।
સ્વયં જનિષ્યેઽહમિતિ બ્રુવાણ-
સ્તિરોદધા બર્હિષિ વિશ્વમૂર્તે ॥2॥
નાભિપ્રિયાયામથ મેરુદેવ્યાં
ત્વમંશતોઽભૂઃ ૠષભાભિધાનઃ ।
અલોકસામાન્યગુણપ્રભાવ-
પ્રભાવિતાશેષજનપ્રમોદઃ ॥3॥
ત્વયિ ત્રિલોકીભૃતિ રાજ્યભારં
નિધાય નાભિઃ સહ મેરુદેવ્યા ।
તપોવનં પ્રાપ્ય ભવન્નિષેવી
ગતઃ કિલાનંદપદં પદં તે ॥4॥
ઇંદ્રસ્ત્વદુત્કર્ષકૃતાદમર્ષા-
દ્વવર્ષ નાસ્મિન્નજનાભવર્ષે ।
યદા તદા ત્વં નિજયોગશક્ત્યા
સ્વવર્ષમેનદ્વ્યદધાઃ સુવર્ષમ્ ॥5॥
જિતેંદ્રદત્તાં કમનીં જયંતી-
મથોદ્વહન્નાત્મરતાશયોઽપિ ।
અજીજનસ્તત્ર શતં તનૂજા-
નેષાં ક્ષિતીશો ભરતોઽગ્રજન્મા ॥6॥
નવાભવન્ યોગિવરા નવાન્યે
ત્વપાલયન્ ભારતવર્ષખંડાન્ ।
સૈકા ત્વશીતિસ્તવ શેષપુત્ર-
સ્તપોબલાત્ ભૂસુરભૂયમીયુઃ ॥7॥
ઉક્ત્વા સુતેભ્યોઽથ મુનીંદ્રમધ્યે
વિરક્તિભક્ત્યન્વિતમુક્તિમાર્ગમ્ ।
સ્વયં ગતઃ પારમહંસ્યવૃત્તિ-
મધા જડોન્મત્તપિશાચચર્યામ્ ॥8॥
પરાત્મભૂતોઽપિ પરોપદેશં
કુર્વન્ ભવાન્ સર્વનિરસ્યમાનઃ ।
વિકારહીનો વિચચાર કૃત્સ્નાં
મહીમહીનાત્મરસાભિલીનઃ ॥9॥
શયુવ્રતં ગોમૃગકાકચર્યાં
ચિરં ચરન્નાપ્ય પરં સ્વરૂપમ્ ।
દવાહૃતાંગઃ કુટકાચલે ત્વં
તાપાન્ મમાપાકુરુ વાતનાથ ॥10॥