ઇંદ્રદ્યુમ્નઃ પાંડ્યખંડાધિરાજ-
સ્ત્વદ્ભક્તાત્મા ચંદનાદ્રૌ કદાચિત્ ।
ત્વત્ સેવાયાં મગ્નધીરાલુલોકે
નૈવાગસ્ત્યં પ્રાપ્તમાતિથ્યકામમ્ ॥1॥
કુંભોદ્ભૂતિઃ સંભૃતક્રોધભારઃ
સ્તબ્ધાત્મા ત્વં હસ્તિભૂયં ભજેતિ ।
શપ્ત્વાઽથૈનં પ્રત્યગાત્ સોઽપિ લેભે
હસ્તીંદ્રત્વં ત્વત્સ્મૃતિવ્યક્તિધન્યમ્ ॥2॥
દગ્ધાંભોધેર્મધ્યભાજિ ત્રિકૂટે
ક્રીડંછૈલે યૂથપોઽયં વશાભિઃ ।
સર્વાન્ જંતૂનત્યવર્તિષ્ટ શક્ત્યા
ત્વદ્ભક્તાનાં કુત્ર નોત્કર્ષલાભઃ ॥3॥
સ્વેન સ્થેમ્ના દિવ્યદેશત્વશક્ત્યા
સોઽયં ખેદાનપ્રજાનન્ કદાચિત્ ।
શૈલપ્રાંતે ઘર્મતાંતઃ સરસ્યાં
યૂથૈસ્સાર્ધં ત્વત્પ્રણુન્નોઽભિરેમે ॥4॥
હૂહૂસ્તાવદ્દેવલસ્યાપિ શાપાત્
ગ્રાહીભૂતસ્તજ્જલે બર્તમાનઃ ।
જગ્રાહૈનં હસ્તિનં પાદદેશે
શાંત્યર્થં હિ શ્રાંતિદોઽસિ સ્વકાનામ્ ॥5॥
ત્વત્સેવાયા વૈભવાત્ દુર્નિરોધં
યુધ્યંતં તં વત્સરાણાં સહસ્રમ્ ।
પ્રાપ્તે કાલે ત્વત્પદૈકાગ્ર્યસિધ્યૈ
નક્રાક્રાંતં હસ્તિવર્યં વ્યધાસ્ત્વમ્ ॥6॥
આર્તિવ્યક્તપ્રાક્તનજ્ઞાનભક્તિઃ
શુંડોત્ક્ષિપ્તૈઃ પુંડરીકૈઃ સમર્ચન્ ।
પૂર્વાભ્યસ્તં નિર્વિશેષાત્મનિષ્ઠં
સ્તોત્રં શ્રેષ્ઠં સોઽન્વગાદીત્ પરાત્મન્ ॥7॥
શ્રુત્વા સ્તોત્રં નિર્ગુણસ્થં સમસ્તં
બ્રહ્મેશાદ્યૈર્નાહમિત્યપ્રયાતે ।
સર્વાત્મા ત્વં ભૂરિકારુણ્યવેગાત્
તાર્ક્ષ્યારૂઢઃ પ્રેક્ષિતોઽભૂઃ પુરસ્તાત્ ॥8॥
હસ્તીંદ્રં તં હસ્તપદ્મેન ધૃત્વા
ચક્રેણ ત્વં નક્રવર્યં વ્યદારીઃ ।
ગંધર્વેઽસ્મિન્ મુક્તશાપે સ હસ્તી
ત્વત્સારૂપ્યં પ્રાપ્ય દેદીપ્યતે સ્મ ॥9॥
એતદ્વૃત્તં ત્વાં ચ માં ચ પ્રગે યો
ગાયેત્સોઽયં ભૂયસે શ્રેયસે સ્યાત્ ।
ઇત્યુક્ત્વૈનં તેન સાર્ધં ગતસ્ત્વં
ધિષ્ણ્યં વિષ્ણો પાહિ વાતાલયેશ ॥10॥