દર્વાસાસ્સુરવનિતાપ્તદિવ્યમાલ્યં
શક્રાય સ્વયમુપદાય તત્ર ભૂયઃ ।
નાગેંદ્રપ્રતિમૃદિતે શશાપ શક્રં
કા ક્ષાંતિસ્ત્વદિતરદેવતાંશજાનામ્ ॥1॥
શાપેન પ્રથિતજરેઽથ નિર્જરેંદ્રે
દેવેષ્વપ્યસુરજિતેષુ નિષ્પ્રભેષુ ।
શર્વાદ્યાઃ કમલજમેત્ય સર્વદેવા
નિર્વાણપ્રભવ સમં ભવંતમાપુઃ ॥2॥
બ્રહ્માદ્યૈઃ સ્તુતમહિમા ચિરં તદાનીં
પ્રાદુષ્ષન્ વરદ પુરઃ પરેણ ધામ્ના ।
હે દેવા દિતિજકુલૈર્વિધાય સંધિં
પીયૂષં પરિમથતેતિ પર્યશાસ્ત્વમ્ ॥3॥
સંધાનં કૃતવતિ દાનવૈઃ સુરૌઘે
મંથાનં નયતિ મદેન મંદરાદ્રિમ્ ।
ભ્રષ્ટેઽસ્મિન્ બદરમિવોદ્વહન્ ખગેંદ્રે
સદ્યસ્ત્વં વિનિહિતવાન્ પયઃપયોધૌ ॥4॥
આધાય દ્રુતમથ વાસુકિં વરત્રાં
પાથોધૌ વિનિહિતસર્વબીજજાલે ।
પ્રારબ્ધે મથનવિધૌ સુરાસુરૈસ્તૈ-
ર્વ્યાજાત્ત્વં ભુજગમુખેઽકરોસ્સુરારીન્ ॥5॥
ક્ષુબ્ધાદ્રૌ ક્ષુભિતજલોદરે તદાનીં
દુગ્ધાબ્ધૌ ગુરુતરભારતો નિમગ્ને ।
દેવેષુ વ્યથિતતમેષુ તત્પ્રિયૈષી
પ્રાણૈષીઃ કમઠતનું કઠોરપૃષ્ઠામ્ ॥6॥
વજ્રાતિસ્થિરતરકર્પરેણ વિષ્ણો
વિસ્તારાત્પરિગતલક્ષયોજનેન ।
અંભોધેઃ કુહરગતેન વર્ષ્મણા ત્વં
નિર્મગ્નં ક્ષિતિધરનાથમુન્નિનેથ ॥7॥
ઉન્મગ્ને ઝટિતિ તદા ધરાધરેંદ્રે
નિર્મેથુર્દૃઢમિહ સમ્મદેન સર્વે ।
આવિશ્ય દ્વિતયગણેઽપિ સર્પરાજે
વૈવશ્યં પરિશમયન્નવીવૃધસ્તાન્ ॥8॥
ઉદ્દામભ્રમણજવોન્નમદ્ગિરીંદ્ર-
ન્યસ્તૈકસ્થિરતરહસ્તપંકજં ત્વામ્ ।
અભ્રાંતે વિધિગિરિશાદયઃ પ્રમોદા-
દુદ્ભ્રાંતા નુનુવુરુપાત્તપુષ્પવર્ષાઃ ॥9॥
દૈત્યૌઘે ભુજગમુખાનિલેન તપ્તે
તેનૈવ ત્રિદશકુલેઽપિ કિંચિદાર્તે ।
કારુણ્યાત્તવ કિલ દેવ વારિવાહાઃ
પ્રાવર્ષન્નમરગણાન્ન દૈત્યસંઘાન્ ॥10॥
ઉદ્ભ્રામ્યદ્બહુતિમિનક્રચક્રવાલે
તત્રાબ્ધૌ ચિરમથિતેઽપિ નિર્વિકારે ।
એકસ્ત્વં કરયુગકૃષ્ટસર્પરાજઃ
સંરાજન્ પવનપુરેશ પાહિ રોગાત્ ॥11॥