ગરલં તરલાનલં પુરસ્તા-
જ્જલધેરુદ્વિજગાલ કાલકૂટમ્ ।
અમરસ્તુતિવાદમોદનિઘ્નો
ગિરિશસ્તન્નિપપૌ ભવત્પ્રિયાર્થમ્ ॥1॥
વિમથત્સુ સુરાસુરેષુ જાતા
સુરભિસ્તામૃષિષુ ન્યધાસ્ત્રિધામન્ ।
હયરત્નમભૂદથેભરત્નં
દ્યુતરુશ્ચાપ્સરસઃ સુરેષુ તાનિ ॥2॥
જગદીશ ભવત્પરા તદાનીં
કમનીયા કમલા બભૂવ દેવી ।
અમલામવલોક્ય યાં વિલોલઃ
સકલોઽપિ સ્પૃહયાંબભૂવ લોકઃ ॥3॥
ત્વયિ દત્તહૃદે તદૈવ દેવ્યૈ
ત્રિદશેંદ્રો મણિપીઠિકાં વ્યતારીત્ ।
સકલોપહૃતાભિષેચનીયૈઃ
ઋષયસ્તાં શ્રુતિગીર્ભિરભ્યષિંચન્ ॥4॥
અભિષેકજલાનુપાતિમુગ્ધ-
ત્વદપાંગૈરવભૂષિતાંગવલ્લીમ્ ।
મણિકુંડલપીતચેલહાર-
પ્રમુખૈસ્તામમરાદયોઽન્વભૂષન્ ॥5॥
વરણસ્રજમાત્તભૃંગનાદાં
દધતી સા કુચકુંભમંદયાના ।
પદશિંજિતમંજુનૂપુરા ત્વાં
કલિતવ્રીલવિલાસમાસસાદ ॥6॥
ગિરિશદ્રુહિણાદિસર્વદેવાન્
ગુણભાજોઽપ્યવિમુક્તદોષલેશાન્ ।
અવમૃશ્ય સદૈવ સર્વરમ્યે
નિહિતા ત્વય્યનયાઽપિ દિવ્યમાલા ॥7॥
ઉરસા તરસા મમાનિથૈનાં
ભુવનાનાં જનનીમનન્યભાવામ્ ।
ત્વદુરોવિલસત્તદીક્ષણશ્રી-
પરિવૃષ્ટ્યા પરિપુષ્ટમાસ વિશ્વમ્ ॥8॥
અતિમોહનવિભ્રમા તદાનીં
મદયંતી ખલુ વારુણી નિરાગાત્ ।
તમસઃ પદવીમદાસ્ત્વમેના-
મતિસમ્માનનયા મહાસુરેભ્યઃ ॥9॥
તરુણાંબુદસુંદરસ્તદા ત્વં
નનુ ધન્વંતરિરુત્થિતોઽંબુરાશેઃ ।
અમૃતં કલશે વહન્ કરાભ્યા-
મખિલાર્તિં હર મારુતાલયેશ ॥10॥