શક્રેણ સંયતિ હતોઽપિ બલિર્મહાત્મા
શુક્રેણ જીવિતતનુઃ ક્રતુવર્ધિતોષ્મા ।
વિક્રાંતિમાન્ ભયનિલીનસુરાં ત્રિલોકીં
ચક્રે વશે સ તવ ચક્રમુખાદભીતઃ ॥1॥
પુત્રાર્તિદર્શનવશાદદિતિર્વિષણ્ણા
તં કાશ્યપં નિજપતિં શરણં પ્રપન્ના ।
ત્વત્પૂજનં તદુદિતં હિ પયોવ્રતાખ્યં
સા દ્વાદશાહમચરત્ત્વયિ ભક્તિપૂર્ણા ॥2॥
તસ્યાવધૌ ત્વયિ નિલીનમતેરમુષ્યાઃ
શ્યામશ્ચતુર્ભુજવપુઃ સ્વયમાવિરાસીઃ ।
નમ્રાં ચ તામિહ ભવત્તનયો ભવેયં
ગોપ્યં મદીક્ષણમિતિ પ્રલપન્નયાસીઃ ॥3॥
ત્વં કાશ્યપે તપસિ સન્નિદધત્તદાનીં
પ્રાપ્તોઽસિ ગર્ભમદિતેઃ પ્રણુતો વિધાત્રા ।
પ્રાસૂત ચ પ્રકટવૈષ્ણવદિવ્યરૂપં
સા દ્વાદશીશ્રવણપુણ્યદિને ભવંતમ્ ॥4॥
પુણ્યાશ્રમં તમભિવર્ષતિ પુષ્પવર્ષૈ-
ર્હર્ષાકુલે સુરગણે કૃતતૂર્યઘોષે ।
બધ્વાઽંજલિં જય જયેતિ નુતઃ પિતૃભ્યાં
ત્વં તત્ક્ષણે પટુતમં વટુરૂપમાધાઃ ॥5॥
તાવત્પ્રજાપતિમુખૈરુપનીય મૌંજી-
દંડાજિનાક્ષવલયાદિભિરર્ચ્યમાનઃ ।
દેદીપ્યમાનવપુરીશ કૃતાગ્નિકાર્ય-
સ્ત્વં પ્રાસ્થિથા બલિગૃહં પ્રકૃતાશ્વમેધમ્ ॥6॥
ગાત્રેણ ભાવિમહિમોચિતગૌરવં પ્રા-
ગ્વ્યાવૃણ્વતેવ ધરણીં ચલયન્નાયાસીઃ ।
છત્રં પરોષ્મતિરણાર્થમિવાદધાનો
દંડં ચ દાનવજનેષ્વિવ સન્નિધાતુમ્ ॥7॥
તાં નર્મદોત્તરતટે હયમેધશાલા-
માસેદુષિ ત્વયિ રુચા તવ રુદ્ધનેત્રૈઃ ।
ભાસ્વાન્ કિમેષ દહનો નુ સનત્કુમારો
યોગી નુ કોઽયમિતિ શુક્રમુખૈશ્શશંકે ॥8॥
આનીતમાશુ ભૃગુભિર્મહસાઽભિભૂતૈ-
સ્ત્વાં રમ્યરૂપમસુરઃ પુલકાવૃતાંગઃ ।
ભક્ત્યા સમેત્ય સુકૃતી પરિણિજ્ય પાદૌ
તત્તોયમન્વધૃત મૂર્ધનિ તીર્થતીર્થમ્ ॥9॥
પ્રહ્લાદવંશજતયા ક્રતુભિર્દ્વિજેષુ
વિશ્વાસતો નુ તદિદં દિતિજોઽપિ લેભે ।
યત્તે પદાંબુ ગિરિશસ્ય શિરોભિલાલ્યં
સ ત્વં વિભો ગુરુપુરાલય પાલયેથાઃ ॥10॥