પુરા હયગ્રીવમહાસુરેણ ષષ્ઠાંતરાંતોદ્યદકાંડકલ્પે ।
નિદ્રોન્મુખબ્રહ્મમુખાત્ હૃતેષુ વેદેષ્વધિત્સઃ કિલ મત્સ્યરૂપમ્ ॥1॥
સત્યવ્રતસ્ય દ્રમિલાધિભર્તુર્નદીજલે તર્પયતસ્તદાનીમ્ ।
કરાંજલૌ સંજ્વલિતાકૃતિસ્ત્વમદૃશ્યથાઃ કશ્ચન બાલમીનઃ ॥2॥
ક્ષિપ્તં જલે ત્વાં ચકિતં વિલોક્ય નિન્યેઽંબુપાત્રેણ મુનિઃ સ્વગેહમ્ ।
સ્વલ્પૈરહોભિઃ કલશીં ચ કૂપં વાપીં સરશ્ચાનશિષે વિભો ત્વમ્ ॥3॥
યોગપ્રભાવાદ્ભવદાજ્ઞયૈવ નીતસ્તતસ્ત્વં મુનિના પયોધિમ્ ।
પૃષ્ટોઽમુના કલ્પદિદૃક્ષુમેનં સપ્તાહમાસ્વેતિ વદન્નયાસીઃ ॥4॥
પ્રાપ્તે ત્વદુક્તેઽહનિ વારિધારાપરિપ્લુતે ભૂમિતલે મુનીંદ્રઃ ।
સપ્તર્ષિભિઃ સાર્ધમપારવારિણ્યુદ્ઘૂર્ણમાનઃ શરણં યયૌ ત્વામ્ ॥5॥
ધરાં ત્વદાદેશકરીમવાપ્તાં નૌરૂપિણીમારુરુહુસ્તદા તે
તત્કંપકંપ્રેષુ ચ તેષુ ભૂયસ્ત્વમંબુધેરાવિરભૂર્મહીયાન્ ॥6॥
ઝષાકૃતિં યોજનલક્ષદીર્ઘાં દધાનમુચ્ચૈસ્તરતેજસં ત્વામ્ ।
નિરીક્ષ્ય તુષ્ટા મુનયસ્ત્વદુક્ત્યા ત્વત્તુંગશૃંગે તરણિં બબંધુઃ ॥7॥
આકૃષ્ટનૌકો મુનિમંડલાય પ્રદર્શયન્ વિશ્વજગદ્વિભાગાન્ ।
સંસ્તૂયમાનો નૃવરેણ તેન જ્ઞાનં પરં ચોપદિશન્નચારીઃ ॥8॥
કલ્પાવધૌ સપ્તમુનીન્ પુરોવત્ પ્રસ્થાપ્ય સત્યવ્રતભૂમિપં તમ્ ।
વૈવસ્વતાખ્યં મનુમાદધાનઃ ક્રોધાદ્ હયગ્રીવમભિદ્રુતોઽભૂઃ ॥9॥
સ્વતુંગશૃંગક્ષતવક્ષસં તં નિપાત્ય દૈત્યં નિગમાન્ ગૃહીત્વા ।
વિરિંચયે પ્રીતહૃદે દદાનઃ પ્રભંજનાગારપતે પ્રપાયાઃ ॥10॥