આનંદરૂપ ભગવન્નયિ તેઽવતારે
પ્રાપ્તે પ્રદીપ્તભવદંગનિરીયમાણૈઃ ।
કાંતિવ્રજૈરિવ ઘનાઘનમંડલૈર્દ્યા-
માવૃણ્વતી વિરુરુચે કિલ વર્ષવેલા ॥1॥
આશાસુ શીતલતરાસુ પયોદતોયૈ-
રાશાસિતાપ્તિવિવશેષુ ચ સજ્જનેષુ ।
નૈશાકરોદયવિધૌ નિશિ મધ્યમાયાં
ક્લેશાપહસ્ત્રિજગતાં ત્વમિહાવિરાસીઃ ॥2॥
બાલ્યસ્પૃશાઽપિ વપુષા દધુષા વિભૂતી-
રુદ્યત્કિરીટકટકાંગદહારભાસા ।
શંખારિવારિજગદાપરિભાસિતેન
મેઘાસિતેન પરિલેસિથ સૂતિગેહે ॥3॥
વક્ષઃસ્થલીસુખનિલીનવિલાસિલક્ષ્મી-
મંદાક્ષલક્ષિતકટાક્ષવિમોક્ષભેદૈઃ ।
તન્મંદિરસ્ય ખલકંસકૃતામલક્ષ્મી-
મુન્માર્જયન્નિવ વિરેજિથ વાસુદેવ ॥4॥
શૌરિસ્તુ ધીરમુનિમંડલચેતસોઽપિ
દૂરસ્થિતં વપુરુદીક્ષ્ય નિજેક્ષણાભ્યામ્ ॥
આનંદવાષ્પપુલકોદ્ગમગદ્ગદાર્દ્ર-
સ્તુષ્ટાવ દૃષ્ટિમકરંદરસં ભવંતમ્ ॥5॥
દેવ પ્રસીદ પરપૂરુષ તાપવલ્લી-
નિર્લૂનદાત્રસમનેત્રકલાવિલાસિન્ ।
ખેદાનપાકુરુ કૃપાગુરુભિઃ કટાક્ષૈ-
રિત્યાદિ તેન મુદિતેન ચિરં નુતોઽભૂઃ ॥6॥
માત્રા ચ નેત્રસલિલાસ્તૃતગાત્રવલ્યા
સ્તોત્રૈરભિષ્ટુતગુણઃ કરુણાલયસ્ત્વમ્ ।
પ્રાચીનજન્મયુગલં પ્રતિબોધ્ય તાભ્યાં
માતુર્ગિરા દધિથ માનુષબાલવેષમ્ ॥7॥
ત્વત્પ્રેરિતસ્તદનુ નંદતનૂજયા તે
વ્યત્યાસમારચયિતું સ હિ શૂરસૂનુઃ ।
ત્વાં હસ્તયોરધૃત ચિત્તવિધાર્યમાર્યૈ-
રંભોરુહસ્થકલહંસકિશોરરમ્યમ્ ॥8॥
જાતા તદા પશુપસદ્મનિ યોગનિદ્રા ।
નિદ્રાવિમુદ્રિતમથાકૃત પૌરલોકમ્ ।
ત્વત્પ્રેરણાત્ કિમિવ ચિત્રમચેતનૈર્યદ્-
દ્વારૈઃ સ્વયં વ્યઘટિ સંઘટિતૈઃ સુગાઢમ્ ॥9॥
શેષેણ ભૂરિફણવારિતવારિણાઽથ
સ્વૈરં પ્રદર્શિતપથો મણિદીપિતેન ।
ત્વાં ધારયન્ સ ખલુ ધન્યતમઃ પ્રતસ્થે
સોઽયં ત્વમીશ મમ નાશય રોગવેગાન્ ॥10॥