તદનુ નંદમમંદશુભાસ્પદં નૃપપુરીં કરદાનકૃતે ગતમ્।
સમવલોક્ય જગાદ ભવત્પિતા વિદિતકંસસહાયજનોદ્યમઃ ॥1॥
અયિ સખે તવ બાલકજન્મ માં સુખયતેઽદ્ય નિજાત્મજજન્મવત્ ।
ઇતિ ભવત્પિતૃતાં વ્રજનાયકે સમધિરોપ્ય શશંસ તમાદરાત્ ॥2॥
ઇહ ચ સંત્યનિમિત્તશતાનિ તે કટકસીમ્નિ તતો લઘુ ગમ્યતામ્ ।
ઇતિ ચ તદ્વચસા વ્રજનાયકો ભવદપાયભિયા દ્રુતમાયયૌ ॥3॥
અવસરે ખલુ તત્ર ચ કાચન વ્રજપદે મધુરાકૃતિરંગના ।
તરલષટ્પદલાલિતકુંતલા કપટપોતક તે નિકટં ગતા ॥4॥
સપદિ સા હૃતબાલકચેતના નિશિચરાન્વયજા કિલ પૂતના ।
વ્રજવધૂષ્વિહ કેયમિતિ ક્ષણં વિમૃશતીષુ ભવંતમુપાદદે ॥5॥
લલિતભાવવિલાસહૃતાત્મભિર્યુવતિભિઃ પ્રતિરોદ્ધુમપારિતા ।
સ્તનમસૌ ભવનાંતનિષેદુષી પ્રદદુષી ભવતે કપટાત્મને ॥5॥
સમધિરુહ્ય તદંકમશંકિતસ્ત્વમથ બાલકલોપનરોષિતઃ ।
મહદિવામ્રફલં કુચમંડલં પ્રતિચુચૂષિથ દુર્વિષદૂષિતમ્ ॥7॥
અસુભિરેવ સમં ધયતિ ત્વયિ સ્તનમસૌ સ્તનિતોપમનિસ્વના ।
નિરપતદ્ભયદાયિ નિજં વપુઃ પ્રતિગતા પ્રવિસાર્ય ભુજાવુભૌ ॥8॥
ભયદઘોષણભીષણવિગ્રહશ્રવણદર્શનમોહિતવલ્લવે ।
વ્રજપદે તદુરઃસ્થલખેલનં નનુ ભવંતમગૃહ્ણત ગોપિકાઃ ॥9॥
ભુવનમંગલનામભિરેવ તે યુવતિભિર્બહુધા કૃતરક્ષણઃ ।
ત્વમયિ વાતનિકેતનનાથ મામગદયન્ કુરુ તાવકસેવકમ્ ॥10॥