કદાપિ જન્મર્ક્ષદિને તવ પ્રભો નિમંત્રિતજ્ઞાતિવધૂમહીસુરા ।
મહાનસસ્ત્વાં સવિધે નિધાય સા મહાનસાદૌ વવૃતે વ્રજેશ્વરી ॥1॥
તતો ભવત્ત્રાણનિયુક્તબાલકપ્રભીતિસંક્રંદનસંકુલારવૈઃ ।
વિમિશ્રમશ્રાવિ ભવત્સમીપતઃ પરિસ્ફુટદ્દારુચટચ્ચટારવઃ ॥2॥
તતસ્તદાકર્ણનસંભ્રમશ્રમપ્રકંપિવક્ષોજભરા વ્રજાંગનાઃ ।
ભવંતમંતર્દદૃશુસ્સમંતતો વિનિષ્પતદ્દારુણદારુમધ્યગમ્ ॥3॥
શિશોરહો કિં કિમભૂદિતિ દ્રુતં પ્રધાવ્ય નંદઃ પશુપાશ્ચ ભૂસુરાઃ ।
ભવંતમાલોક્ય યશોદયા ધૃતં સમાશ્વસન્નશ્રુજલાર્દ્રલોચનાઃ ॥4॥
કસ્કો નુ કૌતસ્કુત એષ વિસ્મયો વિશંકટં યચ્છકટં વિપાટિતમ્ ।
ન કારણં કિંચિદિહેતિ તે સ્થિતાઃ સ્વનાસિકાદત્તકરાસ્ત્વદીક્ષકાઃ ॥5॥
કુમારકસ્યાસ્ય પયોધરાર્થિનઃ પ્રરોદને લોલપદાંબુજાહતમ્ ।
મયા મયા દૃષ્ટમનો વિપર્યગાદિતીશ તે પાલકબાલકા જગુઃ ॥6॥
ભિયા તદા કિંચિદજાનતામિદં કુમારકાણામતિદુર્ઘટં વચઃ ।
ભવત્પ્રભાવાવિદુરૈરિતીરિતં મનાગિવાશંક્યત દૃષ્ટપૂતનૈઃ ॥7॥
પ્રવાલતામ્રં કિમિદં પદં ક્ષતં સરોજરમ્યૌ નુ કરૌ વિરોજિતૌ।
ઇતિ પ્રસર્પત્કરુણાતરંગિતાસ્ત્વદંગમાપસ્પૃશુરંગનાજનાઃ ॥8॥
અયે સુતં દેહિ જગત્પતેઃ કૃપાતરંગપાતાત્પરિપાતમદ્ય મે ।
ઇતિ સ્મ સંગૃહ્ય પિતા ત્વદંગકં મુહુર્મુહુઃ શ્લિષ્યતિ જાતકંટકઃ ॥9॥
અનોનિલીનઃ કિલ હંતુમાગતઃ સુરારિરેવં ભવતા વિહિંસિતઃ ।
રજોઽપિ નો દૃષ્ટમમુષ્ય તત્કથં સ શુદ્ધસત્ત્વે ત્વયિ લીનવાન્ ધ્રુવમ્ ॥10॥
પ્રપૂજિતૈસ્તત્ર તતો દ્વિજાતિભિર્વિશેષતો લંભિતમંગલાશિષઃ ।
વ્રજં નિજૈર્બાલ્યરસૈર્વિમોહયન્ મરુત્પુરાધીશ રુજાં જહીહિ મે ॥11॥