તરલમધુકૃત્ વૃંદે વૃંદાવનેઽથ મનોહરે
પશુપશિશુભિઃ સાકં વત્સાનુપાલનલોલુપઃ ।
હલધરસખો દેવ શ્રીમન્ વિચેરિથ ધારયન્
ગવલમુરલીવેત્રં નેત્રાભિરામતનુદ્યુતિઃ ॥1॥
વિહિતજગતીરક્ષં લક્ષ્મીકરાંબુજલાલિતં
દદતિ ચરણદ્વંદ્વં વૃંદાવને ત્વયિ પાવને ।
કિમિવ ન બભૌ સંપત્સંપૂરિતં તરુવલ્લરી-
સલિલધરણીગોત્રક્ષેત્રાદિકં કમલાપતે ॥2॥
વિલસદુલપે કાંતારાંતે સમીરણશીતલે
વિપુલયમુનાતીરે ગોવર્ધનાચલમૂર્ધસુ ।
લલિતમુરલીનાદઃ સંચારયન્ ખલુ વાત્સકં
ક્વચન દિવસે દૈત્યં વત્સાકૃતિં ત્વમુદૈક્ષથાઃ ॥3॥
રભસવિલસત્પુચ્છં વિચ્છાયતોઽસ્ય વિલોકયન્
કિમપિ વલિતસ્કંધં રંધ્રપ્રતીક્ષમુદીક્ષિતમ્ ।
તમથ ચરણે બિભ્રદ્વિભ્રામયન્ મુહુરુચ્ચકૈઃ
કુહચન મહાવૃક્ષે ચિક્ષેપિથ ક્ષતજીવિતમ્ ॥4॥
નિપતતિ મહાદૈત્યે જાત્યા દુરાત્મનિ તત્ક્ષણં
નિપતનજવક્ષુણ્ણક્ષોણીરુહક્ષતકાનને ।
દિવિ પરિમિલત્ વૃંદા વૃંદારકાઃ કુસુમોત્કરૈઃ
શિરસિ ભવતો હર્ષાદ્વર્ષંતિ નામ તદા હરે ॥5॥
સુરભિલતમા મૂર્ધન્યૂર્ધ્વં કુતઃ કુસુમાવલી
નિપતતિ તવેત્યુક્તો બાલૈઃ સહેલમુદૈરયઃ ।
ઝટિતિ દનુજક્ષેપેણોર્ધ્વં ગતસ્તરુમંડલાત્
કુસુમનિકરઃ સોઽયં નૂનં સમેતિ શનૈરિતિ ॥6॥
ક્વચન દિવસે ભૂયો ભૂયસ્તરે પરુષાતપે
તપનતનયાપાથઃ પાતું ગતા ભવદાદયઃ ।
ચલિતગરુતં પ્રેક્ષામાસુર્બકં ખલુ વિસ્મ્રૃતં
ક્ષિતિધરગરુચ્છેદે કૈલાસશૈલમિવાપરમ્ ॥7॥
પિબતિ સલિલં ગોપવ્રાતે ભવંતમભિદ્રુતઃ
સ કિલ નિગિલન્નગ્નિપ્રખ્યં પુનર્દ્રુતમુદ્વમન્ ।
દલયિતુમગાત્ત્રોટ્યાઃ કોટ્યા તદાઽઽશુ ભવાન્ વિભો
ખલજનભિદાચુંચુશ્ચંચૂ પ્રગૃહ્ય દદાર તમ્ ॥8॥
સપદિ સહજાં સંદ્રષ્ટું વા મૃતાં ખલુ પૂતના-
મનુજમઘમપ્યગ્રે ગત્વા પ્રતીક્ષિતુમેવ વા ।
શમનનિલયં યાતે તસ્મિન્ બકે સુમનોગણે
કિરતિ સુમનોવૃંદં વૃંદાવનાત્ ગૃહમૈયથાઃ ॥9॥
લલિતમુરલીનાદં દૂરાન્નિશમ્ય વધૂજનૈ-
સ્ત્વરિતમુપગમ્યારાદારૂઢમોદમુદીક્ષિતઃ ।
જનિતજનનીનંદાનંદઃ સમીરણમંદિર-
પ્રથિતવસતે શૌરે દૂરીકુરુષ્વ મમામયાન્ ॥10॥