કદાચન વ્રજશિશુભિઃ સમં ભવાન્
વનાશને વિહિતમતિઃ પ્રગેતરામ્ ।
સમાવૃતો બહુતરવત્સમંડલૈઃ
સતેમનૈર્નિરગમદીશ જેમનૈઃ ॥1॥
વિનિર્યતસ્તવ ચરણાંબુજદ્વયા-
દુદંચિતં ત્રિભુવનપાવનં રજઃ ।
મહર્ષયઃ પુલકધરૈઃ કલેબરૈ-
રુદૂહિરે ધૃતભવદીક્ષણોત્સવાઃ ॥2॥
પ્રચારયત્યવિરલશાદ્વલે તલે
પશૂન્ વિભો ભવતિ સમં કુમારકૈઃ ।
અઘાસુરો ન્યરુણદઘાય વર્તની
ભયાનકઃ સપદિ શયાનકાકૃતિઃ ॥3॥
મહાચલપ્રતિમતનોર્ગુહાનિભ-
પ્રસારિતપ્રથિતમુખસ્ય કાનને ।
મુખોદરં વિહરણકૌતુકાદ્ગતાઃ
કુમારકાઃ કિમપિ વિદૂરગે ત્વયિ ॥4॥
પ્રમાદતઃ પ્રવિશતિ પન્નગોદરં
ક્વથત્તનૌ પશુપકુલે સવાત્સકે ।
વિદન્નિદં ત્વમપિ વિવેશિથ પ્રભો
સુહૃજ્જનં વિશરણમાશુ રક્ષિતુમ્ ॥5॥
ગલોદરે વિપુલિતવર્ષ્મણા ત્વયા
મહોરગે લુઠતિ નિરુદ્ધમારુતે ।
દ્રુતં ભવાન્ વિદલિતકંઠમંડલો
વિમોચયન્ પશુપપશૂન્ વિનિર્યયૌ ॥6॥
ક્ષણં દિવિ ત્વદુપગમાર્થમાસ્થિતં
મહાસુરપ્રભવમહો મહો મહત્ ।
વિનિર્ગતે ત્વયિ તુ નિલીનમંજસા
નભઃસ્થલે નનૃતુરથો જગુઃ સુરાઃ ॥7॥
સવિસ્મયૈઃ કમલભવાદિભિઃ સુરૈ-
રનુદ્રુતસ્તદનુ ગતઃ કુમારકૈઃ ।
દિને પુનસ્તરુણદશામુપેયુષિ
સ્વકૈર્ભવાનતનુત ભોજનોત્સવમ્ ॥8॥
વિષાણિકામપિ મુરલીં નિતંબકે
નિવેશયન્ કબલધરઃ કરાંબુજે ।
પ્રહાસયન્ કલવચનૈઃ કુમારકાન્
બુભોજિથ ત્રિદશગણૈર્મુદા નુતઃ ॥9॥
સુખાશનં ત્વિહ તવ ગોપમંડલે
મખાશનાત્ પ્રિયમિવ દેવમંડલે ।
ઇતિ સ્તુતસ્ત્રિદશવરૈર્જગત્પતે
મરુત્પુરીનિલય ગદાત્ પ્રપાહિ મામ્ ॥10॥