અન્યાવતારનિકરેષ્વનિરીક્ષિતં તે
ભૂમાતિરેકમભિવીક્ષ્ય તદાઘમોક્ષે ।
બ્રહ્મા પરીક્ષિતુમનાઃ સ પરોક્ષભાવં
નિન્યેઽથ વત્સકગણાન્ પ્રવિતત્ય માયામ્ ॥1॥
વત્સાનવીક્ષ્ય વિવશે પશુપોત્કરે તા-
નાનેતુકામ ઇવ ધાતૃમતાનુવર્તી ।
ત્વં સામિભુક્તકબલો ગતવાંસ્તદાનીં
ભુક્તાંસ્તિરોઽધિત સરોજભવઃ કુમારાન્ ॥2॥
વત્સાયિતસ્તદનુ ગોપગણાયિતસ્ત્વં
શિક્યાદિભાંડમુરલીગવલાદિરૂપઃ ।
પ્રાગ્વદ્વિહૃત્ય વિપિનેષુ ચિરાય સાયં
ત્વં માયયાઽથ બહુધા વ્રજમાયયાથ ॥3॥
ત્વામેવ શિક્યગવલાદિમયં દધાનો
ભૂયસ્ત્વમેવ પશુવત્સકબાલરૂપઃ ।
ગોરૂપિણીભિરપિ ગોપવધૂમયીભિ-
રાસાદિતોઽસિ જનનીભિરતિપ્રહર્ષાત્ ॥4॥
જીવં હિ કંચિદભિમાનવશાત્સ્વકીયં
મત્વા તનૂજ ઇતિ રાગભરં વહંત્યઃ ।
આત્માનમેવ તુ ભવંતમવાપ્ય સૂનું
પ્રીતિં યયુર્ન કિયતીં વનિતાશ્ચ ગાવઃ ॥5॥
એવં પ્રતિક્ષણવિજૃંભિતહર્ષભાર-
નિશ્શેષગોપગણલાલિતભૂરિમૂર્તિમ્ ।
ત્વામગ્રજોઽપિ બુબુધે કિલ વત્સરાંતે
બ્રહ્માત્મનોરપિ મહાન્ યુવયોર્વિશેષઃ ॥6॥
વર્ષાવધૌ નવપુરાતનવત્સપાલાન્
દૃષ્ટ્વા વિવેકમસૃણે દ્રુહિણે વિમૂઢે ।
પ્રાદીદૃશઃ પ્રતિનવાન્ મકુટાંગદાદિ
ભૂષાંશ્ચતુર્ભુજયુજઃ સજલાંબુદાભાન્ ॥7॥
પ્રત્યેકમેવ કમલાપરિલાલિતાંગાન્
ભોગીંદ્રભોગશયનાન્ નયનાભિરામાન્ ।
લીલાનિમીલિતદૃશઃ સનકાદિયોગિ-
વ્યાસેવિતાન્ કમલભૂર્ભવતો દદર્શ ॥8॥
નારાયણાકૃતિમસંખ્યતમાં નિરીક્ષ્ય
સર્વત્ર સેવકમપિ સ્વમવેક્ષ્ય ધાતા ।
માયાનિમગ્નહૃદયો વિમુમોહ યાવ-
દેકો બભૂવિથ તદા કબલાર્ધપાણિઃ ॥9॥
નશ્યન્મદે તદનુ વિશ્વપતિં મુહુસ્ત્વાં
નત્વા ચ નૂતવતિ ધાતરિ ધામ યાતે ।
પોતૈઃ સમં પ્રમુદિતૈઃ પ્રવિશન્ નિકેતં
વાતાલયાધિપ વિભો પરિપાહિ રોગાત્ ॥10॥