અથ વારિણિ ઘોરતરં ફણિનં
પ્રતિવારયિતું કૃતધીર્ભગવન્ ।
દ્રુતમારિથ તીરગનીપતરું
વિષમારુતશોષિતપર્ણચયમ્ ॥1॥
અધિરુહ્ય પદાંબુરુહેણ ચ તં
નવપલ્લવતુલ્યમનોજ્ઞરુચા ।
હ્રદવારિણિ દૂરતરં ન્યપતઃ
પરિઘૂર્ણિતઘોરતરંગ્ગણે ॥2॥
ભુવનત્રયભારભૃતો ભવતો
ગુરુભારવિકંપિવિજૃંભિજલા ।
પરિમજ્જયતિ સ્મ ધનુશ્શતકં
તટિની ઝટિતિ સ્ફુટઘોષવતી ॥3॥
અથ દિક્ષુ વિદિક્ષુ પરિક્ષુભિત-
ભ્રમિતોદરવારિનિનાદભરૈઃ ।
ઉદકાદુદગાદુરગાધિપતિ-
સ્ત્વદુપાંતમશાંતરુષાઽંધમનાઃ ॥4॥
ફણશૃંગસહસ્રવિનિસ્સૃમર-
જ્વલદગ્નિકણોગ્રવિષાંબુધરમ્ ।
પુરતઃ ફણિનં સમલોકયથા
બહુશૃંગિણમંજનશૈલમિવ ॥5॥
જ્વલદક્ષિ પરિક્ષરદુગ્રવિષ-
શ્વસનોષ્મભરઃ સ મહાભુજગઃ ।
પરિદશ્ય ભવંતમનંતબલં
સમવેષ્ટયદસ્ફુટચેષ્ટમહો ॥6॥
અવિલોક્ય ભવંતમથાકુલિતે
તટગામિનિ બાલકધેનુગણે ।
વ્રજગેહતલેઽપ્યનિમિત્તશતં
સમુદીક્ષ્ય ગતા યમુનાં પશુપાઃ ॥7॥
અખિલેષુ વિભો ભવદીય દશા-
મવલોક્ય જિહાસુષુ જીવભરમ્ ।
ફણિબંધનમાશુ વિમુચ્ય જવા-
દુદગમ્યત હાસજુષા ભવતા ॥8॥
અધિરુહ્ય તતઃ ફણિરાજફણાન્
નનૃતે ભવતા મૃદુપાદરુચા ।
કલશિંજિતનૂપુરમંજુમિલ-
ત્કરકંકણસંકુલસંક્વણિતમ્ ॥9॥
જહૃષુઃ પશુપાસ્તુતુષુર્મુનયો
વવૃષુઃ કુસુમાનિ સુરેંદ્રગણાઃ ।
ત્વયિ નૃત્યતિ મારુતગેહપતે
પરિપાહિ સ માં ત્વમદાંતગદાત્ ॥10॥