રુચિરકંપિતકુંડલમંડલઃ સુચિરમીશ નનર્તિથ પન્નગે ।
અમરતાડિતદુંદુભિસુંદરં વિયતિ ગાયતિ દૈવતયૌવતે ॥1॥
નમતિ યદ્યદમુષ્ય શિરો હરે પરિવિહાય તદુન્નતમુન્નતમ્ ।
પરિમથન્ પદપંકરુહા ચિરં વ્યહરથાઃ કરતાલમનોહરમ્ ॥2॥
ત્વદવભગ્નવિભુગ્નફણાગણે ગલિતશોણિતશોણિતપાથસિ ।
ફણિપતાવવસીદતિ સન્નતાસ્તદબલાસ્તવ માધવ પાદયોઃ ॥3॥
અયિ પુરૈવ ચિરાય પરિશ્રુતત્વદનુભાવવિલીનહૃદો હિ તાઃ ।
મુનિભિરપ્યનવાપ્યપથૈઃ સ્તવૈર્નુનુવુરીશ ભવંતમયંત્રિતમ્ ॥4॥
ફણિવધૂગણભક્તિવિલોકનપ્રવિકસત્કરુણાકુલચેતસા ।
ફણિપતિર્ભવતાઽચ્યુત જીવિતસ્ત્વયિ સમર્પિતમૂર્તિરવાનમત્ ॥5॥
રમણકં વ્રજ વારિધિમધ્યગં ફણિરિપુર્ન કરોતિ વિરોધિતામ્ ।
ઇતિ ભવદ્વચનાન્યતિમાનયન્ ફણિપતિર્નિરગાદુરગૈઃ સમમ્ ॥6॥
ફણિવધૂજનદત્તમણિવ્રજજ્વલિતહારદુકૂલવિભૂષિતઃ ।
તટગતૈઃ પ્રમદાશ્રુવિમિશ્રિતૈઃ સમગથાઃ સ્વજનૈર્દિવસાવધૌ ॥7॥
નિશિ પુનસ્તમસા વ્રજમંદિરં વ્રજિતુમક્ષમ એવ જનોત્કરે ।
સ્વપતિ તત્ર ભવચ્ચરણાશ્રયે દવકૃશાનુરરુંધ સમંતતઃ ॥8॥
પ્રબુધિતાનથ પાલય પાલયેત્યુદયદાર્તરવાન્ પશુપાલકાન્ ।
અવિતુમાશુ પપાથ મહાનલં કિમિહ ચિત્રમયં ખલુ તે મુખમ્ ॥9॥
શિખિનિ વર્ણત એવ હિ પીતતા પરિલસત્યધુના ક્રિયયાઽપ્યસૌ ।
ઇતિ નુતઃ પશુપૈર્મુદિતૈર્વિભો હર હરે દુરિતૈઃસહ મે ગદાન્ ॥10॥