મદનાતુરચેતસોઽન્વહં ભવદંઘ્રિદ્વયદાસ્યકામ્યયા ।
યમુનાતટસીમ્નિ સૈકતીં તરલાક્ષ્યો ગિરિજાં સમાર્ચિચન્ ॥1॥
તવ નામકથારતાઃ સમં સુદૃશઃ પ્રાતરુપાગતા નદીમ્ ।
ઉપહારશતૈરપૂજયન્ દયિતો નંદસુતો ભવેદિતિ ॥2॥
ઇતિ માસમુપાહિતવ્રતાસ્તરલાક્ષીરભિવીક્ષ્ય તા ભવાન્ ।
કરુણામૃદુલો નદીતટં સમયાસીત્તદનુગ્રહેચ્છયા ॥3॥
નિયમાવસિતૌ નિજાંબરં તટસીમન્યવમુચ્ય તાસ્તદા ।
યમુનાજલખેલનાકુલાઃ પુરતસ્ત્વામવલોક્ય લજ્જિતાઃ ॥4॥
ત્રપયા નમિતાનનાસ્વથો વનિતાસ્વંબરજાલમંતિકે ।
નિહિતં પરિગૃહ્ય ભૂરુહો વિટપં ત્વં તરસાઽધિરૂઢવાન્ ॥5॥
ઇહ તાવદુપેત્ય નીયતાં વસનં વઃ સુદૃશો યથાયથમ્ ।
ઇતિ નર્મમૃદુસ્મિતે ત્વયિ બ્રુવતિ વ્યામુમુહે વધૂજનૈઃ ॥6॥
અયિ જીવ ચિરં કિશોર નસ્તવ દાસીરવશીકરોષિ કિમ્ ।
પ્રદિશાંબરમંબુજેક્ષણેત્યુદિતસ્ત્વં સ્મિતમેવ દત્તવાન્ ॥7॥
અધિરુહ્ય તટં કૃતાંજલીઃ પરિશુદ્ધાઃ સ્વગતીર્નિરીક્ષ્ય તાઃ ।
વસનાન્યખિલાન્યનુગ્રહં પુનરેવં ગિરમપ્યદા મુદા ॥8॥
વિદિતં નનુ વો મનીષિતં વદિતારસ્ત્વિહ યોગ્યમુત્તરમ્ ।
યમુનાપુલિને સચંદ્રિકાઃ ક્ષણદા ઇત્યબલાસ્ત્વમૂચિવાન્ ॥9॥
ઉપકર્ણ્ય ભવન્મુખચ્યુતં મધુનિષ્યંદિ વચો મૃગીદૃશઃ ।
પ્રણયાદયિ વીક્ષ્ય વીક્ષ્ય તે વદનાબ્જં શનકૈર્ગૃહં ગતાઃ ॥10॥
ઇતિ નન્વનુગૃહ્ય વલ્લવીર્વિપિનાંતેષુ પુરેવ સંચરન્ ।
કરુણાશિશિરો હરે હર ત્વરયા મે સકલામયાવલિમ્ ॥11॥