દદૃશિરે કિલ તત્ક્ષણમક્ષત-
સ્તનિતજૃંભિતકંપિતદિક્તટાઃ ।
સુષમયા ભવદંગતુલાં ગતા
વ્રજપદોપરિ વારિધરાસ્ત્વયા ॥1॥
વિપુલકરકમિશ્રૈસ્તોયધારાનિપાતૈ-
ર્દિશિદિશિ પશુપાનાં મંડલે દંડ્યમાને ।
કુપિતહરિકૃતાન્નઃ પાહિ પાહીતિ તેષાં
વચનમજિત શ્રૃણ્વન્ મા બિભીતેત્યભાણીઃ ॥2॥
કુલ ઇહ ખલુ ગોત્રો દૈવતં ગોત્રશત્રો-
ર્વિહતિમિહ સ રુંધ્યાત્ કો નુ વઃ સંશયોઽસ્મિન્ ।
ઇતિ સહસિતવાદી દેવ ગોવર્દ્ધનાદ્રિં
ત્વરિતમુદમુમૂલો મૂલતો બાલદોર્ભ્યામ્ ॥3॥
તદનુ ગિરિવરસ્ય પ્રોદ્ધૃતસ્યાસ્ય તાવત્
સિકતિલમૃદુદેશે દૂરતો વારિતાપે ।
પરિકરપરિમિશ્રાન્ ધેનુગોપાનધસ્તા-
દુપનિદધદધત્થા હસ્તપદ્મેન શૈલમ્ ॥4॥
ભવતિ વિધૃતશૈલે બાલિકાભિર્વયસ્યૈ-
રપિ વિહિતવિલાસં કેલિલાપાદિલોલે ।
સવિધમિલિતધેનૂરેકહસ્તેન કંડૂ-
યતિ સતિ પશુપાલાસ્તોષમૈષંત સર્વે ॥5॥
અતિમહાન્ ગિરિરેષ તુ વામકે
કરસરોરુહિ તં ધરતે ચિરમ્ ।
કિમિદમદ્ભુતમદ્રિબલં ન્વિતિ
ત્વદવલોકિભિરાકથિ ગોપકૈઃ ॥6॥
અહહ ધાર્ષ્ટ્યમમુષ્ય વટોર્ગિરિં
વ્યથિતબાહુરસાવવરોપયેત્ ।
ઇતિ હરિસ્ત્વયિ બદ્ધવિગર્હણો
દિવસસપ્તકમુગ્રમવર્ષયત્ ॥7॥
અચલતિ ત્વયિ દેવ પદાત્ પદં
ગલિતસર્વજલે ચ ઘનોત્કરે ।
અપહૃતે મરુતા મરુતાં પતિ-
સ્ત્વદભિશંકિતધીઃ સમુપાદ્રવત્ ॥8॥
શમમુપેયુષિ વર્ષભરે તદા
પશુપધેનુકુલે ચ વિનિર્ગતે ।
ભુવિ વિભો સમુપાહિતભૂધરઃ
પ્રમુદિતૈઃ પશુપૈઃ પરિરેભિષે ॥9॥
ધરણિમેવ પુરા ધૃતવાનસિ
ક્ષિતિધરોદ્ધરણે તવ કઃ શ્રમઃ ।
ઇતિ નુતસ્ત્રિદશૈઃ કમલાપતે
ગુરુપુરાલય પાલય માં ગદાત્ ॥10॥