આલોક્ય શૈલોદ્ધરણાદિરૂપં પ્રભાવમુચ્ચૈસ્તવ ગોપલોકાઃ ।
વિશ્વેશ્વરં ત્વામભિમત્ય વિશ્વે નંદં ભવજ્જાતકમન્વપૃચ્છન્ ॥1॥
ગર્ગોદિતો નિર્ગદિતો નિજાય વર્ગાય તાતેન તવ પ્રભાવઃ ।
પૂર્વાધિકસ્ત્વય્યનુરાગ એષામૈધિષ્ટ તાવત્ બહુમાનભારઃ ॥2॥
તતોઽવમાનોદિતતત્ત્વબોધઃ સુરાધિરાજઃ સહ દિવ્યગવ્યા।
ઉપેત્ય તુષ્ટાવ સ નષ્ટગર્વઃ સ્પૃષ્ટ્વા પદાબ્જં મણિમૌલિના તે ॥3॥
સ્નેહસ્નુતૈસ્ત્વાં સુરભિઃ પયોભિર્ગોવિંદનામાંકિતમભ્યષિંચત્ ।
ઐરાવતોપાહૃતદિવ્યગંગાપાથોભિરિંદ્રોઽપિ ચ જાતહર્ષઃ ॥4॥
જગત્ત્રયેશે ત્વયિ ગોકુલેશે તથાઽભિષિક્તે સતિ ગોપવાટઃ ।
નાકેઽપિ વૈકુંઠપદેઽપ્યલભ્યાં શ્રિયં પ્રપેદે ભવતઃ પ્રભાવાત્ ॥5॥
કદાચિદંતર્યમુનં પ્રભાતે સ્નાયન્ પિતા વારુણપૂરુષેણ ।
નીતસ્તમાનેતુમગાઃ પુરીં ત્વં તાં વારુણીં કારણમર્ત્યરૂપઃ ॥6॥
સસંભ્રમં તેન જલાધિપેન પ્રપૂજિતસ્ત્વં પ્રતિગૃહ્ય તાતમ્ ।
ઉપાગતસ્તત્ક્ષણમાત્મગેહં પિતાઽવદત્તચ્ચરિતં નિજેભ્યઃ ॥7॥
હરિં વિનિશ્ચિત્ય ભવંતમેતાન્ ભવત્પદાલોકનબદ્ધતૃષ્ણાન્ ॥
નિરીક્ષ્ય વિષ્ણો પરમં પદં તદ્દુરાપમન્યૈસ્ત્વમદીદૃશસ્તાન્ ॥8॥
સ્ફુરત્પરાનંદરસપ્રવાહપ્રપૂર્ણકૈવલ્યમહાપયોધૌ ।
ચિરં નિમગ્નાઃ ખલુ ગોપસંઘાસ્ત્વયૈવ ભૂમન્ પુનરુદ્ધૃતાસ્તે ॥9॥
કરબદરવદેવં દેવ કુત્રાવતારે
નિજપદમનવાપ્યં દર્શિતં ભક્તિભાજામ્ ।
તદિહ પશુપરૂપી ત્વં હિ સાક્ષાત્ પરાત્મા
પવનપુરનિવાસિન્ પાહિ મામામયેભ્યઃ ॥10॥