ગોપીજનાય કથિતં નિયમાવસાને
મારોત્સવં ત્વમથ સાધયિતું પ્રવૃત્તઃ ।
સાંદ્રેણ ચાંદ્રમહસા શિશિરીકૃતાશે
પ્રાપૂરયો મુરલિકાં યમુનાવનાંતે ॥1॥

સમ્મૂર્છનાભિરુદિતસ્વરમંડલાભિઃ
સમ્મૂર્છયંતમખિલં ભુવનાંતરાલમ્ ।
ત્વદ્વેણુનાદમુપકર્ણ્ય વિભો તરુણ્ય-
સ્તત્તાદૃશં કમપિ ચિત્તવિમોહમાપુઃ ॥2॥

તા ગેહકૃત્યનિરતાસ્તનયપ્રસક્તાઃ
કાંતોપસેવનપરાશ્ચ સરોરુહાક્ષ્યઃ ।
સર્વં વિસૃજ્ય મુરલીરવમોહિતાસ્તે
કાંતારદેશમયિ કાંતતનો સમેતાઃ ॥3॥

કાશ્ચિન્નિજાંગપરિભૂષણમાદધાના
વેણુપ્રણાદમુપકર્ણ્ય કૃતાર્ધભૂષાઃ ।
ત્વામાગતા નનુ તથૈવ વિભૂષિતાભ્ય-
સ્તા એવ સંરુરુચિરે તવ લોચનાય ॥4॥

હારં નિતંબભુવિ કાચન ધારયંતી
કાંચીં ચ કંઠભુવિ દેવ સમાગતા ત્વામ્ ।
હારિત્વમાત્મજઘનસ્ય મુકુંદ તુભ્યં
વ્યક્તં બભાષ ઇવ મુગ્ધમુખી વિશેષાત્ ॥5॥

કાચિત્ કુચે પુનરસજ્જિતકંચુલીકા
વ્યામોહતઃ પરવધૂભિરલક્ષ્યમાણા ।
ત્વામાયયૌ નિરુપમપ્રણયાતિભાર-
રાજ્યાભિષેકવિધયે કલશીધરેવ ॥6॥

કાશ્ચિત્ ગૃહાત્ કિલ નિરેતુમપારયંત્ય-
સ્ત્વામેવ દેવ હૃદયે સુદૃઢં વિભાવ્ય ।
દેહં વિધૂય પરચિત્સુખરૂપમેકં
ત્વામાવિશન્ પરમિમા નનુ ધન્યધન્યાઃ ॥7॥

જારાત્મના ન પરમાત્મતયા સ્મરંત્યો
નાર્યો ગતાઃ પરમહંસગતિં ક્ષણેન ।
તં ત્વાં પ્રકાશપરમાત્મતનું કથંચિ-
ચ્ચિત્તે વહન્નમૃતમશ્રમમશ્નુવીય ॥8॥

અભ્યાગતાભિરભિતો વ્રજસુંદરીભિ-
ર્મુગ્ધસ્મિતાર્દ્રવદનઃ કરુણાવલોકી ।
નિસ્સીમકાંતિજલધિસ્ત્વમવેક્ષ્યમાણો
વિશ્વૈકહૃદ્ય હર મે પવનેશ રોગાન્ ॥9॥