સ્ફુરત્પરાનંદરસાત્મકેન ત્વયા સમાસાદિતભોગલીલાઃ ।
અસીમમાનંદભરં પ્રપન્ના મહાંતમાપુર્મદમંબુજાક્ષ્યઃ ॥1॥
નિલીયતેઽસૌ મયિ મય્યમાયં રમાપતિર્વિશ્વમનોભિરામઃ ।
ઇતિ સ્મ સર્વાઃ કલિતાભિમાના નિરીક્ષ્ય ગોવિંદ્ તિરોહિતોઽભૂઃ ॥2॥
રાધાભિધાં તાવદજાતગર્વામતિપ્રિયાં ગોપવધૂં મુરારે ।
ભવાનુપાદાય ગતો વિદૂરં તયા સહ સ્વૈરવિહારકારી ॥3॥
તિરોહિતેઽથ ત્વયિ જાતતાપાઃ સમં સમેતાઃ કમલાયતાક્ષ્યઃ ।
વને વને ત્વાં પરિમાર્ગયંત્યો વિષાદમાપુર્ભગવન્નપારમ્ ॥4॥
હા ચૂત હા ચંપક કર્ણિકાર હા મલ્લિકે માલતિ બાલવલ્યઃ ।
કિં વીક્ષિતો નો હૃદયૈકચોરઃ ઇત્યાદિ તાસ્ત્વત્પ્રવણા વિલેપુઃ ॥5॥
નિરીક્ષિતોઽયં સખિ પંકજાક્ષઃ પુરો મમેત્યાકુલમાલપંતી ।
ત્વાં ભાવનાચક્ષુષિ વીક્ષ્ય કાચિત્તાપં સખીનાં દ્વિગુણીચકાર ॥6॥
ત્વદાત્મિકાસ્તા યમુનાતટાંતે તવાનુચક્રુઃ કિલ ચેષ્ટિતાનિ ।
વિચિત્ય ભૂયોઽપિ તથૈવ માનાત્ત્વયા વિમુક્તાં દદૃશુશ્ચ રાધામ્ ॥7॥
તતઃ સમં તા વિપિને સમંતાત્તમોવતારાવધિ માર્ગયંત્યઃ ।
પુનર્વિમિશ્રા યમુનાતટાંતે ભૃશં વિલેપુશ્ચ જગુર્ગુણાંસ્તે ॥8॥
તથા વ્યથાસંકુલમાનસાનાં વ્રજાંગનાનાં કરુણૈકસિંધો ।
જગત્ત્રયીમોહનમોહનાત્મા ત્વં પ્રાદુરાસીરયિ મંદહાસી ॥9॥
સંદિગ્ધસંદર્શનમાત્મકાંતં ત્વાં વીક્ષ્ય તન્વ્યઃ સહસા તદાનીમ્ ।
કિં કિં ન ચક્રુઃ પ્રમદાતિભારાત્ સ ત્વં ગદાત્ પાલય મારુતેશ ॥10॥