તવ વિલોકનાદ્ગોપિકાજનાઃ પ્રમદસંકુલાઃ પંકજેક્ષણ ।
અમૃતધારયા સંપ્લુતા ઇવ સ્તિમિતતાં દધુસ્ત્વત્પુરોગતાઃ ॥1॥
તદનુ કાચન ત્વત્કરાંબુજં સપદિ ગૃહ્ણતી નિર્વિશંકિતમ્ ।
ઘનપયોધરે સન્નિધાય સા પુલકસંવૃતા તસ્થુષી ચિરમ્ ॥2॥
તવ વિભોઽપરા કોમલં ભુજં નિજગલાંતરે પર્યવેષ્ટયત્ ।
ગલસમુદ્ગતં પ્રાણમારુતં પ્રતિનિરુંધતીવાતિહર્ષુલા ॥3॥
અપગતત્રપા કાપિ કામિની તવ મુખાંબુજાત્ પૂગચર્વિતમ્ ।
પ્રતિગૃહય્ય તદ્વક્ત્રપંકજે નિદધતી ગતા પૂર્ણકામતામ્ ॥4॥
વિકરુણો વને સંવિહાય મામપગતોઽસિ કા ત્વામિહ સ્પૃશેત્ ।
ઇતિ સરોષયા તાવદેકયા સજલલોચનં વીક્ષિતો ભવાન્ ॥5॥
ઇતિ મુદાઽઽકુલૈર્વલ્લવીજનૈઃ સમમુપાગતો યામુને તટે ।
મૃદુકુચાંબરૈઃ કલ્પિતાસને ઘુસૃણભાસુરે પર્યશોભથાઃ ॥6॥
કતિવિધા કૃપા કેઽપિ સર્વતો ધૃતદયોદયાઃ કેચિદાશ્રિતે ।
કતિચિદીદૃશા માદૃશેષ્વપીત્યભિહિતો ભવાન્ વલ્લવીજનૈઃ ॥7॥
અયિ કુમારિકા નૈવ શંક્યતાં કઠિનતા મયિ પ્રેમકાતરે ।
મયિ તુ ચેતસો વોઽનુવૃત્તયે કૃતમિદં મયેત્યૂચિવાન્ ભવાન્ ॥8॥
અયિ નિશમ્યતાં જીવવલ્લભાઃ પ્રિયતમો જનો નેદૃશો મમ ।
તદિહ રમ્યતાં રમ્યયામિનીષ્વનુપરોધમિત્યાલપો વિભો ॥9॥
ઇતિ ગિરાધિકં મોદમેદુરૈર્વ્રજવધૂજનૈઃ સાકમારમન્ ।
કલિતકૌતુકો રાસખેલને ગુરુપુરીપતે પાહિ માં ગદાત્ ॥10॥