એવં દેવ ચતુર્દશાત્મકજગદ્રૂપેણ જાતઃ પુન-
સ્તસ્યોર્ધ્વં ખલુ સત્યલોકનિલયે જાતોઽસિ ધાતા સ્વયમ્ ।
યં શંસંતિ હિરણ્યગર્ભમખિલત્રૈલોક્યજીવાત્મકં
યોઽભૂત્ સ્ફીતરજોવિકારવિકસન્નાનાસિસૃક્ષારસઃ ॥1॥
સોઽયં વિશ્વવિસર્ગદત્તહૃદયઃ સંપશ્યમાનઃ સ્વયં
બોધં ખલ્વનવાપ્ય વિશ્વવિષયં ચિંતાકુલસ્તસ્થિવાન્ ।
તાવત્ત્વં જગતાં પતે તપ તપેત્યેવં હિ વૈહાયસીં
વાણીમેનમશિશ્રવઃ શ્રુતિસુખાં કુર્વંસ્તપઃપ્રેરણામ્ ॥2॥
કોઽસૌ મામવદત્ પુમાનિતિ જલાપૂર્ણે જગન્મંડલે
દિક્ષૂદ્વીક્ષ્ય કિમપ્યનીક્ષિતવતા વાક્યાર્થમુત્પશ્યતા ।
દિવ્યં વર્ષસહસ્રમાત્તતપસા તેન ત્વમારાધિત –
સ્તસ્મૈ દર્શિતવાનસિ સ્વનિલયં વૈકુંઠમેકાદ્ભુતમ્ ॥3॥
માયા યત્ર કદાપિ નો વિકુરુતે ભાતે જગદ્ભ્યો બહિઃ
શોકક્રોધવિમોહસાધ્વસમુખા ભાવાસ્તુ દૂરં ગતાઃ ।
સાંદ્રાનંદઝરી ચ યત્ર પરમજ્યોતિઃપ્રકાશાત્મકે
તત્તે ધામ વિભાવિતં વિજયતે વૈકુંઠરૂપં વિભો ॥4॥
યસ્મિન્નામ ચતુર્ભુજા હરિમણિશ્યામાવદાતત્વિષો
નાનાભૂષણરત્નદીપિતદિશો રાજદ્વિમાનાલયાઃ ।
ભક્તિપ્રાપ્તતથાવિધોન્નતપદા દીવ્યંતિ દિવ્યા જના-
તત્તે ધામ નિરસ્તસર્વશમલં વૈકુંઠરૂપં જયેત્ ॥5॥
નાનાદિવ્યવધૂજનૈરભિવૃતા વિદ્યુલ્લતાતુલ્યયા
વિશ્વોન્માદનહૃદ્યગાત્રલતયા વિદ્યોતિતાશાંતરા ।
ત્વત્પાદાંબુજસૌરભૈકકુતુકાલ્લક્ષ્મીઃ સ્વયં લક્ષ્યતે
યસ્મિન્ વિસ્મયનીયદિવ્યવિભવં તત્તે પદં દેહિ મે ॥6॥
તત્રૈવં પ્રતિદર્શિતે નિજપદે રત્નાસનાધ્યાસિતં
ભાસ્વત્કોટિલસત્કિરીટકટકાદ્યાકલ્પદીપ્રાકૃતિ ।
શ્રીવત્સાંકિતમાત્તકૌસ્તુભમણિચ્છાયારુણં કારણં
વિશ્વેષાં તવ રૂપમૈક્ષત વિધિસ્તત્તે વિભો ભાતુ મે ॥7॥
કાલાંભોદકલાયકોમલરુચીચક્રેણ ચક્રં દિશા –
માવૃણ્વાનમુદારમંદહસિતસ્યંદપ્રસન્નાનનમ્ ।
રાજત્કંબુગદારિપંકજધરશ્રીમદ્ભુજામંડલં
સ્રષ્ટુસ્તુષ્ટિકરં વપુસ્તવ વિભો મદ્રોગમુદ્વાસયેત્ ॥8॥
દૃષ્ટ્વા સંભૃતસંભ્રમઃ કમલભૂસ્ત્વત્પાદપાથોરુહે
હર્ષાવેશવશંવદો નિપતિતઃ પ્રીત્યા કૃતાર્થીભવન્ ।
જાનાસ્યેવ મનીષિતં મમ વિભો જ્ઞાનં તદાપાદય
દ્વૈતાદ્વૈતભવત્સ્વરૂપપરમિત્યાચષ્ટ તં ત્વાં ભજે ॥9॥
આતામ્રે ચરણે વિનમ્રમથ તં હસ્તેન હસ્તે સ્પૃશન્
બોધસ્તે ભવિતા ન સર્ગવિધિભિર્બંધોઽપિ સંજાયતે ।
ઇત્યાભાષ્ય ગિરં પ્રતોષ્ય નિતરાં તચ્ચિત્તગૂઢઃ સ્વયં
સૃષ્ટૌ તં સમુદૈરયઃ સ ભગવન્નુલ્લાસયોલ્લાઘતામ્ ॥10॥