યત્નેષુ સર્વેષ્વપિ નાવકેશી કેશી સ ભોજેશિતુરિષ્ટબંધુઃ ।
ત્વાં સિંધુજાવાપ્ય ઇતીવ મત્વા સંપ્રાપ્તવાન્ સિંધુજવાજિરૂપઃ ॥1॥
ગંધર્વતામેષ ગતોઽપિ રૂક્ષૈર્નાદૈઃ સમુદ્વેજિતસર્વલોકઃ ।
ભવદ્વિલોકાવધિ ગોપવાટીં પ્રમર્દ્ય પાપઃ પુનરાપતત્ત્વામ્ ॥2॥
તાર્ક્ષ્યાર્પિતાંઘ્રેસ્તવ તાર્ક્ષ્ય એષ ચિક્ષેપ વક્ષોભુવિ નામ પાદમ્ ।
ભૃગોઃ પદાઘાતકથાં નિશમ્ય સ્વેનાપિ શક્યં તદિતીવ મોહાત્ ॥3॥
પ્રવંચયન્નસ્ય ખુરાંચલં દ્રાગમુંચ ચિક્ષેપિથ દૂરદૂરમ્
સમ્મૂર્ચ્છિતોઽપિ હ્યતિમૂર્ચ્છિતેન ક્રોધોષ્મણા ખાદિતુમાદ્રુતસ્ત્વામ્ ॥4॥
ત્વં વાહદંડે કૃતધીશ્ચ વાહાદંડં ન્યધાસ્તસ્ય મુખે તદાનીમ્ ।
તદ્ વૃદ્ધિરુદ્ધશ્વસનો ગતાસુઃ સપ્તીભવન્નપ્યયમૈક્યમાગાત્ ॥5॥
આલંભમાત્રેણ પશોઃ સુરાણાં પ્રસાદકે નૂત્ન ઇવાશ્વમેધે ।
કૃતે ત્વયા હર્ષવશાત્ સુરેંદ્રાસ્ત્વાં તુષ્ટુવુઃ કેશવનામધેયમ્ ॥6॥
કંસાય તે શૌરિસુતત્વમુક્ત્વા તં તદ્વધોત્કં પ્રતિરુધ્ય વાચા।
પ્રાપ્તેન કેશિક્ષપણાવસાને શ્રીનારદેન ત્વમભિષ્ટુતોઽભૂઃ ॥7॥
કદાપિ ગોપૈઃ સહ કાનનાંતે નિલાયનક્રીડનલોલુપં ત્વામ્ ।
મયાત્મજઃ પ્રાપ દુરંતમાયો વ્યોમાભિધો વ્યોમચરોપરોધી ॥8॥
સ ચોરપાલાયિતવલ્લવેષુ ચોરાયિતો ગોપશિશૂન્ પશૂંશ્ચ
ગુહાસુ કૃત્વા પિદધે શિલાભિસ્ત્વયા ચ બુદ્ધ્વા પરિમર્દિતોઽભૂત્ ॥9॥
એવં વિધૈશ્ચાદ્ભુતકેલિભેદૈરાનંદમૂર્ચ્છામતુલાં વ્રજસ્ય ।
પદે પદે નૂતનયન્નસીમાં પરાત્મરૂપિન્ પવનેશ પાયાઃ ॥10॥