કંસોઽથ નારદગિરા વ્રજવાસિનં ત્વા-
માકર્ણ્ય દીર્ણહૃદયઃ સ હિ ગાંદિનેયમ્ ।
આહૂય કાર્મુકમખચ્છલતો ભવંત-
માનેતુમેનમહિનોદહિનાથશાયિન્ ॥1॥

અક્રૂર એષ ભવદંઘ્રિપરશ્ચિરાય
ત્વદ્દર્શનાક્ષમમનાઃ ક્ષિતિપાલભીત્યા ।
તસ્યાજ્ઞયૈવ પુનરીક્ષિતુમુદ્યતસ્ત્વા-
માનંદભારમતિભૂરિતરં બભાર ॥2॥

સોઽયં રથેન સુકૃતી ભવતો નિવાસં
ગચ્છન્ મનોરથગણાંસ્ત્વયિ ધાર્યમાણાન્ ।
આસ્વાદયન્ મુહુરપાયભયેન દૈવં
સંપ્રાર્થયન્ પથિ ન કિંચિદપિ વ્યજાનાત્ ॥3॥

દ્રક્ષ્યામિ વેદશતગીતગતિં પુમાંસં
સ્પ્રક્ષ્યામિ કિંસ્વિદપિ નામ પરિષ્વજેયમ્ ।
કિં વક્ષ્યતે સ ખલુ માં ક્વનુ વીક્ષિતઃ સ્યા-
દિત્થં નિનાય સ ભવન્મયમેવ માર્ગમ્ ॥4॥

ભૂયઃ ક્રમાદભિવિશન્ ભવદંઘ્રિપૂતં
વૃંદાવનં હરવિરિંચસુરાભિવંદ્યમ્ ।
આનંદમગ્ન ઇવ લગ્ન ઇવ પ્રમોહે
કિં કિં દશાંતરમવાપ ન પંકજાક્ષ ॥5॥

પશ્યન્નવંદત ભવદ્વિહૃતિસ્થલાનિ
પાંસુષ્વવેષ્ટત ભવચ્ચરણાંકિતેષુ ।
કિં બ્રૂમહે બહુજના હિ તદાપિ જાતા
એવં તુ ભક્તિતરલા વિરલાઃ પરાત્મન્ ॥6॥

સાયં સ ગોપભવનાનિ ભવચ્ચરિત્ર-
ગીતામૃતપ્રસૃતકર્ણરસાયનાનિ ।
પશ્યન્ પ્રમોદસરિતેવ કિલોહ્યમાનો
ગચ્છન્ ભવદ્ભવનસન્નિધિમન્વયાસીત્ ॥7॥

તાવદ્દદર્શ પશુદોહવિલોકલોલં
ભક્તોત્તમાગતિમિવ પ્રતિપાલયંતમ્ ।
ભૂમન્ ભવંતમયમગ્રજવંતમંત-
ર્બ્રહ્માનુભૂતિરસસિંધુમિવોદ્વમંતમ્ ॥8॥

સાયંતનાપ્લવવિશેષવિવિક્તગાત્રૌ
દ્વૌ પીતનીલરુચિરાંબરલોભનીયૌ ।
નાતિપ્રપંચધૃતભૂષણચારુવેષૌ
મંદસ્મિતાર્દ્રવદનૌ સ યુવાં દદર્શ ॥9॥

દૂરાદ્રથાત્સમવરુહ્ય નમંતમેન-
મુત્થાપ્ય ભક્તકુલમૌલિમથોપગૂહન્ ।
હર્ષાન્મિતાક્ષરગિરા કુશલાનુયોગી
પાણિં પ્રગૃહ્ય સબલોઽથ ગૃહં નિનેથ ॥10॥

નંદેન સાકમમિતાદરમર્ચયિત્વા
તં યાદવં તદુદિતાં નિશમય્ય વાર્તામ્ ।
ગોપેષુ ભૂપતિનિદેશકથાં નિવેદ્ય
નાનાકથાભિરિહ તેન નિશામનૈષીઃ ॥11॥

ચંદ્રાગૃહે કિમુત ચંદ્રભગાગૃહે નુ
રાધાગૃહે નુ ભવને કિમુ મૈત્રવિંદે ।
ધૂર્તો વિલંબત ઇતિ પ્રમદાભિરુચ્ચૈ-
રાશંકિતો નિશિ મરુત્પુરનાથ પાયાઃ ॥12॥