પ્રદ્યુમ્નો રૌક્મિણેયઃ સ ખલુ તવ કલા શંબરેણાહૃતસ્તં
હત્વા રત્યા સહાપ્તો નિજપુરમહરદ્રુક્મિકન્યાં ચ ધન્યામ્ ।
તત્પુત્રોઽથાનિરુદ્ધો ગુણનિધિરવહદ્રોચનાં રુક્મિપૌત્રીં
તત્રોદ્વાહે ગતસ્ત્વં ન્યવધિ મુસલિના રુક્મ્યપિ દ્યૂતવૈરાત્ ॥1॥
બાણસ્ય સા બલિસુતસ્ય સહસ્રબાહો-
ર્માહેશ્વરસ્ય મહિતા દુહિતા કિલોષા ।
ત્વત્પૌત્રમેનમનિરુદ્ધમદૃષ્ટપૂર્વં
સ્વપ્નેઽનુભૂય ભગવન્ વિરહાતુરાઽભૂત્ ॥2॥
યોગિન્યતીવ કુશલા ખલુ ચિત્રલેખા
તસ્યાઃ સખી વિલિખતી તરુણાનશેષાન્ ।
તત્રાનિરુદ્ધમુષયા વિદિતં નિશાયા-
માનેષ્ટ યોગબલતો ભવતો નિકેતાત્ ॥3॥
કન્યાપુરે દયિતયા સુખમારમંતં
ચૈનં કથંચન બબંધુષિ શર્વબંધૌ ।
શ્રીનારદોક્તતદુદંતદુરંતરોષૈ-
સ્ત્વં તસ્ય શોણિતપુરં યદુભિર્ન્યરુંધાઃ ॥4॥
પુરીપાલશ્શૈલપ્રિયદુહિતૃનાથોઽસ્ય ભગવાન્
સમં ભૂતવ્રાતૈર્યદુબલમશંકં નિરુરુધે ।
મહાપ્રાણો બાણો ઝટિતિ યુયુધાનેનયુયુધે
ગુહઃ પ્રદ્યુમ્નેન ત્વમપિ પુરહંત્રા જઘટિષે ॥5॥
નિરુદ્ધાશેષાસ્ત્રે મુમુહુષિ તવાસ્ત્રેણ ગિરિશે
દ્રુતા ભૂતા ભીતાઃ પ્રમથકુલવીરાઃ પ્રમથિતાઃ ।
પરાસ્કંદ્ત્ સ્કંદઃ કુસુમશરબાણૈશ્ચ સચિવઃ
સ કુંભાંડો ભાંડં નવમિવ બલેનાશુ બિભિદે ॥6॥
ચાપાનાં પંચશત્યા પ્રસભમુપગતે છિન્નચાપેઽથ બાણે
વ્યર્થે યાતે સમેતો જ્વરપતિરશનૈરજ્વરિ ત્વજ્જ્વરેણ ।
જ્ઞાની સ્તુત્વાઽથ દત્વા તવ ચરિતજુષાં વિજ્વરં સ જ્વરોઽગાત્
પ્રાયોઽંતર્જ્ઞાનવંતોઽપિ ચ બહુતમસા રૌદ્રચેષ્ટા હિ રૌદ્રાઃ ॥7॥
બાણં નાનાયુધોગ્રં પુનરભિપતિતં દર્પદોષાદ્વિતન્વન્
નિર્લૂનાશેષદોષં સપદિ બુબુધુષા શંકરેણોપગીતઃ ।
તદ્વાચા શિષ્ટબાહુદ્વિતયમુભયતો નિર્ભયં તત્પ્રિયં તં
મુક્ત્વા તદ્દત્તમાનો નિજપુરમગમઃ સાનિરુદ્ધઃ સહોષઃ ॥8॥
મુહુસ્તાવચ્છક્રં વરુણમજયો નંદહરણે
યમં બાલાનીતૌ દવદહનપાનેઽનિલસખમ્ ।
વિધિં વત્સસ્તેયે ગિરિશમિહ બાણસ્ય સમરે
વિભો વિશ્વોત્કર્ષી તદયમવતારો જયતિ તે ॥9॥
દ્વિજરુષા કૃકલાસવપુર્ધરં નૃગનૃપં ત્રિદિવાલયમાપયન્ ।
નિજજને દ્વિજભક્તિમનુત્તમામુપદિશન્ પવનેશ્વર્ પાહિ મામ્ ॥10॥