તતો મગધભૂભૃતા ચિરનિરોધસંક્લેશિતં
શતાષ્ટકયુતાયુતદ્વિતયમીશ ભૂમીભૃતામ્ ।
અનાથશરણાય તે કમપિ પૂરુષં પ્રાહિણો-
દયાચત સ માગધક્ષપણમેવ કિં ભૂયસા ॥1॥
યિયાસુરભિમાગધં તદનુ નારદોદીરિતા-
દ્યુધિષ્ઠિરમખોદ્યમાદુભયકાર્યપર્યાકુલઃ ।
વિરુદ્ધજયિનોઽધ્વરાદુભયસિદ્ધિરિત્યુદ્ધવે
શશંસુષિ નિજૈઃ સમં પુરમિયેથ યૌધિષ્ઠિરીમ્ ॥2॥
અશેષદયિતાયુતે ત્વયિ સમાગતે ધર્મજો
વિજિત્ય સહજૈર્મહીં ભવદપાંગસંવર્ધિતૈઃ ।
શ્રિયં નિરુપમાં વહન્નહહ ભક્તદાસાયિતં
ભવંતમયિ માગધે પ્રહિતવાન્ સભીમાર્જુનમ્ ॥3॥
ગિરિવ્રજપુરં ગતાસ્તદનુ દેવ યૂયં ત્રયો
યયાચ સમરોત્સવં દ્વિજમિષેણ તં માગધમ્ ।
અપૂર્ણસુકૃતં ત્વમું પવનજેન સંગ્રામયન્
નિરીક્ષ્ય સહ જિષ્ણુના ત્વમપિ રાજયુદ્ધ્વા સ્થિતઃ ॥4॥
અશાંતસમરોદ્ધતં બિટપપાટનાસંજ્ઞયા
નિપાત્ય જરરસ્સુતં પવનજેન નિષ્પાટિતમ્ ।
વિમુચ્ય નૃપતીન્ મુદા સમનુગૃહ્ય ભક્તિં પરાં
દિદેશિથ ગતસ્પૃહાનપિ ચ ધર્મગુપ્ત્યૈ ભુવઃ ॥5॥
પ્રચક્રુષિ યુધિષ્ઠિરે તદનુ રાજસૂયાધ્વરં
પ્રસન્નભૃતકીભવત્સકલરાજકવ્યાકુલમ્ ।
ત્વમપ્યયિ જગત્પતે દ્વિજપદાવનેજાદિકં
ચકર્થ કિમુ કથ્યતે નૃપવરસ્ય ભાગ્યોન્નતિઃ ॥6॥
તતઃ સવનકર્મણિ પ્રવરમગ્ર્યપૂજાવિધિં
વિચાર્ય સહદેવવાગનુગતઃ સ ધર્માત્મજઃ ।
વ્યધત્ત ભવતે મુદા સદસિ વિશ્વભૂતાત્મને
તદા સસુરમાનુષં ભુવનમેવ તૃપ્તિં દધૌ ॥7॥
તતઃ સપદિ ચેદિપો મુનિનૃપેષુ તિષ્ઠત્સ્વહો
સભાજયતિ કો જડઃ પશુપદુર્દુરૂટં વટુમ્ ।
ઇતિ ત્વયિ સ દુર્વચોવિતતિમુદ્વમન્નાસના-
દુદાપતદુદાયુધઃ સમપતન્નમું પાંડવાઃ ॥8॥
નિવાર્ય નિજપક્ષગાનભિમુખસ્યવિદ્વેષિણ-
સ્ત્વમેવ જહૃષે શિરો દનુજદારિણા સ્વારિણા ।
જનુસ્ત્રિતયલબ્ધયા સતતચિંતયા શુદ્ધધી-
સ્ત્વયા સ પરમેકતામધૃત યોગિનાં દુર્લભામ્ ॥9॥
તતઃ સુમહિતે ત્વયા ક્રતુવરે નિરૂઢે જનો
યયૌ જયતિ ધર્મજો જયતિ કૃષ્ણ ઇત્યાલપન્।
ખલઃ સ તુ સુયોધનો ધુતમનાસ્સપત્નશ્રિયા
મયાર્પિતસભામુખે સ્થલજલભ્રમાદભ્રમીત્ ॥10॥
તદા હસિતમુત્થિતં દ્રુપદનંદનાભીમયો-
રપાંગકલયા વિભો કિમપિ તાવદુજ્જૃંભયન્ ।
ધરાભરનિરાકૃતૌ સપદિ નામ બીજં વપન્
જનાર્દન મરુત્પુરીનિલય પાહિ મામામયાત્ ॥11॥