પ્રાગેવાચાર્યપુત્રાહૃતિનિશમનયા સ્વીયષટ્સૂનુવીક્ષાં
કાંક્ષંત્યા માતુરુક્ત્યા સુતલભુવિ બલિં પ્રાપ્ય તેનાર્ચિતસ્ત્વમ્ ।
ધાતુઃ શાપાદ્ધિરણ્યાન્વિતકશિપુભવાન્ શૌરિજાન્ કંસભગ્ના-
નાનીયૈનાન્ પ્રદર્શ્ય સ્વપદમનયથાઃ પૂર્વપુત્રાન્ મરીચેઃ ॥1॥
શ્રુતદેવ ઇતિ શ્રુતં દ્વિજેંદ્રં
બહુલાશ્વં નૃપતિં ચ ભક્તિપૂર્ણમ્ ।
યુગપત્ત્વમનુગ્રહીતુકામો
મિથિલાં પ્રાપિથં તાપસૈઃ સમેતઃ ॥2॥
ગચ્છન્ દ્વિમૂર્તિરુભયોર્યુગપન્નિકેત-
મેકેન ભૂરિવિભવૈર્વિહિતોપચારઃ ।
અન્યેન તદ્દિનભૃતૈશ્ચ ફલૌદનાદ્યૈ-
સ્તુલ્યં પ્રસેદિથ દદથ ચ મુક્તિમાભ્યામ્ ॥3॥
ભૂયોઽથ દ્વારવત્યાં દ્વિજતનયમૃતિં તત્પ્રલાપાનપિ ત્વમ્
કો વા દૈવં નિરુંધ્યાદિતિ કિલ કથયન્ વિશ્વવોઢાપ્યસોઢાઃ ।
જિષ્ણોર્ગર્વં વિનેતું ત્વયિ મનુજધિયા કુંઠિતાં ચાસ્ય બુદ્ધિં
તત્ત્વારૂઢાં વિધાતું પરમતમપદપ્રેક્ષણેનેતિ મન્યે ॥4॥
નષ્ટા અષ્ટાસ્ય પુત્રાઃ પુનરપિ તવ તૂપેક્ષયા કષ્ટવાદઃ
સ્પષ્ટો જાતો જનાનામથ તદવસરે દ્વારકામાપ પાર્થઃ ।
મૈત્ર્યા તત્રોષિતોઽસૌ નવમસુતમૃતૌ વિપ્રવર્યપ્રરોદં
શ્રુત્વા ચક્રે પ્રતિજ્ઞામનુપહૃતસુતઃ સન્નિવેક્ષ્યે કૃશાનુમ્ ॥5॥
માની સ ત્વામપૃષ્ટ્વા દ્વિજનિલયગતો બાણજાલૈર્મહાસ્ત્રૈ
રુંધાનઃ સૂતિગેહં પુનરપિ સહસા દૃષ્ટનષ્ટે કુમારે ।
યામ્યામૈંદ્રીં તથાઽન્યાઃ સુરવરનગરીર્વિદ્યયાઽઽસાદ્ય સદ્યો
મોઘોદ્યોગઃ પતિષ્યન્ હુતભુજિ ભવતા સસ્મિતં વારિતોઽભૂત્ ॥6॥
સાર્ધં તેન પ્રતીચીં દિશમતિજવિના સ્યંદનેનાભિયાતો
લોકાલોકં વ્યતીતસ્તિમિરભરમથો ચક્રધામ્ના નિરુંધન્ ।
ચક્રાંશુક્લિષ્ટદૃષ્ટિં સ્થિતમથ વિજયં પશ્ય પશ્યેતિ વારાં
પારે ત્વં પ્રાદદર્શઃ કિમપિ હિ તમસાં દૂરદૂરં પદં તે ॥7॥
તત્રાસીનં ભુજંગાધિપશયનતલે દિવ્યભૂષાયુધાદ્યૈ-
રાવીતં પીતચેલં પ્રતિનવજલદશ્યામલં શ્રીમદંગમ્ ।
મૂર્તીનામીશિતારં પરમિહ તિસૃણામેકમર્થં શ્રુતીનાં
ત્વામેવ ત્વં પરાત્મન્ પ્રિયસખસહિતો નેમિથ ક્ષેમરૂપમ્ ॥8॥
યુવાં મામેવ દ્વાવધિકવિવૃતાંતર્હિતતયા
વિભિન્નૌ સંદ્રષ્ટું સ્વયમહમહાર્ષં દ્વિજસુતાન્ ।
નયેતં દ્રાગેતાનિતિ ખલુ વિતીર્ણાન્ પુનરમૂન્
દ્વિજાયાદાયાદાઃ પ્રણુતમહિમા પાંડુજનુષા ॥9॥
એવં નાનાવિહારૈર્જગદભિરમયન્ વૃષ્ણિવંશં પ્રપુષ્ણ-
ન્નીજાનો યજ્ઞભેદૈરતુલવિહૃતિભિઃ પ્રીણયન્નેણનેત્રાઃ ।
ભૂભારક્ષેપદંભાત્ પદકમલજુષાં મોક્ષણાયાવતીર્ણઃ
પૂર્ણં બ્રહ્મૈવ સાક્ષાદ્યદુષુ મનુજતારૂષિતસ્ત્વં વ્યલાસીઃ ॥10॥
પ્રાયેણ દ્વારવત્યામવૃતદયિ તદા નારદસ્ત્વદ્રસાર્દ્ર-
સ્તસ્માલ્લેભે કદાચિત્ખલુ સુકૃતનિધિસ્ત્વત્પિતા તત્ત્વબોધમ્ ।
ભક્તાનામગ્રયાયી સ ચ ખલુ મતિમાનુદ્ધવસ્ત્વત્ત એવ
પ્રાપ્તો વિજ્ઞાનસારં સ કિલ જનહિતાયાધુનાઽઽસ્તે બદર્યામ્ ॥11॥
સોઽયં કૃષ્ણાવતારો જયતિ તવ વિભો યત્ર સૌહાર્દભીતિ-
સ્નેહદ્વેષાનુરાગપ્રભૃતિભિરતુલૈરશ્રમૈર્યોગભેદૈઃ ।
આર્તિં તીર્ત્વા સમસ્તામમૃતપદમગુસ્સર્વતઃ સર્વલોકાઃ
સ ત્વં વિશ્વાર્તિશાંત્યૈ પવનપુરપતે ભક્તિપૂર્ત્યૈ ચ ભૂયાઃ ॥12॥