બંધુસ્નેહં વિજહ્યાં તવ હિ કરુણયા ત્વય્યુપાવેશિતાત્મા
સર્વં ત્યક્ત્વા ચરેયં સકલમપિ જગદ્વીક્ષ્ય માયાવિલાસમ્ ।
નાનાત્વાદ્ભ્રાંતિજન્યાત્ સતિ ખલુ ગુણદોષાવબોધે વિધિર્વા
વ્યાસેધો વા કથં તૌ ત્વયિ નિહિતમતેર્વીતવૈષમ્યબુદ્ધેઃ ॥1॥
ક્ષુત્તૃષ્ણાલોપમાત્રે સતતકૃતધિયો જંતવઃ સંત્યનંતા-
સ્તેભ્યો વિજ્ઞાનવત્ત્વાત્ પુરુષ ઇહ વરસ્તજ્જનિર્દુર્લભૈવ ।
તત્રાપ્યાત્માત્મનઃ સ્યાત્સુહૃદપિ ચ રિપુર્યસ્ત્વયિ ન્યસ્તચેતા-
સ્તાપોચ્છિત્તેરુપાયં સ્મરતિ સ હિ સુહૃત્ સ્વાત્મવૈરી તતોઽન્યઃ ॥2॥
ત્વત્કારુણ્યે પ્રવૃત્તે ક ઇવ નહિ ગુરુર્લોકવૃત્તેઽપિ ભૂમન્
સર્વાક્રાંતાપિ ભૂમિર્નહિ ચલતિ તતસ્સત્ક્ષમાં શિક્ષયેયમ્ ।
ગૃહ્ણીયામીશ તત્તદ્વિષયપરિચયેઽપ્યપ્રસક્તિં સમીરાત્
વ્યાપ્તત્વંચાત્મનો મે ગગનગુરુવશાદ્ભાતુ નિર્લેપતા ચ ॥3
સ્વચ્છઃ સ્યાં પાવનોઽહં મધુર ઉદકવદ્વહ્નિવન્મા સ્મ ગૃહ્ણાં
સર્વાન્નીનોઽપિ દોષં તરુષુ તમિવ માં સર્વભૂતેષ્વવેયામ્ ।
પુષ્ટિર્નષ્ટિઃ કલાનાં શશિન ઇવ તનોર્નાત્મનોઽસ્તીતિ વિદ્યાં
તોયાદિવ્યસ્તમાર્તાંડવદપિ ચ તનુષ્વેકતાં ત્વત્પ્રસાદાત્ ॥4॥
સ્નેહાદ્વ્યાધાત્તપુત્રપ્રણયમૃતકપોતાયિતો મા સ્મ ભૂવં
પ્રાપ્તં પ્રાશ્નન્ સહેય ક્ષુધમપિ શયુવત્ સિંધુવત્સ્યામગાધઃ ।
મા પપ્તં યોષિદાદૌ શિખિનિ શલભવત્ ભૃંગવત્સારભાગી
ભૂયાસં કિંતુ તદ્વદ્ધનચયનવશાન્માહમીશ પ્રણેશમ્ ॥5॥
મા બદ્ધ્યાસં તરુણ્યા ગજ ઇવ વશયા નાર્જયેયં ધનૌઘં
હર્તાન્યસ્તં હિ માધ્વીહર ઇવ મૃગવન્મા મુહં ગ્રામ્યગીતૈઃ ।
નાત્યાસજ્જેય ભોજ્યે ઝષ ઇવ બલિશે પિંગલાવન્નિરાશઃ
સુપ્યાં ભર્તવ્યયોગાત્ કુરર ઇવ વિભો સામિષોઽન્યૈર્ન હન્યૈ ॥6॥
વર્તેય ત્યક્તમાનઃ સુખમતિશિશુવન્નિસ્સહાયશ્ચરેયં
કન્યાયા એકશેષો વલય ઇવ વિભો વર્જિતાન્યોન્યઘોષઃ ।
ત્વચ્ચિત્તો નાવબુધ્યૈ પરમિષુકૃદિવ ક્ષ્માભૃદાયાનઘોષં
ગેહેષ્વન્યપ્રણીતેષ્વહિરિવ નિવસાન્યુંદુરોર્મંદિરેષુ ॥7॥
ત્વય્યેવ ત્વત્કૃતં ત્વં ક્ષપયસિ જગદિત્યૂર્ણનાભાત્ પ્રતીયાં
ત્વચ્ચિંતા ત્વત્સ્વરૂપં કુરુત ઇતિ દૃઢં શિક્ષયે પેશકારાત્ ।
વિડ્ભસ્માત્મા ચ દેહો ભવતિ ગુરુવરો યો વિવેકં વિરક્તિં
ધત્તે સંચિંત્યમાનો મમ તુ બહુરુજાપીડિતોઽયં વિશેષાત્ ॥8॥
હી હી મે દેહમોહં ત્યજ પવનપુરાધીશ યત્પ્રેમહેતો-
ર્ગેહે વિત્તે કલત્રાદિષુ ચ વિવશિતાસ્ત્વત્પદં વિસ્મરંતિ ।
સોઽયં વહ્નેશ્શુનો વા પરમિહ પરતઃ સાંપ્રતંચાક્ષિકર્ણ-
ત્વગ્જિહ્વાદ્યા વિકર્ષંત્યવશમત ઇતઃ કોઽપિ ન ત્વત્પદાબ્જે ॥9॥
દુર્વારો દેહમોહો યદિ પુનરધુના તર્હિ નિશ્શેષરોગાન્
હૃત્વા ભક્તિં દ્રઢિષ્ઠાં કુરુ તવ પદપંકેરુહે પંકજાક્ષ ।
નૂનં નાનાભવાંતે સમધિગતમમું મુક્તિદં વિપ્રદેહં
ક્ષુદ્રે હા હંત મા મા ક્ષિપ વિષયરસે પાહિ માં મારુતેશ ॥10॥