યત્સેવનેન પિતૃમાતૃસહોદરાણાં
ચિત્તં ન મોહમહિમા મલિનં કરોતિ ।
ઇત્થં સમીક્ષ્ય તવ ભક્તજનાન્મુરારે
મૂકોઽસ્મિ તેઽંઘ્રિકમલં તદતીવ ધન્યમ્ ॥ 1 ॥
યે યે વિલગ્નમનસઃ સુખમાપ્તુકામાઃ
તે તે ભવંતિ જગદુદ્ભવમોહશૂન્યાઃ ।
દૃષ્ટ્વા વિનષ્ટધનધાન્યગૃહાન્મુરારે
મૂકોઽસ્મિ તેઽંઘ્રિકમલં તદતીવ ધન્યમ્ ॥ 2 ॥
વસ્ત્રાણિ દિગ્વલયમાવસતિઃ શ્મશાને
પાત્રં કપાલમપિ મુંડવિભૂષણાનિ ।
રુદ્રે પ્રસાદમચલં તવ વીક્ષ્ય શૌરે
મૂકોઽસ્મિ તેઽંઘ્રિકમલં તદતીવ ધન્યમ્ ॥ 3 ॥
યત્કીર્તિગાયનપરસ્ય વિધાતૃસૂનોઃ
કૌપીનમૈણમજિનં વિપુલાં વિભૂતિમ્ ।
સ્વસ્યાર્થ દિગ્ભ્રમણમીક્ષ્ય તુ સાર્વકાલં
મૂકોઽસ્મિ તેઽંઘ્રિકમલં તદતીવ ધન્યમ્ ॥ 4 ॥
યદ્વીક્ષણે ધૃતધિયામશનં ફલાદિ
વાસોઽપિ નિર્જિનવને ગિરિકંદરાસુ ।
વાસાંસિ વલ્કલમયાનિ વિલોક્ય ચૈવં
મૂકોઽસ્મિ તેઽંઘ્રિકમલં તદતીવ ધન્યમ્ ॥ 5 ॥
સ્તોત્રં પાદાંબુજસ્યૈતચ્છ્રીશસ્ય વિજિતેંદ્રિયઃ ।
પઠિત્વા તત્પદં યાતિ શ્લોકાર્થજ્ઞસ્તુ યો નરઃ ॥ 6 ॥
ઇતિ મુરારિ પંચરત્નમ્ ।