કલિતકનકચેલં ખંડિતાપત્કુચેલં
ગળધૃતવનમાલં ગર્વિતારાતિકાલમ્ ।
કલિમલહરશીલં કાંતિધૂતેંદ્રનીલં
વિનમદવનશીલં વેણુગોપાલમીડે ॥ 1 ॥
વ્રજયુવતિવિલોલં વંદનાનંદલોલં
કરધૃતગુરુશૈલં કંજગર્ભાદિપાલમ્ ।
અભિમતફલદાનં શ્રીજિતામર્ત્યસાલં
વિનમદવનશીલં વેણુગોપાલમીડે ॥ 2 ॥
ઘનતરકરુણાશ્રીકલ્પવલ્લ્યાલવાલં
કલશજલધિકન્યામોદકશ્રીકપોલમ્ ।
પ્લુષિતવિનતલોકાનંતદુષ્કર્મતૂલં
વિનમદવનશીલં વેણુગોપાલમીડે ॥ 3 ॥
શુભદસુગુણજાલં સૂરિલોકાનુકૂલં
દિતિજતતિકરાલં દિવ્યદારાયિતેલમ્ ।
મૃદુમધુરવચઃશ્રી દૂરિતશ્રીરસાલં
વિનમદવનશીલં વેણુગોપાલમીડે ॥ 4 ॥
મૃગમદતિલકશ્રીમેદુરસ્વીયફાલં
જગદુદયલયસ્થિત્યાત્મકાત્મીયખેલમ્ ।
સકલમુનિજનાળીમાનસાંતર્મરાળં
વિનમદવનશીલં વેણુગોપાલમીડે ॥ 5 ॥
અસુરહરણખેલનં નંદકોત્ક્ષેપલીલં
વિલસિતશરકાલં વિશ્વપૂર્ણાંતરાળમ્ ।
શુચિરુચિરયશશ્શ્રીધિક્કૃત શ્રીમૃણાલં
વિનમદવનશીલં વેણુગોપાલમીડે ॥ 6 ॥
સ્વપરિચરણલબ્ધ શ્રીધરાશાધિપાલં
સ્વમહિમલવલીલાજાતવિધ્યંડગોળમ્ ।
ગુરુતરભવદુઃખાનીક વાઃપૂરકૂલં
વિનમદવનશીલં વેણુગોપાલમીડે ॥ 7 ॥
ચરણકમલશોભાપાલિત શ્રીપ્રવાળં
સકલસુકૃતિરક્ષાદક્ષકારુણ્ય હેલમ્ ।
રુચિવિજિતતમાલં રુક્મિણીપુણ્યમૂલં
વિનમદવનશીલં વેણુગોપાલમીડે ॥ 8 ॥
શ્રીવેણુગોપાલ કૃપાલવાલાં
શ્રીરુક્મિણીલોલસુવર્ણચેલામ્ ।
કૃતિં મમ ત્વં કૃપયા ગૃહીત્વા
સ્રજં યથા માં કુરુ દુઃખદૂરમ્ ॥ 9 ॥
ઇતિ શ્રી વેણુગોપાલાષ્ટકમ્ ।