વિશુદ્ધં પરં સચ્ચિદાનંદરૂપં
ગુણાધારમાધારહીનં વરેણ્યમ્ ।
મહાંતં વિભાંતં ગુહાંતં ગુણાંતં
સુખાંતં સ્વયં ધામ રામં પ્રપદ્યે ॥ 1 ॥
શિવં નિત્યમેકં વિભું તારકાખ્યં
સુખાકારમાકારશૂન્યં સુમાન્યમ્ ।
મહેશં કલેશં સુરેશં પરેશં
નરેશં નિરીશં મહીશં પ્રપદ્યે ॥ 2 ॥
યદાવર્ણયત્કર્ણમૂલેઽંતકાલે
શિવો રામ રામેતિ રામેતિ કાશ્યામ્ ।
તદેકં પરં તારકબ્રહ્મરૂપં
ભજેઽહં ભજેઽહં ભજેઽહં ભજેઽહમ્ ॥ 3 ॥
મહારત્નપીઠે શુભે કલ્પમૂલે
સુખાસીનમાદિત્યકોટિપ્રકાશમ્ ।
સદા જાનકીલક્ષ્મણોપેતમેકં
સદા રામચંદ્રં ભજેઽહં ભજેઽહમ્ ॥ 4 ॥
ક્વણદ્રત્નમંજીરપાદારવિંદં
લસન્મેખલાચારુપીતાંબરાઢ્યમ્ ।
મહારત્નહારોલ્લસત્કૌસ્તુભાંગં
નદચ્ચંચરીમંજરીલોલમાલમ્ ॥ 5 ॥
લસચ્ચંદ્રિકાસ્મેરશોણાધરાભં
સમુદ્યત્પતંગેંદુકોટિપ્રકાશમ્ ।
નમદ્બ્રહ્મરુદ્રાદિકોટીરરત્ન
સ્ફુરત્કાંતિનીરાજનારાધિતાંઘ્રિમ્ ॥ 6 ॥
પુરઃ પ્રાંજલીનાંજનેયાદિભક્તાન્
સ્વચિન્મુદ્રયા ભદ્રયા બોધયંતમ્ ।
ભજેઽહં ભજેઽહં સદા રામચંદ્રં
ત્વદન્યં ન મન્યે ન મન્યે ન મન્યે ॥ 7 ॥
યદા મત્સમીપં કૃતાંતઃ સમેત્ય
પ્રચંડપ્રકોપૈર્ભટૈર્ભીષયેન્મામ્ ।
તદાવિષ્કરોષિ ત્વદીયં સ્વરૂપં
સદાપત્પ્રણાશં સકોદંડબાણમ્ ॥ 8 ॥
નિજે માનસે મંદિરે સન્નિધેહિ
પ્રસીદ પ્રસીદ પ્રભો રામચંદ્ર ।
સસૌમિત્રિણા કૈકયીનંદનેન
સ્વશક્ત્યાનુભક્ત્યા ચ સંસેવ્યમાન ॥ 9 ॥
સ્વભક્તાગ્રગણ્યૈઃ કપીશૈર્મહીશૈ-
-રનીકૈરનેકૈશ્ચ રામ પ્રસીદ ।
નમસ્તે નમોઽસ્ત્વીશ રામ પ્રસીદ
પ્રશાધિ પ્રશાધિ પ્રકાશં પ્રભો મામ્ ॥ 10 ॥
ત્વમેવાસિ દૈવં પરં મે યદેકં
સુચૈતન્યમેતત્ત્વદન્યં ન મન્યે ।
યતોઽભૂદમેયં વિયદ્વાયુતેજો
જલોર્વ્યાદિકાર્યં ચરં ચાચરં ચ ॥ 11 ॥
નમઃ સચ્ચિદાનંદરૂપાય તસ્મૈ
નમો દેવદેવાય રામાય તુભ્યમ્ ।
નમો જાનકીજીવિતેશાય તુભ્યં
નમઃ પુંડરીકાયતાક્ષાય તુભ્યમ્ ॥ 12 ॥
નમો ભક્તિયુક્તાનુરક્તાય તુભ્યં
નમઃ પુણ્યપુંજૈકલભ્યાય તુભ્યમ્ ।
નમો વેદવેદ્યાય ચાદ્યાય પુંસે
નમઃ સુંદરાયેંદિરાવલ્લભાય ॥ 13 ॥
નમો વિશ્વકર્ત્રે નમો વિશ્વહર્ત્રે
નમો વિશ્વભોક્ત્રે નમો વિશ્વમાત્રે ।
નમો વિશ્વનેત્રે નમો વિશ્વજેત્રે
નમો વિશ્વપિત્રે નમો વિશ્વમાત્રે ॥ 14 ॥
નમસ્તે નમસ્તે સમસ્તપ્રપંચ-
-પ્રભોગપ્રયોગપ્રમાણપ્રવીણ ।
મદીયં મનસ્ત્વત્પદદ્વંદ્વસેવાં
વિધાતું પ્રવૃત્તં સુચૈતન્યસિદ્ધ્યૈ ॥ 15 ॥
શિલાપિ ત્વદંઘ્રિક્ષમાસંગિરેણુ
પ્રસાદાદ્ધિ ચૈતન્યમાધત્ત રામ ।
નરસ્ત્વત્પદદ્વંદ્વસેવાવિધાના-
-ત્સુચૈતન્યમેતીતિ કિં ચિત્રમત્ર ॥ 16 ॥
પવિત્રં ચરિત્રં વિચિત્રં ત્વદીયં
નરા યે સ્મરંત્યન્વહં રામચંદ્ર ।
ભવંતં ભવાંતં ભરંતં ભજંતો
લભંતે કૃતાંતં ન પશ્યંત્યતોઽંતે ॥ 17 ॥
સ પુણ્યઃ સ ગણ્યઃ શરણ્યો મમાયં
નરો વેદ યો દેવચૂડામણિં ત્વામ્ ।
સદાકારમેકં ચિદાનંદરૂપં
મનોવાગગમ્યં પરં ધામ રામ ॥ 18 ॥
પ્રચંડપ્રતાપપ્રભાવાભિભૂત-
-પ્રભૂતારિવીર પ્રભો રામચંદ્ર ।
બલં તે કથં વર્ણ્યતેઽતીવ બાલ્યે
યતોઽખંડિ ચંડીશકોદંડદંડમ્ ॥ 19 ॥
દશગ્રીવમુગ્રં સપુત્રં સમિત્રં
સરિદ્દુર્ગમધ્યસ્થરક્ષોગણેશમ્ ।
ભવંતં વિના રામ વીરો નરો વા
સુરો વાઽમરો વા જયેત્કસ્ત્રિલોક્યામ્ ॥ 20 ॥
સદા રામ રામેતિ રામામૃતં તે
સદારામમાનંદનિષ્યંદકંદમ્ ।
પિબંતં નમંતં સુદંતં હસંતં
હનૂમંતમંતર્ભજે તં નિતાંતમ્ ॥ 21 ॥
સદા રામ રામેતિ રામામૃતં તે
સદારામમાનંદનિષ્યંદકંદમ્ ।
પિબન્નન્વહં નન્વહં નૈવ મૃત્યો-
-ર્બિભેમિ પ્રસાદાદસાદાત્તવૈવ ॥ 22 ॥
અસીતાસમેતૈરકોદંડભૂષૈ-
-રસૌમિત્રિવંદ્યૈરચંડપ્રતાપૈઃ ।
અલંકેશકાલૈરસુગ્રીવમિત્રૈ-
-રરામાભિધેયૈરલં દૈવતૈર્નઃ ॥ 23 ॥
અવીરાસનસ્થૈરચિન્મુદ્રિકાઢ્યૈ-
-રભક્તાંજનેયાદિતત્ત્વપ્રકાશૈઃ ।
અમંદારમૂલૈરમંદારમાલૈ-
-રરામાભિધેયૈરલં દૈવતૈર્નઃ ॥ 24 ॥
અસિંધુપ્રકોપૈરવંદ્યપ્રતાપૈ-
-રબંધુપ્રયાણૈરમંદસ્મિતાઢ્યૈઃ ।
અદંડપ્રવાસૈરખંડપ્રબોધૈ-
-રરામાભિધેયૈરલં દૈવતૈર્નઃ ॥ 25 ॥
હરે રામ સીતાપતે રાવણારે
ખરારે મુરારેઽસુરારે પરેતિ ।
લપંતં નયંતં સદાકાલમેવં
સમાલોકયાલોકયાશેષબંધો ॥ 26 ॥
નમસ્તે સુમિત્રાસુપુત્રાભિવંદ્ય
નમસ્તે સદા કૈકયીનંદનેડ્ય ।
નમસ્તે સદા વાનરાધીશવંદ્ય
નમસ્તે નમસ્તે સદા રામચંદ્ર ॥ 27 ॥
પ્રસીદ પ્રસીદ પ્રચંડપ્રતાપ
પ્રસીદ પ્રસીદ પ્રચંડારિકાલ ।
પ્રસીદ પ્રસીદ પ્રપન્નાનુકંપિન્
પ્રસીદ પ્રસીદ પ્રભો રામચંદ્ર ॥ 28 ॥
ભુજંગપ્રયાતં પરં વેદસારં
મુદા રામચંદ્રસ્ય ભક્ત્યા ચ નિત્યમ્ ।
પઠન્સંતતં ચિંતયન્સ્વાંતરંગે
સ એવ સ્વયં રામચંદ્રઃ સ ધન્યઃ ॥ 29 ॥
ઇતિ શ્રીમચ્છંકરાચાર્ય કૃતં શ્રી રામ ભુજંગપ્રયાત સ્તોત્રમ્ ।