ಅಥ ದ್ವಿತೀಯೋಽಧ್ಯಾಯಃ ।
ಶ್ರೀಶುಕಃ ಉವಾಚ ।
ಗೋವಿಂದಭುಜಗುಪ್ತಾಯಾಂ ದ್ವಾರವತ್ಯಾಂ ಕುರೂದ್ವಹ ।
ಅವಾತ್ಸೀತ್ ನಾರದಃ ಅಭೀಕ್ಷ್ಣಂ ಕೃಷ್ಣೌಪಾಸನಲಾಲಸಃ ॥ 1॥
ಕೋ ನು ರಾಜನ್ ಇಂದ್ರಿಯವಾನ್ ಮುಕುಂದಚರಣಾಂಬುಜಮ್ ।
ನ ಭಜೇತ್ ಸರ್ವತಃ ಮೃತ್ಯುಃ ಉಪಾಸ್ಯಂ ಅಮರೌತ್ತಮೈಃ ॥ 2॥
ತಂ ಏಕದಾ ದೇವರ್ಷಿಂ ವಸುದೇವಃ ಗೃಹ ಆಗತಮ್ ।
ಅರ್ಚಿತಂ ಸುಖಂ ಆಸೀನಂ ಅಭಿವಾದ್ಯ ಇದಂ ಅಬ್ರವೀತ್ ॥ 3॥
ವಸುದೇವಃ ಉವಾಚ ।
ಭಗವನ್ ಭವತಃ ಯಾತ್ರಾ ಸ್ವಸ್ತಯೇ ಸರ್ವದೇಹಿನಾಮ್ ।
ಕೃಪಣಾನಾಂ ಯಥಾ ಪಿತ್ರೋಃ ಉತ್ತಮಶ್ಲೋಕವರ್ತ್ಮನಾಮ್ ॥ 4॥
ಭೂತಾನಾಂ ದೇವಚರಿತಂ ದುಃಖಾಯ ಚ ಸುಖಾಯ ಚ ।
ಸುಖಾಯ ಏವ ಹಿ ಸಾಧೂನಾಂ ತ್ವಾದೃಶಾಂ ಅಚ್ಯುತ ಆತ್ಮನಾಮ್ ॥ 5॥
ಭಜಂತಿ ಯೇ ಯಥಾ ದೇವಾನ್ ದೇವಾಃ ಅಪಿ ತಥಾ ಏವ ತಾನ್ ।
ಛಾಯಾ ಇವ ಕರ್ಮಸಚಿವಾಃ ಸಾಧವಃ ದೀನವತ್ಸಲಾಃ ॥ 6॥
ಬ್ರಹ್ಮನ್ ತಥಾ ಅಪಿ ಪೃಚ್ಛಾಮಃ ಧರ್ಮಾನ್ ಭಾಗವತಾನ್ ತವ ।
ಯಾನ್ ಶ್ರುತ್ವಾ ಶ್ರದ್ಧಯಾ ಮರ್ತ್ಯಃ ಮುಚ್ಯತೇ ಸರ್ವತಃ ಭಯಾತ್ ॥ 7॥
ಅಹಂ ಕಿಲ ಪುರಾ ಅನಂತಂ ಪ್ರಜಾರ್ಥಃ ಭುವಿ ಮುಕ್ತಿದಮ್ ।
ಅಪೂಜಯಂ ನ ಮೋಕ್ಷಾಯ ಮೋಹಿತಃ ದೇವಮಾಯಯಾ ॥ 8॥
ಯಯಾ ವಿಚಿತ್ರವ್ಯಸನಾತ್ ಭವದ್ಭಿಃ ವಿಶ್ವತಃ ಭಯಾತ್ ।
ಮುಚ್ಯೇಮ ಹಿ ಅಂಜಸಾ ಏವ ಅದ್ಧಾ ತಥಾ ನಃ ಶಾಧಿ ಸುವ್ರತ ॥ 9॥
ಶ್ರೀಶುಕಃ ಉವಾಚ ।
ರಾಜನ್ ಏವಂ ಕೃತಪ್ರಶ್ನಃ ವಸುದೇವೇನ ಧೀಮತಾ ।
ಪ್ರೀತಃ ತಂ ಆಹ ದೇವರ್ಷಿಃ ಹರೇಃ ಸಂಸ್ಮಾರಿತಃ ಗುಣೈಃ ॥ 10॥
ನಾರದಃ ಉವಾಚ ।
ಸಮ್ಯಕ್ ಏತತ್ ವ್ಯವಸಿತಂ ಭವತಾ ಸಾತ್ವತರ್ಷಭ ।
ಯತ್ ಪೃಚ್ಛಸೇ ಭಾಗವತಾನ್ ಧರ್ಮಾನ್ ತ್ವಂ ವಿಶ್ವಭಾವನಾನ್ ॥
11॥
ಶ್ರುತಃ ಅನುಪಠಿತಃ ಧ್ಯಾತಃ ಆದೃತಃ ವಾ ಅನುಮೋದಿತಃ ।
ಸದ್ಯಃ ಪುನಾತಿ ಸದ್ಧರ್ಮಃ ದೇವವಿಶ್ವದ್ರುಹಃ ಅಪಿ ॥ 12॥
ತ್ವಯಾ ಪರಮಕಲ್ಯಾಣಃ ಪುಣ್ಯಶ್ರವಣಕೀರ್ತನಃ ।
ಸ್ಮಾರಿತಃ ಭಗವಾನ್ ಅದ್ಯ ದೇವಃ ನಾರಾಯಣಃ ಮಮ ॥ 13॥
ಅತ್ರ ಅಪಿ ಉದಾಹರಂತಿ ಇಮಂ ಇತಿಹಾಸಂ ಪುರಾತನಮ್ ।
ಆರ್ಷಭಾಣಾಂ ಚ ಸಂವಾದಂ ವಿದೇಹಸ್ಯ ಮಹಾತ್ಮನಃ ॥ 14॥
ಪ್ರಿಯವ್ರತಃ ನಾಮ ಸುತಃ ಮನೋಃ ಸ್ವಾಯಂಭುವಸ್ಯ ಯಃ ।
ತಸ್ಯ ಅಗ್ನೀಧ್ರಃ ತತಃ ನಾಭಿಃ ಋಷಭಃ ತತ್ ಸುತಃ ಸ್ಮೃತಃ ॥ 15॥
ತಂ ಆಹುಃ ವಾಸುದೇವಾಂಶಂ ಮೋಕ್ಷಧರ್ಮವಿವಕ್ಷಯಾ ।
ಅವತೀರ್ಣಂ ಸುತಶತಂ ತಸ್ಯ ಆಸೀತ್ ವೇದಪಾರಗಮ್ ॥ 16॥
ತೇಷಾಂ ವೈ ಭರತಃ ಜ್ಯೇಷ್ಠಃ ನಾರಾಯಣಪರಾಯಣಃ ।
ವಿಖ್ಯಾತಂ ವರ್ಷಂ ಏತತ್ ಯತ್ ನಾಮ್ನಾ ಭಾರತಂ ಅದ್ಭುತಮ್ ॥ 17॥
ಸಃ ಭುಕ್ತಭೋಗಾಂ ತ್ಯಕ್ತ್ವಾ ಇಮಾಂ ನಿರ್ಗತಃ ತಪಸಾ ಹರಿಮ್ ।
ಉಪಾಸೀನಃ ತತ್ ಪದವೀಂ ಲೇಭೇ ವೈ ಜನ್ಮಭಿಃ ತ್ರಿಭಿಃ ॥ 18॥
ತೇಷಾಂ ನವ ನವದ್ವೀಪಪತಯಃ ಅಸ್ಯ ಸಮಂತತಃ ।
ಕರ್ಮತಂತ್ರಪ್ರಣೇತಾರಃ ಏಕಾಶೀತಿಃ ದ್ವಿಜಾತಯಃ ॥ 19॥
ನವ ಅಭವನ್ ಮಹಾಭಾಗಾಃ ಮುನಯಃ ಹಿ ಅರ್ಥಶಂಸಿನಃ ।
ಶ್ರಮಣಾಃ ವಾತಃ ಅಶನಾಃ ಆತ್ಮವಿದ್ಯಾವಿಶಾರದಾಃ ॥ 20॥
ಕವಿಃ ಹರಿಃ ಅಂತರಿಕ್ಷಃ ಪ್ರಬುದ್ಧಃ ಪಿಪ್ಪಲಾಯನಃ ।
ಆವಿರ್ಹೋತ್ರಃ ಅಥ ದ್ರುಮಿಲಃ ಚಮಸಃ ಕರಭಾಜನಃ ॥ 21॥
ಏತೇ ವೈ ಭಗವದ್ರೂಪಂ ವಿಶ್ವಂ ಸದಸದ್ ಆತ್ಮಕಮ್ ।
ಆತ್ಮನಃ ಅವ್ಯತಿರೇಕೇಣ ಪಶ್ಯಂತಃ ವ್ಯಚರತ್ ಮಹೀಮ್ ॥ 22॥
ಅವ್ಯಾಹತ ಇಷ್ಟಗತಯಾಃ ಸುರಸಿದ್ಧಸಿದ್ಧಸಾಧ್ಯ
ಗಂಧರ್ವಯಕ್ಷನರಕಿನ್ನರನಾಗಲೋಕಾನ್ ।
ಮುಕ್ತಾಃ ಚರಂತಿ ಮುನಿಚಾರಣಭೂತನಾಥ
ವಿದ್ಯಾಧರದ್ವಿಜಗವಾಂ ಭುವನಾನಿ ಕಾಮಮ್ ॥ 23॥
ತಃ ಏಕದಾ ನಿಮೇಃ ಸತ್ರಂ ಉಪಜಗ್ಮುಃ ಯತ್ ಋಚ್ಛಯಾ ।
ವಿತಾಯಮಾನಂ ಋಷಿಭಿಃ ಅಜನಾಭೇ ಮಹಾತ್ಮನಃ ॥ 24॥
ತಾನ್ ದೃಷ್ಟ್ವಾ ಸೂರ್ಯಸಂಕಾಶಾನ್ ಮಹಾಭಗವತಾನ್ ನೃಪಃ ।
ಯಜಮಾನಃ ಅಗ್ನಯಃ ವಿಪ್ರಾಃ ಸರ್ವಃ ಏವ ಉಪತಸ್ಥಿರೇ ॥ 25॥
ವಿದೇಹಃ ತಾನ್ ಅಭಿಪ್ರೇತ್ಯ ನಾರಾಯಣಪರಾಯಣಾನ್ ।
ಪ್ರೀತಃ ಸಂಪೂಜಯಾನ್ ಚಕ್ರೇ ಆಸನಸ್ಥಾನ್ ಯಥಾ ಅರ್ಹತಃ ॥ 26॥
ತಾನ್ ರೋಚಮಾನಾನ್ ಸ್ವರುಚಾ ಬ್ರಹ್ಮಪುತ್ರೌಪಮಾನ್ ನವ ।
ಪಪ್ರಚ್ಛ ಪರಮಪ್ರೀತಃ ಪ್ರಶ್ರಯ ಅವನತಃ ನೃಪಃ ॥ 27॥
ವಿದೇಹಃ ಉವಾಚ ।
ಮನ್ಯೇ ಭಗವತಃ ಸಾಕ್ಷಾತ್ ಪಾರ್ಷದಾನ್ ವಃ ಮಧುದ್ವಿಷಃ ।
ವಿಷ್ಣೋಃ ಭೂತಾನಿ ಲೋಕಾನಾಂ ಪಾವನಾಯ ಚರಂತಿ ಹಿ ॥ 28॥
ದುರ್ಲಭಃ ಮಾನುಷಃ ದೇಹಃ ದೇಹಿನಾಂ ಕ್ಷಣಭಂಗುರಃ ।
ತತ್ರ ಅಪಿ ದುರ್ಲಭಂ ಮನ್ಯೇ ವೈಕುಂಠಪ್ರಿಯದರ್ಶನಮ್ ॥ 29॥
ಅತಃ ಆತ್ಯಂತಿಕಂ ಕಹೇಮಂ ಪೃಚ್ಛಾಮಃ ಭವತಃ ಅನಘಾಃ ।
ಸಂಸಾರೇ ಅಸ್ಮಿನ್ ಕ್ಷಣಾರ್ಧಃ ಅಪಿ ಸತ್ಸಂಗಃ ಶೇವಧಿಃ ನೃಣಾಮ್ ॥
30॥
ಧರ್ಮಾನ್ ಭಾಗವತಾನ್ ಬ್ರೂತ ಯದಿ ನಃ ಶ್ರುತಯೇ ಕ್ಷಮಮ್ ।
ಯೈಃ ಪ್ರಸನ್ನಃ ಪ್ರಪನ್ನಾಯ ದಾಸ್ಯತಿ ಆತ್ಮಾನಂ ಅಪಿ ಅಜಃ ॥ 31॥
ಶ್ರೀನಾರದಃ ಉವಾಚ ।
ಏವಂ ತೇ ನಿಮಿನಾ ಪೃಷ್ಟಾ ವಸುದೇವ ಮಹತ್ತಮಾಃ ।
ಪ್ರತಿಪೂಜ್ಯ ಅಬ್ರುವನ್ ಪ್ರೀತ್ಯಾ ಸಸದಸಿ ಋತ್ವಿಜಂ ನೃಪಮ್ ॥ 32॥
ಕವಿಃ ಉವಾಚ ।
ಮನ್ಯೇ ಅಕುತಶ್ಚಿತ್ ಭಯಂ ಅಚ್ಯುತಸ್ಯ
ಪಾದಾಂಬುಜೌಪಾಸನಂ ಅತ್ರ ನಿತ್ಯಮ್ ।
ಉದ್ವಿಗ್ನಬುದ್ಧೇಃ ಅಸತ್ ಆತ್ಮಭಾವಾತ್
ವಿಶ್ವಾತ್ಮನಾ ಯತ್ರ ನಿವರ್ತತೇ ಭೀಃ ॥ 33॥
ಯೇ ವೈ ಭಗವತಾ ಪ್ರೋಕ್ತಾಃ ಉಪಾಯಾಃ ಹಿ ಆತ್ಮಲಬ್ಧಯೇ ।
ಅಂಜಃ ಪುಂಸಾಂ ಅವಿದುಷಾಂ ವಿದ್ಧಿ ಭಾಗವತಾನ್ ಹಿ ತಾನ್ ॥ 34॥
ಯಾನ್ ಆಸ್ಥಾಯ ನರಃ ರಾಜನ್ ನ ಪ್ರಮಾದ್ಯೇತ ಕರ್ಹಿಚಿತ್ ।
ಧಾವನ್ ನಿಮೀಲ್ಯ ವಾ ನೇತ್ರೇ ನ ಸ್ಖಲೇನ ಪತೇತ್ ಇಹ ॥ 35॥
ಕಾಯೇನ ವಾಚಾ ಮನಸಾ ಇಂದ್ರಿಯೈಃ ವಾ
ಬುದ್ಧ್ಯಾ ಆತ್ಮನಾ ವಾ ಅನುಸೃತಸ್ವಭಾವಾತ್ ।
ಕರೋತಿ ಯತ್ ಯತ್ ಸಕಲಂ ಪರಸ್ಮೈ
ನಾರಾಯಣಾಯ ಇತಿ ಸಮರ್ಪಯೇತ್ ತತ್ ॥ 36॥
ಭಯಂ ದ್ವಿತೀಯಾಭಿನಿವೇಶತಃ ಸ್ಯಾತ್
ಈಶಾತ್ ಅಪೇತಸ್ಯ ವಿಪರ್ಯಯಃ ಅಸ್ಮೃತಿಃ ।
ತತ್ ಮಾಯಯಾ ಅತಃ ಬುಧಃ ಆಭಜೇತ್ ತಂ
ಭಕ್ತ್ಯಾ ಏಕ ಈಶಂ ಗುರುದೇವತಾತ್ಮಾ ॥ 37।
ಅವಿದ್ಯಮಾನಃ ಅಪಿ ಅವಭಾತಿ ಹಿ ದ್ವಯೋಃ
ಧ್ಯಾತುಃ ಧಿಯಾ ಸ್ವಪ್ನಮನೋರಥೌ ಯಥಾ ।
ತತ್ ಕರ್ಮಸಂಕಲ್ಪವಿಕಲ್ಪಕಂ ಮನಃ
ಬುಧಃ ನಿರುಂಧ್ಯಾತ್ ಅಭಯಂ ತತಃ ಸ್ಯಾತ್ ॥ 38॥
ಶ್ರುಣ್ವನ್ ಸುಭದ್ರಾಣಿ ರಥಾಂಗಪಾಣೇಃ
ಜನ್ಮಾನಿ ಕರ್ಮಾಣಿ ಚ ಯಾನಿ ಲೋಕೇ ।
ಗೀತಾನಿ ನಾಮಾನಿ ತತ್ ಅರ್ಥಕಾನಿ
ಗಾಯನ್ ವಿಲಜ್ಜಃ ವಿಚರೇತ್ ಅಸಂಗಃ ॥ 39॥
ಏವಂ ವ್ರತಃ ಸ್ವಪ್ರಿಯನಾಮಕೀರ್ತ್ಯಾ
ಜಾತಾನುರಾಗಃ ದ್ರುತಚಿತ್ತಃ ಉಚ್ಚೈಃ ।
ಹಸತಿ ಅಥಃ ರೋದಿತಿ ರೌತಿ ಗಾಯತಿ
ಉನ್ಮಾದವತ್ ನೃತ್ಯತಿ ಲೋಕಬಾಹ್ಯಃ ॥ 40॥
ಖಂ ವಾಯುಂ ಅಗ್ನಿಂ ಸಲಿಲಂ ಮಹೀಂ ಚ
ಜ್ಯೋತೀಂಷಿ ಸತ್ತ್ವಾನಿ ದಿಶಃ ದ್ರುಮಾದೀನ್ ।
ಸರಿತ್ ಸಮುದ್ರಾನ್ ಚ ಹರೇಃ ಶರೀರಂ
ಯತ್ಕಿಂಚ ಭೂತಂ ಪ್ರಣಮೇತ್ ಅನನ್ಯಃ ॥ 41॥
ಭಕ್ತಿಃ ಪರೇಶ ಅನುಭವಃ ವಿರಕ್ತಿಃ
ಅನ್ಯತ್ರ ಏಷ ತ್ರಿಕಃ ಏಕಕಾಲಃ ।
ಪ್ರಪದ್ಯಮಾನಸ್ಯ ಯಥಾ ಅಶ್ನತಃ ಸ್ಯುಃ
ತುಷ್ಟಿಃ ಪುಷ್ಟಿಃ ಕ್ಷುತ್ ಅಪಾಯಃ ಅನುಘಾಸಮ್ ॥ 42॥
ಇತಿ ಅಚ್ಯುತ ಅಂಘ್ರಿಂ ಭಜತಃ ಅನುವೃತ್ತ್ಯಾ
ಭಕ್ತಿಃ ವಿರಕ್ತಿಃ ಭಗವತ್ ಪ್ರಬೋಧಃ ।
ಭವಂತಿ ವೈ ಭಾಗವತಸ್ಯ ರಾಜನ್
ತತಃ ಪರಾಂ ಶಾಂತಿಂ ಉಪೈತಿ ಸಾಕ್ಷಾತ್ ॥ 43॥
ರಾಜಾ ಉವಾಚ ।
ಅಥ ಭಾಗವತಂ ಬ್ರೂತ ಯತ್ ಧರ್ಮಃ ಯಾದೃಶಃ ನೃಣಾಮ್ ।
ಯಥಾ ಚರತಿ ಯತ್ ಬ್ರೂತೇ ಯೈಃ ಲಿಂಗೈಃ ಭಗವತ್ ಪ್ರಿಯಃ ॥ 44॥
ಹರಿಃ ಉವಾಚ ।
ಸರ್ವಭೂತೇಷು ಯಃ ಪಶ್ಯೇತ್ ಭಗವತ್ ಭಾವ ಆತ್ಮನಃ ।
ಭೂತಾನಿ ಭಾಗವತಿ ಆತ್ಮನಿ ಏಷ ಭಾಗವತೌತ್ತಮಃ ॥ 45॥
ಈಶ್ವರೇ ತತ್ ಅಧೀನೇಷು ಬಾಲಿಶೇಷು ದ್ವಿಷತ್ಸು ಚ ।
ಪ್ರೇಮಮೈತ್ರೀಕೃಪಾಉಪೇಕ್ಷಾ ಯಃ ಕರೋತಿ ಸ ಮಧ್ಯಮಃ ॥ 46॥
ಅರ್ಚಾಯಾಂ ಏವ ಹರಯೇ ಪೂಜಾಂ ಯಃ ಶ್ರದ್ಧಯಾ ಈಹತೇ ।
ನ ತತ್ ಭಕ್ತೇಷು ಚ ಅನ್ಯೇಷು ಸಃ ಭಕ್ತಃ ಪ್ರಾಕೃತಃ ಸ್ಮೃತಃ ॥
47॥
ಗೃಹೀತ್ವಾ ಅಪಿ ಇಂದ್ರಿಯೈಃ ಅರ್ಥಾನ್ಯಃ ನ ದ್ವೇಷ್ಟಿ ನ ಹೃಷ್ಯತಿ ।
ವಿಷ್ಣೋಃ ಮಾಯಾಂ ಇದಂ ಪಶ್ಯನ್ ಸಃ ವೈ ಭಾಗವತ ಉತ್ತಮಃ ॥ 48॥
ದೇಹೈಂದ್ರಿಯಪ್ರಾಣಮನಃಧಿಯಾಂ ಯಃ
ಜನ್ಮಾಪಿಅಯಕ್ಷುತ್ ಭಯತರ್ಷಕೃಚ್ಛ್ರೈಃ ।
ಸಂಸಾರಧರ್ಮೈಃ ಅವಿಮುಹ್ಯಮಾನಃ
ಸ್ಮೃತ್ಯಾ ಹರೇಃ ಭಾಗವತಪ್ರಧಾನಃ ॥ 49॥
ನ ಕಾಮಕರ್ಮಬೀಜಾನಾಂ ಯಸ್ಯ ಚೇತಸಿ ಸಂಭವಃ ।
ವಾಸುದೇವೇಕನಿಲಯಃ ಸಃ ವೈ ಭಾಗವತ ಉತ್ತಮಃ ॥ 50॥
ನ ಯಸ್ಯ ಜನ್ಮಕರ್ಮಭ್ಯಾಂ ನ ವರ್ಣಾಶ್ರಮಜಾತಿಭಿಃ ।
ಸಜ್ಜತೇ ಅಸ್ಮಿನ್ ಅಹಂಭಾವಃ ದೇಹೇ ವೈ ಸಃ ಹರೇಃ ಪ್ರಿಯಃ ॥ 51॥
ನ ಯಸ್ಯ ಸ್ವಃ ಪರಃ ಇತಿ ವಿತ್ತೇಷು ಆತ್ಮನಿ ವಾ ಭಿದಾ ।
ಸರ್ವಭೂತಸಮಃ ಶಾಂತಃ ಸಃ ವೌ ಭಾಗವತ ಉತ್ತಮಃ ॥ 52॥
ತ್ರಿಭುವನವಿಭವಹೇತವೇ ಅಪಿ ಅಕುಂಠಸ್ಮೃತಿಃ
ಅಜಿತಾತ್ಮಸುರಾದಿಭಿಃ ವಿಮೃಗ್ಯಾತ್ ।
ನ ಚಲತಿ ಭಗವತ್ ಪದ ಅರವಿಂದಾತ್
ಲವನಿಮಿಷ ಅರ್ಧಂ ಅಪಿ ಯಃ ಸಃ ವೈಷ್ಣವ ಅಗ್ರ್ಯಃ ॥ 53॥
ಭಗವತಃ ಉರುವಿಕ್ರಮ ಅಂಘ್ರಿಶಾಖಾ
ನಖಮಣಿಚಂದ್ರಿಕಯಾ ನಿರಸ್ತತಾಪೇ ।
ಹೃದಿ ಕಥಂ ಉಪಸೀದತಾಂ ಪುನಃ ಸಃ
ಪ್ರಭವತಿ ಚಂದ್ರಃ ಇವ ಉದಿತೇ ಅರ್ಕತಾಪಃ ॥ 54॥
ವಿಸೃಜತಿ ಹೃದಯಂ ನ ಯಸ್ಯ ಸಾಕ್ಷಾತ್
ಹರಿಃ ಅವಶ ಅಭಿಹಿತಃ ಅಪಿ ಅಘೌಘನಾಶಃ ।
ಪ್ರಣಯಃ ಅಶನಯಾ ಧೃತ ಅಂಘ್ರಿಪದ್ಮಃ
ಸಃ ಭವತಿ ಭಾಗವತಪ್ರಧಾನಃ ಉಕ್ತಃ ॥ 55॥
ಇತಿ ಶ್ರೀಮತ್ ಭಾಗವತೇ ಮಹಾಪುರಾಣೇ ಪಾರಮಹಂಸ್ಯಾಂ
ಸಂಹಿತಾಯಾಂ ಏಕಾದಶಸ್ಕಂಧೇ ನಿಮಿಜಾಯಂತಸಂವಾದೇ ದ್ವಿತೀಯಃ
ಅಧ್ಯಾಯಃ ॥