ವ್ರಜೇ ಪ್ರಸಿದ್ಧಂ ನವನೀತಚೌರಂ
ಗೋಪಾಂಗನಾನಾಂ ಚ ದುಕೂಲಚೌರಮ್ ।
ಅನೇಕಜನ್ಮಾರ್ಜಿತಪಾಪಚೌರಂ
ಚೌರಾಗ್ರಗಣ್ಯಂ ಪುರುಷಂ ನಮಾಮಿ ॥ 1॥
ಶ್ರೀರಾಧಿಕಾಯಾ ಹೃದಯಸ್ಯ ಚೌರಂ
ನವಾಂಬುದಶ್ಯಾಮಲಕಾಂತಿಚೌರಮ್ ।
ಪದಾಶ್ರಿತಾನಾಂ ಚ ಸಮಸ್ತಚೌರಂ
ಚೌರಾಗ್ರಗಣ್ಯಂ ಪುರುಷಂ ನಮಾಮಿ ॥ 2॥
ಅಕಿಂಚನೀಕೃತ್ಯ ಪದಾಶ್ರಿತಂ ಯಃ
ಕರೋತಿ ಭಿಕ್ಷುಂ ಪಥಿ ಗೇಹಹೀನಮ್ ।
ಕೇನಾಪ್ಯಹೋ ಭೀಷಣಚೌರ ಈದೃಗ್-
ದೃಷ್ಟಃಶ್ರುತೋ ವಾ ನ ಜಗತ್ತ್ರಯೇಽಪಿ ॥ 3॥
ಯದೀಯ ನಾಮಾಪಿ ಹರತ್ಯಶೇಷಂ
ಗಿರಿಪ್ರಸಾರಾನ್ ಅಪಿ ಪಾಪರಾಶೀನ್ ।
ಆಶ್ಚರ್ಯರೂಪೋ ನನು ಚೌರ ಈದೃಗ್
ದೃಷ್ಟಃ ಶ್ರುತೋ ವಾ ನ ಮಯಾ ಕದಾಪಿ ॥ 4॥
ಧನಂ ಚ ಮಾನಂ ಚ ತಥೇಂದ್ರಿಯಾಣಿ
ಪ್ರಾಣಾಂಶ್ಚ ಹೃತ್ವಾ ಮಮ ಸರ್ವಮೇವ ।
ಪಲಾಯಸೇ ಕುತ್ರ ಧೃತೋಽದ್ಯ ಚೌರ
ತ್ವಂ ಭಕ್ತಿದಾಮ್ನಾಸಿ ಮಯಾ ನಿರುದ್ಧಃ ॥ 5॥
ಛಿನತ್ಸಿ ಘೋರಂ ಯಮಪಾಶಬಂಧಂ
ಭಿನತ್ಸಿ ಭೀಮಂ ಭವಪಾಶಬಂಧಮ್ ।
ಛಿನತ್ಸಿ ಸರ್ವಸ್ಯ ಸಮಸ್ತಬಂಧಂ
ನೈವಾತ್ಮನೋ ಭಕ್ತಕೃತಂ ತು ಬಂಧಮ್ ॥ 6॥
ಮನ್ಮಾನಸೇ ತಾಮಸರಾಶಿಘೋರೇ
ಕಾರಾಗೃಹೇ ದುಃಖಮಯೇ ನಿಬದ್ಧಃ ।
ಲಭಸ್ವ ಹೇ ಚೌರ! ಹರೇ! ಚಿರಾಯ
ಸ್ವಚೌರ್ಯದೋಷೋಚಿತಮೇವ ದಂಡಮ್ ॥ 7॥
ಕಾರಾಗೃಹೇ ವಸ ಸದಾ ಹೃದಯೇ ಮದೀಯೇ
ಮದ್ಭಕ್ತಿಪಾಶದೃಢಬಂಧನನಿಶ್ಚಲಃ ಸನ್ ।
ತ್ವಾಂ ಕೃಷ್ಣ ಹೇ! ಪ್ರಲಯಕೋಟಿಶತಾಂತರೇಽಪಿ
ಸರ್ವಸ್ವಚೌರ! ಹೃದಯಾನ್ ನ ಹಿ ಮೋಚಯಾಮಿ ॥ 8॥
ಇತಿ ಶ್ರೀಬಿಲ್ವಮಂಗಲಠಾಕೂರವಿರಚಿತಂ ಚೌರಾಷ್ಟಕಂ ಸಂಪೂರ್ಣಮ್ ।
ಚೌರಗ್ರಗಣ್ಯ ಪುರುಷಾಷ್ಟಕಮ್ ।