ನಕ್ಷತ್ರ ಸೂಕ್ತಂ (ನಕ್ಷತ್ರೇಷ್ಟಿ)ತೈತ್ತಿರೀಯ ಬ್ರಾಹ್ಮಣ – ಅಷ್ಟಕಂ 3, ಪ್ರಶ್ನಃ 1,
ತೈತ್ತಿರೀಯ ಸಂಹಿತಾ – ಕಾಂಡ 3, ಪ್ರಪಾಠಕಃ 5, ಅನುವಾಕಂ 1ನಕ್ಷತ್ರಂ – ಕೃತ್ತಿಕಾ, ದೇವತಾ – ಅಗ್ನಿಃ
ಓಂ ಅ॒ಗ್ನಿರ್ನಃ॑ ಪಾತು॒ ಕೃತ್ತಿ॑ಕಾಃ । ನಕ್ಷ॑ತ್ರಂ ದೇ॒ವಮಿಂ॑ದ್ರಿ॒ಯಮ್ ।
ಇ॒ದಮಾ॑ಸಾಂ-ವಿಁಚಕ್ಷ॒ಣಮ್ । ಹ॒ವಿರಾ॒ಸಂ ಜು॑ಹೋತನ ।
ಯಸ್ಯ॒ ಭಾಂತಿ॑ ರ॒ಶ್ಮಯೋ॒ ಯಸ್ಯ॑ ಕೇ॒ತವಃ॑ । ಯಸ್ಯೇ॒ಮಾ ವಿಶ್ವಾ॒ ಭುವ॑ನಾನಿ॒ ಸರ್ವಾ᳚ ।
ಸ ಕೃತ್ತಿ॑ಕಾಭಿ-ರ॒ಭಿಸಂ॒​ವಁಸಾ॑ನಃ । ಅ॒ಗ್ನಿರ್ನೋ॑ ದೇ॒ವಸ್ಸು॑ವಿ॒ತೇ ದ॑ಧಾತು ॥ 1ನಕ್ಷತ್ರಂ – ರೋಹಿಣೀ, ದೇವತಾ – ಪ್ರಜಾಪತಿಃ
ಪ್ರ॒ಜಾಪ॑ತೇ ರೋಹಿ॒ಣೀವೇ॑ತು॒ ಪತ್ನೀ᳚ । ವಿ॒ಶ್ವರೂ॑ಪಾ ಬೃಹ॒ತೀ ಚಿ॒ತ್ರಭಾ॑ನುಃ ।
ಸಾ ನೋ॑ ಯ॒ಜ್ಞಸ್ಯ॑ ಸುವಿ॒ತೇ ದ॑ಧಾತು । ಯಥಾ॒ ಜೀವೇ॑ಮ ಶ॒ರದ॒ಸ್ಸವೀ॑ರಾಃ ।
ರೋ॒ಹಿ॒ಣೀ ದೇ॒ವ್ಯುದ॑ಗಾತ್ಪು॒ರಸ್ತಾ᳚ತ್ । ವಿಶ್ವಾ॑ ರೂ॒ಪಾಣಿ॑ ಪ್ರತಿ॒ಮೋದ॑ಮಾನಾ ।
ಪ್ರ॒ಜಾಪ॑ತಿಗ್ಂ ಹ॒ವಿಷಾ॑ ವ॒ರ್ಧಯಂ॑ತೀ । ಪ್ರಿ॒ಯಾ ದೇ॒ವಾನಾ॒-ಮುಪ॑ಯಾತು ಯ॒ಜ್ಞಮ್ ॥ 2ನಕ್ಷತ್ರಂ – ಮೃಗಶೀರ್​ಷಃ, ದೇವತಾ – ಸೋಮಃ
ಸೋಮೋ॒ ರಾಜಾ॑ ಮೃಗಶೀ॒ರ್॒ಷೇಣ॒ ಆಗನ್ನ್॑ । ಶಿ॒ವಂ ನಕ್ಷ॑ತ್ರಂ ಪ್ರಿ॒ಯಮ॑ಸ್ಯ॒ ಧಾಮ॑ ।
ಆ॒ಪ್ಯಾಯ॑ಮಾನೋ ಬಹು॒ಧಾ ಜನೇ॑ಷು । ರೇತಃ॑ ಪ್ರ॒ಜಾಂ-ಯಁಜ॑ಮಾನೇ ದಧಾತು ।
ಯತ್ತೇ॒ ನಕ್ಷ॑ತ್ರಂ ಮೃಗಶೀ॒ರ್॒ಷಮಸ್ತಿ॑ । ಪ್ರಿ॒ಯಗ್ಂ ರಾ॑ಜನ್ ಪ್ರಿ॒ಯತ॑ಮಂ ಪ್ರಿ॒ಯಾಣಾ᳚ಮ್ ।
ತಸ್ಮೈ॑ ತೇ ಸೋಮ ಹ॒ವಿಷಾ॑ ವಿಧೇಮ । ಶನ್ನ॑ ಏಧಿ ದ್ವಿ॒ಪದೇ॒ ಶಂಚತು॑ಷ್ಪದೇ ॥ 3ನಕ್ಷತ್ರಂ – ಆರ್ದ್ರಾ, ದೇವತಾ – ರುದ್ರಃ
ಆ॒ರ್ದ್ರಯಾ॑ ರು॒ದ್ರಃ ಪ್ರಥ॑ಮಾ ನ ಏತಿ । ಶ್ರೇಷ್ಠೋ॑ ದೇ॒ವಾನಾಂ॒ ಪತಿ॑ರಘ್ನಿ॒ಯಾನಾ᳚ಮ್ ।
ನಕ್ಷ॑ತ್ರಮಸ್ಯ ಹ॒ವಿಷಾ॑ ವಿಧೇಮ । ಮಾ ನಃ॑ ಪ್ರ॒ಜಾಗ್ಂ ರೀ॑ರಿಷ॒ನ್ಮೋತ ವೀ॒ರಾನ್ ।
ಹೇ॒ತೀ ರು॒ದ್ರಸ್ಯ॒ ಪರಿ॑ಣೋ ವೃಣಕ್ತು । ಆ॒ರ್ದ್ರಾ ನಕ್ಷ॑ತ್ರಂ ಜುಷತಾಗ್ಂ ಹ॒ವಿರ್ನಃ॑ ।
ಪ್ರ॒ಮುಂ॒ಚಮಾ॑ನೌ ದುರಿ॒ತಾನಿ॒ ವಿಶ್ವಾ᳚ । ಅಪಾ॒ಘಶಗ್ಂ॑ ಸನ್ನು-ದತಾ॒ಮರಾ॑ತಿಮ್ ॥ 4ನಕ್ಷತ್ರಂ – ಪುನರ್ವಸು, ದೇವತಾ – ಅದಿತಿಃ
ಪುನ॑ರ್ನೋ ದೇ॒ವ್ಯದಿ॑ತಿ-ಸ್ಪೃಣೋತು । ಪುನ॑ರ್ವಸೂ ನಃ॒ ಪುನ॒ರೇತಾಂ᳚-ಯಁ॒ಜ್ಞಮ್ ।
ಪುನ॑ರ್ನೋ ದೇ॒ವಾ ಅ॒ಭಿಯಂ॑ತು॒ ಸರ್ವೇ᳚ । ಪುನಃ॑ ಪುನರ್ವೋ ಹ॒ವಿಷಾ॑ ಯಜಾಮಃ ।
ಏ॒ವಾ ನ ದೇ॒ವ್ಯ-ದಿ॑ತಿರನ॒ರ್ವಾ । ವಿಶ್ವ॑ಸ್ಯ ಭ॒ರ್ತ್ರೀ ಜಗ॑ತಃ ಪ್ರತಿ॒ಷ್ಠಾ ।
ಪುನ॑ರ್ವಸೂ ಹ॒ವಿಷಾ॑ ವ॒ರ್ಧಯಂ॑ತೀ । ಪ್ರಿ॒ಯಂ ದೇ॒ವಾನಾ॒-ಮಪ್ಯೇ॑ತು॒ ಪಾಥಃ॑ ॥ 5ನಕ್ಷತ್ರಂ – ಪುಷ್ಯಃ, ದೇವತಾ – ಬೃಹಸ್ಪತಿಃ
ಬೃಹ॒ಸ್ಪತಿಃ॑ ಪ್ರಥ॒ಮಂಜಾಯ॑ಮಾನಃ । ತಿ॒ಷ್ಯಂ॑ ನಕ್ಷ॑ತ್ರಮ॒ಭಿ ಸಂಬ॑ಭೂವ ।
ಶ್ರೇಷ್ಠೋ॑ ದೇ॒ವಾನಾಂ॒ ಪೃತ॑ನಾಸು ಜಿ॒ಷ್ಣುಃ । ದಿ॒ಶೋಽನು॒ ಸರ್ವಾ॒ ಅಭ॑ಯನ್ನೋ ಅಸ್ತು ।
ತಿ॒ಷ್ಯಃ॑ ಪು॒ರಸ್ತಾ॑ದು॒ತ ಮ॑ಧ್ಯ॒ತೋ ನಃ॑ । ಬೃಹ॒ಸ್ಪತಿ॑ರ್ನಃ॒ ಪರಿ॑ಪಾತು ಪ॒ಶ್ಚಾತ್ ।
ಬಾಧೇ॑ ತಾಂ॒ದ್ವೇಷೋ॒ ಅಭ॑ಯಂ ಕೃಣುತಾಮ್ । ಸು॒ವೀರ್ಯ॑ಸ್ಯ॒ ಪತ॑ಯಸ್ಯಾಮ ॥ 6ನಕ್ಷತ್ರಂ -ಆಶ್ರೇಷಂ, ದೇವತಾ – ಸರ್ಪಾಃ
ಇ॒ದಗ್ಂ ಸ॒ರ್ಪೇಭ್ಯೋ॑ ಹ॒ವಿರ॑ಸ್ತು॒ ಜುಷ್ಟ᳚ಮ್ । ಆ॒ಶ್ರೇ॒ಷಾ ಯೇಷಾ॑ಮನು॒ಯಂತಿ॒ ಚೇತಃ॑ ।
ಯೇ ಅಂ॒ತರಿ॑ಕ್ಷಂ ಪೃಥಿ॒ವೀಂ-ಕ್ಷಿ॒ಯಂತಿ॑ । ತೇನ॑ ಸ್ಸ॒ರ್ಪಾಸೋ॒ ಹವ॒ಮಾಗ॑ಮಿಷ್ಠಾಃ ।
ಯೇ ರೋ॑ಚ॒ನೇ ಸೂರ್ಯ॒ಸ್ಯಾಪಿ॑ ಸ॒ರ್ಪಾಃ । ಯೇ ದಿವಂ॑ ದೇ॒ವೀ-ಮನು॑ಸಂ॒ಚರಂ॑ತಿ ।
ಯೇಷಾ॑ಮಾಶ್ರೇ॒ಷಾ ಅ॑ನು॒ಯಂತಿ॒ ಕಾಮ᳚ಮ್ । ತೇಭ್ಯ॑-ಸ್ಸ॒ರ್ಪೇಭ್ಯೋ॒ ಮಧು॑-ಮಜ್ಜುಹೋಮಿ ॥ 7ನಕ್ಷತ್ರಂ – ಮಘಾ, ದೇವತಾ – ಪಿತರಃ
ಉಪ॑ಹೂತಾಃ ಪಿ॒ತರೋ॒ ಯೇ ಮ॒ಘಾಸು॑ । ಮನೋ॑ಜವಸ-ಸ್ಸು॒ಕೃತ॑-ಸ್ಸುಕೃ॒ತ್ಯಾಃ ।
ತೇ ನೋ॒ ನಕ್ಷ॑ತ್ರೇ॒ ಹವ॒ಮಾಗ॑ಮಿಷ್ಠಾಃ । ಸ್ವ॒ಧಾಭಿ॑ರ್ಯ॒ಜ್ಞಂ ಪ್ರಯ॑ತಂ ಜುಷಂತಾಮ್ ।
ಯೇ ಅ॑ಗ್ನಿದ॒ಗ್ಧಾ ಯೇಽನ॑ಗ್ನಿ-ದಗ್ಧಾಃ । ಯೇ॑ಽಮುಲ್ಲೋ॒ಕಂ ಪಿ॒ತರಃ॑, ಕ್ಷಿ॒ಯಂತಿ॑ ।
ಯಾಗ್ಗ್​ಶ್ಚ॑ ವಿ॒ದ್ಮಯಾಗ್ಂ ಉ॑ ಚ॒ ನ ಪ್ರ॑ವಿ॒ದ್ಮ । ಮ॒ಘಾಸು॑ ಯ॒ಜ್ಞಗ್ಂ ಸುಕೃ॑ತಂ ಜುಷಂತಾಮ್ ॥ 8ನಕ್ಷತ್ರಂ – ಪೂರ್ವಫಲ್ಗುನೀ, ದೇವತಾ – ಅರ್ಯಮಾ
ಗವಾಂ॒ ಪತಿಃ॒ ಫಲ್ಗು॑ನೀ-ನಾಮಸಿ॒ ತ್ವಮ್ । ತದ॑ರ್ಯಮನ್ವರುಣ ಮಿತ್ರ॒ ಚಾರು॑ ।
ತಂ ತ್ವಾ॑ ವ॒ಯಗ್ಂ ಸ॑ನಿ॒ತಾರಗ್ಂ॑ ಸನೀ॒ನಾಮ್ । ಜೀ॒ವಾ ಜೀವಂ॑ತ॒ಮುಪ॒ ಸಂ​ವಿಁ॑ಶೇಮ ।
ಯೇನೇ॒ಮಾ ವಿಶ್ವಾ॒ ಭುವ॑ನಾನಿ॒ ಸಂಜಿ॑ತಾ । ಯಸ್ಯ॑ ದೇ॒ವಾ ಅ॑ನುಸಂ॒​ಯಂಁತಿ॒ ಚೇತಃ॑ ।
ಅ॒ರ್ಯ॒ಮಾ ರಾಜಾ॒ಽಜರ॒ಸ್ತು ವಿ॑ಷ್ಮಾನ್ । ಫಲ್ಗು॑ನೀನಾ-ಮೃಷ॒ಭೋ ರೋ॑ರವೀತಿ ॥ 9ನಕ್ಷತ್ರಂ – ಉತ್ತರ ಫಲ್ಗುನೀ, ದೇವತಾ – ಭಗಃ
ಶ್ರೇಷ್ಠೋ॑ ದೇ॒ವಾನಾಂ᳚ ಭಗವೋ ಭಗಾಸಿ । ತತ್ತ್ವಾ॑ ವಿದುಃ॒ ಫಲ್ಗು॑ನೀ॒-ಸ್ತಸ್ಯ॑ ವಿತ್ತಾತ್ ।
ಅ॒ಸ್ಮಭ್ಯಂ॑-ಕ್ಷ॒ತ್ರಮ॒ಜರಗ್ಂ॑ ಸು॒ವೀರ್ಯ᳚ಮ್ । ಗೋಮ॒ದಶ್ವ॑-ವ॒ದುಪ॒ಸನ್ನು॑-ದೇ॒ಹ ।
ಭಗೋ॑ಹ ದಾ॒ತಾ ಭಗ॒ ಇತ್ಪ್ರ॑ದಾ॒ತಾ । ಭಗೋ॑ ದೇ॒ವೀಃ ಫಲ್ಗು॑ನೀ॒-ರಾವಿ॑ವೇಶ ।
ಭಗ॒ಸ್ಯೇತ್ತಂ ಪ್ರ॑ಸ॒ವಂ ಗ॑ಮೇಮ । ಯತ್ರ॑ ದೇ॒ವೈ-ಸ್ಸ॑ಧ॒ಮಾದಂ॑ ಮದೇಮ ॥ 10ನಕ್ಷತ್ರಂ – ಹಸ್ತಃ, ದೇವತಾ – ಸವಿತಾ
ಆಯಾ॑ತು ದೇ॒ವ-ಸ್ಸ॑ವಿ॒ತೋ ಪ॑ಯಾತು । ಹಿ॒ರ॒ಣ್ಯಯೇ॑ನ ಸು॒ವೃತಾ॒ ರಥೇ॑ನ ।
ವಹ॒ನ॒, ಹಸ್ತಗ್ಂ॑ ಸು॒ಭಗಂ॑-ವಿಁದ್ಮ॒ನಾಪ॑ಸಮ್ । ಪ್ರ॒ಯಚ್ಛಂ॑ತಂ॒ ಪಪು॑ರಿಂ॒ ಪುಣ್ಯ॒ಮಚ್ಛ॑ ।
ಹಸ್ತಃ॒ ಪ್ರಯ॑ಚ್ಛ ತ್ವ॒ಮೃತಂ॒-ವಁಸೀ॑ಯಃ । ದಕ್ಷಿ॑ಣೇನ॒ ಪ್ರತಿ॑ಗೃಭ್ಣೀಮ ಏನತ್ ।
ದಾ॒ತಾರ॑-ಮ॒ದ್ಯ ಸ॑ವಿ॒ತಾ ವಿ॑ದೇಯ । ಯೋ ನೋ॒ ಹಸ್ತಾ॑ಯ ಪ್ರಸು॒ವಾತಿ॑ ಯ॒ಜ್ಞಮ್ ॥ 11ನಕ್ಷತ್ರಂ – ಚಿತ್ರಾ, ದೇವತಾ – ತ್ವಷ್ಟಾ
ತ್ವಷ್ಟಾ॒ ನಕ್ಷ॑ತ್ರ-ಮ॒ಭ್ಯೇ॑ತಿ ಚಿ॒ತ್ರಾಮ್ । ಸು॒ಭಗ್ಂ ಸ॑ಸಂ​ಯುಁವ॒ತಿಗ್ಂ ರೋಚ॑ಮಾನಾಮ್ ।
ನಿ॒ವೇ॒ಶಯ॑-ನ್ನ॒ಮೃತಾ॒-ನ್ಮರ್ತ್ಯಾಗ್ಗ್॑ಶ್ಚ । ರೂ॒ಪಾಣಿ॑ ಪಿ॒ಗ್ಂ॒ಶನ್ ಭುವ॑ನಾನಿ॒ ವಿಶ್ವಾ᳚ ।
ತನ್ನ॒ಸ್ತ್ವಷ್ಟಾ॒ ತದು॑ ಚಿ॒ತ್ರಾ ವಿಚ॑ಷ್ಟಾಮ್ । ತನ್ನಕ್ಷ॑ತ್ರಂ ಭೂರಿ॒ದಾ ಅ॑ಸ್ತು॒ ಮಹ್ಯ᳚ಮ್ ।
ತನ್ನಃ॑ ಪ್ರ॒ಜಾಂ-ವೀಁ॒ರವ॑ತೀಗ್ಂ ಸನೋತು । ಗೋಭಿ॑ರ್ನೋ॒ ಅಶ್ವೈ॒-ಸ್ಸಮ॑ನಕ್ತು ಯ॒ಜ್ಞಮ್ ॥ 12ನಕ್ಷತ್ರಂ – ಸ್ವಾತೀ, ದೇವತಾ – ವಾಯುಃ
ವಾ॒ಯು-ರ್ನಕ್ಷ॑ತ್ರ-ಮ॒ಭ್ಯೇ॑ತಿ॒ ನಿಷ್ಟ್ಯಾ᳚ಮ್ । ತಿ॒ಗ್ಮಶೃಂ॑ಗೋ ವೃಷ॒ಭೋ ರೋರು॑ವಾಣಃ ।
ಸ॒ಮೀ॒ರಯ॒ನ್ ಭುವ॑ನಾ ಮಾತ॒ರಿಶ್ವಾ᳚ । ಅಪ॒ ದ್ವೇಷಾಗ್ಂ॑ಸಿ ನುದತಾ॒ಮರಾ॑ತೀಃ ।
ತನ್ನೋ॑ ವಾ॒ಯಸ್ತದು॒ ನಿಷ್ಟ್ಯಾ॑ ಶೃಣೋತು । ತನ್ನಕ್ಷ॑ತ್ರಂ ಭೂರಿ॒ದಾ ಅ॑ಸ್ತು॒ ಮಹ್ಯ᳚ಮ್ ।
ತನ್ನೋ॑ ದೇ॒ವಾಸೋ॒ ಅನು॑ ಜಾನಂತು॒ ಕಾಮ᳚ಮ್ । ಯಥಾ॒ ತರೇ॑ಮ ದುರಿ॒ತಾನಿ॒ ವಿಶ್ವಾ᳚ ॥ 13ನಕ್ಷತ್ರಂ – ವಿಶಾಖಾ, ದೇವತಾ – ಇಂದ್ರಾಗ್ನೀ
ದೂ॒ರಮ॒ಸ್ಮಚ್ಛತ್ರ॑ವೋ ಯಂತು ಭೀ॒ತಾಃ । ತದಿಂ॑ದ್ರಾ॒ಗ್ನೀ ಕೃ॑ಣುತಾಂ॒ ತದ್ವಿಶಾ॑ಖೇ ।
ತನ್ನೋ॑ ದೇ॒ವಾ ಅನು॑ಮದಂತು ಯ॒ಜ್ಞಮ್ । ಪ॒ಶ್ಚಾತ್ ಪು॒ರಸ್ತಾ॒-ದಭ॑ಯನ್ನೋ ಅಸ್ತು ।
ನಕ್ಷ॑ತ್ರಾಣಾ॒-ಮಧಿ॑ಪತ್ನೀ॒ ವಿಶಾ॑ಖೇ । ಶ್ರೇಷ್ಠಾ॑-ವಿಂದ್ರಾ॒ಗ್ನೀ ಭುವ॑ನಸ್ಯ ಗೋ॒ಪೌ ।
ವಿಷೂ॑ಚ॒-ಶ್ಶತ್ರೂ॑ನಪ॒ಬಾಧ॑ಮಾನೌ । ಅಪ॒ಕ್ಷುಧ॑-ನ್ನುದತಾ॒ಮರಾ॑ತಿಮ್ ॥ 14ಪೌರ್ಣಮಾಸಿ
ಪೂ॒ರ್ಣಾ ಪ॒ಶ್ಚಾದು॒ತ ಪೂ॒ರ್ಣಾ ಪು॒ರಸ್ತಾ᳚ತ್ । ಉನ್ಮ॑ಧ್ಯ॒ತಃ ಪೌ᳚ರ್ಣಮಾ॒ಸೀ ಜಿ॑ಗಾಯ ।
ತಸ್ಯಾಂ᳚ ದೇ॒ವಾ ಅಧಿ॑ ಸಂ॒-ವಁಸಂ॑ತಃ । ಉ॒ತ್ತ॒ಮೇ ನಾಕ॑ ಇ॒ಹ ಮಾ॑ದಯಂತಾಮ್ ।
ಪೃ॒ಥ್ವೀ ಸು॒ವರ್ಚಾ॑ ಯುವ॒ತಿ-ಸ್ಸ॒ಜೋಷಾಃ᳚ । ಪೌ॒ರ್ಣ॒ಮಾ॒ಸ್ಯುದ॑ಗಾ॒-ಚ್ಛೋಭ॑ಮಾನಾ ।
ಆ॒ಪ್ಯಾ॒ಯಯಂ॑ತೀ ದುರಿ॒ತಾನಿ॒ ವಿಶ್ವಾ᳚ । ಉ॒ರುಂ ದುಹಾಂ॒-ಯಁಜ॑ಮಾನಾಯ ಯ॒ಜ್ಞಮ್ ॥ 15ನಕ್ಷತ್ರಂ – ಅನೂರಾಧಾ, ದೇವತಾ – ಮಿತ್ರಃ
ಋ॒ದ್ಧ್ಯಾಸ್ಮ॑ ಹ॒ವ್ಯೈ-ರ್ನಮ॑ಸೋಪ॒-ಸದ್ಯ॑ । ಮಿ॒ತ್ರಂ ದೇ॒ವಂ ಮಿ॑ತ್ರ॒ಧೇಯ॑ನ್ನೋ ಅಸ್ತು ।
ಅ॒ನೂ॒ರಾ॒ಧಾನ್, ಹ॒ವಿಷಾ॑ ವ॒ರ್ಧಯಂ॑ತಃ । ಶ॒ತಂ ಜೀ॑ವೇಮ ಶ॒ರದ॒-ಸ್ಸವೀ॑ರಾಃ ।
ಚಿ॒ತ್ರಂ-ನಕ್ಷ॑ತ್ರ॒-ಮುದ॑ಗಾ-ತ್ಪು॒ರಸ್ತಾ᳚ತ್ । ಅ॒ನೂ॒ರಾ॒ಧಾ ಸ॒ ಇತಿ॒ ಯದ್ವದಂ॑ತಿ ।
ತನ್ಮಿ॒ತ್ರ ಏ॑ತಿ ಪ॒ಥಿಭಿ॑-ರ್ದೇವ॒ಯಾನೈಃ᳚ । ಹಿ॒ರ॒ಣ್ಯಯೈ॒-ರ್ವಿತ॑ತೈ-ರಂ॒ತರಿ॑ಕ್ಷೇ ॥ 16ನಕ್ಷತ್ರಂ – ಜ್ಯೇಷ್ಠಾ, ದೇವತಾ – ಇಂದ್ರಃ
ಇಂದ್ರೋ᳚ ಜ್ಯೇ॒ಷ್ಠಾ ಮನು॒ ನಕ್ಷ॑ತ್ರಮೇತಿ । ಯಸ್ಮಿ॑ನ್ ವೃ॒ತ್ರಂ-ವೃಁ॑ತ್ರ॒ ತೂರ್ಯೇ॑ ತ॒ತಾರ॑ ।
ತಸ್ಮಿ॑ನ್ವ॒ಯ-ಮ॒ಮೃತಂ॒ ದುಹಾ॑ನಾಃ । ಕ್ಷುಧಂ॑ತರೇಮ॒ ದುರಿ॑ತಿಂ॒ ದುರಿ॑ಷ್ಟಿಮ್ ।
ಪು॒ರಂ॒ದ॒ರಾಯ॑ ವೃಷ॒ಭಾಯ॑ ಧೃ॒ಷ್ಣವೇ᳚ । ಅಷಾ॑ಢಾಯ॒ ಸಹ॑ಮಾನಾಯ ಮೀ॒ಢುಷೇ᳚ ।
ಇಂದ್ರಾ॑ಯ ಜ್ಯೇ॒ಷ್ಠಾ ಮಧು॑ಮ॒ದ್ದುಹಾ॑ನಾ । ಉ॒ರುಂ ಕೃ॑ಣೋತು॒ ಯಜ॑ಮಾನಾಯ ಲೋ॒ಕಮ್ ॥ 17ನಕ್ಷತ್ರಂ – ಮೂಲಂ, ದೇವತಾ – ಪ್ರಜಾಪತಿಃ
ಮೂಲಂ॑ ಪ್ರ॒ಜಾಂ-ವೀಁ॒ರವ॑ತೀಂ-ವಿಁದೇಯ । ಪರಾ᳚ಚ್ಯೇತು॒ ನಿರ್​ಋ॑ತಿಃ ಪರಾ॒ಚಾ ।
ಗೋಭಿ॒-ರ್ನಕ್ಷ॑ತ್ರಂ ಪ॒ಶುಭಿ॒-ಸ್ಸಮ॑ಕ್ತಮ್ । ಅಹ॑-ರ್ಭೂಯಾ॒-ದ್ಯಜ॑ಮಾನಾಯ॒ ಮಹ್ಯ᳚ಮ್ ।
ಅಹ॑ರ್ನೋ ಅ॒ದ್ಯ ಸು॑ವಿ॒ತೇ ದ॑ಧಾತು । ಮೂಲಂ॒ ನಕ್ಷ॑ತ್ರ॒ಮಿತಿ॒ ಯದ್ವದಂ॑ತಿ ।
ಪರಾ॑ಚೀಂ-ವಾಁ॒ಚಾ ನಿರ್​ಋ॑ತಿಂ ನುದಾಮಿ । ಶಿ॒ವಂ ಪ್ರ॒ಜಾಯೈ॑ ಶಿ॒ವಮ॑ಸ್ತು॒ ಮಹ್ಯ᳚ಮ್ ॥ 18ನಕ್ಷತ್ರಂ – ಪೂರ್ವಾಷಾಢಾ, ದೇವತಾ – ಆಪಃ
ಯಾ ದಿ॒ವ್ಯಾ ಆಪಃ॒ ಪಯ॑ಸಾ ಸಂಬಭೂ॒ವುಃ । ಯಾ ಅಂ॒ತರಿ॑ಕ್ಷ ಉ॒ತ ಪಾರ್ಥಿ॑ವೀ॒ರ್ಯಾಃ ।
ಯಾಸಾ॑ಮಷಾ॒ಢಾ ಅ॑ನು॒ಯಂತಿ॒ ಕಾಮ᳚ಮ್ । ತಾ ನ॒ ಆಪಃ॒ ಶಗ್ಗ್​ ಸ್ಯೋ॒ನಾ ಭ॑ವಂತು ।
ಯಾಶ್ಚ॒ ಕೂಪ್ಯಾ॒ ಯಾಶ್ಚ॑ ನಾ॒ದ್ಯಾ᳚-ಸ್ಸಮು॒ದ್ರಿಯಾಃ᳚ । ಯಾಶ್ಚ॑ ವೈಶಂ॒ತೀರು॒ತ ಪ್ರಾ॑ಸ॒ಚೀರ್ಯಾಃ ।
ಯಾಸಾ॑ಮಷಾ॒ಢಾ ಮಧು॑ ಭ॒ಕ್ಷಯಂ॑ತಿ । ತಾ ನ॒ ಆಪಃ॒ ಶಗ್ಗ್​ ಸ್ಯೋ॒ನಾ ಭ॑ವಂತು ॥ 19ನಕ್ಷತ್ರಂ – ಉತ್ತರಾಷಾಢಾ, ದೇವತಾ – ವಿಶ್ವೇದೇವಃ
ತನ್ನೋ॒ ವಿಶ್ವೇ॒ ಉಪ॑ ಶೃಣ್ವಂತು ದೇ॒ವಾಃ । ತದ॑ಷಾ॒ಢಾ ಅ॒ಭಿಸಂ​ಯಁಂ॑ತು ಯ॒ಜ್ಞಮ್ ।
ತನ್ನಕ್ಷ॑ತ್ರಂ ಪ್ರಥತಾಂ ಪ॒ಶುಭ್ಯಃ॑ । ಕೃ॒ಷಿ-ರ್ವೃ॒ಷ್ಟಿ-ರ್ಯಜ॑ಮಾನಾಯ ಕಲ್ಪತಾಮ್ ।
ಶು॒ಭ್ರಾಃ ಕ॒ನ್ಯಾ॑ ಯುವ॒ತಯ॑-ಸ್ಸು॒ಪೇಶ॑ಸಃ । ಕ॒ರ್ಮ॒ಕೃತ॑-ಸ್ಸು॒ಕೃತೋ॑ ವೀ॒ರ್ಯಾ॑ವತೀಃ ।
ವಿಶ್ವಾ᳚ನ್ ದೇ॒ವಾನ್, ಹ॒ವಿಷಾ॑ ವ॒ರ್ಧಯಂ॑ತೀಃ ।
ಅ॒ಷಾ॒ಢಾಃ ಕಾಮ॒ ಮುಪ॑ಯಾಂತು ಯ॒ಜ್ಞಮ್ ॥ 20ನಕ್ಷತ್ರಂ – ಅಭಿಜಿತ್, ದೇವತಾ – ಬ್ರಹ್ಮಾ
ಯಸ್ಮಿ॒ನ್ ಬ್ರಹ್ಮಾ॒ಭ್ಯಜ॑ಯ॒ಥ್ ಸರ್ವ॑ಮೇ॒ತತ್ । ಅ॒ಮುಂಚ॑ ಲೋ॒ಕ ಮಿ॒ದಮೂ॑ಚ॒ ಸರ್ವ᳚ಮ್ ।
ತನ್ನೋ॒ ನಕ್ಷ॑ತ್ರ-ಮಭಿ॒ಜಿ-ದ್ವಿ॒ಜಿತ್ಯ॑ । ಶ್ರಿಯಂ॑ ದಧಾ॒ತ್ವ-ಹೃ॑ಣೀಯಮಾನಮ್ ।
ಉ॒ಭೌ ಲೋ॒ಕೌ ಬ್ರಹ್ಮ॑ಣಾ॒ ಸಂಜಿ॑ತೇ॒ಮೌ । ತನ್ನೋ॒ ನಕ್ಷ॑ತ್ರ-ಮಭಿ॒ಜಿ-ದ್ವಿಚ॑ಷ್ಟಾಮ್ ।
ತಸ್ಮಿ॑ನ್ ವ॒ಯಂ ಪೃತ॑ನಾ॒ ಸ್ಸಂಜ॑ಯೇಮ । ತನ್ನೋ॑ ದೇ॒ವಾಸೋ॒ ಅನು॑ಜಾನಂತು॒ ಕಾಮ᳚ಮ್ ॥ 21ನಕ್ಷತ್ರಂ – ಶ್ರವಣಂ, ದೇವತಾ – ವಿಷ್ಣುಃ
ಶೃ॒ಣ್ವಂತಿ॑ ಶ್ರೋ॒ಣಾ-ಮ॒ಮೃತ॑ಸ್ಯ ಗೋ॒ಪಾಮ್ । ಪುಣ್ಯಾ॑ಮಸ್ಯಾ॒ ಉಪ॑ಶೃಣೋಮಿ॒ ವಾಚ᳚ಮ್ ।
ಮ॒ಹೀಂ ದೇ॒ವೀಂ-ವಿಁಷ್ಣು॑ಪತ್ನೀ ಮಜೂ॒ರ್ಯಾಮ್ । ಪ್ರ॒ತೀಚೀ॑ ಮೇನಾಗ್ಂ ಹ॒ವಿಷಾ॑ ಯಜಾಮಃ ।
ತ್ರೇ॒ಧಾ ವಿಷ್ಣು॑-ರುರುಗಾ॒ಯೋ ವಿಚ॑ಕ್ರಮೇ । ಮ॒ಹೀಂ ದಿವಂ॑ ಪೃಥಿ॒ವೀ-ಮಂ॒ತರಿ॑ಕ್ಷಮ್ ।
ತಚ್ಛ್ರೋ॒ಣೈತಿ॒ ಶ್ರವ॑-ಇ॒ಚ್ಛಮಾ॑ನಾ । ಪುಣ್ಯ॒ಗ್ಗ್॒ ಶ್ಲೋಕಂ॒-ಯಁಜ॑ಮಾನಾಯ ಕೃಣ್ವ॒ತೀ ॥ 22ನಕ್ಷತ್ರಂ – ಶ್ರವಿಷ್ಟಾ, ದೇವತಾ – ವಸವಃ
ಅ॒ಷ್ಟೌ ದೇ॒ವಾ ವಸ॑ವಸ್ಸೋ॒ಮ್ಯಾಸಃ॑ । ಚತ॑ಸ್ರೋ ದೇ॒ವೀ ರ॒ಜರಾಃ॒ ಶ್ರವಿ॑ಷ್ಠಾಃ ।
ತೇ ಯ॒ಜ್ಞಂ ಪಾಂ᳚ತು॒ ರಜ॑ಸಃ ಪ॒ರಸ್ತಾ᳚ತ್ । ಸಂ॒​ವಁ॒ಥ್ಸ॒ರೀಣ॑-ಮ॒ಮೃತಗ್ಗ್॑ ಸ್ವ॒ಸ್ತಿ ।
ಯ॒ಜ್ಞಂ ನಃ॑ ಪಾಂತು॒ ವಸ॑ವಃ ಪು॒ರಸ್ತಾ᳚ತ್ । ದ॒ಕ್ಷಿ॒ಣ॒ತೋ॑-ಽಭಿಯಂ॑ತು॒ ಶ್ರವಿ॑ಷ್ಠಾಃ ।
ಪುಣ್ಯ॒ನ್ನಕ್ಷ॑ತ್ರಮ॒ಭಿ ಸಂ​ವಿಁ॑ಶಾಮ । ಮಾ ನೋ॒ ಅರಾ॑ತಿ-ರ॒ಘಶ॒ಗ್ಂ॒ ಸಾಗನ್ನ್॑ ॥ 23ನಕ್ಷತ್ರಂ – ಶತಭಿಷಕ್, ದೇವತಾ – ವರುಣಃ
ಕ್ಷ॒ತ್ರಸ್ಯ॒ ರಾಜಾ॒ ವರು॑ಣೋಽಧಿರಾ॒ಜಃ । ನಕ್ಷ॑ತ್ರಾಣಾಗ್ಂ ಶ॒ತಭಿ॑ಷ॒ಗ್ ವಸಿ॑ಷ್ಠಃ ।
ತೌ ದೇ॒ವೇಭ್ಯಃ॑ ಕೃಣುತೋ ದೀ॒ರ್ಘಮಾಯಃ॑ । ಶ॒ತಗ್ಂ ಸ॒ಹಸ್ರಾ॑ ಭೇಷ॒ಜಾನಿ॑ ಧತ್ತಃ ।
ಯ॒ಜ್ಞನ್ನೋ॒ ರಾಜಾ॒ ವರು॑ಣ॒ ಉಪ॑ಯಾತು । ತನ್ನೋ॒ ವಿಶ್ವೇ॑ ಅ॒ಭಿಸಂ​ಯಁಂ॑ತು ದೇ॒ವಾಃ ।
ತನ್ನೋ॒ ನಕ್ಷ॑ತ್ರಗ್ಂ ಶ॒ತಭಿ॑ಷಗ್ ಜುಷಾ॒ಣಮ್ । ದೀ॒ರ್ಘಮಾಯುಃ॒ ಪ್ರತಿ॑ರ-ದ್ಭೇಷ॒ಜಾನಿ॑ ॥ 24ನಕ್ಷತ್ರಂ – ಪೂರ್ವಪ್ರೋಷ್ಠಪದಾ, ದೇವತಾ – ಅಜಯೇಕಪಾದಃ
ಅ॒ಜ ಏಕ॑ಪಾ॒- ದುದ॑ಗಾತ್ ಪು॒ರಸ್ತಾ᳚ತ್ । ವಿಶ್ವಾ॑ ಭೂ॒ತಾನಿ॑ ಪ್ರತಿ॒ ಮೋದ॑ಮಾನಃ ।
ತಸ್ಯ॑ ದೇ॒ವಾಃ ಪ್ರ॑ಸ॒ವಂ-ಯಁಂ॑ತಿ॒ ಸರ್ವೇ᳚ । ಪ್ರೋ॒ಷ್ಠ॒ಪ॒ದಾಸೋ॑ ಅ॒ಮೃತ॑ಸ್ಯ ಗೋ॒ಪಾಃ ।
ವಿ॒ಭ್ರಾಜ॑ಮಾನ-ಸ್ಸಮಿಧಾ॒ನ ಉ॒ಗ್ರಃ । ಆಽಂತರಿ॑ಕ್ಷ-ಮರುಹ॒ದ-ದ್ಗಂ॒ದ್ಯಾಮ್ ।
ತಗ್ಂ ಸೂರ್ಯಂ॑ ದೇ॒ವ-ಮ॒ಜಮೇಕ॑ಪಾದಮ್ । ಪ್ರೋ॒ಷ್ಠ॒ಪ॒ದಾಸೋ॒ ಅನು॑ಯಂತಿ॒ ಸರ್ವೇ᳚ ॥ 25ನಕ್ಷತ್ರಂ – ಉತ್ತರಪ್ರೋಷ್ಠಪದಾ, ದೇವತಾ – ಅಹಿರ್ಬುದ್ಧ್ನಿಯಃ
ಅಹಿ॑-ರ್ಬು॒ದ್ಧ್ನಿಯಃ॒ ಪ್ರಥ॑ಮಾನ ಏತಿ । ಶ್ರೇಷ್ಠೋ॑ ದೇ॒ವಾನಾ॑ಮು॒ತ ಮಾನು॑ಷಾಣಾಮ್ ।
ತಂ ಬ್ರಾ᳚ಹ್ಮ॒ಣಾ-ಸ್ಸೋ॑ಮ॒ಪಾ-ಸ್ಸೋ॒ಮ್ಯಾಸಃ॑ । ಪ್ರೋ॒ಷ್ಠ॒ಪ॒ದಾಸೋ॑ ಅ॒ಭಿರ॑ಕ್ಷಂತಿ॒ ಸರ್ವೇ᳚ ।
ಚ॒ತ್ವಾರ॒ ಏಕ॑ಮ॒ಭಿ ಕರ್ಮ॑ ದೇ॒ವಾಃ । ಪ್ರೋ॒ಷ್ಠ॒ಪ॒ದಾಸ॒ ಇತಿ॒ ಯಾನ್, ವದಂ॑ತಿ ।
ತೇ ಬು॒ದ್ಧನಿಯಂ॑ ಪರಿ॒ಷದ್ಯಗ್ಗ್॑ ಸ್ತು॒ವಂತಃ॑ । ಅಹಿಗ್ಂ॑ ರಕ್ಷಂತಿ॒ ನಮ॑ಸೋಪ॒ ಸದ್ಯ॑ ॥ 26ನಕ್ಷತ್ರಂ – ರೇವತೀ, ದೇವತಾ – ಪೂಷಾ
ಪೂ॒ಷಾ ರೇ॒ವತ್ಯನ್ವೇ॑ತಿ॒ ಪಂಥಾ᳚ಮ್ । ಪು॒ಷ್ಟಿ॒ಪತೀ॑ ಪಶು॒ಪಾ ವಾಜ॑ಬಸ್ತ್ಯೌ ।
ಇ॒ಮಾನಿ॑ ಹ॒ವ್ಯಾ ಪ್ರಯ॑ತಾ ಜುಷಾ॒ಣಾ । ಸು॒ಗೈರ್ನೋ॒ ಯಾನೈ॒ರುಪ॑ಯಾತಾಂ-ಯಁ॒ಜ್ಞಮ್ ।
ಕ್ಷು॒ದ್ರಾನ್ ಪ॒ಶೂನ್ ರ॑ಕ್ಷತು ರೇ॒ವತೀ॑ ನಃ । ಗಾವೋ॑ ನೋ॒ ಅಶ್ವಾ॒ಗ್ಂ॒ ಅನ್ವೇ॑ತು ಪೂ॒ಷಾ ।
ಅನ್ನ॒ಗ್ಂ॒ ರಕ್ಷಂ॑ತೌ ಬಹು॒ಧಾ ವಿರೂ॑ಪಮ್ । ವಾಜಗ್ಂ॑ ಸನುತಾಂ॒-ಯಁಜ॑ಮಾನಾಯ ಯ॒ಜ್ಞಮ್ ॥ 27ನಕ್ಷತ್ರಂ – ಅಶ್ವಿನೀ, ದೇವತಾ – ಅಶ್ವಿನೀ ದೇವ
ತದ॒ಶ್ವಿನಾ॑-ವಶ್ವ॒ಯುಜೋ-ಪ॑ಯಾತಾಮ್ । ಶುಭಂ॒ಗಮಿ॑ಷ್ಠೌ ಸು॒ಯಮೇ॑ಭಿ॒ರಶ್ವೈಃ᳚ ।
ಸ್ವನ್ನಕ್ಷ॑ತ್ರಗ್ಂ ಹ॒ವಿಷಾ॒ ಯಜಂ॑ತೌ । ಮದ್ಧ್ವಾ॒-ಸಂಪೃ॑ಕ್ತೌ॒ ಯಜು॑ಷಾ॒ ಸಮ॑ಕ್ತೌ ।
ಯೌ ದೇ॒ವಾನಾಂ᳚ ಭಿ॒ಷಜೌ॑ ಹವ್ಯವಾ॒ಹೌ । ವಿಶ್ವ॑ಸ್ಯ ದೂ॒ತಾ-ವ॒ಮೃತ॑ಸ್ಯ ಗೋ॒ಪೌ ।
ತೌ ನಕ್ಷ॑ತ್ರಂ-ಜುಜುಷಾ॒ಣೋ-ಪ॑ಯಾತಾಮ್ । ನಮೋ॒ಽಶ್ವಿಭ್ಯಾಂ᳚ ಕೃಣುಮೋ-ಽಶ್ವ॒ಗ್ಯುಭ್ಯಾ᳚ಮ್ ॥ 28ನಕ್ಷತ್ರಂ – ಅಪಭರಣೀ, ದೇವತಾ – ಯಮಃ
ಅಪ॑ ಪಾ॒ಪ್ಮಾನಂ॒ ಭರ॑ಣೀ-ರ್ಭರಂತು । ತದ್ಯ॒ಮೋ ರಾಜಾ॒ ಭಗ॑ವಾ॒ನ್॒, ವಿಚ॑ಷ್ಟಾಮ್ ।
ಲೋ॒ಕಸ್ಯ॒ ರಾಜಾ॑ ಮಹ॒ತೋ ಮ॒ಹಾನ್, ಹಿ । ಸು॒ಗನ್ನಃ॒ ಪಂಥಾ॒ಮಭ॑ಯಂ ಕೃಣೋತು ।
ಯಸ್ಮಿ॒-ನ್ನಕ್ಷ॑ತ್ರೇ ಯ॒ಮ ಏತಿ॒ ರಾಜಾ᳚ । ಯಸ್ಮಿ॑ನ್ನೇನ-ಮ॒ಭ್ಯಷಿಂ॑ಚಂತ ದೇ॒ವಾಃ ।
ತದ॑ಸ್ಯ ಚಿ॒ತ್ರಗ್ಂ ಹ॒ವಿಷಾ॑ ಯಜಾಮ । ಅಪ॑ ಪಾ॒ಪ್ಮಾನಂ॒ ಭರ॑ಣೀ-ರ್ಭರಂತು ॥ 29ಅಮಾವಾಸಿ
ನಿ॒ವೇಶ॑ನೀ ಸಂ॒ಗಮ॑ನೀ॒ ವಸೂ॑ನಾಂ॒-ವಿಁಶ್ವಾ॑ ರೂ॒ಪಾಣಿ॒ ವಸೂ᳚ನ್ಯಾ-ವೇ॒ಶಯಂ॑ತೀ ।
ಸ॒ಹ॒ಸ್ರ॒-ಪೋ॒ಷಗ್ಂ ಸು॒ಭಗಾ॒ ರರಾ॑ಣಾ॒ ಸಾ ನ॒ ಆಗ॒ನ್ ವರ್ಚ॑ಸಾ ಸಂ​ವಿಁದಾ॒ನಾ ।
ಯತ್ತೇ॑ ದೇ॒ವಾ ಅದ॑ಧು-ರ್ಭಾಗ॒ಧೇಯ॒-ಮಮಾ॑ವಾಸ್ಯೇ ಸಂ॒​ವಁಸಂ॑ತೋ ಮಹಿ॒ತ್ವಾ ।
ಸಾ ನೋ॑ ಯ॒ಜ್ಞಂ ಪಿ॑ಪೃಹಿ ವಿಶ್ವವಾರೇ ರ॒ಯಿನ್ನೋ॑ ಧೇಹಿ ಸುಭಗೇ ಸು॒ವೀರ᳚ಮ್ ॥ 30ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ॥31-40: Optional for Additional Chantingಚಂದ್ರಮಾ
ನವೋ॑ ನವೋ ಭವತಿ॒ ಜಾಯ॑ಮಾ॒ನೋಽಹ್ನಾಂ᳚ ಕೇ॒ತು-ರು॒ಷಸಾ॑ ಮೇ॒ತ್ಯಗ್ರೇ᳚ ।
ಭಾ॒ಗಂ ದೇ॒ವೇಭ್ಯೋ॒ ವಿದ॑ಧಾತ್ಯಾ॒ಯನ್ ಪ್ರಚಂ॒ದ್ರಮಾ᳚ಸ್ತಿರಿತಿ ದೀ॒ರ್ಘಮಾಯುಃ॑ ॥
ಯಮಾ॑ದಿ॒ತ್ಯಾ ಅ॒ಗ್ಂ॒ಶುಮಾ᳚ಪ್ಯಾ॒ಯಯಂ॑ತಿ॒ ಯಮಕ್ಷಿ॑ತ॒-ಮಕ್ಷಿ॑ತಯಃ॒ ಪಿಬಂ॑ತಿ ।
ತೇನ॑ ನೋ॒ ರಾಜಾ॒ ವರು॑ಣೋ॒ ಬೃಹ॒ಸ್ಪತಿ॒ ರಾಪ್ಯಾ॑ಯಯಂತು॒ ಭುವ॑ನಸ್ಯ ಗೋ॒ಪಾಃ ॥ 31ಅಹೋ ರಾತ್ರ
ಯೇ ವಿರೂ॑ಪೇ॒ ಸಮ॑ನಸಾ ಸಂ​ವ್ಯಁಯಂ॑ತೀ । ಸ॒ಮಾ॒ನಂ ತಂತುಂ॑ ಪರಿತಾ-ತ॒ನಾತೇ᳚ ।
ವಿ॒ಭೂ ಪ್ರ॒ಭೂ ಅ॑ನು॒ಭೂ ವಿ॒ಶ್ವತೋ॑ ಹುವೇ । ತೇ ನೋ॒ ನಕ್ಷ॑ತ್ರೇ॒ ಹವ॒ಮಾಗ॑-ಮೇತಮ್ ।
ವ॒ಯಂ ದೇ॒ವೀ ಬ್ರಹ್ಮ॑ಣಾ ಸಂ​ವಿಁದಾ॒ನಾಃ । ಸು॒ರತ್ನಾ॑ಸೋ ದೇ॒ವವೀ॑ತಿಂ॒ ದಧಾ॑ನಾಃ ।
ಅ॒ಹೋ॒ರಾ॒ತ್ರೇ ಹ॒ವಿಷಾ॑ ವ॒ರ್ಧಯಂ॑ತಃ । ಅತಿ॑ ಪಾ॒ಪ್ಮಾನ॒-ಮತಿ॑ಮುಕ್ತ್ಯಾ ಗಮೇಮ ॥ 32ಉಷಾ
ಪ್ರತ್ಯು॑ವ ದೃಶ್ಯಾಯ॒ತೀ । ವ್ಯು॒ಚ್ಛಂತೀ॑ ದುಹಿ॒ತಾ ದಿ॒ವಃ ।
ಅ॒ಪೋ ಮ॒ಹೀ ವೃ॑ಣುತೇ॒ ಚಕ್ಷು॑ಷಾ । ತಮೋ॒ ಜ್ಯೋತಿ॑ಷ್​ಕೃಣೋತಿ ಸೂ॒ನರೀ᳚ ।
ಉದು॒ ಸ್ತ್ರಿಯಾ᳚ಸ್ಸಚತೇ॒ ಸೂರ್ಯಃ॑ । ಸ ಚಾ॑ ಉ॒ದ್ಯನ್ನಕ್ಷ॑ತ್ರ ಮರ್ಚಿ॒ಮತ್ ।
ತ ವೇದು॑ಷೋ॒ ವ್ಯುಷಿ॒ ಸೂರ್ಯ॑ಸ್ಯ ಚ । ಸಂಭ॒ಕ್ತೇನ॑ ಗಮೇಮಹಿ ॥ 33ನಕ್ಷತ್ರಃ
ತನ್ನೋ॒ ನಕ್ಷ॑ತ್ರ ಮರ್ಚಿ॒ಮತ್ । ಭಾ॒ನು॒ಮತ್ತೇಜ॑ ಉ॒ಚ್ಛರ॑ತ್ ।
ಉಪ॑ಯ॒ಜ್ಞ-ಮಿ॒ಹಾಗ॑ಮತ್ । ಪ್ರನಕ್ಷ॑ತ್ರಾಯ ದೇ॒ವಾಯ॑ । ಇಂದ್ರಾ॒ಯೇಂದುಗ್ಂ॑ ಹವಾಮಹೇ ।
ಸ ನ॑ ಸ್ಸವಿ॒ತಾ ಸು॑ವಥ್ಸ॒ನಿಮ್ । ಪು॒ಷ್ಟಿ॒ದಾಂ-ವೀಁ॒ರವ॑ತ್ತಮಮ್ ॥ 34ಸೂರ್ಯಃ
ಉದು॒ತ್ಯಂ ಜಾ॒ತವೇ॑ದಸಂ ದೇ॒ವಂ-ವಁ॑ಹಂತಿ ಕೇ॒ತವಃ॑ । ದೃ॒ಶೇ ವಿಶ್ವಾ॑ಯ॒ ಸೂರ್ಯ᳚ಮ್ ।
ಚಿ॒ತ್ರಂ ದೇ॒ವಾನಾ॒ ಮುದ॑ಗಾ॒ದನೀ॑ಕಂ॒ ಚಕ್ಷು॑-ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒ಗ್ನೇಃ ।
ಆಽಪ್ರಾ॒ ದ್ಯಾವಾ॑ಪೃಥಿ॒ವೀ ಅಂ॒ತರಿ॑ಕ್ಷ॒ಗ್ಂ॒ ಸೂರ್ಯ॑ ಆ॒ತ್ಮಾ ಜಗ॑ತಸ್ತ॒ಸ್ಥುಷ॑ಶ್ಚ ॥ 35ಅದಿತಿಃ
ಅದಿ॑ತಿರ್ನ ಉರುಷ್ಯ॒-ತ್ವದಿ॑ತಿಃ॒ ಶರ್ಮ॑ ಯಚ್ಛತು । ಅದಿ॑ತಿಃ ಪಾ॒ತ್ವಗ್ಂ ಹ॑ಸಃ।
ಮ॒ಹೀಮೂ॒ಷು ಮಾ॒ತರಗ್ಂ॑ ಸುವ್ರ॒ತಾನಾ॑-ಮೃ॒ತಸ್ಯ॒ ಪತ್ನೀ॒ ಮವ॑ಸೇ ಹುವೇಮ ।
ತು॒ವಿ॒ಕ್ಷ॒ತ್ರಾ-ಮ॒ಜರಂ॑ತೀ ಮುರೂ॒ಚೀಗ್ಂ ಸು॒ಶರ್ಮಾ॑ಣ॒-ಮದಿ॑ತಿಗ್ಂ ಸು॒ಪ್ರಣೀ॑ತಿಮ್ ॥ 36ವಿಷ್ಣುಃ
ಇ॒ದಂ-ವಿಁಷ್ಣು॒-ರ್ವಿಚ॑ಕ್ರಮೇ ತ್ರೇ॒ಧಾ ನಿದ॑ಧೇ ಪ॒ದಮ್ । ಸಮೂ॑ಢಮಸ್ಯ ಪಾಗ್ಂ ಸು॒ರೇ ।
ಪ್ರತದ್ವಿಷ್ಣು॑ ಸ್ತವತೇ ವೀ॒ರ್ಯಾ॑ಯ । ಮೃ॒ಗೋ ನ ಭೀ॒ಮಃ ಕು॑ಚ॒ರೋ ಗಿ॑ರಿ॒ಷ್ಠಾಃ ।
ಯಸ್ಯೋ॒ರುಷು॑ ತ್ರಿ॒ಷು ವಿ॒ಕ್ರಮ॑ಣೇಷು । ಅಧಿ॑ಕ್ಷಿ॒ಯಂತಿ॒ ಭುವ॑ನಾನಿ॒ ವಿಶ್ವಾ᳚ ॥ 37ಅಗ್ನಿಃ
ಅ॒ಗ್ನಿ-ರ್ಮೂ॒ದ್​ರ್ಧಾ ದಿ॒ವಃ ಕ॒ಕುತ್ಪತಿಃ॑ ಪೃಥಿ॒ವ್ಯಾ ಅ॒ಯಮ್ ।
ಅ॒ಪಾಗ್ಂ ರೇತಾಗ್ಂ॑ಸಿ ಜಿನ್ವತಿ ।
ಭುವೋ॑ ಯ॒ಜ್ಞಸ್ಯ॒ ರಜ॑ಸಶ್ಚ ನೇ॒ತಾ ಯತ್ರಾ॑ ನಿ॒ಯುದ್ಭಿಃ॒ ಸಚ॑ಸೇ ಶಿ॒ವಾಭಿಃ॑ ।
ದಿ॒ವಿ ಮೂ॒ದ್​ರ್ಧಾನಂ॑ ದಧಿಷೇ ಸುವ॒ರ್॒ಷಾಂ ಜಿ॒ಹ್ವಾಮ॑ಗ್ನೇ ಚಕೃಷೇ ಹವ್ಯ॒ವಾಹಂ᳚ ॥ 38ಅನುಮತೀ
ಅನು॑ನೋ॒ಽದ್ಯಾನು॑ಮತಿ-ರ್ಯ॒ಜ್ಞಂ ದೇ॒ವೇಷು॑ ಮನ್ಯತಾಮ್ ।
ಅ॒ಗ್ನಿಶ್ಚ॑ ಹವ್ಯ॒ವಾಹ॑ನೋ॒ ಭವ॑ತಾಂ ದಾ॒ಶುಷೇ॒ ಮಯಃ॑ ।
ಅನ್ವಿದ॑ನುಮತೇ॒ ತ್ವಂ ಮನ್ಯಾ॑ಸೈ॒ ಶಂಚ॑ ನಃ ಕೃಧಿ ।
ಕ್ರತ್ವೇ॒ ದಕ್ಷಾ॑ಯ ನೋ ಹಿನು॒ ಪ್ರಣ॒ ಆಯೂಗ್ಂ॑ಷಿ ತಾರಿಷಃ ॥ 39ಹವ್ಯವಾಹಃ (ಅಗ್ನಿಃ)
ಹ॒ವ್ಯ॒ವಾಹ॑ಮಭಿ-ಮಾತಿ॒ಷಾಹ᳚ಮ್ । ರ॒ಕ್ಷೋ॒ಹಣಂ॒ ಪೃತ॑ನಾಸು ಜಿ॒ಷ್ಣುಮ್ ।
ಜ್ಯೋತಿ॑ಷ್ಮಂತಂ॒ ದೀದ್ಯ॑ತಂ॒ ಪುರಂ॑ಧಿಮ್ । ಅ॒ಗ್ನಿಗ್ಗ್​ ಸ್ವಿ॑ಷ್ಟ॒ ಕೃತ॒ಮಾಹು॑ವೇಮ ।
ಸ್ವಿ॑ಷ್ಟ ಮಗ್ನೇ ಅ॒ಭಿತತ್ ಪೃ॑ಣಾಹಿ । ವಿಶ್ವಾ॑ ದೇವ॒ ಪೃತ॑ನಾ ಅ॒ಭಿಷ್ಯ ।
ಉ॒ರುನ್ನಃ॒ ಪಂಥಾಂ᳚ ಪ್ರದಿ॒ಶನ್ ವಿಭಾ॑ಹಿ । ಜ್ಯೋತಿ॑ಷ್ಮದ್ಧೇಹ್ಯ॒ ಜರ॑ನ್ನ॒ ಆಯುಃ॑ ॥ 40ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ॥