ಪೃಥೋಸ್ತು ನಪ್ತಾ ಪೃಥುಧರ್ಮಕರ್ಮಠಃ
ಪ್ರಾಚೀನಬರ್ಹಿರ್ಯುವತೌ ಶತದ್ರುತೌ ।
ಪ್ರಚೇತಸೋ ನಾಮ ಸುಚೇತಸಃ ಸುತಾ-
ನಜೀಜನತ್ತ್ವತ್ಕರುಣಾಂಕುರಾನಿವ ॥1॥
ಪಿತುಃ ಸಿಸೃಕ್ಷಾನಿರತಸ್ಯ ಶಾಸನಾದ್-
ಭವತ್ತಪಸ್ಯಾಭಿರತಾ ದಶಾಪಿ ತೇ
ಪಯೋನಿಧಿಂ ಪಶ್ಚಿಮಮೇತ್ಯ ತತ್ತಟೇ
ಸರೋವರಂ ಸಂದದೃಶುರ್ಮನೋಹರಮ್ ॥2॥
ತದಾ ಭವತ್ತೀರ್ಥಮಿದಂ ಸಮಾಗತೋ
ಭವೋ ಭವತ್ಸೇವಕದರ್ಶನಾದೃತಃ ।
ಪ್ರಕಾಶಮಾಸಾದ್ಯ ಪುರಃ ಪ್ರಚೇತಸಾ-
ಮುಪಾದಿಶತ್ ಭಕ್ತತಮಸ್ತವ ಸ್ತವಮ್ ॥3॥
ಸ್ತವಂ ಜಪಂತಸ್ತಮಮೀ ಜಲಾಂತರೇ
ಭವಂತಮಾಸೇವಿಷತಾಯುತಂ ಸಮಾಃ ।
ಭವತ್ಸುಖಾಸ್ವಾದರಸಾದಮೀಷ್ವಿಯಾನ್
ಬಭೂವ ಕಾಲೋ ಧ್ರುವವನ್ನ ಶೀಘ್ರತಾ ॥4॥
ತಪೋಭಿರೇಷಾಮತಿಮಾತ್ರವರ್ಧಿಭಿಃ
ಸ ಯಜ್ಞಹಿಂಸಾನಿರತೋಽಪಿ ಪಾವಿತಃ ।
ಪಿತಾಽಪಿ ತೇಷಾಂ ಗೃಹಯಾತನಾರದ-
ಪ್ರದರ್ಶಿತಾತ್ಮಾ ಭವದಾತ್ಮತಾಂ ಯಯೌ ॥5॥
ಕೃಪಾಬಲೇನೈವ ಪುರಃ ಪ್ರಚೇತಸಾಂ
ಪ್ರಕಾಶಮಾಗಾಃ ಪತಗೇಂದ್ರವಾಹನಃ ।
ವಿರಾಜಿ ಚಕ್ರಾದಿವರಾಯುಧಾಂಶುಭಿ-
ರ್ಭುಜಾಭಿರಷ್ಟಾಭಿರುದಂಚಿತದ್ಯುತಿಃ ॥6॥
ಪ್ರಚೇತಸಾಂ ತಾವದಯಾಚತಾಮಪಿ
ತ್ವಮೇವ ಕಾರುಣ್ಯಭರಾದ್ವರಾನದಾಃ ।
ಭವದ್ವಿಚಿಂತಾಽಪಿ ಶಿವಾಯ ದೇಹಿನಾಂ
ಭವತ್ವಸೌ ರುದ್ರನುತಿಶ್ಚ ಕಾಮದಾ ॥7॥
ಅವಾಪ್ಯ ಕಾಂತಾಂ ತನಯಾಂ ಮಹೀರುಹಾಂ
ತಯಾ ರಮಧ್ವಂ ದಶಲಕ್ಷವತ್ಸರೀಮ್ ।
ಸುತೋಽಸ್ತು ದಕ್ಷೋ ನನು ತತ್ಕ್ಷಣಾಚ್ಚ ಮಾಂ
ಪ್ರಯಾಸ್ಯಥೇತಿ ನ್ಯಗದೋ ಮುದೈವ ತಾನ್ ॥8॥
ತತಶ್ಚ ತೇ ಭೂತಲರೋಧಿನಸ್ತರೂನ್
ಕ್ರುಧಾ ದಹಂತೋ ದ್ರುಹಿಣೇನ ವಾರಿತಾಃ ।
ದ್ರುಮೈಶ್ಚ ದತ್ತಾಂ ತನಯಾಮವಾಪ್ಯ ತಾಂ
ತ್ವದುಕ್ತಕಾಲಂ ಸುಖಿನೋಽಭಿರೇಮಿರೇ ॥9॥
ಅವಾಪ್ಯ ದಕ್ಷಂ ಚ ಸುತಂ ಕೃತಾಧ್ವರಾಃ
ಪ್ರಚೇತಸೋ ನಾರದಲಬ್ಧಯಾ ಧಿಯಾ ।
ಅವಾಪುರಾನಂದಪದಂ ತಥಾವಿಧ-
ಸ್ತ್ವಮೀಶ ವಾತಾಲಯನಾಥ ಪಾಹಿ ಮಾಮ್ ॥10॥