ದರ್ವಾಸಾಸ್ಸುರವನಿತಾಪ್ತದಿವ್ಯಮಾಲ್ಯಂ
ಶಕ್ರಾಯ ಸ್ವಯಮುಪದಾಯ ತತ್ರ ಭೂಯಃ ।
ನಾಗೇಂದ್ರಪ್ರತಿಮೃದಿತೇ ಶಶಾಪ ಶಕ್ರಂ
ಕಾ ಕ್ಷಾಂತಿಸ್ತ್ವದಿತರದೇವತಾಂಶಜಾನಾಮ್ ॥1॥
ಶಾಪೇನ ಪ್ರಥಿತಜರೇಽಥ ನಿರ್ಜರೇಂದ್ರೇ
ದೇವೇಷ್ವಪ್ಯಸುರಜಿತೇಷು ನಿಷ್ಪ್ರಭೇಷು ।
ಶರ್ವಾದ್ಯಾಃ ಕಮಲಜಮೇತ್ಯ ಸರ್ವದೇವಾ
ನಿರ್ವಾಣಪ್ರಭವ ಸಮಂ ಭವಂತಮಾಪುಃ ॥2॥
ಬ್ರಹ್ಮಾದ್ಯೈಃ ಸ್ತುತಮಹಿಮಾ ಚಿರಂ ತದಾನೀಂ
ಪ್ರಾದುಷ್ಷನ್ ವರದ ಪುರಃ ಪರೇಣ ಧಾಮ್ನಾ ।
ಹೇ ದೇವಾ ದಿತಿಜಕುಲೈರ್ವಿಧಾಯ ಸಂಧಿಂ
ಪೀಯೂಷಂ ಪರಿಮಥತೇತಿ ಪರ್ಯಶಾಸ್ತ್ವಮ್ ॥3॥
ಸಂಧಾನಂ ಕೃತವತಿ ದಾನವೈಃ ಸುರೌಘೇ
ಮಂಥಾನಂ ನಯತಿ ಮದೇನ ಮಂದರಾದ್ರಿಮ್ ।
ಭ್ರಷ್ಟೇಽಸ್ಮಿನ್ ಬದರಮಿವೋದ್ವಹನ್ ಖಗೇಂದ್ರೇ
ಸದ್ಯಸ್ತ್ವಂ ವಿನಿಹಿತವಾನ್ ಪಯಃಪಯೋಧೌ ॥4॥
ಆಧಾಯ ದ್ರುತಮಥ ವಾಸುಕಿಂ ವರತ್ರಾಂ
ಪಾಥೋಧೌ ವಿನಿಹಿತಸರ್ವಬೀಜಜಾಲೇ ।
ಪ್ರಾರಬ್ಧೇ ಮಥನವಿಧೌ ಸುರಾಸುರೈಸ್ತೈ-
ರ್ವ್ಯಾಜಾತ್ತ್ವಂ ಭುಜಗಮುಖೇಽಕರೋಸ್ಸುರಾರೀನ್ ॥5॥
ಕ್ಷುಬ್ಧಾದ್ರೌ ಕ್ಷುಭಿತಜಲೋದರೇ ತದಾನೀಂ
ದುಗ್ಧಾಬ್ಧೌ ಗುರುತರಭಾರತೋ ನಿಮಗ್ನೇ ।
ದೇವೇಷು ವ್ಯಥಿತತಮೇಷು ತತ್ಪ್ರಿಯೈಷೀ
ಪ್ರಾಣೈಷೀಃ ಕಮಠತನುಂ ಕಠೋರಪೃಷ್ಠಾಮ್ ॥6॥
ವಜ್ರಾತಿಸ್ಥಿರತರಕರ್ಪರೇಣ ವಿಷ್ಣೋ
ವಿಸ್ತಾರಾತ್ಪರಿಗತಲಕ್ಷಯೋಜನೇನ ।
ಅಂಭೋಧೇಃ ಕುಹರಗತೇನ ವರ್ಷ್ಮಣಾ ತ್ವಂ
ನಿರ್ಮಗ್ನಂ ಕ್ಷಿತಿಧರನಾಥಮುನ್ನಿನೇಥ ॥7॥
ಉನ್ಮಗ್ನೇ ಝಟಿತಿ ತದಾ ಧರಾಧರೇಂದ್ರೇ
ನಿರ್ಮೇಥುರ್ದೃಢಮಿಹ ಸಮ್ಮದೇನ ಸರ್ವೇ ।
ಆವಿಶ್ಯ ದ್ವಿತಯಗಣೇಽಪಿ ಸರ್ಪರಾಜೇ
ವೈವಶ್ಯಂ ಪರಿಶಮಯನ್ನವೀವೃಧಸ್ತಾನ್ ॥8॥
ಉದ್ದಾಮಭ್ರಮಣಜವೋನ್ನಮದ್ಗಿರೀಂದ್ರ-
ನ್ಯಸ್ತೈಕಸ್ಥಿರತರಹಸ್ತಪಂಕಜಂ ತ್ವಾಮ್ ।
ಅಭ್ರಾಂತೇ ವಿಧಿಗಿರಿಶಾದಯಃ ಪ್ರಮೋದಾ-
ದುದ್ಭ್ರಾಂತಾ ನುನುವುರುಪಾತ್ತಪುಷ್ಪವರ್ಷಾಃ ॥9॥
ದೈತ್ಯೌಘೇ ಭುಜಗಮುಖಾನಿಲೇನ ತಪ್ತೇ
ತೇನೈವ ತ್ರಿದಶಕುಲೇಽಪಿ ಕಿಂಚಿದಾರ್ತೇ ।
ಕಾರುಣ್ಯಾತ್ತವ ಕಿಲ ದೇವ ವಾರಿವಾಹಾಃ
ಪ್ರಾವರ್ಷನ್ನಮರಗಣಾನ್ನ ದೈತ್ಯಸಂಘಾನ್ ॥10॥
ಉದ್ಭ್ರಾಮ್ಯದ್ಬಹುತಿಮಿನಕ್ರಚಕ್ರವಾಲೇ
ತತ್ರಾಬ್ಧೌ ಚಿರಮಥಿತೇಽಪಿ ನಿರ್ವಿಕಾರೇ ।
ಏಕಸ್ತ್ವಂ ಕರಯುಗಕೃಷ್ಟಸರ್ಪರಾಜಃ
ಸಂರಾಜನ್ ಪವನಪುರೇಶ ಪಾಹಿ ರೋಗಾತ್ ॥11॥