ಸ್ಫುರತ್ಪರಾನಂದರಸಾತ್ಮಕೇನ ತ್ವಯಾ ಸಮಾಸಾದಿತಭೋಗಲೀಲಾಃ ।
ಅಸೀಮಮಾನಂದಭರಂ ಪ್ರಪನ್ನಾ ಮಹಾಂತಮಾಪುರ್ಮದಮಂಬುಜಾಕ್ಷ್ಯಃ ॥1॥
ನಿಲೀಯತೇಽಸೌ ಮಯಿ ಮಯ್ಯಮಾಯಂ ರಮಾಪತಿರ್ವಿಶ್ವಮನೋಭಿರಾಮಃ ।
ಇತಿ ಸ್ಮ ಸರ್ವಾಃ ಕಲಿತಾಭಿಮಾನಾ ನಿರೀಕ್ಷ್ಯ ಗೋವಿಂದ್ ತಿರೋಹಿತೋಽಭೂಃ ॥2॥
ರಾಧಾಭಿಧಾಂ ತಾವದಜಾತಗರ್ವಾಮತಿಪ್ರಿಯಾಂ ಗೋಪವಧೂಂ ಮುರಾರೇ ।
ಭವಾನುಪಾದಾಯ ಗತೋ ವಿದೂರಂ ತಯಾ ಸಹ ಸ್ವೈರವಿಹಾರಕಾರೀ ॥3॥
ತಿರೋಹಿತೇಽಥ ತ್ವಯಿ ಜಾತತಾಪಾಃ ಸಮಂ ಸಮೇತಾಃ ಕಮಲಾಯತಾಕ್ಷ್ಯಃ ।
ವನೇ ವನೇ ತ್ವಾಂ ಪರಿಮಾರ್ಗಯಂತ್ಯೋ ವಿಷಾದಮಾಪುರ್ಭಗವನ್ನಪಾರಮ್ ॥4॥
ಹಾ ಚೂತ ಹಾ ಚಂಪಕ ಕರ್ಣಿಕಾರ ಹಾ ಮಲ್ಲಿಕೇ ಮಾಲತಿ ಬಾಲವಲ್ಯಃ ।
ಕಿಂ ವೀಕ್ಷಿತೋ ನೋ ಹೃದಯೈಕಚೋರಃ ಇತ್ಯಾದಿ ತಾಸ್ತ್ವತ್ಪ್ರವಣಾ ವಿಲೇಪುಃ ॥5॥
ನಿರೀಕ್ಷಿತೋಽಯಂ ಸಖಿ ಪಂಕಜಾಕ್ಷಃ ಪುರೋ ಮಮೇತ್ಯಾಕುಲಮಾಲಪಂತೀ ।
ತ್ವಾಂ ಭಾವನಾಚಕ್ಷುಷಿ ವೀಕ್ಷ್ಯ ಕಾಚಿತ್ತಾಪಂ ಸಖೀನಾಂ ದ್ವಿಗುಣೀಚಕಾರ ॥6॥
ತ್ವದಾತ್ಮಿಕಾಸ್ತಾ ಯಮುನಾತಟಾಂತೇ ತವಾನುಚಕ್ರುಃ ಕಿಲ ಚೇಷ್ಟಿತಾನಿ ।
ವಿಚಿತ್ಯ ಭೂಯೋಽಪಿ ತಥೈವ ಮಾನಾತ್ತ್ವಯಾ ವಿಮುಕ್ತಾಂ ದದೃಶುಶ್ಚ ರಾಧಾಮ್ ॥7॥
ತತಃ ಸಮಂ ತಾ ವಿಪಿನೇ ಸಮಂತಾತ್ತಮೋವತಾರಾವಧಿ ಮಾರ್ಗಯಂತ್ಯಃ ।
ಪುನರ್ವಿಮಿಶ್ರಾ ಯಮುನಾತಟಾಂತೇ ಭೃಶಂ ವಿಲೇಪುಶ್ಚ ಜಗುರ್ಗುಣಾಂಸ್ತೇ ॥8॥
ತಥಾ ವ್ಯಥಾಸಂಕುಲಮಾನಸಾನಾಂ ವ್ರಜಾಂಗನಾನಾಂ ಕರುಣೈಕಸಿಂಧೋ ।
ಜಗತ್ತ್ರಯೀಮೋಹನಮೋಹನಾತ್ಮಾ ತ್ವಂ ಪ್ರಾದುರಾಸೀರಯಿ ಮಂದಹಾಸೀ ॥9॥
ಸಂದಿಗ್ಧಸಂದರ್ಶನಮಾತ್ಮಕಾಂತಂ ತ್ವಾಂ ವೀಕ್ಷ್ಯ ತನ್ವ್ಯಃ ಸಹಸಾ ತದಾನೀಮ್ ।
ಕಿಂ ಕಿಂ ನ ಚಕ್ರುಃ ಪ್ರಮದಾತಿಭಾರಾತ್ ಸ ತ್ವಂ ಗದಾತ್ ಪಾಲಯ ಮಾರುತೇಶ ॥10॥