ಪ್ರದ್ಯುಮ್ನೋ ರೌಕ್ಮಿಣೇಯಃ ಸ ಖಲು ತವ ಕಲಾ ಶಂಬರೇಣಾಹೃತಸ್ತಂ
ಹತ್ವಾ ರತ್ಯಾ ಸಹಾಪ್ತೋ ನಿಜಪುರಮಹರದ್ರುಕ್ಮಿಕನ್ಯಾಂ ಚ ಧನ್ಯಾಮ್ ।
ತತ್ಪುತ್ರೋಽಥಾನಿರುದ್ಧೋ ಗುಣನಿಧಿರವಹದ್ರೋಚನಾಂ ರುಕ್ಮಿಪೌತ್ರೀಂ
ತತ್ರೋದ್ವಾಹೇ ಗತಸ್ತ್ವಂ ನ್ಯವಧಿ ಮುಸಲಿನಾ ರುಕ್ಮ್ಯಪಿ ದ್ಯೂತವೈರಾತ್ ॥1॥
ಬಾಣಸ್ಯ ಸಾ ಬಲಿಸುತಸ್ಯ ಸಹಸ್ರಬಾಹೋ-
ರ್ಮಾಹೇಶ್ವರಸ್ಯ ಮಹಿತಾ ದುಹಿತಾ ಕಿಲೋಷಾ ।
ತ್ವತ್ಪೌತ್ರಮೇನಮನಿರುದ್ಧಮದೃಷ್ಟಪೂರ್ವಂ
ಸ್ವಪ್ನೇಽನುಭೂಯ ಭಗವನ್ ವಿರಹಾತುರಾಽಭೂತ್ ॥2॥
ಯೋಗಿನ್ಯತೀವ ಕುಶಲಾ ಖಲು ಚಿತ್ರಲೇಖಾ
ತಸ್ಯಾಃ ಸಖೀ ವಿಲಿಖತೀ ತರುಣಾನಶೇಷಾನ್ ।
ತತ್ರಾನಿರುದ್ಧಮುಷಯಾ ವಿದಿತಂ ನಿಶಾಯಾ-
ಮಾನೇಷ್ಟ ಯೋಗಬಲತೋ ಭವತೋ ನಿಕೇತಾತ್ ॥3॥
ಕನ್ಯಾಪುರೇ ದಯಿತಯಾ ಸುಖಮಾರಮಂತಂ
ಚೈನಂ ಕಥಂಚನ ಬಬಂಧುಷಿ ಶರ್ವಬಂಧೌ ।
ಶ್ರೀನಾರದೋಕ್ತತದುದಂತದುರಂತರೋಷೈ-
ಸ್ತ್ವಂ ತಸ್ಯ ಶೋಣಿತಪುರಂ ಯದುಭಿರ್ನ್ಯರುಂಧಾಃ ॥4॥
ಪುರೀಪಾಲಶ್ಶೈಲಪ್ರಿಯದುಹಿತೃನಾಥೋಽಸ್ಯ ಭಗವಾನ್
ಸಮಂ ಭೂತವ್ರಾತೈರ್ಯದುಬಲಮಶಂಕಂ ನಿರುರುಧೇ ।
ಮಹಾಪ್ರಾಣೋ ಬಾಣೋ ಝಟಿತಿ ಯುಯುಧಾನೇನಯುಯುಧೇ
ಗುಹಃ ಪ್ರದ್ಯುಮ್ನೇನ ತ್ವಮಪಿ ಪುರಹಂತ್ರಾ ಜಘಟಿಷೇ ॥5॥
ನಿರುದ್ಧಾಶೇಷಾಸ್ತ್ರೇ ಮುಮುಹುಷಿ ತವಾಸ್ತ್ರೇಣ ಗಿರಿಶೇ
ದ್ರುತಾ ಭೂತಾ ಭೀತಾಃ ಪ್ರಮಥಕುಲವೀರಾಃ ಪ್ರಮಥಿತಾಃ ।
ಪರಾಸ್ಕಂದ್ತ್ ಸ್ಕಂದಃ ಕುಸುಮಶರಬಾಣೈಶ್ಚ ಸಚಿವಃ
ಸ ಕುಂಭಾಂಡೋ ಭಾಂಡಂ ನವಮಿವ ಬಲೇನಾಶು ಬಿಭಿದೇ ॥6॥
ಚಾಪಾನಾಂ ಪಂಚಶತ್ಯಾ ಪ್ರಸಭಮುಪಗತೇ ಛಿನ್ನಚಾಪೇಽಥ ಬಾಣೇ
ವ್ಯರ್ಥೇ ಯಾತೇ ಸಮೇತೋ ಜ್ವರಪತಿರಶನೈರಜ್ವರಿ ತ್ವಜ್ಜ್ವರೇಣ ।
ಜ್ಞಾನೀ ಸ್ತುತ್ವಾಽಥ ದತ್ವಾ ತವ ಚರಿತಜುಷಾಂ ವಿಜ್ವರಂ ಸ ಜ್ವರೋಽಗಾತ್
ಪ್ರಾಯೋಽಂತರ್ಜ್ಞಾನವಂತೋಽಪಿ ಚ ಬಹುತಮಸಾ ರೌದ್ರಚೇಷ್ಟಾ ಹಿ ರೌದ್ರಾಃ ॥7॥
ಬಾಣಂ ನಾನಾಯುಧೋಗ್ರಂ ಪುನರಭಿಪತಿತಂ ದರ್ಪದೋಷಾದ್ವಿತನ್ವನ್
ನಿರ್ಲೂನಾಶೇಷದೋಷಂ ಸಪದಿ ಬುಬುಧುಷಾ ಶಂಕರೇಣೋಪಗೀತಃ ।
ತದ್ವಾಚಾ ಶಿಷ್ಟಬಾಹುದ್ವಿತಯಮುಭಯತೋ ನಿರ್ಭಯಂ ತತ್ಪ್ರಿಯಂ ತಂ
ಮುಕ್ತ್ವಾ ತದ್ದತ್ತಮಾನೋ ನಿಜಪುರಮಗಮಃ ಸಾನಿರುದ್ಧಃ ಸಹೋಷಃ ॥8॥
ಮುಹುಸ್ತಾವಚ್ಛಕ್ರಂ ವರುಣಮಜಯೋ ನಂದಹರಣೇ
ಯಮಂ ಬಾಲಾನೀತೌ ದವದಹನಪಾನೇಽನಿಲಸಖಮ್ ।
ವಿಧಿಂ ವತ್ಸಸ್ತೇಯೇ ಗಿರಿಶಮಿಹ ಬಾಣಸ್ಯ ಸಮರೇ
ವಿಭೋ ವಿಶ್ವೋತ್ಕರ್ಷೀ ತದಯಮವತಾರೋ ಜಯತಿ ತೇ ॥9॥
ದ್ವಿಜರುಷಾ ಕೃಕಲಾಸವಪುರ್ಧರಂ ನೃಗನೃಪಂ ತ್ರಿದಿವಾಲಯಮಾಪಯನ್ ।
ನಿಜಜನೇ ದ್ವಿಜಭಕ್ತಿಮನುತ್ತಮಾಮುಪದಿಶನ್ ಪವನೇಶ್ವರ್ ಪಾಹಿ ಮಾಮ್ ॥10॥