ಕ್ವಚಿದಥ ತಪನೋಪರಾಗಕಾಲೇ ಪುರಿ ನಿದಧತ್ ಕೃತವರ್ಮಕಾಮಸೂನೂ ।
ಯದುಕುಲಮಹಿಲಾವೃತಃ ಸುತೀರ್ಥಂ ಸಮುಪಗತೋಽಸಿ ಸಮಂತಪಂಚಕಾಖ್ಯಮ್ ॥1॥
ಬಹುತರಜನತಾಹಿತಾಯ ತತ್ರ ತ್ವಮಪಿ ಪುನನ್ ವಿನಿಮಜ್ಯ ತೀರ್ಥತೋಯಮ್ ।
ದ್ವಿಜಗಣಪರಿಮುಕ್ತವಿತ್ತರಾಶಿಃ ಸಮಮಿಲಥಾಃ ಕುರುಪಾಂಡವಾದಿಮಿತ್ರೈಃ ॥2॥
ತವ ಖಲು ದಯಿತಾಜನೈಃ ಸಮೇತಾ ದ್ರುಪದಸುತಾ ತ್ವಯಿ ಗಾಢಭಕ್ತಿಭಾರಾ ।
ತದುದಿತಭವದಾಹೃತಿಪ್ರಕಾರೈಃ ಅತಿಮುಮುದೇ ಸಮಮನ್ಯಭಾಮಿನೀಭಿಃ ॥3॥
ತದನು ಚ ಭಗವನ್ ನಿರೀಕ್ಷ್ಯ ಗೋಪಾನತಿಕುತುಕಾದುಪಗಮ್ಯ ಮಾನಯಿತ್ವಾ।
ಚಿರತರವಿರಹಾತುರಾಂಗರೇಖಾಃ ಪಶುಪವಧೂಃ ಸರಸಂ ತ್ವಮನ್ವಯಾಸೀಃ ॥4॥
ಸಪದಿ ಚ ಭವದೀಕ್ಷಣೋತ್ಸವೇನ ಪ್ರಮುಷಿತಮಾನಹೃದಾಂ ನಿತಂಬಿನೀನಾಮ್ ।
ಅತಿರಸಪರಿಮುಕ್ತಕಂಚುಲೀಕೇ ಪರಿಚಯಹೃದ್ಯತರೇ ಕುಚೇ ನ್ಯಲೈಷೀಃ ॥5॥
ರಿಪುಜನಕಲಹೈಃ ಪುನಃ ಪುನರ್ಮೇ ಸಮುಪಗತೈರಿಯತೀ ವಿಲಂಬನಾಽಭೂತ್ ।
ಇತಿ ಕೃತಪರಿರಂಭಣೇತ್ವಯಿ ದ್ರಾಕ್ ಅತಿವಿವಶಾ ಖಲು ರಾಧಿಕಾ ನಿಲಿಲ್ಯೇ ॥6॥
ಅಪಗತವಿರಹವ್ಯಥಾಸ್ತದಾ ತಾ ರಹಸಿ ವಿಧಾಯ ದದಾಥ ತತ್ತ್ವಬೋಧಮ್ ।
ಪರಮಸುಖಚಿದಾತ್ಮಕೋಽಹಮಾತ್ಮೇತ್ಯುದಯತು ವಃ ಸ್ಫುಟಮೇವ ಚೇತಸೀತಿ ॥7॥
ಸುಖರಸಪರಿಮಿಶ್ರಿತೋ ವಿಯೋಗಃ ಕಿಮಪಿ ಪುರಾಽಭವದುದ್ಧವೋಪದೇಶೈಃ ।
ಸಮಭವದಮುತಃ ಪರಂ ತು ತಾಸಾಂ ಪರಮಸುಖೈಕ್ಯಮಯೀ ಭವದ್ವಿಚಿಂತಾ ॥8॥
ಮುನಿವರನಿವಹೈಸ್ತವಾಥ ಪಿತ್ರಾ ದುರಿತಶಮಾಯ ಶುಭಾನಿ ಪೃಚ್ಛ್ಯಮಾನೈಃ ।
ತ್ವಯಿ ಸತಿ ಕಿಮಿದಂ ಶುಭಾಂತರೈಃ ರಿತ್ಯುರುಹಸಿತೈರಪಿ ಯಾಜಿತಸ್ತದಾಽಸೌ ॥9॥
ಸುಮಹತಿ ಯಜನೇ ವಿತಾಯಮಾನೇ ಪ್ರಮುದಿತಮಿತ್ರಜನೇ ಸಹೈವ ಗೋಪಾಃ ।
ಯದುಜನಮಹಿತಾಸ್ತ್ರಿಮಾಸಮಾತ್ರಂ ಭವದನುಷಂಗರಸಂ ಪುರೇವ ಭೇಜು ಃ ॥10॥
ವ್ಯಪಗಮಸಮಯೇ ಸಮೇತ್ಯ ರಾಧಾಂ ದೃಢಮುಪಗೂಹ್ಯ ನಿರೀಕ್ಷ್ಯ ವೀತಖೇದಾಮ್ ।
ಪ್ರಮುದಿತಹೃದಯಃ ಪುರಂ ಪ್ರಯಾತಃ ಪವನಪುರೇಶ್ವರ ಪಾಹಿ ಮಾಂ ಗದೇಭ್ಯಃ ॥11॥