ಬಂಧುಸ್ನೇಹಂ ವಿಜಹ್ಯಾಂ ತವ ಹಿ ಕರುಣಯಾ ತ್ವಯ್ಯುಪಾವೇಶಿತಾತ್ಮಾ
ಸರ್ವಂ ತ್ಯಕ್ತ್ವಾ ಚರೇಯಂ ಸಕಲಮಪಿ ಜಗದ್ವೀಕ್ಷ್ಯ ಮಾಯಾವಿಲಾಸಮ್ ।
ನಾನಾತ್ವಾದ್ಭ್ರಾಂತಿಜನ್ಯಾತ್ ಸತಿ ಖಲು ಗುಣದೋಷಾವಬೋಧೇ ವಿಧಿರ್ವಾ
ವ್ಯಾಸೇಧೋ ವಾ ಕಥಂ ತೌ ತ್ವಯಿ ನಿಹಿತಮತೇರ್ವೀತವೈಷಮ್ಯಬುದ್ಧೇಃ ॥1॥
ಕ್ಷುತ್ತೃಷ್ಣಾಲೋಪಮಾತ್ರೇ ಸತತಕೃತಧಿಯೋ ಜಂತವಃ ಸಂತ್ಯನಂತಾ-
ಸ್ತೇಭ್ಯೋ ವಿಜ್ಞಾನವತ್ತ್ವಾತ್ ಪುರುಷ ಇಹ ವರಸ್ತಜ್ಜನಿರ್ದುರ್ಲಭೈವ ।
ತತ್ರಾಪ್ಯಾತ್ಮಾತ್ಮನಃ ಸ್ಯಾತ್ಸುಹೃದಪಿ ಚ ರಿಪುರ್ಯಸ್ತ್ವಯಿ ನ್ಯಸ್ತಚೇತಾ-
ಸ್ತಾಪೋಚ್ಛಿತ್ತೇರುಪಾಯಂ ಸ್ಮರತಿ ಸ ಹಿ ಸುಹೃತ್ ಸ್ವಾತ್ಮವೈರೀ ತತೋಽನ್ಯಃ ॥2॥
ತ್ವತ್ಕಾರುಣ್ಯೇ ಪ್ರವೃತ್ತೇ ಕ ಇವ ನಹಿ ಗುರುರ್ಲೋಕವೃತ್ತೇಽಪಿ ಭೂಮನ್
ಸರ್ವಾಕ್ರಾಂತಾಪಿ ಭೂಮಿರ್ನಹಿ ಚಲತಿ ತತಸ್ಸತ್ಕ್ಷಮಾಂ ಶಿಕ್ಷಯೇಯಮ್ ।
ಗೃಹ್ಣೀಯಾಮೀಶ ತತ್ತದ್ವಿಷಯಪರಿಚಯೇಽಪ್ಯಪ್ರಸಕ್ತಿಂ ಸಮೀರಾತ್
ವ್ಯಾಪ್ತತ್ವಂಚಾತ್ಮನೋ ಮೇ ಗಗನಗುರುವಶಾದ್ಭಾತು ನಿರ್ಲೇಪತಾ ಚ ॥3
ಸ್ವಚ್ಛಃ ಸ್ಯಾಂ ಪಾವನೋಽಹಂ ಮಧುರ ಉದಕವದ್ವಹ್ನಿವನ್ಮಾ ಸ್ಮ ಗೃಹ್ಣಾಂ
ಸರ್ವಾನ್ನೀನೋಽಪಿ ದೋಷಂ ತರುಷು ತಮಿವ ಮಾಂ ಸರ್ವಭೂತೇಷ್ವವೇಯಾಮ್ ।
ಪುಷ್ಟಿರ್ನಷ್ಟಿಃ ಕಲಾನಾಂ ಶಶಿನ ಇವ ತನೋರ್ನಾತ್ಮನೋಽಸ್ತೀತಿ ವಿದ್ಯಾಂ
ತೋಯಾದಿವ್ಯಸ್ತಮಾರ್ತಾಂಡವದಪಿ ಚ ತನುಷ್ವೇಕತಾಂ ತ್ವತ್ಪ್ರಸಾದಾತ್ ॥4॥
ಸ್ನೇಹಾದ್ವ್ಯಾಧಾತ್ತಪುತ್ರಪ್ರಣಯಮೃತಕಪೋತಾಯಿತೋ ಮಾ ಸ್ಮ ಭೂವಂ
ಪ್ರಾಪ್ತಂ ಪ್ರಾಶ್ನನ್ ಸಹೇಯ ಕ್ಷುಧಮಪಿ ಶಯುವತ್ ಸಿಂಧುವತ್ಸ್ಯಾಮಗಾಧಃ ।
ಮಾ ಪಪ್ತಂ ಯೋಷಿದಾದೌ ಶಿಖಿನಿ ಶಲಭವತ್ ಭೃಂಗವತ್ಸಾರಭಾಗೀ
ಭೂಯಾಸಂ ಕಿಂತು ತದ್ವದ್ಧನಚಯನವಶಾನ್ಮಾಹಮೀಶ ಪ್ರಣೇಶಮ್ ॥5॥
ಮಾ ಬದ್ಧ್ಯಾಸಂ ತರುಣ್ಯಾ ಗಜ ಇವ ವಶಯಾ ನಾರ್ಜಯೇಯಂ ಧನೌಘಂ
ಹರ್ತಾನ್ಯಸ್ತಂ ಹಿ ಮಾಧ್ವೀಹರ ಇವ ಮೃಗವನ್ಮಾ ಮುಹಂ ಗ್ರಾಮ್ಯಗೀತೈಃ ।
ನಾತ್ಯಾಸಜ್ಜೇಯ ಭೋಜ್ಯೇ ಝಷ ಇವ ಬಲಿಶೇ ಪಿಂಗಲಾವನ್ನಿರಾಶಃ
ಸುಪ್ಯಾಂ ಭರ್ತವ್ಯಯೋಗಾತ್ ಕುರರ ಇವ ವಿಭೋ ಸಾಮಿಷೋಽನ್ಯೈರ್ನ ಹನ್ಯೈ ॥6॥
ವರ್ತೇಯ ತ್ಯಕ್ತಮಾನಃ ಸುಖಮತಿಶಿಶುವನ್ನಿಸ್ಸಹಾಯಶ್ಚರೇಯಂ
ಕನ್ಯಾಯಾ ಏಕಶೇಷೋ ವಲಯ ಇವ ವಿಭೋ ವರ್ಜಿತಾನ್ಯೋನ್ಯಘೋಷಃ ।
ತ್ವಚ್ಚಿತ್ತೋ ನಾವಬುಧ್ಯೈ ಪರಮಿಷುಕೃದಿವ ಕ್ಷ್ಮಾಭೃದಾಯಾನಘೋಷಂ
ಗೇಹೇಷ್ವನ್ಯಪ್ರಣೀತೇಷ್ವಹಿರಿವ ನಿವಸಾನ್ಯುಂದುರೋರ್ಮಂದಿರೇಷು ॥7॥
ತ್ವಯ್ಯೇವ ತ್ವತ್ಕೃತಂ ತ್ವಂ ಕ್ಷಪಯಸಿ ಜಗದಿತ್ಯೂರ್ಣನಾಭಾತ್ ಪ್ರತೀಯಾಂ
ತ್ವಚ್ಚಿಂತಾ ತ್ವತ್ಸ್ವರೂಪಂ ಕುರುತ ಇತಿ ದೃಢಂ ಶಿಕ್ಷಯೇ ಪೇಶಕಾರಾತ್ ।
ವಿಡ್ಭಸ್ಮಾತ್ಮಾ ಚ ದೇಹೋ ಭವತಿ ಗುರುವರೋ ಯೋ ವಿವೇಕಂ ವಿರಕ್ತಿಂ
ಧತ್ತೇ ಸಂಚಿಂತ್ಯಮಾನೋ ಮಮ ತು ಬಹುರುಜಾಪೀಡಿತೋಽಯಂ ವಿಶೇಷಾತ್ ॥8॥
ಹೀ ಹೀ ಮೇ ದೇಹಮೋಹಂ ತ್ಯಜ ಪವನಪುರಾಧೀಶ ಯತ್ಪ್ರೇಮಹೇತೋ-
ರ್ಗೇಹೇ ವಿತ್ತೇ ಕಲತ್ರಾದಿಷು ಚ ವಿವಶಿತಾಸ್ತ್ವತ್ಪದಂ ವಿಸ್ಮರಂತಿ ।
ಸೋಽಯಂ ವಹ್ನೇಶ್ಶುನೋ ವಾ ಪರಮಿಹ ಪರತಃ ಸಾಂಪ್ರತಂಚಾಕ್ಷಿಕರ್ಣ-
ತ್ವಗ್ಜಿಹ್ವಾದ್ಯಾ ವಿಕರ್ಷಂತ್ಯವಶಮತ ಇತಃ ಕೋಽಪಿ ನ ತ್ವತ್ಪದಾಬ್ಜೇ ॥9॥
ದುರ್ವಾರೋ ದೇಹಮೋಹೋ ಯದಿ ಪುನರಧುನಾ ತರ್ಹಿ ನಿಶ್ಶೇಷರೋಗಾನ್
ಹೃತ್ವಾ ಭಕ್ತಿಂ ದ್ರಢಿಷ್ಠಾಂ ಕುರು ತವ ಪದಪಂಕೇರುಹೇ ಪಂಕಜಾಕ್ಷ ।
ನೂನಂ ನಾನಾಭವಾಂತೇ ಸಮಧಿಗತಮಮುಂ ಮುಕ್ತಿದಂ ವಿಪ್ರದೇಹಂ
ಕ್ಷುದ್ರೇ ಹಾ ಹಂತ ಮಾ ಮಾ ಕ್ಷಿಪ ವಿಷಯರಸೇ ಪಾಹಿ ಮಾಂ ಮಾರುತೇಶ ॥10॥