ಪ್ರಾತಸ್ಸ್ಮರಾಮಿ ಗಣನಾಥಮನಾಥಬಂಧುಂ
ಸಿಂದೂರಪೂರಪರಿಶೋಭಿತಗಂಡಯುಗ್ಮಮ್ ।
ಉದ್ದಂಡವಿಘ್ನಪರಿಖಂಡನಚಂಡದಂಡ-
ಮಾಖಂಡಲಾದಿಸುರನಾಯಕವೃಂದವಂದ್ಯಮ್ ॥ 1॥
ಕಲಾಭ್ಯಾಂ ಚೂಡಾಲಂಕೃತಶಶಿಕಲಾಭ್ಯಾಂ ನಿಜತಪಃ
ಫಲಾಭ್ಯಾಂ ಭಕ್ತೇಷು ಪ್ರಕಟಿತಫಲಾಭ್ಯಾಂ ಭವತು ಮೇ ।
ಶಿವಾಭ್ಯಾಮಾಸ್ತೀಕತ್ರಿಭುವನಶಿವಾಭ್ಯಾಂ ಹೃದಿ ಪುನ-
ರ್ಭವಾಭ್ಯಾಮಾನಂದಸ್ಫುರದನುಭವಾಭ್ಯಾಂ ನತಿರಿಯಮ್ ॥ 2॥
ನಮಸ್ತೇ ನಮಸ್ತೇ ಮಹಾದೇವ! ಶಂಭೋ!
ನಮಸ್ತೇ ನಮಸ್ತೇ ದಯಾಪೂರ್ಣಸಿಂಧೋ!
ನಮಸ್ತೇ ನಮಸ್ತೇ ಪ್ರಪನ್ನಾತ್ಮಬಂಧೋ!
ನಮಸ್ತೇ ನಮಸ್ತೇ ನಮಸ್ತೇ ಮಹೇಶ ॥ 3॥
ಶಶ್ವಚ್ಛ್ರೀಗಿರಿಮೂರ್ಧನಿ ತ್ರಿಜಗತಾಂ ರಕ್ಷಾಕೃತೌ ಲಕ್ಷಿತಾಂ
ಸಾಕ್ಷಾದಕ್ಷತಸತ್ಕಟಾಕ್ಷಸರಣಿಶ್ರೀಮತ್ಸುಧಾವರ್ಷಿಣೀಮ್ ।
ಸೋಮಾರ್ಧಾಂಕಿತಮಸ್ತಕಾಂ ಪ್ರಣಮತಾಂ ನಿಸ್ಸೀಮಸಂಪತ್ಪ್ರದಾಂ
ಸುಶ್ಲೋಕಾಂ ಭ್ರಮರಾಂಬಿಕಾಂ ಸ್ಮಿತಮುಖೀಂ ಶಂಭೋಸ್ಸಖೀಂ ತ್ವಾಂ ಸ್ತುಮಃ ॥ 4॥
ಮಾತಃ! ಪ್ರಸೀದ, ಸದಯಾ ಭವ, ಭವ್ಯಶೀಲೇ !
ಲೀಲಾಲವಾಕುಲಿತದೈತ್ಯಕುಲಾಪಹಾರೇ !
ಶ್ರೀಚಕ್ರರಾಜನಿಲಯೇ ! ಶ್ರುತಿಗೀತಕೀರ್ತೇ !
ಶ್ರೀಶೈಲನಾಥದಯಿತೇ ! ತವ ಸುಪ್ರಭಾತಮ್ ॥ 5॥
ಶಂಭೋ ! ಸುರೇಂದ್ರನುತ ! ಶಂಕರ ! ಶೂಲಪಾಣೇ !
ಚಂದ್ರಾವತಂಸ ! ಶಿವ ! ಶರ್ವ ! ಪಿನಾಕಪಾಣೇ !
ಗಂಗಾಧರ ! ಕ್ರತುಪತೇ ! ಗರುಡಧ್ವಜಾಪ್ತ !
ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್ ॥ 6॥
ವಿಶ್ವೇಶ ! ವಿಶ್ವಜನಸೇವಿತ ! ವಿಶ್ವಮೂರ್ತೇ !
ವಿಶ್ವಂಭರ ! ತ್ರಿಪುರಭೇದನ ! ವಿಶ್ವಯೋನೇ !
ಫಾಲಾಕ್ಷ ! ಭವ್ಯಗುಣ ! ಭೋಗಿವಿಭೂಷಣೇಶ !
ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್ ॥ 7॥
ಕಲ್ಯಾಣರೂಪ ! ಕರುಣಾಕರ ! ಕಾಲಕಂಠ !
ಕಲ್ಪದ್ರುಮಪ್ರಸವಪೂಜಿತ ! ಕಾಮದಾಯಿನ್ !
ದುರ್ನೀತಿದೈತ್ಯದಲನೋದ್ಯತ ! ದೇವ ದೇವ !
ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್ ॥ 8॥
ಗೌರೀಮನೋಹರ ! ಗಣೇಶ್ವರಸೇವಿತಾಂಘ್ರೇ !
ಗಂಧರ್ವಯಕ್ಷಸುರಕಿನ್ನರಗೀತಕೀರ್ತೇ !
ಗಂಡಾವಲಂಬಿಫಣಿಕುಂಡಲಮಂಡಿತಾಸ್ಯ !
ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್ ॥ 9॥
ನಾಗೇಂದ್ರಭೂಷಣ ! ನಿರೀಹಿತ ! ನಿರ್ವಿಕಾರ !
ನಿರ್ಮಾಯ ! ನಿಶ್ಚಲ ! ನಿರರ್ಗಲ ! ನಾಗಭೇದಿನ್ ।
ನಾರಾಯಣೀಪ್ರಿಯ ! ನತೇಷ್ಟದ ! ನಿರ್ಮಲಾತ್ಮನ್ !
ಶ್ರೀಪರ್ವತಾಧಿಪ ! ವಿಭೋ ! ತವ ಸುಪ್ರಭಾತಮ್ ॥ 10॥
ಸೃಷ್ಟಂ ತ್ವಯೈವ ಜಗದೇತದಶೇಷಮೀಶ !
ರಕ್ಷಾವಿಧಿಶ್ಚ ವಿಧಿಗೋಚರ ! ತಾವಕೀನಃ ।
ಸಂಹಾರಶಕ್ತಿರಪಿ ಶಂಕರ ! ಕಿಂಕರೀ ತೇ
ಶ್ರೀಶೈಲಶೇಖರ ವಿಭೋ ! ತವ ಸುಪ್ರಭಾತಮ್ ॥ 11॥
ಏಕಸ್ತ್ವಮೇವ ಬಹುಧಾ ಭವ ! ಭಾಸಿ ಲೋಕೇ
ನಿಶ್ಶಂಕಧೀರ್ವೃಷಭಕೇತನ ! ಮಲ್ಲಿನಾಥ !
ಶ್ರೀಭ್ರಾಮರೀಪ್ರಯ ! ಸುಖಾಶ್ರಯ ! ಲೋಕನಾಥ !
ಶ್ರೀಶೈಲಶೇಖರ ವಿಭೋ ! ತವ ಸುಪ್ರಭಾತಮ್ ॥ 12॥
ಪಾತಾಲಗಾಂಗಜಲಮಜ್ಜನನಿರ್ಮಲಾಂಗಾಃ
ಭಸ್ಮತ್ರಿಪುಂಡ್ರಸಮಲಂಕೃತಫಾಲಭಾಗಾಃ ।
ಗಾಯಂತಿ ದೇವಮುನಿಭಕ್ತಜನಾ ಭವಂತಂ
ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್ ॥ 13॥
ಸಾರಸ್ವತಾಂಬುಯುತಭೋಗವತೀಶ್ರಿತಾಯಾಃ
ಬ್ರಹ್ಮೇಶವಿಷ್ಣುಗಿರಿಚುಂಬಿತಕೃಷ್ಣವೇಣ್ಯಾಃ ।
ಸೋಪಾನಮಾರ್ಗಮಧಿರುಹ್ಯ ಭಜಂತಿ ಭಕ್ತಾಃ
ಶ್ರೀಮಲ್ಲಿಕಾರ್ಜುನ ವಿಭೋ ! ತವ ಸುಪ್ರಭಾತಮ್ ॥ 14॥
ಶ್ರೀಮಲ್ಲಿಕಾರ್ಜುನಮಹೇಶ್ವರಸುಪ್ರಭಾತ-
ಸ್ತೋತ್ರಂ ಪಠಂತಿ ಭುವಿ ಯೇ ಮನುಜಾಃ ಪ್ರಭಾತೇ ।
ತೇ ಸರ್ವ ಸೌಖ್ಯಮನುಭೂಯ ಪರಾನವಾಪ್ಯಂ
ಶ್ರೀಶಾಂಭವಂ ಪದಮವಾಪ್ಯ ಮುದಂ ಲಭಂತೇ ॥ 15॥
ಇತಿ ಶ್ರೀಮಲ್ಲಿಕಾರ್ಜುನಸುಪ್ರಭಾತಂ ಸಂಪೂರ್ಣಮ್ ।