ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ಚತುರ್ಥಃ ಪ್ರಶ್ನಃ – ಸುತ್ಯಾದಿನೇ ಕರ್ತವ್ಯಾ ಗ್ರಹಾಃ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಆ ದ॑ದೇ॒ ಗ್ರಾವಾ᳚-ಽಸ್ಯದ್ಧ್ವರ॒ಕೃ-ದ್ದೇ॒ವೇಭ್ಯೋ॑ ಗಮ್ಭೀ॒ರಮಿ॒ಮ- ಮ॑ದ್ಧ್ವ॒ರ-ಙ್ಕೃ॑ದ್ಧ್ಯುತ್ತ॒ಮೇನ॑ ಪ॒ವಿನೇನ್ದ್ರಾ॑ಯ॒ ಸೋಮ॒ಗ್ಂ॒ ಸುಷು॑ತ॒-ಮ್ಮಧು॑ಮನ್ತ॒-ಮ್ಪಯ॑ಸ್ವನ್ತಂ-ವೃಁಷ್ಟಿ॒ವನಿ॒ಮಿನ್ದ್ರಾ॑ಯ ತ್ವಾ ವೃತ್ರ॒ಘ್ನ ಇನ್ದ್ರಾ॑ಯ ತ್ವಾ ವೃತ್ರ॒ತುರ॒ ಇನ್ದ್ರಾ॑ಯ ತ್ವಾ-ಽಭಿಮಾತಿ॒ಘ್ನ ಇನ್ದ್ರಾ॑ಯ ತ್ವಾ-ಽಽದಿ॒ತ್ಯವ॑ತ॒ ಇನ್ದ್ರಾ॑ಯ ತ್ವಾ ವಿ॒ಶ್ವದೇ᳚ವ್ಯಾವತೇ ಶ್ವಾ॒ತ್ರಾ-ಸ್ಸ್ಥ॑ ವೃತ್ರ॒ತುರೋ॒ ರಾಧೋ॑ಗೂರ್ತಾ ಅ॒ಮೃತ॑ಸ್ಯ॒ ಪತ್ನೀ॒ಸ್ತಾ ದೇ॑ವೀ-ರ್ದೇವ॒ತ್ರೇಮಂ-ಯಁ॒ಜ್ಞ-ನ್ಧ॒ತ್ತೋಪ॑ಹೂತಾ॒-ಸ್ಸೋಮ॑ಸ್ಯ ಪಿಬ॒ತೋಪ॑ಹೂತೋ ಯು॒ಷ್ಮಾಕ॒ಗ್ಂ॒ [ಯು॒ಷ್ಮಾಕ᳚ಮ್, ಸೋಮಃ॑ ಪಿಬತು॒ ಯತ್ತೇ॑] 1
ಸೋಮಃ॑ ಪಿಬತು॒ ಯತ್ತೇ॑ ಸೋಮ ದಿ॒ವಿ ಜ್ಯೋತಿ॒ರ್ಯ-ತ್ಪೃ॑ಥಿ॒ವ್ಯಾಂ-ಯಁದು॒ರಾವ॒ನ್ತರಿ॑ಖ್ಷೇ॒ ತೇನಾ॒ಸ್ಮೈ ಯಜ॑ಮಾನಾಯೋ॒ರು ರಾ॒ಯಾ ಕೃ॒ದ್ಧ್ಯಧಿ॑ ದಾ॒ತ್ರೇ ವೋ॑ಚೋ॒ ಧಿಷ॑ಣೇ ವೀ॒ಡೂ ಸ॒ತೀ ವೀ॑ಡಯೇಥಾ॒-ಮೂರ್ಜ॑-ನ್ದಧಾಥಾ॒ಮೂರ್ಜ॑-ಮ್ಮೇ ಧತ್ತ॒-ಮ್ಮಾ ವಾಗ್ಂ॑ ಹಿಗ್ಂಸಿಷ॒-ಮ್ಮಾ ಮಾ॑ ಹಿಗ್ಂಸಿಷ್ಟ॒-ಮ್ಪ್ರಾಗಪಾ॒ಗುದ॑ಗಧ॒ರಾಕ್ತಾಸ್ತ್ವಾ॒ ದಿಶ॒ ಆ ಧಾ॑ವ॒ನ್ತ್ವಮ್ಬ॒ ನಿ ಷ್ವ॑ರ । ಯತ್ತೇ॑ ಸೋ॒ಮಾ-ಽದಾ᳚ಭ್ಯ॒-ನ್ನಾಮ॒ ಜಾಗೃ॑ವಿ॒ ತಸ್ಮೈ॑ ತೇ ಸೋಮ॒ ಸೋಮಾ॑ಯ॒ ಸ್ವಾಹಾ᳚ ॥ 2 ॥
(ಯು॒ಷ್ಮಾಕಗ್ಗ್॑ – ಸ್ವರ॒ ಯತ್ತೇ॒ -ನವ॑ ಚ ) (ಅ. 1)
ವಾ॒ಚಸ್ಪತ॑ಯೇ ಪವಸ್ವ ವಾಜಿ॒ನ್ ವೃಷಾ॒ ವೃಷ್ಣೋ॑ ಅ॒ಗ್ಂ॒ಶುಭ್ಯಾ॒-ಙ್ಗಭ॑ಸ್ತಿಪೂತೋ ದೇ॒ವೋ ದೇ॒ವಾನಾ᳚-ಮ್ಪ॒ವಿತ್ರ॑ಮಸಿ॒ ಯೇಷಾ᳚-ಮ್ಭಾ॒ಗೋ-ಽಸಿ॒ ತೇಭ್ಯ॑ಸ್ತ್ವಾ॒ ಸ್ವಾಙ್ಕೃ॑ತೋ-ಽಸಿ॒ ಮಧು॑ಮತೀ-ರ್ನ॒ ಇಷ॑ಸ್ಕೃಧಿ॒ ವಿಶ್ವೇ᳚ಭ್ಯಸ್ತ್ವೇನ್ದ್ರಿ॒ಯೇಭ್ಯೋ॑ ದಿ॒ವ್ಯೇಭ್ಯಃ॒ ಪಾರ್ಥಿ॑ವೇಭ್ಯೋ॒ ಮನ॑ಸ್ತ್ವಾ ಽಷ್ಟೂ॒ರ್ವ॑ನ್ತರಿ॑ಖ್ಷ॒-ಮನ್ವಿ॑ಹಿ॒ ಸ್ವಾಹಾ᳚ ತ್ವಾ ಸುಭವ॒-ಸ್ಸೂರ್ಯಾ॑ಯ ದೇ॒ವೇಭ್ಯ॑ಸ್ತ್ವಾ ಮರೀಚಿ॒ಪೇಭ್ಯ॑ ಏ॒ಷ ತೇ॒ ಯೋನಿಃ॑ ಪ್ರಾ॒ಣಾಯ॑ ತ್ವಾ ॥ 3 ॥
(ವಾ॒ಚಃ-ಸ॒ಪ್ತಚ॑ತ್ವಾರಿಗ್ಂಶತ್) (ಅ. 2)
ಉ॒ಪ॒ಯಾ॒ಮಗೃ॑ಹೀತೋ ಽಸ್ಯ॒ನ್ತರ್ಯ॑ಚ್ಛ ಮಘವ-ನ್ಪಾ॒ಹಿ ಸೋಮ॑ಮುರು॒ಷ್ಯ ರಾಯ॒-ಸ್ಸಮಿಷೋ॑ ಯಜಸ್ವಾ॒-ಽನ್ತಸ್ತೇ॑ ದಧಾಮಿ॒ ದ್ಯಾವಾ॑ಪೃಥಿ॒ವೀ ಅ॒ನ್ತರು॒ರ್ವ॑ನ್ತರಿ॑ಖ್ಷಗ್ಂ ಸ॒ಜೋಷಾ॑ ದೇ॒ವೈರವ॑ರೈಃ॒ ಪರೈ᳚ಶ್ಚಾ-ಽನ್ತರ್ಯಾ॒ಮೇ ಮ॑ಘವ-ನ್ಮಾದಯಸ್ವ॒ ಸ್ವಾಙ್ಕೃ॑ತೋ-ಽಸಿ॒ ಮಧು॑ಮತೀರ್ನ॒ ಇಷ॑ಸ್ಕೃಧಿ॒ ವಿಶ್ವೇ᳚ಭ್ಯಸ್ತ್ವೇನ್ದ್ರಿ॒ಯೇಭ್ಯೋ॑ ದಿ॒ವ್ಯೇಭ್ಯಃ॒ ಪಾರ್ಥಿ॑ವೇಭ್ಯೋ॒ ಮನ॑ಸ್ತ್ವಾ-ಽಷ್ಟೂ॒ರ್ವ॑ನ್ತರಿ॑ಖ್ಷ॒ಮನ್ವಿ॑ಹಿ॒ ಸ್ವಾಹಾ᳚ ತ್ವಾ ಸುಭವ॒-ಸ್ಸೂರ್ಯಾ॑ಯ ದೇ॒ವೇಭ್ಯ॑ ಸ್ತ್ವಾ ಮರೀಚಿ॒ಪೇಭ್ಯ॑ ಏ॒ಷ ತೇ॒ ಯೋನಿ॑ರಪಾ॒ನಾಯ॑ ತ್ವಾ ॥ 4 ॥
(ದೇ॒ವೇಭ್ಯಃ॑-ಸ॒ಪ್ತ ಚ॑) (ಅ. 3)
ಆ ವಾ॑ಯೋ ಭೂಷ ಶುಚಿಪಾ॒ ಉಪ॑ ನ-ಸ್ಸ॒ಹಸ್ರ॑-ನ್ತೇ ನಿ॒ಯುತೋ॑ ವಿಶ್ವವಾರ । ಉಪೋ॑ ತೇ॒ ಅನ್ಧೋ॒ ಮದ್ಯ॑ಮಯಾಮಿ॒ ಯಸ್ಯ॑ ದೇವ ದಧಿ॒ಷೇ ಪೂ᳚ರ್ವ॒ಪೇಯ᳚ಮ್ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ ವಾ॒ಯವೇ॒ ತ್ವೇನ್ದ್ರ॑ವಾಯೂ ಇ॒ಮೇ ಸು॒ತಾಃ । ಉಪ॒ ಪ್ರಯೋ॑ಭಿ॒ರಾ ಗ॑ತ॒ಮಿನ್ದ॑ವೋ ವಾಮು॒ಶನ್ತಿ॒ ಹಿ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸೀನ್ದ್ರವಾ॒ಯುಭ್ಯಾ᳚-ನ್ತ್ವೈ॒ಷ ತೇ॒ ಯೋನಿ॑-ಸ್ಸ॒ಜೋಷಾ᳚ಭ್ಯಾ-ನ್ತ್ವಾ ॥ 5 ॥
(ಆ ವಾ॑ಯೋ॒- ತ್ರಿಚ॑ತ್ವಾರಿಗ್ಂಶತ್) (ಅ. 4)
ಅ॒ಯಂ-ವಾಁ᳚-ಮ್ಮಿತ್ರಾವರುಣಾ ಸು॒ತ-ಸ್ಸೋಮ॑ ಋತಾವೃಧಾ । ಮಮೇದಿ॒ಹ ಶ್ರು॑ತ॒ಗ್ಂ॒ ಹವ᳚ಮ್ । ಉ॒ಪ॒ಯಾ॒ಮಗೃ॑ಹೀತೋ-ಽಸಿ ಮಿ॒ತ್ರಾವರು॑ಣಾಭ್ಯಾ-ನ್ತ್ವೈ॒ಷ ತೇ॒ ಯೋನಿ॑ರ್-ಋತಾ॒ಯುಭ್ಯಾ᳚-ನ್ತ್ವಾ ॥ 6 ॥
(ಅ॒ಯಂ-ವಾಁಂ᳚ – ವಿಁಗ್ಂಶ॒ತಿಃ) (ಅ. 5)
ಯಾ ವಾ॒-ಙ್ಕಶಾ॒ ಮಧು॑ಮ॒ತ್ಯಶ್ವಿ॑ನಾ ಸೂ॒ನೃತಾ॑ವತೀ । ತಯಾ॑ ಯ॒ಜ್ಞ-ಮ್ಮಿ॑ಮಿಖ್ಷತಮ್ । ಉ॒ಪ॒ಯಾ॒ಮಗೃ॑ಹೀತೋ-ಽಸ್ಯ॒ಶ್ವಿಭ್ಯಾ᳚-ನ್ತ್ವೈ॒ಷ ತೇ॒ ಯೋನಿ॒ರ್ಮಾದ್ಧ್ವೀ᳚ಭ್ಯಾ-ನ್ತ್ವಾ ॥ 7 ॥
(ಯಾ ವಾ॑- ಮ॒ಷ್ಟಾದ॑ಶ) (ಅ. 6)
ಪ್ರಾ॒ತ॒ರ್ಯುಜೌ॒ ವಿ ಮು॑ಚ್ಯೇಥಾ॒-ಮಶ್ವಿ॑ನಾ॒ವೇಹ ಗ॑ಚ್ಛತಮ್ । ಅ॒ಸ್ಯ ಸೋಮ॑ಸ್ಯ ಪೀ॒ತಯೇ᳚ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸ್ಯ॒ಶ್ವಿಭ್ಯಾ᳚-ನ್ತ್ವೈ॒ಷ ತೇ॒ ಯೋನಿ॑ರ॒ಶ್ವಿಭ್ಯಾ᳚-ನ್ತ್ವಾ ॥ 8 ॥
(ಪ್ರಾ॒ತ॒ರ್ಯುಜಾ॒ವೇ-ಕಾ॒ನ್ನವಿಗ್ಂ॑ಶ॒ತಿಃ) (ಅ. 7)
ಅ॒ಯಂ-ವೇಁ॒ನಶ್ಚೋ॑ದಯ॒-ತ್ಪೃಶ್ಞಿ॑ಗರ್ಭಾ॒ ಜ್ಯೋತಿ॑ರ್ಜರಾಯೂ॒ ರಜ॑ಸೋ ವಿ॒ಮಾನೇ᳚ । ಇ॒ಮಮ॒ಪಾಗ್ಂ ಸ॑ಙ್ಗ॒ಮೇ ಸೂರ್ಯ॑ಸ್ಯ॒ ಶಿಶು॒-ನ್ನ ವಿಪ್ರಾ॑ ಮ॒ತಿಭೀ॑ ರಿಹನ್ತಿ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ॒ ಶಣ್ಡಾ॑ಯ ತ್ವೈ॒ಷ ತೇ॒ ಯೋನಿ॑-ರ್ವೀ॒ರತಾ᳚-ಮ್ಪಾಹಿ ॥ 9 ॥
(ಅ॒ಯಂ-ವೇಁ॒ನಃ- ಪಞ್ಚ॑ವಿಗ್ಂಶತಿಃ) (ಅ. 8)
ತ-ಮ್ಪ್ರ॒ತ್ನಥಾ॑ ಪೂ॒ರ್ವಥಾ॑ ವಿ॒ಶ್ವಥೇ॒ಮಥಾ᳚ ಜ್ಯೇ॒ಷ್ಠತಾ॑ತಿ-ಮ್ಬರ್ಹಿ॒ಷದಗ್ಂ॑ ಸುವ॒ರ್ವಿದ॑-ಮ್ಪ್ರತೀಚೀ॒ನಂ-ವೃಁ॒ಜನ॑-ನ್ದೋಹಸೇ ಗಿ॒ರಾ-ಽಽಶು-ಞ್ಜಯ॑ನ್ತ॒ಮನು॒ ಯಾಸು॒ ವರ್ಧ॑ಸೇ । ಉ॒ಪ॒ಯಾ॒ಮಗೃ॑ಹೀತೋ-ಽಸಿ॒ ಮರ್ಕಾ॑ಯ ತ್ವೈ॒ಷ ತೇ॒ ಯೋನಿಃ॑ ಪ್ರ॒ಜಾಃ ಪಾ॑ಹಿ ॥ 10 ॥
(ತ-ಮ್ಪ್ರ॒ತ್ನಯಾ॒-ಷಟ್ವಿಗ್ಂ॑ಶತಿಃ ) (ಅ. 9)
ಯೇ ದೇ॑ವಾ ದಿ॒ವ್ಯೇಕಾ॑ದಶ॒ ಸ್ಥ ಪೃ॑ಥಿ॒ವ್ಯಾಮದ್ಧ್ಯೇಕಾ॑ದಶ॒ ಸ್ಥಾ-ಽಫ್ಸು॒ಷದೋ॑ ಮಹಿ॒ನೈಕಾ॑ದಶ॒ ಸ್ಥ ತೇ ದೇ॑ವಾ ಯ॒ಜ್ಞಮಿ॒ಮ-ಞ್ಜು॑ಷದ್ಧ್ವ-ಮುಪಯಾ॒ಮಗೃ॑ಹೀತೋ-ಽಸ್ಯಾಗ್ರಯ॒ಣೋ॑-ಽಸಿ॒ ಸ್ವಾ᳚ಗ್ರಯಣೋ॒ ಜಿನ್ವ॑ ಯ॒ಜ್ಞ-ಞ್ಜಿನ್ವ॑ ಯ॒ಜ್ಞಪ॑ತಿಮ॒ಭಿ ಸವ॑ನಾ ಪಾಹಿ॒ ವಿಷ್ಣು॒ಸ್ತ್ವಾ-ಮ್ಪಾ॑ತು॒ ವಿಶ॒-ನ್ತ್ವ-ಮ್ಪಾ॑ಹೀನ್ದ್ರಿ॒ಯೇಣೈ॒ಷ ತೇ॒ ಯೋನಿ॒-ರ್ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯಃ॑ ॥ 11 ॥
ಯೇ ದೇ॑ವಾ॒-ಸ್ತ್ರಿಚ॑ತ್ವಾರಿಗ್ಂಶತ್) (ಅ. 10)
ತ್ರಿ॒ಗ್ಂ॒ಶತ್ತ್ರಯ॑ಶ್ಚ ಗ॒ಣಿನೋ॑ ರು॒ಜನ್ತೋ॒ ದಿವಗ್ಂ॑ ರು॒ದ್ರಾಃ ಪೃ॑ಥಿ॒ವೀ-ಞ್ಚ॑ ಸಚನ್ತೇ । ಏ॒ಕಾ॒ದ॒ಶಾಸೋ॑ ಅಫ್ಸು॒ಷದ॑-ಸ್ಸು॒ತಗ್ಂ ಸೋಮ॑-ಞ್ಜುಷನ್ತಾ॒ಗ್ಂ॒ ಸವ॑ನಾಯ॒ ವಿಶ್ವೇ᳚ ॥ ಉ॒ಪ॒ಯಾ॒ಮಗೃ॑ಹೀತೋ -ಽಸ್ಯಾಗ್ರಯ॒ಣೋ॑-ಽಸಿ॒ ಸ್ವಾ᳚ಗ್ರಯಣೋ॒ ಜಿನ್ವ॑ ಯ॒ಜ್ಞ-ಞ್ಜಿನ್ವ॑ ಯ॒ಜ್ಞಪ॑ತಿಮ॒ಭಿ ಸವ॑ನಾ ಪಾಹಿ॒ ವಿಷ್ಣು॒ಸ್ತ್ವಾ-ಮ್ಪಾ॑ತು॒ ವಿಶ॒-ನ್ತ್ವ-ಮ್ಪಾ॑ಹೀನ್ದ್ರಿ॒ಯೇಣೈ॒ಷ ತೇ॒ ಯೋನಿ॒-ರ್ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯಃ॑ ॥ 12 ॥
(ತ್ರಿ॒ಗ್ಂ॒ಶತ್ತ್ರಯೋ॒-ದ್ವಿಚ॑ತ್ವಾರಿಗ್ಂಶತ್) (ಅ. 11)
ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವಾ ಬೃ॒ಹದ್ವ॑ತೇ॒ ವಯ॑ಸ್ವತ ಉಕ್ಥಾ॒ಯುವೇ॒ ಯತ್ತ॑ ಇನ್ದ್ರ ಬೃ॒ಹದ್ವಯ॒ಸ್ತಸ್ಮೈ᳚ ತ್ವಾ॒ ವಿಷ್ಣ॑ವೇ ತ್ವೈ॒ಷ ತೇ॒ ಯೋನಿ॒ರಿನ್ದ್ರಾ॑ಯ ತ್ವೋಕ್ಥಾ॒ಯುವೇ᳚ ॥ 13 ॥
(ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ॒-ದ್ವಾವಿಗ್ಂ॑ಶತಿಃ) (ಅ. 12)
ಮೂ॒ರ್ಧಾನ॑-ನ್ದಿ॒ವೋ ಅ॑ರ॒ತಿ-ಮ್ಪೃ॑ಥಿ॒ವ್ಯಾ ವೈ᳚ಶ್ವಾನ॒ರಮೃ॒ತಾಯ॑ ಜಾ॒ತಮ॒ಗ್ನಿಮ್ । ಕ॒ವಿಗ್ಂ ಸ॒ಮ್ರಾಜ॒-ಮತಿ॑ಥಿ॒-ಞ್ಜನಾ॑ನಾಮಾ॒ಸನ್ನಾ ಪಾತ್ರ॑-ಞ್ಜನಯನ್ತ ದೇ॒ವಾಃ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸ್ಯ॒ಗ್ನಯೇ᳚ ತ್ವಾ ವೈಶ್ವಾನ॒ರಾಯ॑ ಧ್ರು॒ವೋ॑-ಽಸಿ ಧ್ರು॒ವಖ್ಷಿ॑ತಿ-ರ್ಧ್ರು॒ವಾಣಾ᳚-ನ್ಧ್ರು॒ವತ॒ಮೋ-ಽಚ್ಯು॑ತಾನಾ-ಮಚ್ಯುತ॒ಖ್ಷಿತ್ತ॑ಮ ಏ॒ಷ ತೇ॒ ಯೋನಿ॑ರ॒ಗ್ನಯೇ᳚ ತ್ವಾ ವೈಶ್ವಾನ॒ರಾಯ॑ ॥ 14 ॥
(ಮೂ॒ರ್ಧಾನಂ॒-ಪಞ್ಚ॑ತ್ರಿಗ್ಂಶತ್) (ಅ. 13)
ಮಧು॑ಶ್ಚ॒ ಮಾಧ॑ವಶ್ಚ ಶು॒ಕ್ರಶ್ಚ॒ ಶುಚಿ॑ಶ್ಚ॒ ನಭ॑ಶ್ಚ ನಭ॒ಸ್ಯ॑ಶ್ಚೇ॒ಷಶ್ಚೋ॒ರ್ಜಶ್ಚ॒ ಸಹ॑ಶ್ಚ ಸಹ॒ಸ್ಯ॑ಶ್ಚ॒ ತಪ॑ಶ್ಚ ತಪ॒ಸ್ಯ॑ಶ್ಚೋ-ಪಯಾ॒ಮಗೃ॑ಹೀತೋ-ಽಸಿ ಸ॒ಗ್ಂ॒ಸರ್ಪೋ᳚- ಽಸ್ಯಗ್ಂಹಸ್ಪ॒ತ್ಯಾಯ॑ ತ್ವಾ ॥ 15 ॥
(ಮಧು॑ಶ್ಚ-ತ್ರಿ॒ಗ್ಂ॒ಶತ್) (ಅ. 14)
ಇನ್ದ್ರಾ᳚ಗ್ನೀ॒ ಆ ಗ॑ತಗ್ಂ ಸು॒ತ-ಙ್ಗೀ॒ರ್ಭಿ-ರ್ನಭೋ॒ ವರೇ᳚ಣ್ಯಮ್ । ಅ॒ಸ್ಯ ಪಾ॑ತ-ನ್ಧಿ॒ಯೇಷಿ॒ತಾ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸೀನ್ದ್ರಾ॒ಗ್ನಿಭ್ಯಾ᳚-ನ್ತ್ವೈ॒ಷ ತೇ॒ ಯೋನಿ॑ರಿನ್ದ್ರಾ॒ಗ್ನಿಭ್ಯಾ᳚-ನ್ತ್ವಾ ॥ 16 ॥
(ಇನ್ದ್ರಾ᳚ಗ್ನೀ॒ ವಿಗ್ಂಶ॒ತಿಃ) (ಅ. 15)
ಓಮಾ॑ಸಶ್ಚರ್ಷಣೀಧೃತೋ॒ ವಿಶ್ವೇ॑ ದೇವಾಸ॒ ಆ ಗ॑ತ । ದಾ॒ಶ್ವಾಗ್ಂಸೋ॑ ದಾ॒ಶುಷ॑-ಸ್ಸು॒ತಮ್ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ॒ ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯ॑ ಏ॒ಷ ತೇ॒ ಯೋನಿ॒-ರ್ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯಃ॑ ॥ 17 ॥
(ಓಮಾ॑ಸೋ ವಿಗ್ಂಶ॒ತಿಃ) (ಅ. 16)
ಮ॒ರುತ್ವ॑ನ್ತಂ-ವೃಁಷ॒ಭಂ-ವಾಁ॑ವೃಧಾ॒ನಮಕ॑ವಾರಿ-ನ್ದಿ॒ವ್ಯಗ್ಂ ಶಾ॒ಸಮಿನ್ದ್ರ᳚ಮ್ । ವಿ॒ಶ್ವಾ॒ಸಾಹ॒ಮವ॑ಸೇ॒ ನೂತ॑ನಾಯೋ॒ಗ್ರಗ್ಂ ಸ॑ಹೋ॒ದಾಮಿ॒ಹ ತಗ್ಂ ಹು॑ವೇಮ ॥ ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವಾ ಮ॒ರುತ್ವ॑ತ ಏ॒ಷ ತೇ॒ ಯೋನಿ॒ರಿನ್ದ್ರಾ॑ಯ ತ್ವಾ ಮ॒ರುತ್ವ॑ತೇ ॥ 18 ॥
(ಮ॒ರುತ್ವ॑ನ್ತ॒ಗ್ಂ॒-ಷಟ್ವಿಗ್ಂ॑ಶತಿಃ) (ಅ. 17)
ಇನ್ದ್ರ॑ ಮರುತ್ವ ಇ॒ಹ ಪಾ॑ಹಿ॒ ಸೋಮಂ॒-ಯಁಥಾ॑ ಶಾರ್ಯಾ॒ತೇ ಅಪಿ॑ಬ-ಸ್ಸು॒ತಸ್ಯ॑ । ತವ॒ ಪ್ರಣೀ॑ತೀ॒ ತವ॑ ಶೂರ॒ ಶರ್ಮ॒ನ್ನಾ-ವಿ॑ವಾಸನ್ತಿ ಕ॒ವಯ॑-ಸ್ಸುಯ॒ಜ್ಞಾಃ ॥ ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವಾ ಮ॒ರುತ್ವ॑ತ ಏ॒ಷ ತೇ॒ ಯೋನಿ॒ರಿನ್ದ್ರಾ॑ಯ ತ್ವಾ ಮ॒ರುತ್ವ॑ತೇ ॥ 19 ॥
(ಇನ್ದ್ರೈ॒ಕಾ॒ನ್ನ ತ್ರಿ॒ಗ್ಂ॒ಶತ್) (ಅ. 18)
ಮ॒ರುತ್ವಾಗ್ಂ॑ ಇನ್ದ್ರ ವೃಷ॒ಭೋ ರಣಾ॑ಯ॒ ಪಿಬಾ॒ ಸೋಮ॑ಮನುಷ್ವ॒ಧ-ಮ್ಮದಾ॑ಯ । ಆ ಸಿ॑ಞ್ಚಸ್ವ ಜ॒ಠರೇ॒ ಮದ್ಧ್ವ॑ ಊ॒ರ್ಮಿ-ನ್ತ್ವಗ್ಂ ರಾಜಾ॑-ಽಸಿ ಪ್ರ॒ದಿವ॑-ಸ್ಸು॒ತಾನಾ᳚ಮ್ ॥ ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವಾ ಮ॒ರುತ್ವ॑ತ ಏ॒ಷ ತೇ॒ ಯೋನಿ॒ರಿನ್ದ್ರಾ॑ಯ ತ್ವಾ ಮ॒ರುತ್ವ॑ತೇ ॥ 20 ॥
(ಮ॒ರುತ್ವಾ॒ನೇಕಾ॒ನ್ನತ್ರಿ॒ಗ್ಂ॒ಶತ್) (ಅ. 19)
ಮ॒ಹಾಗ್ಂ ಇನ್ದ್ರೋ॒ ಯ ಓಜ॑ಸಾ ಪ॒ರ್ಜನ್ಯೋ॑ ವೃಷ್ಟಿ॒ಮಾಗ್ಂ ಇ॑ವ । ಸ್ತೋಮೈ᳚ರ್ವ॒ಥ್ಸಸ್ಯ॑ ವಾವೃಧೇ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ ಮಹೇ॒ನ್ದ್ರಾಯ॑ ತ್ವೈ॒ಷ ತೇ॒ ಯೋನಿ॑-ರ್ಮಹೇ॒ನ್ದ್ರಾಯ॑ ತ್ವಾ ॥ 21 ॥
(ಮ॒ಹಾನೇಕಾ॒ನ್ನವಿಗ್ಂ॑ಶತಿಃ) (ಅ. 20)
ಮ॒ಹಾಗ್ಂ ಇನ್ದ್ರೋ॑ ನೃ॒ವದಾ ಚ॑ರ್ಷಣಿ॒ಪ್ರಾ ಉ॒ತ ದ್ವಿ॒ಬರ್ಹಾ॑ ಅಮಿ॒ನ-ಸ್ಸಹೋ॑ಭಿಃ । ಅ॒ಸ್ಮ॒ದ್ರಿಯ॑ಗ್ವಾವೃಧೇ ವೀ॒ರ್ಯಾ॑ಯೋ॒ರುಃ ಪೃ॒ಥು-ಸ್ಸುಕೃ॑ತಃ ಕ॒ರ್ತೃಭಿ॑ರ್ಭೂತ್ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ ಮಹೇ॒ನ್ದ್ರಾಯ॑ ತ್ವೈ॒ಷ ತೇ॒ ಯೋನಿ॑-ರ್ಮಹೇ॒ನ್ದ್ರಾಯ॑ ತ್ವಾ ॥ 22 ॥
(ಮ॒ಹಾ-ನ್ನೃ॒ವಥ್ – ಷಡ್ವಿಗ್ಂ॑ಶತಿಃ) (ಅ. 21)
ಕ॒ದಾ ಚ॒ನ ಸ್ತ॒ರೀರ॑ಸಿ॒ ನೇನ್ದ್ರ॑ ಸಶ್ಚಸಿ ದಾ॒ಶುಷೇ᳚ । ಉಪೋ॒ಪೇನ್ನು ಮ॑ಘವ॒-ನ್ಭೂಯ॒ ಇನ್ನು ತೇ॒ ದಾನ॑-ನ್ದೇ॒ವಸ್ಯ॑ ಪೃಚ್ಯತೇ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸ್ಯಾ-ದಿ॒ತ್ಯೇಭ್ಯ॑ಸ್ತ್ವಾ ॥ ಕ॒ದಾ ಚ॒ನ ಪ್ರ ಯು॑ಚ್ಛಸ್ಯು॒ಭೇ ನಿ ಪಾ॑ಸಿ॒ ಜನ್ಮ॑ನೀ । ತುರೀ॑ಯಾದಿತ್ಯ॒ ಸವ॑ನ-ನ್ತ ಇನ್ದ್ರಿ॒ಯಮಾ ತ॑ಸ್ಥಾವ॒ಮೃತ॑-ನ್ದಿ॒ವಿ ॥ ಯ॒ಜ್ಞೋ ದೇ॒ವಾನಾ॒-ಮ್ಪ್ರತ್ಯೇ॑ತಿ ಸು॒ಮ್ನಮಾದಿ॑ತ್ಯಾಸೋ॒ ಭವ॑ತಾ ಮೃಡ॒ಯನ್ತಃ॑ । ಆ ವೋ॒ ಽರ್ವಾಚೀ॑ ಸುಮ॒ತಿ-ರ್ವ॑ವೃತ್ಯಾದ॒ಗ್ಂ॒ಹೋ-ಶ್ಚಿ॒ದ್ಯಾ ವ॑ರಿವೋ॒ವಿತ್ತ॒ರಾ-ಽಸ॑ತ್ ॥ ವಿವ॑ಸ್ವ ಆದಿತ್ಯೈ॒ಷ ತೇ॑ ಸೋಮಪೀ॒ಥಸ್ತೇನ॑ ಮನ್ದಸ್ವ॒ ತೇನ॑ ತೃಪ್ಯ ತೃ॒ಪ್ಯಾಸ್ಮ॑ ತೇ ವ॒ಯ-ನ್ತ॑ರ್ಪಯಿ॒ತಾರೋ॒ ಯಾ ದಿ॒ವ್ಯಾ ವೃಷ್ಟಿ॒ಸ್ತಯಾ᳚ ತ್ವಾ ಶ್ರೀಣಾಮಿ ॥ 23 ॥
(ವಃ॒- ಸ॒ಪ್ತವಿಗ್ಂ॑ಶತಿಶ್ಚ) (ಅ. 22)
ವಾ॒ಮಮ॒ದ್ಯ ಸ॑ವಿತರ್ವಾ॒ಮಮು॒ ಶ್ವೋ ದಿ॒ವೇದಿ॑ವೇ ವಾ॒ಮಮ॒ಸ್ಮಭ್ಯಗ್ಂ॑ ಸಾವೀಃ ॥ ವಾ॒ಮಸ್ಯ॒ ಹಿ ಖ್ಷಯ॑ಸ್ಯ ದೇವ॒ ಭೂರೇ॑ರ॒ಯಾ ಧಿ॒ಯಾ ವಾ॑ಮ॒ಭಾಜ॑-ಸ್ಸ್ಯಾಮ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ ದೇ॒ವಾಯ॑ ತ್ವಾ ಸವಿ॒ತ್ರೇ ॥ 24 ॥
(ವಾ॒ಮಂ-ಚತು॑ರ್ವಿಗ್ಂಶತಿಃ) (ಅ. 23)
ಅದ॑ಬ್ಧೇಭಿ-ಸ್ಸವಿತಃ ಪಾ॒ಯುಭಿ॒ಷ್ಟ್ವಗ್ಂ ಶಿ॒ವೇಭಿ॑ರ॒ದ್ಯ ಪರಿ॑ಪಾಹಿ ನೋ॒ ಗಯ᳚ಮ್ । ಹಿರ॑ಣ್ಯಜಿಹ್ವ-ಸ್ಸುವಿ॒ತಾಯ॒ ನವ್ಯ॑ಸೇ॒ ರಖ್ಷಾ॒ ಮಾಕಿ॑ರ್ನೋ ಅ॒ಘಶಗ್ಂ॑ಸ ಈಶತ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ ದೇ॒ವಾಯ॑ ತ್ವಾ ಸವಿ॒ತ್ರೇ ॥ 25 ॥
(ಅದ॑ಬ್ಧೇಭಿ॒-ಸ್ತ್ರಿಯೋ॑ವಿಗ್ಂಶತಿಃ) (ಅ. 24)
ಹಿರ॑ಣ್ಯಪಾಣಿಮೂ॒ತಯೇ॑ ಸವಿ॒ತಾರ॒ಮುಪ॑ ಹ್ವಯೇ । ಸ ಚೇತ್ತಾ॑ ದೇ॒ವತಾ॑ ಪ॒ದಮ್ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ ದೇ॒ವಾಯ॑ ತ್ವಾ ಸವಿ॒ತ್ರೇ ॥ 26 ॥
(ಹಿರ॑ಣ್ಯಪಾಣಿಂ॒-ಚತು॑ರ್ದಶ) (ಅ. 25)
ಸು॒ಶರ್ಮಾ॑-ಽಸಿ ಸುಪ್ರತಿಷ್ಠಾ॒ನೋ ಬೃ॒ಹದು॒ಖ್ಷೇ ನಮ॑ ಏ॒ಷ ತೇ॒ ಯೋನಿ॒-ರ್ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯಃ॑ ॥ 27 ॥
(ಸು॒ಶರ್ಮಾ॒-ದ್ವಾದ॑ಶ) (ಅ. 26)
ಬೃಹ॒ಸ್ಪತಿ॑ಸುತಸ್ಯ ತ ಇನ್ದೋ ಇನ್ದ್ರಿ॒ಯಾವ॑ತಃ॒ ಪತ್ನೀ॑ವನ್ತ॒-ಙ್ಗ್ರಹ॑-ಙ್ಗೃಹ್ಣಾ॒ಮ್ಯಗ್ನಾ(3)ಇ ಪತ್ನೀ॒ವಾ(3) ಸ್ಸ॒ಜೂರ್ದೇ॒ವೇನ॒ ತ್ವಷ್ಟ್ರಾ॒ ಸೋಮ॑-ಮ್ಪಿಬ॒ ಸ್ವಾಹಾ᳚ ॥ 28 ॥
(ಬೃಹ॒ಸ್ಪತಿ॑ಸುತಸ್ಯ॒-ಪಞ್ಚ॑ದಶ) (ಅ. 27)
ಹರಿ॑ರಸಿ ಹಾರಿಯೋಜ॒ನೋ ಹರ್ಯೋ᳚-ಸ್ಸ್ಥಾ॒ತಾ ವಜ್ರ॑ಸ್ಯ ಭ॒ರ್ತಾ ಪೃಶ್ಞೇಃ᳚ ಪ್ರೇ॒ತಾ ತಸ್ಯ॑ ತೇ ದೇವ ಸೋಮೇ॒ಷ್ಟಯ॑ಜುಷ-ಸ್ಸ್ತು॒ತಸ್ತೋ॑ಮಸ್ಯ ಶ॒ಸ್ತೋಕ್ಥ॑ಸ್ಯ॒ ಹರಿ॑ವನ್ತ॒-ಙ್ಗ್ರಹ॑-ಙ್ಗೃಹ್ಣಾಮಿ ಹ॒ರೀ-ಸ್ಸ್ಥ॒ ಹರ್ಯೋ᳚ರ್ಧಾ॒ನಾ-ಸ್ಸ॒ಹಸೋ॑ಮಾ॒ ಇನ್ದ್ರಾ॑ಯ॒ ಸ್ವಾಹಾ᳚ ॥ 29 ॥
(ಹರಿ॑ರಸಿ॒-ಷಡ್ವಿಗ್ಂ॑ಶತಿಃ) (ಅ. 28)
ಅಗ್ನ॒ ಆಯೂಗ್ಂ॑ಷಿ ಪವಸ॒ ಆ ಸು॒ವೋರ್ಜ॒ಮಿಷ॑-ಞ್ಚ ನಃ । ಆ॒ರೇ ಬಾ॑ಧಸ್ವ ದು॒ಚ್ಛುನಾ᳚ಮ್ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸ್ಯ॒ಗ್ನಯೇ᳚ ತ್ವಾ॒ ತೇಜ॑ಸ್ವತ ಏ॒ಷ ತೇ॒ ಯೋನಿ॑ರ॒ಗ್ನಯೇ᳚ ತ್ವಾ॒ ತೇಜ॑ಸ್ವತೇ ॥ 30 ॥
(ಅಗ್ನ॒ ಆಯೂಗ್ಂ॑ಷಿ॒-ತ್ರಯೋ॑ವಿಗ್ಂಶತಿಃ) (ಅ. 29)
ಉ॒ತ್ತಿಷ್ಠ॒ನ್ನೋಜ॑ಸಾ ಸ॒ಹ ಪೀ॒ತ್ವಾ ಶಿಪ್ರೇ॑ ಅವೇಪಯಃ । ಸೋಮ॑ಮಿನ್ದ್ರ ಚ॒ಮೂ ಸು॒ತಮ್ ॥ ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ॒ ತ್ವೌಜ॑ಸ್ವತ ಏ॒ಷ ತೇ॒ ಯೋನಿ॒ರಿನ್ದ್ರಾ॑ಯ॒ ತ್ವೌಜ॑ಸ್ವತೇ ॥ 31 ॥
(ಉ॒ತ್ತಿಷ್ಠ॒ನ್ನೇಕ॑ವಿಗ್ಂಶತಿಃ) (ಅ. 30)
ತ॒ರಣಿ॑-ರ್ವಿ॒ಶ್ವದ॑ರ್ಶತೋ ಜ್ಯೋತಿ॒ಷ್ಕೃದ॑ಸಿ ಸೂರ್ಯ । ವಿಶ್ವ॒ಮಾ ಭಾ॑ಸಿ ರೋಚ॒ನಮ್ ॥ ಉ॒ಪ॒ಯಾ॒ಮಗೃ॑ಹೀತೋ-ಽಸಿ॒ ಸೂರ್ಯಾ॑ಯ ತ್ವಾ॒ ಭ್ರಾಜ॑ಸ್ವತ ಏ॒ಷ ತೇ॒ ಯೋನಿ॒-ಸ್ಸೂರ್ಯಾ॑ಯ ತ್ವಾ॒ ಭ್ರಾಜ॑ಸ್ವತೇ ॥ 32 ॥
(ತ॒ರಣಿ॑-ರ್ವಿಗ್ಂಶ॒ತಿಃ) (ಅ. 31)
ಆ ಪ್ಯಾ॑ಯಸ್ವ ಮದಿನ್ತಮ॒ ಸೋಮ॒ ವಿಶ್ವಾ॑ಭಿ-ರೂ॒ತಿಭಿಃ॑ । ಭವಾ॑ ನ-ಸ್ಸ॒ಪ್ರಥ॑ಸ್ತಮಃ ॥ 33 ॥
(ಆ ಪ್ಯಾ॑ಯಸ್ವ॒-ನವ॑) (ಅ. 32)
ಈ॒ಯುಷ್ಟೇ ಯೇ ಪೂರ್ವ॑ತರಾ॒ಮಪ॑ಶ್ಯನ್ ವ್ಯು॒ಚ್ಛನ್ತೀ॑ಮು॒ಷಸ॒-ಮ್ಮರ್ತ್ಯಾ॑ಸಃ । ಅ॒ಸ್ಮಾಭಿ॑ರೂ॒ ನು ಪ್ರ॑ತಿ॒ಚಖ್ಷ್ಯಾ॑-ಽಭೂ॒ದೋ ತೇ ಯ॑ನ್ತಿ॒ ಯೇ ಅ॑ಪ॒ರೀಷು॒ ಪಶ್ಯಾನ್॑ ॥ 34 ॥
(ಈ॒ಯು-ರೇಕಾ॒ನ್ನವಿಗ್ಂ॑ಶತಿಃ) (ಅ. 33)
ಜ್ಯೋತಿ॑ಷ್ಮತೀ-ನ್ತ್ವಾ ಸಾದಯಾಮಿ ಜ್ಯೋತಿ॒ಷ್ಕೃತ॑-ನ್ತ್ವಾ ಸಾದಯಾಮಿ ಜ್ಯೋತಿ॒ರ್ವಿದ॑-ನ್ತ್ವಾ ಸಾದಯಾಮಿ॒ ಭಾಸ್ವ॑ತೀ-ನ್ತ್ವಾ ಸಾದಯಾಮಿ॒ ಜ್ವಲ॑ನ್ತೀ-ನ್ತ್ವಾ ಸಾದಯಾಮಿ ಮಲ್ಮಲಾ॒ಭವ॑ನ್ತೀ-ನ್ತ್ವಾ ಸಾದಯಾಮಿ॒ ದೀಪ್ಯ॑ಮಾನಾ-ನ್ತ್ವಾ ಸಾದಯಾಮಿ॒ ರೋಚ॑ಮಾನಾ-ನ್ತ್ವಾ ಸಾದಯಾ॒ಮ್ಯಜ॑ಸ್ರಾ-ನ್ತ್ವಾ ಸಾದಯಾಮಿ ಬೃ॒ಹಜ್ಜ್ಯೋ॑ತಿಷ-ನ್ತ್ವಾ ಸಾದಯಾಮಿ ಬೋ॒ಧಯ॑ನ್ತೀ-ನ್ತ್ವಾ ಸಾದಯಾಮಿ॒ ಜಾಗ್ರ॑ತೀ-ನ್ತ್ವಾ ಸಾದಯಾಮಿ ॥ 35 ॥
(ಜ್ಯೋತಿ॑ಷ್ಮತೀ॒ಗ್ಂ॒-ಷಟ್ತ್ರಿಗ್ಂ॑ಶತ್) (ಅ. 34)
ಪ್ರ॒ಯಾ॒ಸಾಯ॒ ಸ್ವಾಹಾ॑ ಽಽಯಾ॒ಸಾಯ॒ ಸ್ವಾಹಾ॑ ವಿಯಾ॒ಸಾಯ॒ ಸ್ವಾಹಾ॑ ಸಂಯಾಁ॒ಸಾಯ॒ ಸ್ವಾಹೋ᳚ದ್ಯಾ॒ಸಾಯ॒ ಸ್ವಾಹಾ॑-ಽವಯಾ॒ಸಾಯ॒ ಸ್ವಾಹಾ॑ ಶು॒ಚೇ ಸ್ವಾಹಾ॒ ಶೋಕಾ॑ಯ॒ ಸ್ವಾಹಾ॑ ತಪ್ಯ॒ತ್ವೈ ಸ್ವಾಹಾ॒ ತಪ॑ತೇ॒ ಸ್ವಾಹಾ᳚ ಬ್ರಹ್ಮಹ॒ತ್ಯಾಯೈ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 36 ॥
(ಪ್ರ॒ಯಾ॒ಸಾಯ॒-ಚತು॑ರ್ವಿಗ್ಂಶತಿಃ ) (ಅ. 35)
ಚಿ॒ತ್ತಗ್ಂ ಸ॑ನ್ತಾ॒ನೇನ॑ ಭ॒ವಂ-ಯಁ॒ಕ್ನಾ ರು॒ದ್ರ-ನ್ತನಿ॑ಮ್ನಾ ಪಶು॒ಪತಿಗ್ಗ್॑ ಸ್ಥೂಲಹೃದ॒ಯೇನಾ॒ಗ್ನಿಗ್ಂ ಹೃದ॑ಯೇನ ರು॒ದ್ರಂ-ಲೋಁಹಿ॑ತೇನ ಶ॒ರ್ವ-ಮ್ಮತ॑ಸ್ನಾಭ್ಯಾ-ಮ್ಮಹಾದೇ॒ವ-ಮ॒ನ್ತಃಪಾ᳚ರ್ಶ್ವೇನೌಷಿಷ್ಠ॒ಹನಗ್ಂ॑ ಶಿಙ್ಗೀನಿಕೋ॒ಶ್ಯಾ᳚ಭ್ಯಾಮ್ ॥ 37 ॥
(ಚಿ॒ತ್ತ-ಮ॒ಷ್ಟಾದ॑ಶ) (ಅ. 36)
ಆ ತಿ॑ಷ್ಠ ವೃತ್ರಹ॒-ನ್ರಥಂ॑-ಯುಁ॒ಕ್ತಾ ತೇ॒ ಬ್ರಹ್ಮ॑ಣಾ॒ ಹರೀ᳚ । ಅ॒ರ್ವಾ॒ಚೀನ॒ಗ್ಂ॒ ಸು ತೇ॒ ಮನೋ॒ ಗ್ರಾವಾ॑ ಕೃಣೋತು ವ॒ಗ್ನುನಾ᳚ ॥ ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವಾ ಷೋಡ॒ಶಿನ॑ ಏ॒ಷ ತೇ॒ ಯೋನಿ॒ರಿನ್ದ್ರಾ॑ಯ ತ್ವಾ ಷೋಡ॒ಶಿನೇ᳚ ॥ 38 ॥
(ಆ ತಿ॑ಷ್ಟ॒-ಷಟ್ವಿಗ್ಂ॑ಶತಿಃ) (ಅ. 37)
ಇನ್ದ್ರ॒ಮಿದ್ಧರೀ॑ ವಹ॒ತೋ-ಽಪ್ರ॑ತಿಧೃಷ್ಟಶವಸ॒-ಮೃಷೀ॑ಣಾ-ಞ್ಚ ಸ್ತು॒ತೀರುಪ॑ ಯ॒ಜ್ಞ-ಞ್ಚ॒ ಮಾನು॑ಷಾಣಾಮ್ ॥ ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವಾ ಷೋಡ॒ಶಿನ॑ ಏ॒ಷ ತೇ॒ ಯೋನಿ॒ರಿನ್ದ್ರಾ॑ಯ ತ್ವಾ ಷೋಡ॒ಶಿನೇ᳚ ॥ 39 ॥
(ಇನ್ದ್ರ॒ಮಿತ್-ತ್ರಯೋ॑ವಿಗ್ಂಶತಿಃ) (ಅ. 38)
ಅಸಾ॑ವಿ॒ ಸೋಮ॑ ಇನ್ದ್ರ ತೇ॒ ಶವಿ॑ಷ್ಠ ಧೃಷ್ಣ॒ವಾ ಗ॑ಹಿ । ಆ ತ್ವಾ॑ ಪೃಣಕ್ತ್ವಿನ್ದ್ರಿ॒ಯಗ್ಂ ರಜ॒-ಸ್ಸೂರ್ಯ॒-ನ್ನ ರ॒ಶ್ಮಿಭಿಃ॑ ॥ ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವಾ ಷೋಡ॒ಶಿನ॑ ಏ॒ಷ ತೇ॒ ಯೋನಿ॒ರಿನ್ದ್ರಾ॑ಯ ತ್ವಾ ಷೋಡ॒ಶಿನೇ᳚ ॥ 40 ॥
(ಅಸಾ॑ವಿ-ಸ॒ಪ್ತವಿಗ್ಂ॑ಶತಿಃ) (ಅ. 39)
ಸರ್ವ॑ಸ್ಯ ಪ್ರತಿ॒ಶೀವ॑ರೀ॒ ಭೂಮಿ॑ಸ್ತ್ವೋ॒ಪಸ್ಥ॒ ಆ-ಽಧಿ॑ತ । ಸ್ಯೋ॒ನಾ-ಽಸ್ಮೈ॑ ಸು॒ಷದಾ॑ ಭವ॒ ಯಚ್ಛಾ᳚-ಽಸ್ಮೈ ಶರ್ಮ॑ ಸ॒ಪ್ರಥಾಃ᳚ ॥ ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವಾ ಷೋಡ॒ಶಿನ॑ ಏ॒ಷ ತೇ॒ ಯೋನಿ॒ರಿನ್ದ್ರಾ॑ಯ ತ್ವಾ ಷೋಡ॒ಶಿನೇ᳚ ॥ 41 ॥
(ಸರ್ವ॑ಸ್ಯ॒ ಷಡ್ವಿಗ್ಂ॑ಶತಿಃ) (ಅ. 40)
ಮ॒ಹಾಗ್ಂ ಇನ್ದ್ರೋ॒ ವಜ್ರ॑ಬಾಹು-ಷ್ಷೋಡ॒ಶೀ ಶರ್ಮ॑ ಯಚ್ಛತು । ಸ್ವ॒ಸ್ತಿ ನೋ॑ ಮ॒ಘವಾ॑ ಕರೋತು॒ ಹನ್ತು॑ ಪಾ॒ಪ್ಮಾನಂ॒-ಯೋಁ᳚-ಽಸ್ಮಾ-ನ್ದ್ವೇಷ್ಟಿ॑ ॥ ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವಾ ಷೋಡ॒ಶಿನ॑ ಏ॒ಷ ತೇ॒ ಯೋನಿ॒ರಿನ್ದ್ರಾ॑ಯ ತ್ವಾ ಷೋಡ॒ಶಿನೇ᳚ ॥ 42 ॥
(ಮ॒ಹಾನ್-ಷಡ್ವಿಗ್ಂ॑ಶತಿಃ) (ಅ. 41)
ಸ॒ಜೋಷಾ॑ ಇನ್ದ್ರ॒ ಸಗ॑ಣೋ ಮ॒ರುದ್ಭಿ॒-ಸ್ಸೋಮ॑-ಮ್ಪಿಬ ವೃತ್ರಹಞ್ಛೂರ ವಿ॒ದ್ವಾನ್ । ಜ॒ಹಿ ಶತ್ರೂ॒ಗ್ಂ॒ ರಪ॒ ಮೃಧೋ॑ ನುದ॒ಸ್ವಾ-ಽಥಾಭ॑ಯ-ಙ್ಕೃಣುಹಿ ವಿ॒ಶ್ವತೋ॑ ನಃ ॥ ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವಾ ಷೋಡ॒ಶಿನ॑ ಏ॒ಷ ತೇ॒ ಯೋನಿ॒ರಿನ್ದ್ರಾ॑ಯ ತ್ವಾ ಷೋಡ॒ಶಿನೇ᳚ ॥ 43 ॥
(ಸ॒ಜೋಷಾಃ᳚-ತ್ರಿ॒ಗ್ಂ॒ಶತ್) (ಅ. 42)
ಉದು॒ ತ್ಯ-ಞ್ಜಾ॒ತವೇ॑ದಸ-ನ್ದೇ॒ವಂ-ವಁ॑ಹನ್ತಿ ಕೇ॒ತವಃ॑ । ದೃ॒ಶೇ ವಿಶ್ವಾ॑ಯ॒ ಸೂರ್ಯ᳚ಮ್ ॥ ಚಿ॒ತ್ರ-ನ್ದೇ॒ವಾನಾ॒-ಮುದ॑ಗಾ॒ದನೀ॑ಕ॒-ಞ್ಚಖ್ಷು॑-ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒-ಽಗ್ನೇಃ । ಆ-ಽಪ್ರಾ॒ ದ್ಯಾವಾ॑ಪೃಥಿ॒ವೀ ಅ॒ನ್ತರಿ॑ಖ್ಷ॒ಗ್ಂ॒ ಸೂರ್ಯ॑ ಆ॒ತ್ಮಾ ಜಗ॑ತಸ್ತ॒ಸ್ಥುಷ॑ಶ್ಚ ॥ ಅಗ್ನೇ॒ ನಯ॑ ಸು॒ಪಥಾ॑ ರಾ॒ಯೇ ಅ॒ಸ್ಮಾನ್. ವಿಶ್ವಾ॑ನಿ ದೇವ ವ॒ಯುನಾ॑ನಿ ವಿ॒ದ್ವಾನ್ । ಯು॒ಯೋ॒ದ್ಧ್ಯ॑ಸ್ಮ-ಜ್ಜು॑ಹುರಾ॒ಣ ಮೇನೋ॒ ಭೂಯಿ॑ಷ್ಠಾ-ನ್ತೇ॒ ನಮ॑ಉಕ್ತಿಂ-ವಿಁಧೇಮ ॥ ದಿವ॑-ಙ್ಗಚ್ಛ॒ ಸುವಃ॑ ಪತ ರೂ॒ಪೇಣ॑ [ರೂ॒ಪೇಣ॑, ವೋ॒ ರೂ॒ಪಮ॒ಭ್ಯೈಮಿ॒ ವಯ॑ಸಾ॒ ವಯಃ॑ ।] ॥ 44 ॥
ವೋ ರೂ॒ಪಮ॒ಭ್ಯೈಮಿ॒ ವಯ॑ಸಾ॒ ವಯಃ॑ । ತು॒ಥೋ ವೋ॑ ವಿ॒ಶ್ವವೇ॑ದಾ॒ ವಿ ಭ॑ಜತು॒ ವರ್ಷಿ॑ಷ್ಠೇ॒ ಅಧಿ॒ ನಾಕೇ᳚ ॥ ಏ॒ತತ್ತೇ॑ ಅಗ್ನೇ॒ ರಾಧ॒ ಐತಿ॒ ಸೋಮ॑ಚ್ಯುತ॒-ನ್ತನ್ಮಿ॒ತ್ರಸ್ಯ॑ ಪ॒ಥಾ ನ॑ಯ॒ರ್ತಸ್ಯ॑ ಪ॒ಥಾ ಪ್ರೇತ॑ ಚ॒ನ್ದ್ರದ॑ಖ್ಷಿಣಾ ಯ॒ಜ್ಞಸ್ಯ॑ ಪ॒ಥಾ ಸು॑ವಿ॒ತಾ ನಯ॑ನ್ತೀ-ರ್ಬ್ರಾಹ್ಮ॒ಣಮ॒ದ್ಯ ರಾ᳚ದ್ಧ್ಯಾಸ॒ಮೃಷಿ॑ಮಾರ್ಷೇ॒ಯ-ಮ್ಪಿ॑ತೃ॒ಮನ್ತ॑-ಮ್ಪೈತೃಮ॒ತ್ಯಗ್ಂ ಸು॒ಧಾತು॑ದಖ್ಷಿಣಂ॒-ವಿಁ ಸುವಃ॒ ಪಶ್ಯ॒ ವ್ಯ॑ನ್ತರಿ॑ಖ್ಷಂ॒-ಯಁತ॑ಸ್ವ ಸದ॒ಸ್ಯೈ॑ ರ॒ಸ್ಮದ್ದಾ᳚ತ್ರಾ ದೇವ॒ತ್ರಾ ಗ॑ಚ್ಛತ॒ ಮಧು॑ಮತೀಃ ಪ್ರದಾ॒ತಾರ॒ಮಾ ವಿ॑ಶ॒ತಾ-ಽನ॑ವಹಾಯಾ॒-ಽಸ್ಮಾ-ನ್ದೇ॑ವ॒ಯಾನೇ॑ನ ಪ॒ಥೇತ॑ ಸು॒ಕೃತಾಂ᳚-ಲೋಁ॒ಕೇ ಸೀ॑ದತ॒ ತನ್ನ॑-ಸ್ಸಗ್ಗ್ಸ್ಕೃ॒ತಮ್ ॥ 45 ॥
(ರೂ॒ಪೇಣ॑-ಸದ॒ಸ್ಯೈ॑-ರ॒ಷ್ಟಾದ॑ಶ ಚ) (ಅ. 43)
ಧಾ॒ತಾ ರಾ॒ತಿ-ಸ್ಸ॑ವಿ॒ತೇದ-ಞ್ಜು॑ಷನ್ತಾ-ಮ್ಪ್ರ॒ಜಾಪ॑ತಿ-ರ್ನಿಧಿ॒ಪತಿ॑ರ್ನೋ ಅ॒ಗ್ನಿಃ । ತ್ವಷ್ಟಾ॒ ವಿಷ್ಣುಃ॑ ಪ್ರ॒ಜಯಾ॑ ಸಗ್ಂರರಾ॒ಣೋ ಯಜ॑ಮಾನಾಯ॒ ದ್ರವಿ॑ಣ-ನ್ದಧಾತು ॥ ಸಮಿ॑ನ್ದ್ರ ಣೋ॒ ಮನ॑ಸಾ ನೇಷಿ॒ ಗೋಭಿ॒-ಸ್ಸಗ್ಂ ಸೂ॒ರಿಭಿ॑ರ್ಮಘವ॒ನ್-ಥ್ಸಗ್ಗ್ ಸ್ವ॒ಸ್ತ್ಯಾ । ಸ-ಮ್ಬ್ರಹ್ಮ॑ಣಾ ದೇ॒ವಕೃ॑ತಂ॒-ಯಁದಸ್ತಿ॒ ಸ-ನ್ದೇ॒ವಾನಾಗ್ಂ॑ ಸುಮ॒ತ್ಯಾ ಯ॒ಜ್ಞಿಯಾ॑ನಾಮ್ ॥ ಸಂ-ವಁರ್ಚ॑ಸಾ॒ ಪಯ॑ಸಾ॒ ಸ-ನ್ತ॒ನೂಭಿ॒-ರಗ॑ನ್ಮಹಿ॒ ಮನ॑ಸಾ॒ ಸಗ್ಂ ಶಿ॒ವೇನ॑ ॥ ತ್ವಷ್ಟಾ॑ ನೋ॒ ಅತ್ರ॒ ವರಿ॑ವಃ ಕೃಣೋ॒- [ವರಿ॑ವಃ ಕೃಣೋತು, ಅನು॑ ಮಾರ್ಷ್ಟು] 46
ತ್ವನು॑ ಮಾರ್ಷ್ಟು ತ॒ನುವೋ॒ ಯದ್ವಿಲಿ॑ಷ್ಟಮ್ ॥ ಯದ॒ದ್ಯ ತ್ವಾ᳚ ಪ್ರಯ॒ತಿ ಯ॒ಜ್ಞೇ ಅ॒ಸ್ಮಿನ್ನಗ್ನೇ॒ ಹೋತಾ॑ರ॒ಮವೃ॑ಣೀಮಹೀ॒ಹ । ಋಧ॑ಗಯಾ॒ಡೃಧ॑ಗು॒ತಾ-ಽಶ॑ಮಿಷ್ಠಾಃ ಪ್ರಜಾ॒ನನ್. ಯ॒ಜ್ಞಮುಪ॑ ಯಾಹಿ ವಿ॒ದ್ವಾನ್ ॥ ಸ್ವ॒ಗಾ ವೋ॑ ದೇವಾ॒-ಸ್ಸದ॑ನಮಕರ್ಮ॒ ಯ ಆ॑ಜ॒ಗ್ಮ ಸವ॑ನೇ॒ದ-ಞ್ಜು॑ಷಾ॒ಣಾಃ । ಜ॒ಖ್ಷಿ॒ವಾಗ್ಂಸಃ॑ ಪಪಿ॒ವಾಗ್ಂಸ॑ಶ್ಚ॒ ವಿಶ್ವೇ॒-ಽಸ್ಮೇ ಧ॑ತ್ತ ವಸವೋ॒ ವಸೂ॑ನಿ ॥ ಯಾನಾ-ಽವ॑ಹ ಉಶ॒ತೋ ದೇ॑ವ ದೇ॒ವಾ-ನ್ತಾ- [ದೇ॒ವಾ-ನ್ತಾನ್, ಪ್ರೇರ॑ಯ॒ ಸ್ವೇ ಅ॑ಗ್ನೇ ಸ॒ಧಸ್ಥೇ᳚ ।] 47
ನ್ಪ್ರೇರ॑ಯ॒ ಸ್ವೇ ಅ॑ಗ್ನೇ ಸ॒ಧಸ್ಥೇ᳚ । ವಹ॑ಮಾನಾ॒ ಭರ॑ಮಾಣಾ ಹ॒ವೀಗ್ಂಷಿ॒ ವಸು॑-ಙ್ಘ॒ರ್ಮ-ನ್ದಿವ॒ಮಾ ತಿ॑ಷ್ಠ॒ತಾನು॑ । ಯಜ್ಞ॑ ಯ॒ಜ್ಞ-ಙ್ಗ॑ಚ್ಛ ಯ॒ಜ್ಞಪ॑ತಿ-ಙ್ಗಚ್ಛ॒ ಸ್ವಾಂ-ಯೋಁನಿ॑-ಙ್ಗಚ್ಛ॒ ಸ್ವಾಹೈ॒ಷ ತೇ॑ ಯ॒ಜ್ಞೋ ಯ॑ಜ್ಞಪತೇ ಸ॒ಹಸೂ᳚ಕ್ತವಾಕ-ಸ್ಸು॒ವೀರ॒-ಸ್ಸ್ವಾಹಾ॒ ದೇವಾ॑ ಗಾತುವಿದೋ ಗಾ॒ತುಂ-ವಿಁ॒ತ್ತ್ವಾ ಗಾ॒ತುಮಿ॑ತ॒ ಮನ॑ಸಸ್ಪತ ಇ॒ಮ-ನ್ನೋ॑ ದೇವ ದೇ॒ವೇಷು॑ ಯ॒ಜ್ಞಗ್ಗ್ ಸ್ವಾಹಾ॑ ವಾ॒ಚಿ ಸ್ವಾಹಾ॒ ವಾತೇ॑ ಧಾಃ ॥ 48 ॥
(ಕೃ॒ಣೋ॒ತು॒-ತಾನ॒-ಷ್ಟಾಚ॑ತ್ವಾರಿಗ್ಂಶಚ್ಚ ) (ಅ. 44)
ಉ॒ರುಗ್ಂ ಹಿ ರಾಜಾ॒ ವರು॑ಣಶ್ಚ॒ಕಾರ॒ ಸೂರ್ಯಾ॑ಯ॒ ಪನ್ಥಾ॒-ಮನ್ವೇ॑ತ॒ವಾ ಉ॑ । ಅ॒ಪದೇ॒ ಪಾದಾ॒ ಪ್ರತಿ॑ಧಾತವೇ-ಽಕರು॒ತಾ-ಽಪ॑ವ॒ಕ್ತಾ ಹೃ॑ದಯಾ॒ವಿಧ॑ಶ್ಚಿತ್ ॥ ಶ॒ತ-ನ್ತೇ॑ ರಾಜ-ನ್ಭಿ॒ಷಜ॑-ಸ್ಸ॒ಹಸ್ರ॑ಮು॒ರ್ವೀ ಗ॑ಮ್ಭೀ॒ರಾ ಸು॑ಮ॒ತಿಷ್ಟೇ॑ ಅಸ್ತು । ಬಾಧ॑ಸ್ವ॒ ದ್ವೇಷೋ॒ ನಿರ್-ಋ॑ತಿ-ಮ್ಪರಾ॒ಚೈಃ ಕೃ॒ತ-ಞ್ಚಿ॒ದೇನಃ॒ ಪ್ರ ಮು॑ಮುಗ್ದ್ಧ್ಯ॒ಸ್ಮತ್ ॥ ಅ॒ಭಿಷ್ಠಿ॑ತೋ॒ ವರು॑ಣಸ್ಯ॒ ಪಾಶೋ॒-ಽಗ್ನೇರನೀ॑ಕಮ॒ಪ ಆ ವಿ॑ವೇಶ । ಅಪಾ᳚ನ್ನಪಾ-ತ್ಪ್ರತಿ॒ರಖ್ಷ॑ನ್ನಸು॒ರ್ಯ॑-ನ್ದಮೇ॑ದಮೇ [ ] 49
ಸ॒ಮಿಧಂ॑-ಯಁಖ್ಷ್ಯಗ್ನೇ ॥ ಪ್ರತಿ॑ ತೇ ಜಿ॒ಹ್ವಾ ಘೃ॒ತಮುಚ್ಚ॑ರಣ್ಯೇ-ಥ್ಸಮು॒ದ್ರೇ ತೇ॒ ಹೃದ॑ಯಮ॒ಫ್ಸ್ವ॑ನ್ತಃ । ಸ-ನ್ತ್ವಾ॑ ವಿಶ॒ನ್ತ್ವೋಷ॑ಧೀ-ರು॒ತಾ-ಽಽಪೋ॑ ಯ॒ಜ್ಞಸ್ಯ॑ ತ್ವಾ ಯಜ್ಞಪತೇ ಹ॒ವಿರ್ಭಿಃ॑ ॥ ಸೂ॒ಕ್ತ॒ವಾ॒ಕೇ ನ॑ಮೋವಾ॒ಕೇ ವಿ॑ಧೇ॒ಮಾ-ಽವ॑ಭೃಥ ನಿಚಙ್ಕುಣ ನಿಚೇ॒ರುರ॑ಸಿ ನಿಚಙ್ಕು॒ಣಾ-ಽವ॑ ದೇ॒ವೈ-ರ್ದೇ॒ವಕೃ॑ತ॒ಮೇನೋ॑-ಽಯಾ॒ಡವ॒ ಮರ್ತ್ಯೈ॒-ರ್ಮರ್ತ್ಯ॑ಕೃತಮು॒ರೋರಾ ನೋ॑ ದೇವ ರಿ॒ಷಸ್ಪಾ॑ಹಿ ಸುಮಿ॒ತ್ರಾ ನ॒ ಆಪ॒ ಓಷ॑ಧಯ- [ಓಷ॑ಧಯಃ, ಸ॒ನ್ತು॒ ದು॒ರ್ಮಿ॒ತ್ರಾಸ್ತಸ್ಮೈ॑] 50
ಸ್ಸನ್ತು ದುರ್ಮಿ॒ತ್ರಾಸ್ತಸ್ಮೈ॑ ಭೂಯಾಸು॒-ರ್ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮೋ ದೇವೀ॑ರಾಪ ಏ॒ಷ ವೋ॒ ಗರ್ಭ॒ಸ್ತಂ-ವಁ॒-ಸ್ಸುಪ್ರೀ॑ತ॒ಗ್ಂ॒ ಸುಭೃ॑ತ-ಮಕರ್ಮ ದೇ॒ವೇಷು॑ ನ-ಸ್ಸು॒ಕೃತೋ᳚ ಬ್ರೂತಾ॒-ತ್ಪ್ರತಿ॑ಯುತೋ॒ ವರು॑ಣಸ್ಯ॒ ಪಾಶಃ॒ ಪ್ರತ್ಯ॑ಸ್ತೋ॒ ವರು॑ಣಸ್ಯ॒ ಪಾಶ॒ ಏಧೋ᳚-ಽಸ್ಯೇಧಿಷೀ॒ಮಹಿ॑ ಸ॒ಮಿದ॑ಸಿ॒ ತೇಜೋ॑-ಽಸಿ ತೇಜೋ॒ ಮಯಿ॑ ಧೇಹ್ಯ॒ಪೋ ಅನ್ವ॑ಚಾರಿಷ॒ಗ್ಂ॒ ರಸೇ॑ನ॒ ಸಮ॑ಸೃಖ್ಷ್ಮಹಿ । ಪಯ॑ಸ್ವಾಗ್ಂ ಅಗ್ನ॒ ಆ ಽಗ॑ಮ॒-ನ್ತ-ಮ್ಮಾ॒ ಸಗ್ಂ ಸೃ॑ಜ॒ ವರ್ಚ॑ಸಾ ॥ 51 ॥
(ದಮೇ॑ದಮ॒-ಓಷ॑ಧಯ॒- ಆ-ಷಟ್ಚ॑) (ಅ. 45)
ಯಸ್ತ್ವಾ॑ ಹೃ॒ದಾ ಕೀ॒ರಿಣಾ॒ ಮನ್ಯ॑ಮಾ॒ನೋ ಽಮ॑ರ್ತ್ಯ॒-ಮ್ಮರ್ತ್ಯೋ॒ ಜೋಹ॑ವೀಮಿ । ಜಾತ॑ವೇದೋ॒ ಯಶೋ॑ ಅ॒ಸ್ಮಾಸು॑ ಧೇಹಿ ಪ್ರ॒ಜಾಭಿ॑ರಗ್ನೇ ಅಮೃತ॒ತ್ವಮ॑ಶ್ಯಾಮ್ ॥ ಯಸ್ಮೈ॒ ತ್ವಗ್ಂ ಸು॒ಕೃತೇ॑ ಜಾತವೇದ॒ ಉ ಲೋ॒ಕಮ॑ಗ್ನೇ ಕೃ॒ಣವ॑-ಸ್ಸ್ಯೋ॒ನಮ್ । ಅ॒ಶ್ವಿನ॒ಗ್ಂ॒ ಸ ಪು॒ತ್ರಿಣಂ॑-ವೀಁ॒ರವ॑ನ್ತ॒-ಙ್ಗೋಮ॑ನ್ತಗ್ಂ ರ॒ಯಿ-ನ್ನ॑ಶತೇ ಸ್ವ॒ಸ್ತಿ ॥ ತ್ವೇ ಸು ಪು॑ತ್ರ ಶವ॒ಸೋ-ಽವೃ॑ತ್ರ॒ನ್ ಕಾಮ॑ಕಾತಯಃ । ನ ತ್ವಾಮಿ॒ನ್ದ್ರಾತಿ॑ ರಿಚ್ಯತೇ ॥ ಉ॒ಕ್ಥೌ॑ಕ್ಥೇ॒ ಸೋಮ॒ ಇನ್ದ್ರ॑-ಮ್ಮಮಾದ ನೀ॒ಥೇನೀ॑ಥೇ ಮ॒ಘವಾ॑ನಗ್ಂ [ಮ॒ಘವಾ॑ನಗ್ಂ, ಸು॒ತಾಸಃ॑ ।] 52
ಸು॒ತಾಸಃ॑ । ಯದೀಗ್ಂ॑ ಸ॒ಬಾಧಃ॑ ಪಿ॒ತರ॒-ನ್ನ ಪು॒ತ್ರಾ-ಸ್ಸ॑ಮಾ॒ನದ॑ಖ್ಷಾ॒ ಅವ॑ಸೇ॒ ಹವ॑ನ್ತೇ ॥ ಅಗ್ನೇ॒ ರಸೇ॑ನ॒ ತೇಜ॑ಸಾ॒ ಜಾತ॑ವೇದೋ॒ ವಿ ರೋ॑ಚಸೇ । ರ॒ಖ್ಷೋ॒ಹಾ-ಽಮೀ॑ವ॒ಚಾತ॑ನಃ ॥ ಅ॒ಪೋ ಅನ್ವ॑ಚಾರಿಷ॒ಗ್ಂ॒ ರಸೇ॑ನ॒ ಸಮ॑ಸೃಖ್ಷ್ಮಹಿ । ಪಯ॑ಸ್ವಾಗ್ಂ ಅಗ್ನ॒ ಆ-ಽಗ॑ಮ॒-ನ್ತ-ಮ್ಮಾ॒ ಸಗ್ಂ ಸೃ॑ಜ॒ ವರ್ಚ॑ಸಾ ॥ವಸು॒-ರ್ವಸು॑ಪತಿ॒ರ್॒ ಹಿಕ॒ಮಸ್ಯ॑ಗ್ನೇ ವಿ॒ಭಾವ॑ಸುಃ । ಸ್ಯಾಮ॑ ತೇ ಸುಮ॒ತಾವಪಿ॑ ॥ ತ್ವಾಮ॑ಗ್ನೇ॒ ವಸು॑ಪತಿಂ॒-ವಁಸೂ॑ನಾಮ॒ಭಿ ಪ್ರ ಮ॑ನ್ದೇ [ಪ್ರ ಮ॑ನ್ದೇ, ಅ॒ದ್ಧ್ವ॒ರೇಷು॑ ರಾಜನ್ನ್ ।] 53
ಅದ್ಧ್ವ॒ರೇಷು॑ ರಾಜನ್ನ್ । ತ್ವಯಾ॒ ವಾಜಂ॑-ವಾಁಜ॒ಯನ್ತೋ॑ ಜಯೇಮಾ॒-ಽಭಿಷ್ಯಾ॑ಮ ಪೃಥ್ಸು॒ತೀ-ರ್ಮರ್ತ್ಯಾ॑ನಾಮ್ । ತ್ವಾಮ॑ಗ್ನೇ ವಾಜ॒ಸಾತ॑ಮಂ॒-ವಿಁಪ್ರಾ॑ ವರ್ಧನ್ತಿ॒ ಸುಷ್ಟು॑ತಮ್ । ಸ ನೋ॑ ರಾಸ್ವ ಸು॒ವೀರ್ಯ᳚ಮ್ ॥ ಅ॒ಯ-ನ್ನೋ॑ ಅ॒ಗ್ನಿರ್ವರಿ॑ವಃ ಕೃಣೋತ್ವ॒ಯ-ಮ್ಮೃಧಃ॑ ಪು॒ರ ಏ॑ತು ಪ್ರಭಿ॒ನ್ದನ್ನ್ ॥ ಅ॒ಯಗ್ಂ ಶತ್ರೂ᳚ಞ್ಜಯತು॒ ಜರ್ಹೃ॑ಷಾಣೋ॒-ಽಯಂ-ವಾಁಜ॑-ಞ್ಜಯತು॒ ವಾಜ॑ಸಾತೌ ॥ ಅ॒ಗ್ನಿನಾ॒-ಽಗ್ನಿ-ಸ್ಸಮಿ॑ದ್ಧ್ಯತೇ ಕ॒ವಿ-ರ್ಗೃ॒ಹಪ॑ತಿ॒-ರ್ಯುವಾ᳚ । ಹ॒ವ್ಯ॒ವಾಡ್-ಜು॒ಹ್ವಾ᳚ಸ್ಯಃ ॥ ತ್ವಗ್ಗ್ ಹ್ಯ॑ಗ್ನೇ ಅ॒ಗ್ನಿನಾ॒ ವಿಪ್ರೋ॒ ವಿಪ್ರೇ॑ಣ॒ ಸನ್ಥ್ಸ॒ತಾ । ಸಖಾ॒ ಸಖ್ಯಾ॑ ಸಮಿ॒ದ್ಧ್ಯಸೇ᳚ ॥ ಉದ॑ಗ್ನೇ॒ ಶುಚ॑ಯ॒ಸ್ತವ॒, ವಿ ಜ್ಯೋತಿ॑ಷಾ ॥ 54 ॥
(ಮ॒ಘವಾ॑ನಂ-ಮನ್ದೇ॒-ಹ್ಯ॑ಗ್ನೇ॒-ಚತು॑ರ್ದಶ ಚ) (ಅ. 46)
(ಆ ದ॑ದೇ-ವಾ॒ಚಸ್ಪತ॑ಯ-ಉಪಯಾ॒ಮಗೃ॑ಹೀತೋ॒-ಽಸ್ಯಾ ವಾ॑ಯೋ -ಅ॒ಯಂ-ವಾಁಂ॒ – ಯಾಁ ವಾಂ᳚-ಪ್ರಾತ॒ರ್ಯುಜಾ॑-ವ॒ಯನ್-ತಂ -ಯೇಁ ದೇ॑ವಾ-ಸ್ತ್ರಿ॒ಗ್ಂ॒ಶ-ದು॑ಪಯಾ॒ಮಗೃ॑ಹೀತೋ-ಽಸಿ-ಮೂ॒ರ್ಧಾನಂ॒-ಮಧು॒ಶ್ಚೇ-ನ್ದ್ರಾ᳚ಗ್ನೀ॒; ಓಮಾ॑ಸೋ-ಮ॒ರುತ್ವ॑ನ್ತ॒-ಮಿನ್ದ್ರ॑ ಮರುತ್ವೋ-ಮ॒ರುತ್ವಾ᳚ನ್- ಮ॒ಹಾ-ನ್ಮ॒ಹಾನ್ನು॒ವತ್-ಕ॒ದಾ-ವಾ॒ಮ-ಮದ॑ಬ್ಧೇಭಿ॒ರ್॒ ಹಿರ॑ಣ್ಯಪಾಣಿಗ್ಂ-ಸು॒ಶರ್ಮಾ॒-ಬೃಹ॒ಸ್ಪತಿ॑ ಸುತಸ್ಯ॒ – ಹರಿ॑ರ॒ಸ್ಯ-ಗ್ನ॑-ಉ॒ತ್ತಿಷ್ಠ॑ನ್-ತ॒ರಣಿ॒- ರಾಪ್ಯಾ॑ಯಸ್ವೇ॒-ಯುಷ್ಟೇ ಯೇ-ಜ್ಯೋತಿ॑ಷ್ಮತೀಂ-ಪ್ರಯಾ॒ಸಾಯ॑-ಚಿ॒ತ್ತ-ಮಾತಿ॒ಷ್ಠೇ-ನ್ದ್ರ॒-ಮಸಾ॑ವಿ॒-ಸರ್ವ॑ಸ್ಯ-ಮ॒ಹಾನ್-ಥ್ಸ॒ಜೋಷಾ॒-ಉದು॒ತ್ಯಂ-ಧಾ॒ತೋ-ರುಗ್ಂ ಹಿ-ಯ-ಸ್ತ್ವಾ॒ ಷಟ್ಚ॑ತ್ವಾರಿಗ್ಂಶತ್ ।)
(ವಾ॒ಚ ಪ್ರಾ॒ಣಾಯ॑ ತ್ವಾ । ಉ॒ಪ॒ಯಾ॒ಮಗೃ॑ಹೀತೋ-ಽಸ್ಯಪಾ॒ನಾಯ॑ ತ್ವಾ । ಆ ವಾ॑ಯೋ ವಾ॒ಯವೇ॑ ಸ॒ಜೋಷಾ᳚ಭ್ಯಾ-ನ್ತ್ವಾ । ಅ॒ಯಮೃ॑ತಾ॒ಯುಭ್ಯಾ᳚-ನ್ತ್ವಾ । ಯಾ ವಾ॑ಮ॒ಶ್ವಿಭ್ಯಾ॒-ಮ್ಮಾದ್ಧ್ವೀ᳚ಭ್ಯಾ-ನ್ತ್ವಾ । ಪ್ರಾ॒ತ॒ರ್ಯುಜಾ॑ವ॒ಶ್ವಿಭ್ಯಾ॑ಮ॒ಶ್ವಿಭ್ಯಾ᳚-ನ್ತ್ವಾ । ಅ॒ಯಗ್ಂ ಶಣ್ಡಾ॑ಯ ವೀ॒ರತಾ᳚-ಮ್ಪಾಹಿ । ತ-ಮ್ಮರ್ಕಾ॑ಯ ಪ್ರ॒ಜಾಃ ಪಾ॑ಹಿ । ಯೇ ದೇ॑ವಾ ಸ್ತ್ರಿ॒ಗ್ಂ॒ಶದಾ᳚ಗ್ರಯ॒ಣೋ॑-ಽಸಿ॒ ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯಃ॑ । ಉ॒ಪ॒ಯಾ॒ಮಗೃ॑ಹೀತೋ॒-ಽಸೀನ್ದ್ರಾ॑ಯ ತ್ವೋಕ್ಥಾ॒ಯುವೇ᳚ । ಮೂ॒ರ್ಧಾನ॑ಮ॒ಗ್ನಯೇ᳚ ತ್ವಾ ವೈಶ್ವಾನ॒ರಾಯ॑ । ಮಧು॑ಶ್ಚ ಸ॒ಗ್ಂ॒ ಸರ್ಪೋ॑-ಽಸಿ । ಇನ್ದ್ರಾ᳚ಗ್ನೀ ಇನ್ದ್ರಾ॒ಗ್ನಿಭ್ಯಾ᳚-ನ್ತ್ವಾ । ಓಮಾ॑ಸೋ॒ ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯಃ॑ । ಮ॒ರುತ್ವ॑-ನ್ತ॒ನ್ತ್ರೀಣೀನ್ದ್ರಾ॑ಯ ತ್ವಾ ಮ॒ರುತ್ವ॑ತೇ । ಮ॒ಹಾನ್ದ್ವೇ ಮ॑ಹೇ॒ನ್ದ್ರಾಯ॑ ತ್ವಾ । ಕ॒ದಾ ಚ॒ನಾ-ಽಽದಿ॒ತ್ಯೇಭ್ಯ॑ಸ್ತ್ವಾ । ಕ॒ದಾ ಚ॒ನ ಸ್ತ॒ರೀ-ರ್ವಿವ॑ಸ್ವ ಆದಿತ್ಯ । ಇನ್ದ್ರ॒ಗ್ಂ॒ ಶುಚಿ॑ರ॒ಪಃ । ವಾ॒ಮನ್ತ್ರೀಣೀ॑ ದೇ॒ವಾಯ॑ ತ್ವಾ ಸವಿ॒ತ್ರೇ । ಸು॒ಶರ್ಮಾ॑-ಽಸಿ॒ ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯಃ॑ । ಬೃಹ॒ಸ್ಪತಿ॑-ಸುತಸ್ಯ॒ ತ್ವಷ್ಟ್ರಾ॒ ಸೋಮ॑-ಮ್ಪಿಬ॒ ಸ್ವಾಹಾ᳚ । ಹರಿ॑ರಸಿ ಸ॒ಹಸೋ॑ಮಾ॒ ಇನ್ದ್ರಾ॑ಯ॒ ಸ್ವಾಹಾ᳚ । ಅಗ್ನ॒ ಆಯೂಗ್॑ಷ್ಯ॒ಗ್ನಯೇ᳚ ತ್ವಾ॒ ತೇಜ॑ಸ್ವತೇ । ಉ॒ತ್ತಿಷ್ಠ॒ನ್ನಿನ್ದ್ರಾ॑ಯ॒ ತ್ವೌಜ॑ಸ್ವತೇ । ತ॒ರಣಿ॒-ಸ್ಸೂರ್ಯಾ॑ಯ ತ್ವಾ॒ ಭ್ರಾಜ॑ಸ್ವತೇ । ಆ ತಿ॑ಷ್ಠಾದ್ಯಾ॒ಷ್ಷಟಿನ್ದ್ರಾ॑ಯ ತ್ವಾ ಷೋಡ॒ಶಿನೇ᳚ । ಉದು॒ ತ್ಯ-ಞ್ಚಿ॒ತ್ರಮ್ । ಅಗ್ನೇ॒ ನಯ॒ ದಿವ॑-ಙ್ಗಚ್ಛ । ಉ॒ರೂಮಾಯು॑ಷ್ಟೇ॒ ಯದ್ದೇ॑ವಾ ಮುಮುಗ್ಧಿ । ಅಗ್ನಾ॑ವಿಷ್ಣೂ ಸುಕ್ರತೂ ಮುಮುಕ್ತಮ್ । ಪರಾ॒ ವೈ ಪ॒ಙ್ಕ್ತ್ಯಃ॑ । ದೇ॒ವಾ ವೈ ಯೇ ದೇ॒ವಾಃ ಪ॒ಙ್ಕ್ತ್ಯೋ᳚ । ಪರಾ॒ ವೈ ಸ ವಾಚ᳚ಮ್ । ಭೂಮಿ॒ರ್ವ್ಯ॑ತೃಷ್ಯನ್ನ್ । ಪ್ರ॒ಜಾಪ॑ತಿ॒-ರ್ವ್ಯ॑ಖ್ಷುದ್ಧ್ಯನ್ನ್ । ಭೂಮಿ॑ರಾದಿ॒ಯಾ ವೈ । ಅ॒ಗ್ನಿ॒ಹೋ॒ತ್ರಮಾ॑ದಿ॒ತ್ಯೋ ವೈ । ಭೂಮಿ॒-ರ್ಲೇಕ॒-ಸ್ಸಲೇ॑ಕ-ಸ್ಸು॒ಲೇಕಃ॑ । ವಿಷ್ಣೋ॒ರುದು॑ತ್ತ॒ಮಮ್ । ಅನ್ನ॑ಪತೇ॒ ಪುನ॑ಸ್ವಾ-ಽಽದಿ॒ತ್ಯಾಃ । ಉ॒ರುಗ್ಂ ಸಗ್ಂ ಸೃ॑ಜ॒ ವರ್ಚ॑ಸಾ । ಯಸ್ತ್ವಾ॒ ಸುಷ್ಟು॑ತಮ್ । ತ್ವಮ॑ಗ್ನೇ ಯು॒ಖ್ಷ್ವಾ ಹಿ ಸು॑ಷ್ಟಿ॒ತಿಮ್ । ತ್ವಮ॑ಗ್ನೇ॒ ವಿಚ॑ರ್ಷಣೇ । ಯತ್ವಾ॒ ವಿ ರೋ॑ಚಸೇ ।)
(ಆ ದ॑ದೇ॒-ಯೇ ದೇ॑ವಾ-ಮ॒ಹಾ-ನು॒ತ್ತಿಷ್ಠ॒ನ್-ಥ್ಸರ್ವ॑ಸ್ಯ-ಸನ್ತು ದುರ್ಮಿ॒ತ್ರಾ-ಶ್ಚತು॑ಷ್ಪಞ್ಚಾ॒ಶತ್ ।)
(ಆ ದ॑ದೇ॒, ವಿ ಜ್ಯೋತಿ॑ಷಾ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ಚತುರ್ಥಃ ಪ್ರಶ್ನ-ಸ್ಸಮಾಪ್ತಃ ॥