ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ಷಷ್ಠಃ ಪ್ರಶ್ನಃ – ಯಾಜಮಾನಕಾಣ್ಡಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಸ-ನ್ತ್ವಾ॑ ಸಿಞ್ಚಾಮಿ॒ ಯಜು॑ಷಾ ಪ್ರ॒ಜಾಮಾಯು॒ರ್ಧನ॑-ಞ್ಚ । ಬೃಹ॒ಸ್ಪತಿ॑ಪ್ರಸೂತೋ॒ ಯಜ॑ಮಾನ ಇ॒ಹ ಮಾ ರಿ॑ಷತ್ ॥ ಆಜ್ಯ॑ಮಸಿ ಸ॒ತ್ಯಮ॑ಸಿ ಸ॒ತ್ಯಸ್ಯಾದ್ಧ್ಯ॑ಖ್ಷಮಸಿ ಹ॒ವಿರ॑ಸಿ ವೈಶ್ವಾನ॒ರಂ-ವೈಁ᳚ಶ್ವದೇ॒ವ-ಮುತ್ಪೂ॑ತಶುಷ್ಮಗ್ಂ ಸ॒ತ್ಯೌಜಾ॒-ಸ್ಸಹೋ॑-ಽಸಿ॒ ಸಹ॑ಮಾನಮಸಿ॒ ಸಹ॒ಸ್ವಾರಾ॑ತೀ॒-ಸ್ಸಹ॑ಸ್ವಾರಾತೀಯ॒ತ-ಸ್ಸಹ॑ಸ್ವ॒ ಪೃತ॑ನಾ॒-ಸ್ಸಹ॑ಸ್ವ ಪೃತನ್ಯ॒ತಃ । ಸ॒ಹಸ್ರ॑ವೀರ್ಯಮಸಿ॒ ತನ್ಮಾ॑ ಜಿ॒ನ್ವಾಜ್ಯ॒ಸ್ಯಾಜ್ಯ॑ಮಸಿ ಸ॒ತ್ಯಸ್ಯ॑ ಸ॒ತ್ಯಮ॑ಸಿ ಸ॒ತ್ಯಾಯು॑- [ಸ॒ತ್ಯಾಯುಃ॑, ಅ॒ಸಿ॒ ಸ॒ತ್ಯಶು॑ಷ್ಮಮಸಿ] 1
-ರಸಿ ಸ॒ತ್ಯಶು॑ಷ್ಮಮಸಿ ಸ॒ತ್ಯೇನ॑ ತ್ವಾ॒-ಽಭಿ ಘಾ॑ರಯಾಮಿ॒ ತಸ್ಯ॑ ತೇ ಭಖ್ಷೀಯ ಪಞ್ಚಾ॒ನಾ-ನ್ತ್ವಾ॒ ವಾತಾ॑ನಾಂ-ಯಁ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಪಞ್ಚಾ॒ನಾ-ನ್ತ್ವ॑ರ್ತೂ॒ನಾಂ-ಯಁ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಪಞ್ಚಾ॒ನಾ-ನ್ತ್ವಾ॑ ದಿ॒ಶಾಂ-ಯಁ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಪಞ್ಚಾ॒ನಾ-ನ್ತ್ವಾ॑ ಪಞ್ಚಜ॒ನಾನಾಂ᳚-ಯಁ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಚ॒ರೋಸ್ತ್ವಾ॒ ಪಞ್ಚ॑ಬಿಲಸ್ಯ ಯ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ॒ ಬ್ರಹ್ಮ॑ಣಸ್ತ್ವಾ॒ ತೇಜ॑ಸೇ ಯ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಖ್ಷ॒ತ್ರಸ್ಯ॒ ತ್ವೌಜ॑ಸೇ ಯ॒ನ್ತ್ರಾಯ॑ [ ] 2
ಧ॒ರ್ತ್ರಾಯ॑ ಗೃಹ್ಣಾಮಿ ವಿ॒ಶೇ ತ್ವಾ॑ ಯ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಸು॒ವೀರ್ಯಾ॑ಯ ತ್ವಾ ಗೃಹ್ಣಾಮಿ ಸುಪ್ರಜಾ॒ಸ್ತ್ವಾಯ॑ ತ್ವಾ ಗೃಹ್ಣಾಮಿ ರಾ॒ಯಸ್ಪೋಷಾ॑ಯ ತ್ವಾ ಗೃಹ್ಣಾಮಿ ಬ್ರಹ್ಮವರ್ಚ॒ಸಾಯ॑ ತ್ವಾ ಗೃಹ್ಣಾಮಿ॒ ಭೂರ॒ಸ್ಮಾಕಗ್ಂ॑ ಹ॒ವಿರ್ದೇ॒ವಾನಾ॑-ಮಾ॒ಶಿಷೋ॒ ಯಜ॑ಮಾನಸ್ಯ ದೇ॒ವಾನಾ᳚-ನ್ತ್ವಾ ದೇ॒ವತಾ᳚ಭ್ಯೋ ಗೃಹ್ಣಾಮಿ॒ ಕಾಮಾ॑ಯ ತ್ವಾ ಗೃಹ್ಣಾಮಿ ॥ 3 ॥
(ಸ॒ತ್ಯಾಯು॒-ರೋಜ॑ಸೇ ಯ॒ನ್ತ್ರಾಯ॒-ತ್ರಯ॑ಸ್ತ್ರಿಗ್ಂಶಚ್ಚ) (ಅ. 1)
ಧ್ರು॒ವೋ॑-ಽಸಿ ಧ್ರು॒ವೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ॒-ನ್ಧೀರ॒ಶ್ಚೇತ್ತಾ॑ ವಸು॒ವಿದು॒ಗ್ರೋ᳚-ಽಸ್ಯು॒ಗ್ರೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ-ಮು॒ಗ್ರಶ್ಚೇತ್ತಾ॑ ವಸು॒ವಿದ॑ಭಿ॒-ಭೂರ॑ಸ್ಯಭಿ॒ಭೂರ॒ಹಗ್ಂ ಸ॑ಜಾ॒ತೇಷು॑ ಭೂಯಾಸಮಭಿ॒ಭೂಶ್ಚೇತ್ತಾ॑ ವಸು॒ವಿ-ದ್ಯು॒ನಜ್ಮಿ॑ ತ್ವಾ॒ ಬ್ರಹ್ಮ॑ಣಾ॒ ದೈವ್ಯೇ॑ನ ಹ॒ವ್ಯಾಯಾ॒ಸ್ಮೈ ವೋಢ॒ವೇ ಜಾ॑ತವೇದಃ ॥ ಇನ್ಧಾ॑ನಾಸ್ತ್ವಾ ಸುಪ್ರ॒ಜಸ॑-ಸ್ಸು॒ವೀರಾ॒ ಜ್ಯೋಗ್ಜೀ॑ವೇಮ ಬಲಿ॒ಹೃತೋ॑ ವ॒ಯ-ನ್ತೇ᳚ ॥ ಯನ್ಮೇ॑ ಅಗ್ನೇ ಅ॒ಸ್ಯ ಯ॒ಜ್ಞಸ್ಯ॒ ರಿಷ್ಯಾ॒- [ರಿಷ್ಯಾ᳚ತ್, ದ್ಯದ್ವಾ॒] 4
-ದ್ಯದ್ವಾ॒ ಸ್ಕನ್ದಾ॒-ದಾಜ್ಯ॑ಸ್ಯೋ॒ತ ವಿ॑ಷ್ಣೋ । ತೇನ॑ ಹನ್ಮಿ ಸ॒ಪತ್ನ॑-ನ್ದುರ್ಮರಾ॒ಯುಮೈನ॑-ನ್ದಧಾಮಿ॒ ನಿರ್-ಋ॑ತ್ಯಾ ಉ॒ಪಸ್ಥೇ᳚ । ಭೂ-ರ್ಭುವ॒-ಸ್ಸುವ॒ರುಚ್ಛು॑ಷ್ಮೋ ಅಗ್ನೇ॒ ಯಜ॑ಮಾನಾಯೈಧಿ॒ ನಿಶು॑ಷ್ಮೋ ಅಭಿ॒ದಾಸ॑ತೇ । ಅಗ್ನೇ॒ ದೇವೇ᳚ದ್ಧ॒ ಮನ್ವಿ॑ದ್ಧ॒ ಮನ್ದ್ರ॑ಜಿ॒ಹ್ವಾ-ಮ॑ರ್ತ್ಯಸ್ಯ ತೇ ಹೋತರ್ಮೂ॒ರ್ಧನ್ನಾ ಜಿ॑ಘರ್ಮಿ ರಾ॒ಯಸ್ಪೋಷಾ॑ಯ ಸುಪ್ರಜಾ॒ಸ್ತ್ವಾಯ॑ ಸು॒ವೀರ್ಯಾ॑ಯ॒ ಮನೋ॑-ಽಸಿ ಪ್ರಾಜಾಪ॒ತ್ಯ-ಮ್ಮನ॑ಸಾ ಮಾ ಭೂ॒ತೇನಾ ವಿ॑ಶ॒ ವಾಗ॑ಸ್ಯೈ॒ನ್ದ್ರೀ ಸ॑ಪತ್ನ॒ಖ್ಷಯ॑ಣೀ [ ] 5
ವಾ॒ಚಾ ಮೇ᳚ನ್ದ್ರಿ॒ಯೇಣಾ ವಿ॑ಶ ವಸ॒ನ್ತಮೃ॑ತೂ॒ನಾ-ಮ್ಪ್ರೀ॑ಣಾಮಿ॒ ಸ ಮಾ᳚ ಪ್ರೀ॒ತಃ ಪ್ರೀ॑ಣಾತು ಗ್ರೀ॒ಷ್ಮಮೃ॑ತೂ॒ನಾ-ಮ್ಪ್ರೀ॑ಣಾಮಿ॒ ಸ ಮಾ᳚ ಪ್ರೀ॒ತಃ ಪ್ರೀ॑ಣಾತು ವ॒ರ್॒ಷಾ ಋ॑ತೂ॒ನಾ-ಮ್ಪ್ರೀ॑ಣಾಮಿ॒ ತಾ ಮಾ᳚ ಪ್ರೀ॒ತಾಃ ಪ್ರೀ॑ಣನ್ತು ಶ॒ರದ॑ಮೃತೂ॒ನಾ-ಮ್ಪ್ರೀ॑ಣಾಮಿ॒ ಸಾ ಮಾ᳚ ಪ್ರೀ॒ತಾ ಪ್ರೀ॑ಣಾತು ಹೇಮನ್ತಶಿಶಿ॒ರಾವೃ॑ತೂ॒ನಾ-ಮ್ಪ್ರೀ॑ಣಾಮಿ॒ ತೌ ಮಾ᳚ ಪ್ರೀ॒ತೌ ಪ್ರೀ॑ಣೀತಾ-ಮ॒ಗ್ನೀಷೋಮ॑ಯೋ-ರ॒ಹ-ನ್ದೇ॑ವಯ॒ಜ್ಯಯಾ॒ ಚಖ್ಷು॑ಷ್ಮಾ-ನ್ಭೂಯಾಸಮ॒ಗ್ನೇರ॒ಹ-ನ್ದೇ॑ವಯ॒ಜ್ಯಯಾ᳚-ಽನ್ನಾ॒ದೋ ಭೂ॑ಯಾಸ॒- [ಭೂ॑ಯಾಸಮ್, ದಬ್ಧಿ॑ರ॒ಸ್ಯದ॑ಬ್ಧೋ] 6
-ನ್ದಬ್ಧಿ॑ರ॒ಸ್ಯದ॑ಬ್ಧೋ ಭೂಯಾಸಮ॒ಮು-ನ್ದ॑ಭೇಯ-ಮ॒ಗ್ನೀಷೋಮ॑ಯೋ-ರ॒ಹ-ನ್ದೇ॑ವಯ॒ಜ್ಯಯಾ॑ ವೃತ್ರ॒ಹಾ ಭೂ॑ಯಾಸಮಿನ್ದ್ರಾಗ್ನಿ॒ಯೋರ॒ಹ-ನ್ದೇ॑ವಯ॒ಜ್ಯಯೇ᳚ನ್ದ್ರಿಯಾ॒ವ್ಯ॑ನ್ನಾ॒ದೋ ಭೂ॑ಯಾಸ॒ಮಿನ್ದ್ರ॑ಸ್ಯಾ॒-ಽಹ-ನ್ದೇ॑ವಯ॒ಜ್ಯಯೇ᳚ನ್ದ್ರಿಯಾ॒ವೀ ಭೂ॑ಯಾಸ-ಮ್ಮಹೇ॒ನ್ದ್ರಸ್ಯಾ॒-ಽಹ-ನ್ದೇ॑ವಯ॒ಜ್ಯಯಾ॑ ಜೇ॒ಮಾನ॑-ಮ್ಮಹಿ॒ಮಾನ॑-ಙ್ಗಮೇಯಮ॒ಗ್ನೇ-ಸ್ಸ್ವಿ॑ಷ್ಟ॒ಕೃತೋ॒-ಽಹ-ನ್ದೇ॑ವಯ॒ಜ್ಯಯಾ ಽಽಯು॑ಷ್ಮಾನ್. ಯ॒ಜ್ಞೇನ॑ ಪ್ರತಿ॒ಷ್ಠಾ-ಙ್ಗ॑ಮೇಯಮ್ ॥ 7 ॥
(ರಿಷ್ಯಾ᳚-ಥ್ಸಪತ್ನ॒ಖ್ಷಯ॑ಣ್ಯ-ನ್ನಾ॒ದೋ ಭೂ॑ಯಾಸ॒ಗ್ಂ॒-ಷಟ್ತ್ರಿಗ್ಂ॑ಶಚ್ಚ) (ಅ. 2)
ಅ॒ಗ್ನಿರ್ಮಾ॒ ದುರಿ॑ಷ್ಟಾ-ತ್ಪಾತು ಸವಿ॒ತಾ-ಽಘಶಗ್ಂ॑ಸಾ॒ದ್ಯೋ ಮೇ-ಽನ್ತಿ॑ ದೂ॒ರೇ॑-ಽರಾತೀ॒ಯತಿ॒ ತಮೇ॒ತೇನ॑ ಜೇಷ॒ಗ್ಂ॒ ಸುರೂ॑ಪವರ್ಷವರ್ಣ॒ ಏಹೀ॒ಮಾ-ನ್ಭ॒ದ್ರಾ-ನ್ದುರ್ಯಾಗ್ಂ॑ ಅ॒ಭ್ಯೇಹಿ॒ ಮಾಮನು॑ವ್ರತಾ॒ ನ್ಯು॑ ಶೀ॒ರ್॒ಷಾಣಿ॑ ಮೃಢ್ವ॒ಮಿಡ॒ ಏಹ್ಯದಿ॑ತ॒ ಏಹಿ॒ ಸರ॑ಸ್ವ॒ತ್ಯೇಹಿ॒ ರನ್ತಿ॑ರಸಿ॒ ರಮ॑ತಿರಸಿ ಸೂ॒ನರ್ಯ॑ಸಿ॒ ಜುಷ್ಟೇ॒ ಜುಷ್ಟಿ॑-ನ್ತೇ-ಽಶೀ॒ಯೋಪ॑ಹೂತ ಉಪಹ॒ವ- [ಉಪಹ॒ವಮ್, ತೇ॒-ಽಶೀ॒ಯ॒ ಸಾ ] 8
-ನ್ತೇ॑-ಽಶೀಯ॒ ಸಾ ಮೇ॑ ಸ॒ತ್ಯಾ-ಽಽಶೀರ॒ಸ್ಯ ಯ॒ಜ್ಞಸ್ಯ॑ ಭೂಯಾ॒ದರೇ॑ಡತಾ॒ ಮನ॑ಸಾ॒ ತಚ್ಛ॑ಕೇಯಂ-ಯಁ॒ಜ್ಞೋ ದಿವಗ್ಂ॑ ರೋಹತು ಯ॒ಜ್ಞೋ ದಿವ॑-ಙ್ಗಚ್ಛತು॒ ಯೋ ದೇ॑ವ॒ಯಾನಃ॒ ಪನ್ಥಾ॒ಸ್ತೇನ॑ ಯ॒ಜ್ಞೋ ದೇ॒ವಾಗ್ಂ ಅಪ್ಯೇ᳚ತ್ವ॒ಸ್ಮಾಸ್ವಿನ್ದ್ರ॑ ಇನ್ದ್ರಿ॒ಯ-ನ್ದ॑ಧಾತ್ವ॒ಸ್ಮಾನ್ರಾಯ॑ ಉ॒ತ ಯ॒ಜ್ಞಾ-ಸ್ಸ॑ಚನ್ತಾಮ॒ಸ್ಮಾಸು॑ ಸನ್ತ್ವಾ॒ಶಿಷ॒-ಸ್ಸಾ ನಃ॑ ಪ್ರಿ॒ಯಾ ಸು॒ಪ್ರತೂ᳚ರ್ತಿರ್ಮ॒ಘೋನೀ॒ ಜುಷ್ಟಿ॑ರಸಿ ಜು॒ಷಸ್ವ॑ ನೋ॒ ಜುಷ್ಟಾ॑ ನೋ- [ಜುಷ್ಟಾ॑ ನಃ, ಅ॒ಸಿ॒ ಜುಷ್ಟಿ॑-ನ್ತೇ] 9
-ಽಸಿ॒ ಜುಷ್ಟಿ॑-ನ್ತೇ ಗಮೇಯ॒-ಮ್ಮನೋ॒ ಜ್ಯೋತಿ॑-ರ್ಜುಷತಾ॒ಮಾಜ್ಯಂ॒-ವಿಁಚ್ಛಿ॑ನ್ನಂ-ಯಁ॒ಜ್ಞಗ್ಂ ಸಮಿ॒ಮ-ನ್ದ॑ಧಾತು । ಬೃಹ॒ಸ್ಪತಿ॑-ಸ್ತನುತಾಮಿ॒ಮನ್ನೋ॒ ವಿಶ್ವೇ॑ ದೇ॒ವಾ ಇ॒ಹ ಮಾ॑ದಯನ್ತಾಮ್ ॥ ಬ್ರದ್ಧ್ನ॒ ಪಿನ್ವ॑ಸ್ವ॒ ದದ॑ತೋ ಮೇ॒ ಮಾ ಖ್ಷಾ॑ಯಿ ಕುರ್ವ॒ತೋ ಮೇ॒ ಮೋಪ॑ ದಸ-ತ್ಪ್ರ॒ಜಾಪ॑ತೇ-ರ್ಭಾ॒ಗೋ᳚-ಽಸ್ಯೂರ್ಜ॑ಸ್ವಾ॒-ನ್ಪಯ॑ಸ್ವಾ-ನ್ಪ್ರಾಣಾಪಾ॒ನೌ ಮೇ॑ ಪಾಹಿ ಸಮಾನವ್ಯಾ॒ನೌ ಮೇ॑ ಪಾಹ್ಯುದಾನವ್ಯಾ॒ನೌ ಮೇ॑ ಪಾ॒ಹ್ಯಖ್ಷಿ॑ತೋ॒-ಽಸ್ಯಖ್ಷಿ॑ತ್ಯೈ ತ್ವಾ॒ ಮಾ ಮೇ᳚ ಖ್ಷೇಷ್ಠಾ ಅ॒ಮುತ್ರಾ॒ಮುಷ್ಮಿ॑-ಲ್ಲೋಁ॒ಕೇ ॥ 10 ॥
(ಉ॒ಪ॒ಹ॒ವಂ-ಜುಷ್ಟಾ॑ನ-ಸ್ತ್ವಾ॒ ಷಟ್ ಚ॑) (ಅ. 3)
ಬ॒ರ್॒ಹಿಷೋ॒-ಽಹ-ನ್ದೇ॑ವಯ॒ಜ್ಯಯಾ᳚ ಪ್ರ॒ಜಾವಾ᳚-ನ್ಭೂಯಾಸ॒-ನ್ನರಾ॒ಶಗ್ಂಸ॑ಸ್ಯಾ॒ಹ-ನ್ದೇ॑ವಯ॒ಜ್ಯಯಾ॑ ಪಶು॒ಮಾ-ನ್ಭೂ॑ಯಾಸಮ॒ಗ್ನೇ-ಸ್ಸ್ವಿ॑ಷ್ಟ॒ಕೃತೋ॒-ಽಹ-ನ್ದೇ॑ವಯ॒ಜ್ಯಯಾ-ಽಽಯು॑ಷ್ಮಾನ್. ಯ॒ಜ್ಞೇನ॑ ಪ್ರತಿ॒ಷ್ಠಾ-ಙ್ಗ॑ಮೇಯಮ॒ಗ್ನೇರ॒ಹ-ಮುಜ್ಜಿ॑ತಿ॒-ಮನೂಜ್ಜೇ॑ಷ॒ಗ್ಂ॒ ಸೋಮ॑ಸ್ಯಾ॒ಹ – ಮುಜ್ಜಿ॑ತಿ॒-ಮನೂಜ್ಜೇ॑ಷಮ॒ಗ್ನೇರ॒ಹ-ಮುಜ್ಜಿ॑ತಿ॒-ಮನೂಜ್ಜೇ॑ಷ-ಮ॒ಗ್ನೀಷೋಮ॑ಯೋರ॒ಹ-ಮುಜ್ಜಿ॑ತಿ॒-ಮನೂಜ್ಜೇ॑ಷ-ಮಿನ್ದ್ರಾಗ್ನಿ॒ಯೋರ॒ಹ-ಮುಜ್ಜಿ॑ತಿ॒-ಮನೂಜ್ಜೇ॑ಷ॒-ಮಿನ್ದ್ರ॑ಸ್ಯಾ॒-ಽಹ- [-ಮಿನ್ದ್ರ॑ಸ್ಯಾ॒-ಽಹಮ್, ಉಜ್ಜಿ॑ತಿ॒ಮನೂಜ್ಜೇ॑ಷಂ] 11
-ಮುಜ್ಜಿ॑ತಿ॒ಮನೂಜ್ಜೇ॑ಷ-ಮ್ಮಹೇ॒ನ್ದ್ರಸ್ಯಾ॒ಹಮುಜ್ಜಿ॑ತಿ॒- ಮನೂಜ್ಜೇ॑ಷಮ॒ಗ್ನೇ-ಸ್ಸ್ವಿ॑ಷ್ಟ॒ಕೃತೋ॒-ಽಹ ಮುಜ್ಜಿ॑ತಿ॒-ಮನೂಜ್ಜೇ॑ಷಂ॒-ವಾಁಜ॑ಸ್ಯ ಮಾ ಪ್ರಸ॒ವೇನೋ᳚-ದ್ಗ್ರಾ॒ಭೇಣೋದ॑ಗ್ರಭೀತ್ । ಅಥಾ॑ ಸ॒ಪತ್ನಾ॒ಗ್ಂ॒ ಇನ್ದ್ರೋ॑ ಮೇ ನಿಗ್ರಾ॒ಭೇಣಾಧ॑ರಾಗ್ಂ ಅಕಃ ॥ ಉ॒ದ್ಗ್ರಾ॒ಭ-ಞ್ಚ॑ ನಿಗ್ರಾ॒ಭ-ಞ್ಚ॒ ಬ್ರಹ್ಮ॑ ದೇ॒ವಾ ಅ॑ವೀವೃಧನ್ನ್ । ಅಥಾ॑ ಸ॒ಪತ್ನಾ॑ನಿನ್ದ್ರಾ॒ಗ್ನೀ ಮೇ॑ ವಿಷೂ॒ಚೀನಾ॒ನ್ ವ್ಯ॑ಸ್ಯತಾಮ್ ॥ ಏಮಾ ಅ॑ಗ್ಮನ್ನಾ॒ಶಿಷೋ॒ ದೋಹ॑ಕಾಮಾ॒ ಇನ್ದ್ರ॑ವನ್ತೋ [ಇನ್ದ್ರ॑ವನ್ತಃ, ವ॒ನಾ॒ಮ॒ಹೇ॒ ಧು॒ಖ್ಷೀ॒ಮಹಿ॑] 12
ವನಾಮಹೇ ಧುಖ್ಷೀ॒ಮಹಿ॑ ಪ್ರ॒ಜಾಮಿಷ᳚ಮ್ ॥ ರೋಹಿ॑ತೇನ ತ್ವಾ॒-ಽಗ್ನಿ-ರ್ದೇ॒ವತಾ᳚-ಙ್ಗಮಯತು॒ ಹರಿ॑ಭ್ಯಾ॒-ನ್ತ್ವೇನ್ದ್ರೋ॑ ದೇ॒ವತಾ᳚-ಙ್ಗಮಯ॒ತ್ವೇತ॑ಶೇನ ತ್ವಾ॒ ಸೂರ್ಯೋ॑ ದೇ॒ವತಾ᳚-ಙ್ಗಮಯತು॒ ವಿ ತೇ॑ ಮುಞ್ಚಾಮಿ ರಶ॒ನಾ ವಿ ರ॒ಶ್ಮೀನ್ ವಿ ಯೋಕ್ತ್ರಾ॒ ಯಾನಿ॑ ಪರಿ॒ಚರ್ತ॑ನಾನಿ ಧ॒ತ್ತಾದ॒ಸ್ಮಾಸು॒ ದ್ರವಿ॑ಣಂ॒-ಯಁಚ್ಚ॑ ಭ॒ದ್ರ-ಮ್ಪ್ರ ಣೋ᳚ ಬ್ರೂತಾ-ದ್ಭಾಗ॒ಧಾ-ನ್ದೇ॒ವತಾ॑ಸು ॥ ವಿಷ್ಣೋ᳚-ಶ್ಶಂ॒ಯೋಁರ॒ಹ-ನ್ದೇ॑ವಯ॒ಜ್ಯಯಾ॑ ಯ॒ಜ್ಞೇನ॑ ಪ್ರತಿ॒ಷ್ಠಾ-ಙ್ಗ॑ಮೇಯ॒ಗ್ಂ॒ ಸೋಮ॑ಸ್ಯಾ॒ಹ-ನ್ದೇ॑ವಯ॒ಜ್ಯಯಾ॑ [ದೇ॑ವಯ॒ಜ್ಯಯಾ᳚, ಸು॒ರೇತಾ॒] 13
ಸು॒ರೇತಾ॒ ರೇತೋ॑ ಧಿಷೀಯ॒ ತ್ವಷ್ಟು॑ರ॒ಹ-ನ್ದೇ॑ವಯ॒ಜ್ಯಯಾ॑ ಪಶೂ॒ನಾಗ್ಂ ರೂ॒ಪ-ಮ್ಪು॑ಷೇಯ-ನ್ದೇ॒ವಾನಾ॒-ಮ್ಪತ್ನೀ॑ರ॒ಗ್ನಿ-ರ್ಗೃ॒ಹಪ॑ತಿ-ರ್ಯ॒ಜ್ಞಸ್ಯ॑ ಮಿಥು॒ನ-ನ್ತಯೋ॑ರ॒ಹ-ನ್ದೇ॑ವಯ॒ಜ್ಯಯಾ॑ ಮಿಥು॒ನೇನ॒ ಪ್ರಭೂ॑ಯಾಸಂ-ವೇಁ॒ದೋ॑-ಽಸಿ॒ ವಿತ್ತಿ॑ರಸಿ ವಿ॒ದೇಯ॒ ಕರ್ಮಾ॑-ಽಸಿ ಕ॒ರುಣ॑ಮಸಿ ಕ್ರಿ॒ಯಾಸಗ್ಂ॑ ಸ॒ನಿರ॑ಸಿ ಸನಿ॒ತಾ-ಽಸಿ॑ ಸ॒ನೇಯ॑-ಙ್ಘೃ॒ತವ॑ನ್ತ-ಙ್ಕುಲಾ॒ಯಿನಗ್ಂ॑ ರಾ॒ಯಸ್ಪೋಷಗ್ಂ॑ ಸಹ॒ಸ್ರಿಣಂ॑-ವೇಁ॒ದೋ ದ॑ದಾತು ವಾ॒ಜಿನ᳚ಮ್ ॥ 14 ॥
(ಇನ್ದ್ರ॑ಸ್ಯಾ॒ಹ-ಮಿನ್ದ್ರ॑ವನ್ತಃ॒-ಸೋಮ॑ಸ್ಯಾ॒ಹ-ನ್ದೇ॑ವಯ॒ಜ್ಯಯಾ॒-ಚತು॑ಶ್ಚತ್ವಾರಿಗ್ಂಶಚ್ಚ) (ಅ. 4)
ಆ ಪ್ಯಾ॑ಯತಾ-ನ್ಧ್ರು॒ವಾ ಘೃ॒ತೇನ॑ ಯ॒ಜ್ಞಂಯಁ॑ಜ್ಞ॒-ಮ್ಪ್ರತಿ॑ ದೇವ॒ಯದ್ಭ್ಯಃ॑ । ಸೂ॒ರ್ಯಾಯಾ॒ ಊಧೋ-ಽದಿ॑ತ್ಯಾ ಉ॒ಪಸ್ಥ॑ ಉ॒ರುಧಾ॑ರಾ ಪೃಥಿ॒ವೀ ಯ॒ಜ್ಞೇ ಅ॒ಸ್ಮಿನ್ನ್ ॥ ಪ್ರ॒ಜಾಪ॑ತೇ-ರ್ವಿ॒ಭಾನ್ನಾಮ॑ ಲೋ॒ಕಸ್ತಸ್ಮಿಗ್ಗ್॑ಸ್ತ್ವಾ ದಧಾಮಿ ಸ॒ಹ ಯಜ॑ಮಾನೇನ॒ ಸದ॑ಸಿ॒ ಸನ್ಮೇ॑ ಭೂಯಾ॒-ಸ್ಸರ್ವ॑ಮಸಿ॒ ಸರ್ವ॑-ಮ್ಮೇ ಭೂಯಾಃ ಪೂ॒ರ್ಣಮ॑ಸಿ ಪೂ॒ರ್ಣ-ಮ್ಮೇ॑ ಭೂಯಾ॒ ಅಖ್ಷಿ॑ತಮಸಿ॒ ಮಾ ಮೇ᳚ ಖ್ಷೇಷ್ಠಾಃ॒ ಪ್ರಾಚ್ಯಾ᳚-ನ್ದಿ॒ಶಿ ದೇ॒ವಾ ಋ॒ತ್ವಿಜೋ॑ ಮಾರ್ಜಯನ್ತಾ॒-ನ್ದಖ್ಷಿ॑ಣಾಯಾ- [ದಖ್ಷಿ॑ಣಾಯಾಮ್, ದಿ॒ಶಿ] 15
ನ್ದಿ॒ಶಿ ಮಾಸಾಃ᳚ ಪಿ॒ತರೋ॑ ಮಾರ್ಜಯನ್ತಾ-ಮ್ಪ್ರ॒ತೀಚ್ಯಾ᳚-ನ್ದಿ॒ಶಿ ಗೃ॒ಹಾಃ ಪ॒ಶವೋ॑ ಮಾರ್ಜಯನ್ತಾ॒ಮುದೀ᳚ಚ್ಯಾ-ನ್ದಿ॒ಶ್ಯಾಪ॒ ಓಷ॑ಧಯೋ॒ ವನ॒ಸ್ಪತ॑ಯೋ ಮಾರ್ಜಯನ್ತಾಮೂ॒ರ್ಧ್ವಾಯಾ᳚-ನ್ದಿ॒ಶಿ ಯ॒ಜ್ಞ-ಸ್ಸಂ॑ವಁಥ್ಸ॒ರೋ ಯ॒ಜ್ಞಪ॑ತಿ-ರ್ಮಾರ್ಜಯನ್ತಾಂ॒-ವಿಁಷ್ಣೋಃ॒ ಕ್ರಮೋ᳚-ಽಸ್ಯಭಿಮಾತಿ॒ಹಾ ಗಾ॑ಯ॒ತ್ರೇಣ॒ ಛನ್ದ॑ಸಾ ಪೃಥಿ॒ವೀಮನು॒ ವಿ ಕ್ರ॑ಮೇ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮೋ ವಿಷ್ಣೋಃ॒ ಕ್ರಮೋ᳚-ಽಸ್ಯಭಿಶಸ್ತಿ॒ಹಾ ತ್ರೈಷ್ಟು॑ಭೇನ॒ ಛನ್ದ॑ಸಾ॒ ಽನ್ತರಿ॑ಖ್ಷ॒ಮನು॒ ವಿ ಕ್ರ॑ಮೇ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮೋ ವಿಷ್ಣೋಃ॒ ಕ್ರಮೋ᳚-ಽಸ್ಯರಾತೀಯ॒ತೋ ಹ॒ನ್ತಾ ಜಾಗ॑ತೇನ॒ ಛನ್ದ॑ಸಾ॒ ದಿವ॒ಮನು॒ ವಿ ಕ್ರ॑ಮೇ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮೋ ವಿಷ್ಣೋಃ॒ ಕ್ರಮೋ॑-ಽಸಿ ಶತ್ರೂಯ॒ತೋ ಹ॒ನ್ತಾ-ಽಽನು॑ಷ್ಟುಭೇನ॒ ಛನ್ದ॑ಸಾ॒ ದಿಶೋ-ಽನು॒ ವಿ ಕ್ರ॑ಮೇ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮಃ ॥ 16 ॥
(ದಖ್ಷಿ॑ಣಾಯಾ – ಮ॒ನ್ತರಿ॑ಖ್ಷ॒ಮನು॒ ವಿ ಕ್ರ॑ಮೇ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮೋ ವಿಷ್ಣೋ॒- ರೇಕಾ॒ನ್ನತ್ರಿ॒ಗ್ಂ॒ಶಚ್ಚ॑) (ಅ. 5)
ಅಗ॑ನ್ಮ॒ ಸುವ॒-ಸ್ಸುವ॑ರಗನ್ಮ ಸ॒ನ್ದೃಶ॑ಸ್ತೇ॒ ಮಾ ಛಿ॑ಥ್ಸಿ॒ ಯತ್ತೇ॒ ತಪ॒ಸ್ತಸ್ಮೈ॑ ತೇ॒ ಮಾ-ಽಽ ವೃ॑ಖ್ಷಿ ಸು॒ಭೂರ॑ಸಿ॒ ಶ್ರೇಷ್ಠೋ॑ ರಶ್ಮೀ॒ನಾಮಾ॑ಯು॒ರ್ಧಾ ಅ॒ಸ್ಯಾಯು॑ರ್ಮೇ ಧೇಹಿ ವರ್ಚೋ॒ಧಾ ಅ॑ಸಿ॒ ವರ್ಚೋ॒ ಮಯಿ॑ ಧೇಹೀ॒ದಮ॒ಹಮ॒ಮು-ಮ್ಭ್ರಾತೃ॑ವ್ಯಮಾ॒ಭ್ಯೋ ದಿ॒ಗ್ಭ್ಯೋ᳚-ಽಸ್ಯೈ ದಿ॒ವೋ᳚-ಽಸ್ಮಾದ॒ನ್ತರಿ॑ಖ್ಷಾದ॒ಸ್ಯೈ ಪೃ॑ಥಿ॒ವ್ಯಾ ಅ॒ಸ್ಮಾದ॒ನ್ನಾದ್ಯಾ॒ನ್ನಿರ್ಭ॑ಜಾಮಿ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮಃ ॥ 17 ॥
ಸ-ಞ್ಜ್ಯೋತಿ॑ಷಾ-ಽಭೂವಮೈ॒ನ್ದ್ರೀ-ಮಾ॒ವೃತ॑-ಮ॒ನ್ವಾವ॑ರ್ತೇ॒ ಸಮ॒ಹ-ಮ್ಪ್ರ॒ಜಯಾ॒ ಸ-ಮ್ಮಯಾ᳚ ಪ್ರ॒ಜಾ ಸಮ॒ಹಗ್ಂ ರಾ॒ಯಸ್ಪೋಷೇ॑ಣ॒ ಸ-ಮ್ಮಯಾ॑ ರಾ॒ಯಸ್ಪೋಷ॒-ಸ್ಸಮಿ॑ದ್ಧೋ ಅಗ್ನೇ ಮೇ ದೀದಿಹಿ ಸಮೇ॒ದ್ಧಾ ತೇ॑ ಅಗ್ನೇ ದೀದ್ಯಾಸಂ॒-ವಁಸು॑ಮಾನ್. ಯ॒ಜ್ಞೋ ವಸೀ॑ಯಾ-ನ್ಭೂಯಾಸ॒ಮಗ್ನ॒ ಆಯೂಗ್ಂ॑ಷಿ ಪವಸ॒ ಆ ಸು॒ವೋರ್ಜ॒ಮಿಷ॑-ಞ್ಚ ನಃ । ಆ॒ರೇ ಬಾ॑ಧಸ್ವ ದು॒ಚ್ಛುನಾ᳚ಮ್ ॥ ಅಗ್ನೇ॒ ಪವ॑ಸ್ವ॒ ಸ್ವಪಾ॑ ಅ॒ಸ್ಮೇ ವರ್ಚ॑-ಸ್ಸು॒ವೀರ್ಯ᳚ಮ್ ॥ 18 ॥
ದಧ॒ತ್ಪೋಷಗ್ಂ॑ ರ॒ಯಿ-ಮ್ಮಯಿ॑ । ಅಗ್ನೇ॑ ಗೃಹಪತೇ ಸುಗೃಹಪ॒ತಿರ॒ಹ-ನ್ತ್ವಯಾ॑ ಗೃ॒ಹಪ॑ತಿನಾ ಭೂಯಾಸಗ್ಂ ಸುಗೃಹಪ॒ತಿರ್ಮಯಾ॒ ತ್ವ-ಙ್ಗೃ॒ಹಪ॑ತಿನಾ ಭೂಯಾ-ಶ್ಶ॒ತಗ್ಂ ಹಿಮಾ॒ಸ್ತಾಮಾ॒ಶಿಷ॒ಮಾ ಶಾ॑ಸೇ॒ ತನ್ತ॑ವೇ॒ ಜ್ಯೋತಿ॑ಷ್ಮತೀ॒-ನ್ತಾಮಾ॒ಶಿಷ॒ಮಾ ಶಾ॑ಸೇ॒-ಽಮುಷ್ಮೈ॒ ಜ್ಯೋತಿ॑ಷ್ಮತೀ॒-ಙ್ಕಸ್ತ್ವಾ॑ ಯುನಕ್ತಿ॒ ಸ ತ್ವಾ॒ ವಿಮು॑ಞ್ಚ॒ತ್ವಗ್ನೇ᳚ ವ್ರತಪತೇ ವ್ರ॒ತಮ॑ಚಾರಿಷ॒-ನ್ತದ॑ಶಕ॒-ನ್ತನ್ಮೇ॑-ಽರಾಧಿ ಯ॒ಜ್ಞೋ ಬ॑ಭೂವ॒ ಸ ಆ [ಸ ಆ, ಬ॒ಭೂ॒ವ॒ ಸ] 19
ಬ॑ಭೂವ॒ ಸ ಪ್ರಜ॑ಜ್ಞೇ॒ ಸ ವಾ॑ವೃಧೇ । ಸ ದೇ॒ವಾನಾ॒ಮಧಿ॑ಪತಿ-ರ್ಬಭೂವ॒ ಸೋ ಅ॒ಸ್ಮಾಗ್ಂ ಅಧಿ॑ಪತೀನ್ ಕರೋತು ವ॒ಯಗ್ಗ್ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ ಗೋಮಾಗ್ಂ॑ ಅ॒ಗ್ನೇ-ಽವಿ॑ಮಾಗ್ಂ ಅ॒ಶ್ವೀ ಯ॒ಜ್ಞೋ ನೃ॒ವಥ್ಸ॑ಖಾ॒ ಸದ॒ಮಿದ॑ಪ್ರಮೃ॒ಷ್ಯಃ ।ಇಡಾ॑ವಾಗ್ಂ ಏ॒ಷೋ ಅ॑ಸುರ ಪ್ರ॒ಜಾವಾ᳚-ನ್ದೀ॒ರ್ಘೋ ರ॒ಯಿಃ ಪೃ॑ಥುಬು॒ದ್ಧ್ನ-ಸ್ಸ॒ಭಾವಾನ್॑ ॥ 20 ॥
(ದ್ವಿ॒ಷ್ಮಃ-ಸು॒ವೀರ್ಯ॒ಗ್ಂ॒-ಸ ಆ-ಪಞ್ಚ॑ತ್ರಿಗ್ಂಶಚ್ಚ) (ಅ. 6)
ಯಥಾ॒ ವೈ ಸ॑ಮೃತಸೋ॒ಮಾ ಏ॒ವಂ-ವಾಁ ಏ॒ತೇ ಸ॑ಮೃತಯ॒ಜ್ಞಾ ಯದ್ದ॑ರ್ಶಪೂರ್ಣಮಾ॒ಸೌ ಕಸ್ಯ॒ ವಾ-ಽಹ॑ ದೇ॒ವಾ ಯ॒ಜ್ಞಮಾ॒ಗಚ್ಛ॑ನ್ತಿ॒ ಕಸ್ಯ॑ ವಾ॒ ನ ಬ॑ಹೂ॒ನಾಂ-ಯಁಜ॑ಮಾನಾನಾಂ॒-ಯೋಁ ವೈ ದೇ॒ವತಾಃ॒ ಪೂರ್ವಃ॑ ಪರಿಗೃ॒ಹ್ಣಾತಿ॒ ಸ ಏ॑ನಾ॒-ಶ್ಶ್ವೋ ಭೂ॒ತೇ ಯ॑ಜತ ಏ॒ತದ್ವೈ ದೇ॒ವಾನಾ॑-ಮಾ॒ಯತ॑ನಂ॒-ಯಁದಾ॑ಹವ॒ನೀಯೋ᳚-ಽನ್ತ॒ರಾ-ಽಗ್ನೀ ಪ॑ಶೂ॒ನಾ-ಙ್ಗಾರ್ಹ॑ಪತ್ಯೋ ಮನು॒ಷ್ಯಾ॑ಣಾ-ಮನ್ವಾಹಾರ್ಯ॒ಪಚ॑ನಃ ಪಿತೃ॒ಣಾಮ॒ಗ್ನಿ-ಙ್ಗೃ॑ಹ್ಣಾತಿ॒ ಸ್ವ ಏ॒ವಾಯತ॑ನೇ ದೇ॒ವತಾಃ॒ ಪರಿ॑ [ದೇ॒ವತಾಃ॒ ಪರಿ॑, ಗೃ॒ಹ್ಣಾ॒ತಿ॒ ತಾ-ಶ್ಶ್ವೋ] 21
ಗೃಹ್ಣಾತಿ॒ ತಾ-ಶ್ಶ್ವೋ ಭೂ॒ತೇ ಯ॑ಜತೇ ವ್ರ॒ತೇನ॒ ವೈ ಮೇದ್ಧ್ಯೋ॒ -ಽಗ್ನಿ-ರ್ವ್ರ॒ತಪ॑ತಿ-ರ್ಬ್ರಾಹ್ಮ॒ಣೋ ವ್ರ॑ತ॒ಭೃ-ದ್ವ್ರ॒ತ-ಮು॑ಪೈ॒ಷ್ಯ-ನ್ಬ್ರೂ॑ಯಾ॒ದಗ್ನೇ᳚ ವ್ರತಪತೇ ವ್ರ॒ತ-ಞ್ಚ॑ರಿಷ್ಯಾ॒ಮೀತ್ಯ॒ಗ್ನಿ-ರ್ವೈ ದೇ॒ವಾನಾಂ᳚-ವ್ರಁ॒ತಪ॑ತಿ॒ಸ್ತಸ್ಮಾ॑ ಏ॒ವ ಪ್ರ॑ತಿ॒ಪ್ರೋಚ್ಯ॑ ವ್ರ॒ತಮಾ ಲ॑ಭತೇ ಬ॒ರ್॒ಹಿಷಾ॑ ಪೂ॒ರ್ಣಮಾ॑ಸೇ ವ್ರ॒ತಮುಪೈ॑ತಿ ವ॒ಥ್ಸೈರ॑ಮಾವಾ॒ಸ್ಯಾ॑ಯಾಮೇ॒ತದ್ಧ್ಯೇ॑ತಯೋ॑-ರಾ॒ಯತ॑ನಮುಪ॒ಸ್ತೀರ್ಯಃ॒ ಪೂರ್ವ॑ಶ್ಚಾ॒ಗ್ನಿರಪ॑ರ॒ಶ್ಚೇತ್ಯಾ॑ಹು-ರ್ಮನು॒ಷ್ಯಾ॑ [-ರ್ಮನು॒ಷ್ಯಾಃ᳚, ಇನ್ನ್ವಾ] 22
ಇನ್ನ್ವಾ ಉಪ॑ಸ್ತೀರ್ಣ-ಮಿ॒ಚ್ಛನ್ತಿ॒ ಕಿಮು॑ ದೇ॒ವಾ ಯೇಷಾ॒-ನ್ನವಾ॑ವಸಾನ॒-ಮುಪಾ᳚ಸ್ಮಿ॒ಞ್ಛ್ವೋ ಯ॒ಖ್ಷ್ಯಮಾ॑ಣೇ ದೇ॒ವತಾ॑ ವಸನ್ತಿ॒ ಯ ಏ॒ವಂ-ವಿಁ॒ದ್ವಾನ॒ಗ್ನಿ-ಮು॑ಪಸ್ತೃ॒ಣಾತಿ॒ ಯಜ॑ಮಾನೇನ ಗ್ರಾ॒ಮ್ಯಾಶ್ಚ॑ ಪ॒ಶವೋ॑-ಽವ॒ರುದ್ಧ್ಯಾ॑ ಆರ॒ಣ್ಯಾಶ್ಚೇತ್ಯಾ॑ಹು॒-ರ್ಯ-ದ್ಗ್ರಾ॒ಮ್ಯಾನು॑ಪ॒ವಸ॑ತಿ॒ ತೇನ॑ ಗ್ರಾ॒ಮ್ಯಾನವ॑ ರುನ್ಧೇ॒ ಯದಾ॑ರ॒ಣ್ಯಸ್ಯಾ॒-ಽಶ್ಞಾತಿ॒ ತೇನಾ॑ರ॒ಣ್ಯಾನ್. ಯದನಾ᳚ಶ್ವಾ-ನುಪ॒ವಸೇ᳚-ತ್ಪಿತೃದೇವ॒ತ್ಯ॑-ಸ್ಸ್ಯಾದಾರ॒ಣ್ಯಸ್ಯಾ᳚-ಶ್ಞಾತೀನ್ದ್ರಿ॒ಯಂ- [ಶ್ಞಾತೀನ್ದ್ರಿ॒ಯಮ್, ವಾ ಆ॑ರ॒ಣ್ಯಂ-] 23
-ವಾಁ ಆ॑ರ॒ಣ್ಯ-ಮಿ॑ನ್ದ್ರಿ॒ಯ-ಮೇ॒ವಾ-ಽಽತ್ಮ-ನ್ಧ॑ತ್ತೇ॒ ಯದನಾ᳚ಶ್ವಾ-ನುಪ॒ವಸೇ॒-ತ್ಖ್ಷೋಧು॑ಕ-ಸ್ಸ್ಯಾ॒ದ್ಯ-ದ॑ಶ್ಞೀ॒ಯಾದ್ರು॒-ದ್ರೋ᳚-ಽಸ್ಯ ಪ॒ಶೂನ॒ಭಿ ಮ॑ನ್ಯೇತಾ॒-ಽಪೋ᳚-ಽಶ್ಞಾತಿ॒ ತನ್ನೇವಾ॑ಶಿ॒ತ-ನ್ನೇವಾ-ಽನ॑ಶಿತ॒-ನ್ನ ಖ್ಷೋಧು॑ಕೋ॒ ಭವ॑ತಿ॒ ನಾಸ್ಯ॑ ರು॒ದ್ರಃ ಪ॒ಶೂನ॒ಭಿ ಮ॑ನ್ಯತೇ॒ ವಜ್ರೋ॒ ವೈ ಯ॒ಜ್ಞಃ, ಖ್ಷು-ತ್ಖಲು॒ ವೈ ಮ॑ನು॒ಷ್ಯ॑ಸ್ಯ॒ ಭ್ರಾತೃ॑ವ್ಯೋ॒ ಯದನಾ᳚-ಽಶ್ವಾನುಪ॒ವಸ॑ತಿ॒ ವಜ್ರೇ॑ಣೈ॒ವ ಸಾ॒ಖ್ಷಾ-ತ್ಖ್ಷುಧ॒-ಮ್ಭ್ರಾತೃ॑ವ್ಯಗ್ಂ ಹನ್ತಿ ॥ 24 ॥
(ಪರಿ॑-ಮನು॒ಷ್ಯಾ॑-ಇನ್ದ್ರಿ॒ಯಗ್ಂ-ಸಾ॒ಖ್ಷಾತ್-ತ್ರೀಣಿ॑ ಚ) (ಅ. 7)
ಯೋ ವೈ ಶ್ರ॒ದ್ಧಾಮನಾ॑ರಭ್ಯ ಯ॒ಜ್ಞೇನ॒ ಯಜ॑ತೇ॒ ನಾಸ್ಯೇ॒ಷ್ಟಾಯ॒ ಶ್ರದ್ದ॑ಧತೇ॒-ಽಪಃ ಪ್ರ ಣ॑ಯತಿ ಶ್ರ॒ದ್ಧಾ ವಾ ಆಪ॑-ಶ್ಶ್ರ॒ದ್ಧಾಮೇ॒ವಾ-ಽಽರಭ್ಯ॑ ಯ॒ಜ್ಞೇನ॑ ಯಜತ ಉ॒ಭಯೇ᳚-ಽಸ್ಯ ದೇವಮನು॒ಷ್ಯಾ ಇ॒ಷ್ಟಾಯ॒ ಶ್ರದ್ದ॑ಧತೇ॒ ತದಾ॑ಹು॒ರತಿ॒ ವಾ ಏ॒ತಾ ವರ್ತ್ರ॑-ನ್ನೇದ॒ನ್ತ್ಯತಿ॒ ವಾಚ॒-ಮ್ಮನೋ॒ ವಾವೈತಾ ನಾತಿ॑ ನೇದ॒ನ್ತೀತಿ॒ ಮನ॑ಸಾ॒ ಪ್ರ ಣ॑ಯತೀ॒ಯಂ-ವೈಁ ಮನೋ॒- [ಮನಃ॑, ಅ॒ನಯೈ॒ವೈನಾಃ॒] 25
-ಽನಯೈ॒ವೈನಾಃ॒ ಪ್ರ ಣ॑ಯ॒ತ್ಯ-ಸ್ಕ॑ನ್ನಹವಿ-ರ್ಭವತಿ॒ ಯ ಏ॒ವಂ-ವೇಁದ॑ ಯಜ್ಞಾಯು॒ಧಾನಿ॒ ಸ-ಮ್ಭ॑ರತಿ ಯ॒ಜ್ಞೋ ವೈ ಯ॑ಜ್ಞಾಯು॒ಧಾನಿ॑ ಯ॒ಜ್ಞಮೇ॒ವ ತಥ್ಸ-ಮ್ಭ॑ರತಿ॒ ಯದೇಕ॑ಮೇಕಗ್ಂ ಸ॒ಮ್ಭರೇ᳚ತ್-ಪಿತೃದೇವ॒ತ್ಯಾ॑ನಿ ಸ್ಯು॒ರ್ಯ-ಥ್ಸ॒ಹ ಸರ್ವಾ॑ಣಿ ಮಾನು॒ಷಾಣಿ॒ ದ್ವೇದ್ವೇ॒ ಸಮ್ಭ॑ರತಿ ಯಾಜ್ಯಾನುವಾ॒ಕ್ಯ॑ಯೋರೇ॒ವ ರೂ॒ಪ-ಙ್ಕ॑ರೋ॒ತ್ಯಥೋ॑ ಮಿಥು॒ನಮೇ॒ವಯೋ ವೈ ದಶ॑ ಯಜ್ಞಾಯು॒ಧಾನಿ॒ ವೇದ॑ ಮುಖ॒ತೋ᳚-ಽಸ್ಯ ಯ॒ಜ್ಞಃ ಕ॑ಲ್ಪತೇ॒ ಸ್ಫ್ಯ- [ಕ॑ಲ್ಪತೇ॒ ಸ್ಫ್ಯಃ, ಚ॒ ಕ॒ಪಾಲಾ॑ನಿ] 26
-ಶ್ಚ॑ ಕ॒ಪಾಲಾ॑ನಿ ಚಾಗ್ನಿಹೋತ್ರ॒ಹವ॑ಣೀ ಚ॒ ಶೂರ್ಪ॑-ಞ್ಚ ಕೃಷ್ಣಾಜಿ॒ನ-ಞ್ಚ॒ ಶಮ್ಯಾ॑ ಚೋ॒ಲೂಖ॑ಲ-ಞ್ಚ॒ ಮುಸ॑ಲ-ಞ್ಚ ದೃ॒ಷಚ್ಚೋಪ॑ಲಾ ಚೈ॒ತಾನಿ॒ ವೈ ದಶ॑ ಯಜ್ಞಾಯು॒ಧಾನಿ॒ ಯ ಏ॒ವಂ-ವೇಁದ॑ ಮುಖ॒ತೋ᳚-ಽಸ್ಯ ಯ॒ಜ್ಞಃ ಕ॑ಲ್ಪತೇ॒ ಯೋ ವೈ ದೇ॒ವೇಭ್ಯಃ॑ ಪ್ರತಿ॒ಪ್ರೋಚ್ಯ॑ ಯ॒ಜ್ಞೇನ॒ ಯಜ॑ತೇ ಜು॒ಷನ್ತೇ᳚-ಽಸ್ಯ ದೇ॒ವಾ ಹ॒ವ್ಯಗ್ಂ ಹ॒ವಿ-ರ್ನಿ॑ರು॒ಪ್ಯಮಾ॑ಣಮ॒ಭಿ ಮ॑ನ್ತ್ರಯೇತಾ॒-ಽಗ್ನಿಗ್ಂ ಹೋತಾ॑ರಮಿ॒ಹ ತಗ್ಂ ಹು॑ವ॒ ಇತಿ॑ [ ] 27
ದೇ॒ವೇಭ್ಯ॑ ಏ॒ವ ಪ್ರ॑ತಿ॒ಪ್ರೋಚ್ಯ॑ ಯ॒ಜ್ಞೇನ॑ ಯಜತೇ ಜು॒ಷನ್ತೇ᳚-ಽಸ್ಯ ದೇ॒ವಾ ಹ॒ವ್ಯಮೇ॒ಷ ವೈ ಯ॒ಜ್ಞಸ್ಯ॒ ಗ್ರಹೋ॑ ಗೃಹೀ॒ತ್ವೈವ ಯ॒ಜ್ಞೇನ॑ ಯಜತೇ॒ ತದು॑ದಿ॒ತ್ವಾ ವಾಚಂ॑-ಯಁಚ್ಛತಿ ಯ॒ಜ್ಞಸ್ಯ॒ ಧೃತ್ಯಾ॒ ಅಥೋ॒ ಮನ॑ಸಾ॒ ವೈ ಪ್ರ॒ಜಾಪ॑ತಿ-ರ್ಯ॒ಜ್ಞಮ॑ತನುತ॒ ಮನ॑ಸೈ॒ವ ತ-ದ್ಯ॒ಜ್ಞ-ನ್ತ॑ನುತೇ॒ ರಖ್ಷ॑ಸಾ॒-ಮನ॑ನ್ವವಚಾರಾಯ॒ ಯೋ ವೈ ಯ॒ಜ್ಞಂ-ಯೋಁಗ॒ ಆಗ॑ತೇ ಯು॒ನಕ್ತಿ॑ ಯು॒ಙ್ಕ್ತೇ ಯು॑ಞ್ಜಾ॒ನೇಷು॒ ಕಸ್ತ್ವಾ॑ ಯುನಕ್ತಿ॒ ಸ ತ್ವಾ॑ ಯುನ॒ಕ್ತ್ವಿ-( ) -ತ್ಯಾ॑ಹ ಪ್ರ॒ಜಾಪ॑ತಿ॒-ರ್ವೈ ಕಃ ಪ್ರ॒ಜಾಪ॑ತಿನೈ॒ವೈನಂ॑-ಯುಁನಕ್ತಿ ಯು॒ಙ್ಕ್ತೇ ಯು॑ಞ್ಜಾ॒ನೇಷು॑ ॥ 28 ॥
(ವೈಮ॒ನಃ-ಸ್ಫ್ಯ-ಇತಿ॑-ಯುನ॒ಕ್ತ್ವೇ-ಕಾ॑ದಶ ಚ) (ಅ. 8)
ಪ್ರ॒ಜಾಪ॑ತಿ-ರ್ಯ॒ಜ್ಞಾನ॑ಸೃಜತಾ-ಗ್ನಿಹೋ॒ತ್ರ-ಞ್ಚಾ᳚ಗ್ನಿಷ್ಟೋ॒ಮ-ಞ್ಚ॑ ಪೌರ್ಣಮಾ॒ಸೀ-ಞ್ಚೋ॒ಕ್ಥ್ಯ॑-ಞ್ಚಾಮಾವಾ॒ಸ್ಯಾ᳚-ಞ್ಚಾತಿರಾ॒ತ್ರ-ಞ್ಚ॒ ತಾನುದ॑ಮಿಮೀತ॒ ಯಾವ॑ದಗ್ನಿಹೋ॒ತ್ರ-ಮಾಸೀ॒-ತ್ತಾವಾ॑ನಗ್ನಿಷ್ಟೋ॒ಮೋ ಯಾವ॑ತೀ ಪೌರ್ಣಮಾ॒ಸೀ ತಾವಾ॑ನು॒ಕ್ಥ್ಯೋ॑ ಯಾವ॑ತ್ಯಮಾವಾ॒ಸ್ಯಾ॑ ತಾವಾ॑ನತಿರಾ॒ತ್ರೋ ಯ ಏ॒ವಂ-ವಿಁ॒ದ್ವಾನ॑ಗ್ನಿಹೋ॒ತ್ರ-ಞ್ಜು॒ಹೋತಿ॒ ಯಾವ॑ದಗ್ನಿಷ್ಟೋ॒ಮೇನೋ॑ ಪಾ॒ಪ್ನೋತಿ॒ ತಾವ॒ದುಪಾ᳚-ಽಽಪ್ನೋತಿ॒ ಯ ಏ॒ವಂ-ವಿಁ॒ದ್ವಾ-ನ್ಪೌ᳚ರ್ಣಮಾ॒ಸೀಂ-ಯಁಜ॑ತೇ॒ ಯಾವ॑ದು॒ಕ್ಥ್ಯೇ॑ನೋಪಾ॒ಪ್ನೋತಿ॒ [ಯಾವ॑ದು॒ಕ್ಥ್ಯೇ॑ನೋಪಾ॒ಪ್ನೋತಿ॑, ತಾವ॒ದುಪಾ᳚-ಽಽಪ್ನೋತಿ॒] 29
ತಾವ॒ದುಪಾ᳚-ಽಽಪ್ನೋತಿ॒ ಯ ಏ॒ವಂ-ವಿಁ॒ದ್ವಾನ॑ಮಾವಾ॒ಸ್ಯಾಂ᳚-ಯಁಜ॑ತೇ॒ ಯಾವ॑ದತಿರಾ॒ತ್ರೇಣೋ॑ಪಾ॒ಪ್ನೋತಿ॒ ತಾವ॒ದುಪಾ᳚-ಽಽಪ್ನೋತಿ ಪರಮೇ॒ಷ್ಠಿನೋ॒ ವಾ ಏ॒ಷ ಯ॒ಜ್ಞೋ-ಽಗ್ರ॑ ಆಸೀ॒-ತ್ತೇನ॒ ಸ ಪ॑ರ॒ಮಾ-ಙ್ಕಾಷ್ಠಾ॑ಮಗಚ್ಛ॒-ತ್ತೇನ॑ ಪ್ರ॒ಜಾಪ॑ತಿ-ನ್ನಿ॒ರವಾ॑ಸಾಯಯ॒-ತ್ತೇನ॑ ಪ್ರ॒ಜಾಪ॑ತಿಃ ಪರ॒ಮಾ-ಙ್ಕಾಷ್ಠಾ॑ಮಗಚ್ಛ॒-ತ್ತೇನೇನ್ದ್ರ॑-ನ್ನಿ॒ರವಾ॑ಸಾಯಯ॒-ತ್ತೇನೇನ್ದ್ರಃ॑ ಪರ॒ಮಾ-ಙ್ಕಾಷ್ಠಾ॑ಮಗಚ್ಛ॒-ತ್ತೇನಾ॒-ಽಗ್ನೀಷೋಮೌ॑ ನಿ॒ರವಾ॑ಸಾಯಯ॒-ತ್ತೇನಾ॒ಗ್ನೀಷೋಮೌ॑ ಪ॒ರಮಾ-ಙ್ಕಾಷ್ಠಾ॑ಮಗಚ್ಛತಾಂ॒-ಯಁ [ಕಾಷ್ಠಾ॑ಮಗಚ್ಛತಾಂ॒-ಯಃ, ಁಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ] 30
ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ ಪರ॒ಮಾಮೇ॒ವ ಕಾಷ್ಠಾ᳚-ಙ್ಗಚ್ಛತಿ॒ ಯೋ ವೈ ಪ್ರಜಾ॑ತೇನ ಯ॒ಜ್ಞೇನ॒ ಯಜ॑ತೇ॒ ಪ್ರ ಪ್ರ॒ಜಯಾ॑ ಪ॒ಶುಭಿ॑-ರ್ಮಿಥು॒ನೈ-ರ್ಜಾ॑ಯತೇ॒ ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರೋ ದ್ವಾದ॑ಶ ದ್ವ॒ನ್ದ್ವಾನಿ॑ ದರ್ಶಪೂರ್ಣಮಾ॒ಸಯೋ॒ಸ್ತಾನಿ॑ ಸ॒ಮ್ಪಾದ್ಯಾ॒ನೀತ್ಯಾ॑ಹು-ರ್ವ॒ಥ್ಸ-ಞ್ಚೋ॑ಪಾವಸೃ॒ಜತ್ಯು॒ಖಾ-ಞ್ಚಾಧಿ॑ ಶ್ರಯ॒ತ್ಯವ॑ ಚ॒ ಹನ್ತಿ॑ ದೃ॒ಷದೌ॑ ಚ ಸ॒ಮಾಹ॒ನ್ತ್ಯಧಿ॑ ಚ॒ ವಪ॑ತೇ ಕ॒ಪಾಲಾ॑ನಿ॒ ಚೋಪ॑ ದಧಾತಿ ಪುರೋ॒ಡಾಶ॑-ಞ್ಚಾ- [ಪುರೋ॒ಡಾಶ॑-ಞ್ಚ, ಅ॒ಧಿ॒ಶ್ರಯ॒ತ್ಯಾಜ್ಯ॑-ಞ್ಚ] 31
-ಽಧಿ॒ಶ್ರಯ॒ತ್ಯಾಜ್ಯ॑-ಞ್ಚ ಸ್ತಮ್ಬಯ॒ಜುಶ್ಚ॒ ಹರ॑ತ್ಯ॒ಭಿ ಚ॑ ಗೃಹ್ಣಾತಿ॒ ವೇದಿ॑-ಞ್ಚ ಪರಿ ಗೃ॒ಹ್ಣಾತಿ॒ ಪತ್ನೀ᳚-ಞ್ಚ॒ ಸನ್ನ॑ಹ್ಯತಿ॒ ಪ್ರೋಖ್ಷ॑ಣೀಶ್ಚಾ ಽಽಸಾ॒ದಯ॒ತ್ಯಾಜ್ಯ॑-ಞ್ಚೈ॒ತಾನಿ॒ ವೈ ದ್ವಾದ॑ಶ ದ್ವ॒ನ್ದ್ವಾನಿ॑ ದರ್ಶಪೂರ್ಣಮಾ॒ಸಯೋ॒ಸ್ತಾನಿ॒ ಯ ಏ॒ವಗ್ಂ ಸ॒ಮ್ಪಾದ್ಯ॒ ಯಜ॑ತೇ॒ ಪ್ರಜಾ॑ತೇನೈ॒ವ ಯ॒ಜ್ಞೇನ॑ ಯಜತೇ॒ ಪ್ರ ಪ್ರ॒ಜಯಾ॑ ಪ॒ಶುಭಿ॑-ರ್ಮಿಥು॒ನೈ-ರ್ಜಾ॑ಯತೇ ॥ 32 ॥
(ಉ॒ಕ್ಥ್ಯೇ॑ನೋಪಾ॒ಪ್ನೋತ್ಯ॑-ಗಚ್ಛತಾಂ॒-ಯಃ ಁ- ಪು॑ರೋ॒ಡಾಶಂ॑-ಚತ್ವಾರಿ॒ಗ್ಂ॒ಶಚ್ಚ॑) (ಅ. 9)
ಧ್ರು॒ವೋ॑-ಽಸಿ ಧ್ರು॒ವೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ॒ಮಿತ್ಯಾ॑ಹ ಧ್ರು॒ವಾನೇ॒ವೈನಾ᳚ನ್ ಕುರುತ ಉ॒ಗ್ರೋ᳚-ಽಸ್ಯು॒ಗ್ರೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ॒-ಮಿತ್ಯಾ॒ಹಾಪ್ರ॑ತಿವಾದಿನ ಏ॒ವೈನಾ᳚ನ್ ಕುರುತೇ-ಽಭಿ॒ಭೂರ॑ಸ್ಯಭಿ॒ಭೂರ॒ಹಗ್ಂ ಸ॑ಜಾ॒ತೇಷು॑ ಭೂಯಾಸ॒ಮಿತ್ಯಾ॑ಹ॒ ಯ ಏ॒ವೈನ॑-ಮ್ಪ್ರತ್ಯು॒ತ್ಪಿಪೀ॑ತೇ॒ ತಮುಪಾ᳚ಸ್ಯತೇ ಯು॒ನಜ್ಮಿ॑ ತ್ವಾ॒ ಬ್ರಹ್ಮ॑ಣಾ॒ ದೈವ್ಯೇ॒ನೇತ್ಯಾ॑ಹೈ॒ಷ ವಾಅ॒ಗ್ನೇರ್ಯೋಗ॒ಸ್ತೇನೈ॒ – [ವಾಅ॒ಗ್ನೇರ್ಯೋಗ॒ಸ್ತೇನ॑, ಏ॒ವೈನಂ॑-ಯುಁನಕ್ತಿ] 33
ವೈನಂ॑-ಯುಁನಕ್ತಿ ಯ॒ಜ್ಞಸ್ಯ॒ ವೈ ಸಮೃ॑ದ್ಧೇನ ದೇ॒ವಾ-ಸ್ಸು॑ವ॒ರ್ಗಂ-ಲೋಁ॒ಕಮಾ॑ಯನ್. ಯ॒ಜ್ಞಸ್ಯ॒ ವ್ಯೃ॑ದ್ಧೇ॒ನಾಸು॑ರಾ॒-ನ್ಪರಾ॑ಭಾವಯ॒ನ್. ಯನ್ಮೇ॑ ಅಗ್ನೇ ಅ॒ಸ್ಯ ಯ॒ಜ್ಞಸ್ಯ॒ ರಿಷ್ಯಾ॒ದಿತ್ಯಾ॑ಹ ಯ॒ಜ್ಞಸ್ಯೈ॒ವ ತಥ್ಸಮೃ॑ದ್ಧೇನ॒ ಯಜ॑ಮಾನ-ಸ್ಸುವ॒ರ್ಗಂ-ಲೋಁ॒ಕಮೇ॑ತಿ ಯ॒ಜ್ಞಸ್ಯ॒ ವ್ಯೃ॑ದ್ಧೇನ॒ ಭ್ರಾತೃ॑ವ್ಯಾ॒-ನ್ಪರಾ॑ ಭಾವಯತ್ಯಗ್ನಿಹೋ॒ತ್ರ-ಮೇ॒ತಾಭಿ॒-ರ್ವ್ಯಾಹೃ॑ತೀಭಿ॒ರುಪ॑ ಸಾದಯೇದ್ಯಜ್ಞಮು॒ಖಂ-ವಾಁ ಅ॑ಗ್ನಿಹೋ॒ತ್ರ-ಮ್ಬ್ರಹ್ಮೈ॒ತಾ ವ್ಯಾಹೃ॑ತಯೋ ಯಜ್ಞಮು॒ಖ ಏ॒ವ ಬ್ರಹ್ಮ॑ – [ಬ್ರಹ್ಮ॑, ಕು॒ರು॒ತೇ॒ ಸಂ॒ವಁ॒ಥ್ಸ॒ರೇ] 34
ಕುರುತೇ ಸಂವಁಥ್ಸ॒ರೇ ಪ॒ರ್ಯಾಗ॑ತ ಏ॒ತಾಭಿ॑ರೇ॒ವೋಪ॑ ಸಾದಯೇ॒-ದ್ಬ್ರಹ್ಮ॑ಣೈ॒ವೋಭ॒ಯತ॑-ಸ್ಸಂವಁಥ್ಸ॒ರ-ಮ್ಪರಿ॑ ಗೃಹ್ಣಾತಿ ದರ್ಶಪೂರ್ಣಮಾ॒ಸೌ ಚಾ॑ತುರ್ಮಾ॒ಸ್ಯಾನ್ಯಾ॒ಲಭ॑ಮಾನ ಏ॒ತಾಭಿ॒-ರ್ವ್ಯಾಹೃ॑ತೀಭಿರ್-ಹ॒ವೀಗ್ಷ್ಯಾಸಾ॑ದಯೇ-ದ್ಯಜ್ಞಮು॒ಖಂ-ವೈಁ ದ॑ರ್ಶಪೂರ್ಣಮಾ॒ಸೌ ಚಾ॑ತುರ್ಮಾ॒ಸ್ಯಾನಿ॒ ಬ್ರಹ್ಮೈ॒ತಾ ವ್ಯಾಹೃ॑ತಯೋ ಯಜ್ಞಮು॒ಖ ಏ॒ವ ಬ್ರಹ್ಮ॑ ಕುರುತೇ ಸಂವಁಥ್ಸ॒ರೇ ಪ॒ರ್ಯಾಗ॑ತ ಏ॒ತಾಭಿ॑ರೇ॒ವಾಸಾ॑ದಯೇ॒-ದ್ಬ್ರಹ್ಮ॑ಣೈ॒ವೋಭ॒ಯತ॑-ಸ್ಸಂವಁಥ್ಸ॒ರ-ಮ್ಪರಿ॑ಗೃಹ್ಣಾತಿ॒ ಯದ್ವೈ ಯ॒ಜ್ಞಸ್ಯ॒ ಸಾಮ್ನಾ᳚ ಕ್ರಿ॒ಯತೇ॑ ರಾ॒ಷ್ಟ್ರಂ- [ರಾ॒ಷ್ಟ್ರಮ್, ಯ॒ಜ್ಞಸ್ಯಾ॒-ಶೀರ್ಗ॑ಚ್ಛತಿ॒] 35
-ಯಁ॒ಜ್ಞಸ್ಯಾ॒-ಶೀರ್ಗ॑ಚ್ಛತಿ॒ ಯದೃ॒ಚಾ ವಿಶಂ॑-ಯಁ॒ಜ್ಞಸ್ಯಾ॒- ಶೀರ್ಗ॑ಚ್ಛ॒ತ್ಯಥ॑ ಬ್ರಾಹ್ಮ॒ಣೋ॑-ಽನಾ॒ಶೀರ್ಕೇ॑ಣ ಯ॒ಜ್ಞೇನ॑ ಯಜತೇ ಸಾಮಿಧೇ॒ನೀ-ರ॑ನುವ॒ಖ್ಷ್ಯನ್ನೇ॒ತಾ ವ್ಯಾಹೃ॑ತೀಃ ಪು॒ರಸ್ತಾ᳚ದ್ದದ್ಧ್ಯಾ॒-ದ್ಬ್ರಹ್ಮೈ॒ವ ಪ್ರ॑ತಿ॒ಪದ॑-ಙ್ಕುರುತೇ॒ ತಥಾ᳚ ಬ್ರಾಹ್ಮ॒ಣ-ಸ್ಸಾಶೀ᳚ರ್ಕೇಣ ಯ॒ಜ್ಞೇನ॑ ಯಜತೇ॒ ಯ-ಙ್ಕಾ॒ಮಯೇ॑ತ॒ ಯಜ॑ಮಾನ॒-ಮ್ಭ್ರಾತೃ॑ವ್ಯಮಸ್ಯ ಯ॒ಜ್ಞಸ್ಯಾ॒ಶೀರ್ಗ॑ಚ್ಛೇ॒ದಿತಿ॒ ತಸ್ಯೈ॒ತಾ ವ್ಯಾಹೃ॑ತೀಃ ಪುರೋನುವಾ॒ಕ್ಯಾ॑ಯಾ-ನ್ದದ್ಧ್ಯಾ-ದ್ಭ್ರಾತೃವ್ಯದೇವ॒ತ್ಯಾ॑ ವೈ ಪು॑ರೋನುವಾ॒ಕ್ಯಾ᳚ ಭ್ರಾತೃ॑ವ್ಯಮೇ॒ವಾಸ್ಯ॑ ಯ॒ಜ್ಞಸ್ಯಾ॒-[ಯ॒ಜ್ಞಸ್ಯಾ॑, ಆ॒ಶೀರ್ಗ॑ಚ್ಛತಿ॒] 36
-ಽಽಶೀರ್ಗ॑ಚ್ಛತಿ॒ ಯಾನ್ ಕಾ॒ಮಯೇ॑ತ॒ ಯಜ॑ಮಾನಾನ್-ಥ್ಸ॒ಮಾವ॑ತ್ಯೇನಾನ್ ಯ॒ಜ್ಞಸ್ಯಾ॒ ಽಽಶೀರ್ಗ॑ಚ್ಛೇ॒ದಿತಿ॒ ತೇಷಾ॑ಮೇ॒ತಾ ವ್ಯಾಹೃ॑ತೀಃ ಪುರೋನುವಾ॒ಕ್ಯಾ॑ಯಾ ಅರ್ಧ॒ರ್ಚ ಏಕಾ᳚-ನ್ದದ್ಧ್ಯಾ-ದ್ಯಾ॒ಜ್ಯಾ॑ಯೈ ಪು॒ರಸ್ತಾ॒ದೇಕಾಂ᳚-ಯಾಁ॒ಜ್ಯಾ॑ಯಾ ಅರ್ಧ॒ರ್ಚ ಏಕಾ॒-ನ್ತಥೈ॑ನಾನ್-ಥ್ಸ॒ಮಾವ॑ತೀ ಯ॒ಜ್ಞಸ್ಯಾ॒ ಽಽಶೀರ್ಗ॑ಚ್ಛತಿ॒ ಯಥಾ॒ ವೈ ಪ॒ರ್ಜನ್ಯ॒-ಸ್ಸುವೃ॑ಷ್ಟಂ॒-ವಁರ್ಷ॑ತ್ಯೇ॒ವಂ-ಯಁ॒ಜ್ಞೋ ಯಜ॑ಮಾನಾಯ ವರ್ಷತಿ॒ ಸ್ಥಲ॑ಯೋದ॒ಕ-ಮ್ಪ॑ರಿಗೃ॒ಹ್ಣನ್ತ್ಯಾ॒ಶಿಷಾ॑ ಯ॒ಜ್ಞಂ-ಯಁಜ॑ಮಾನಃ॒ ಪರಿ॑ ಗೃಹ್ಣಾತಿ॒ ಮನೋ॑-ಽಸಿ ಪ್ರಾಜಾಪ॒ತ್ಯಂ- [ಪ್ರಾಜಾಪ॒ತ್ಯಮ್, ಮನ॑ಸಾ] 37
-ಮನ॑ಸಾ ಮಾ ಭೂ॒ತೇನಾ-ಽಽವಿ॒ಶೇತ್ಯಾ॑ಹ॒ ಮನೋ॒ ವೈ ಪ್ರಾ॑ಜಾಪ॒ತ್ಯ-ಮ್ಪ್ರಾ॑ಜಾಪ॒ತ್ಯೋ ಯ॒ಜ್ಞೋ ಮನ॑ ಏ॒ವ ಯ॒ಜ್ಞಮಾ॒ತ್ಮ-ನ್ಧ॑ತ್ತೇ॒ ವಾಗ॑ಸ್ಯೈ॒ನ್ದ್ರೀ ಸ॑ಪತ್ನ॒ಖ್ಷಯ॑ಣೀ ವಾ॒ಚಾ ಮೇ᳚ನ್ದ್ರಿ॒ಯೇಣಾ-ಽಽವಿ॒ಶೇತ್ಯಾ॑ಹೈ॒ನ್ದ್ರೀ ವೈ ವಾಗ್ವಾಚ॑-ಮೇ॒ವೈನ್ದ್ರೀ- ಮಾ॒ತ್ಮ-ನ್ಧ॑ತ್ತೇ ॥ 38 ॥
(ತೇನೈ॒-ವ ಬ್ರಹ್ಮ॑- ರಾ॒ಷ್ಟ್ರಮೇ॒-ವಾಸ್ಯ॑ ಯ॒ಜ್ಞಸ್ಯ॑-ಪ್ರಾಜಾಪ॒ತ್ಯಗ್ಂ-ಷಟ್ತ್ರಿಗ್ಂ॑ಶಚ್ಚ) (ಅ. 10)
ಯೋ ವೈ ಸ॑ಪ್ತದ॒ಶ-ಮ್ಪ್ರ॒ಜಾಪ॑ತಿಂ-ಯಁ॒ಜ್ಞಮ॒ನ್ವಾಯ॑ತ್ತಂ॒-ವೇಁದ॒ ಪ್ರತಿ॑ ಯ॒ಜ್ಞೇನ॑ ತಿಷ್ಠತಿ॒ ನ ಯ॒ಜ್ಞಾ-ದ್ಭ್ರಗ್ಂ॑ಶತ॒ ಆ ಶ್ರಾ॑ವ॒ಯೇತಿ॒ ಚತು॑ರಖ್ಷರ॒ಮಸ್ತು॒ ಶ್ರೌಷ॒ಡಿತಿ॒ ಚತು॑ರಖ್ಷರಂ॒-ಯಁಜೇತಿ॒ ದ್ವ್ಯ॑ಖ್ಷರಂ॒-ಯೇಁ ಯಜಾ॑ಮಹ॒ ಇತಿ॒ ಪಞ್ಚಾ᳚ಖ್ಷರ-ನ್ದ್ವ್ಯಖ್ಷ॒ರೋ ವ॑ಷಟ್ಕಾ॒ರ ಏ॒ಷ ವೈ ಸ॑ಪ್ತದ॒ಶಃ ಪ್ರ॒ಜಾಪ॑ತಿ-ರ್ಯ॒ಜ್ಞಮ॒ನ್ವಾಯ॑ತ್ತೋ॒ ಯ ಏ॒ವಂ-ವೇಁದ॒ ಪ್ರತಿ॑ ಯ॒ಜ್ಞೇನ॑ ತಿಷ್ಠತಿ॒ ನ ಯ॒ಜ್ಞಾದ್- ಭ್ರಗ್ಂ॑ಶತೇ॒ ಯೋ ವೈ ಯ॒ಜ್ಞಸ್ಯ॒ ಪ್ರಾಯ॑ಣ-ಮ್ಪ್ರತಿ॒ಷ್ಠಾ- [ಪ್ರತಿ॒ಷ್ಠಾಮ್, ಉ॒ದಯ॑ನಂ॒-ವೇಁದ॒] 39
ಮು॒ದಯ॑ನಂ॒-ವೇಁದ॒ ಪ್ರತಿ॑ಷ್ಠಿತೇ॒ನಾರಿ॑ಷ್ಟೇನ ಯ॒ಜ್ಞೇನ॑ ಸ॒ಗ್ಗ್॒ಸ್ಥಾ-ಙ್ಗ॑ಚ್ಛ॒ತ್ಯಾಶ್ರಾ॑ವ॒ಯಾಸ್ತು॒ ಶ್ರೌಷ॒ಡ್ಯಜ॒ ಯೇ ಯಜಾ॑ಮಹೇ ವಷಟ್ಕಾ॒ರ ಏ॒ತದ್ವೈ ಯ॒ಜ್ಞಸ್ಯ॒ ಪ್ರಾಯ॑ಣಮೇ॒ಷಾ ಪ್ರ॑ತಿ॒ಷ್ಠೈತದು॒ದಯ॑ನಂ॒-ಯಁ ಏ॒ವಂ-ವೇಁದ॒ ಪ್ರತಿ॑ಷ್ಠಿತೇ॒ನಾ-ಽರಿ॑ಷ್ಟೇನ ಯ॒ಜ್ಞೇನ॑ ಸ॒ಗ್ಗ್॒ಸ್ಥಾ-ಙ್ಗ॑ಚ್ಛತಿ॒ ಯೋ ವೈ ಸೂ॒ನೃತಾ॑ಯೈ॒ ದೋಹಂ॒-ವೇಁದ॑ ದು॒ಹ ಏ॒ವೈನಾಂ᳚-ಯಁ॒ಜ್ಞೋ ವೈ ಸೂ॒ನೃತಾ ಽಽ ಶ್ರಾ॑ವ॒ಯೇತ್ಯೈವೈನಾ॑-ಮಹ್ವ॒ದಸ್ತು॒ [-ಮಹ್ವ॒ದಸ್ತು॑, ಶ್ರೌಷ॒ಡಿತ್ಯು॒ಪಾವಾ᳚ಸ್ರಾ॒-] 40
ಶ್ರೌಷ॒ಡಿತ್ಯು॒ಪಾವಾ᳚ಸ್ರಾ॒-ಗ್ಯಜೇತ್ಯುದ॑ನೈಷೀ॒ದ್ಯೇ ಯಜಾ॑ಮಹ॒ ಇತ್ಯುಪಾ॑-ಽಸದ-ದ್ವಷಟ್ಕಾ॒ರೇಣ॑ ದೋಗ್ದ್ಧ್ಯೇ॒ಷ ವೈ ಸೂ॒ನೃತಾ॑ಯೈ॒ ದೋಹೋ॒ ಯ ಏ॒ವಂ-ವೇಁದ॑ ದು॒ಹ ಏ॒ವೈನಾ᳚-ನ್ದೇ॒ವಾ ವೈ ಸ॒ತ್ರಮಾ॑ಸತ॒ ತೇಷಾ॒-ನ್ದಿಶೋ॑-ಽದಸ್ಯ॒ನ್ತ ಏ॒ತಾಮಾ॒ರ್ದ್ರಾ-ಮ್ಪ॒ಙ್ಕ್ತಿಮ॑ಪಶ್ಯ॒ನ್ನಾ ಶ್ರಾ॑ವ॒ಯೇತಿ॑ ಪುರೋವಾ॒ತ-ಮ॑ಜನಯ॒ನ್ನಸ್ತು॒ ಶ್ರೌಷ॒ಡಿತ್ಯ॒ಭ್ರಗ್ಂ ಸಮ॑ಪ್ಲಾವಯ॒ನ್॒. ಯಜೇತಿ॑ ವಿ॒ದ್ಯುತ॑- [ವಿ॒ದ್ಯುತ॑ಮ್, ಅ॒ಜ॒ನ॒ಯ॒ನ್॒ ಯೇ] 41
ಮಜನಯ॒ನ್॒ ಯೇ ಯಜಾ॑ಮಹ॒ ಇತಿ॒ ಪ್ರಾವ॑ರ್ಷಯನ್ನ॒ಭ್ಯ॑ಸ್ತನಯನ್ ವಷಟ್ಕಾ॒ರೇಣ॒ ತತೋ॒ ವೈ ತೇಭ್ಯೋ॒ ದಿಶಃ॒ ಪ್ರಾಪ್ಯಾ॑ಯನ್ತ॒ ಯ ಏ॒ವಂ-ವೇಁದ॒ ಪ್ರಾಸ್ಮೈ॒ ದಿಶಃ॑ ಪ್ಯಾಯನ್ತೇ ಪ್ರ॒ಜಾಪ॑ತಿ-ನ್ತ್ವೋ॒ವೇದ॑ ಪ್ರ॒ಜಾಪ॑ತಿ ಸ್ತ್ವಂವೇಁದ॒ ಯ-ಮ್ಪ್ರ॒ಜಾಪ॑ತಿ॒-ರ್ವೇದ॒ ಸ ಪುಣ್ಯೋ॑ ಭವತ್ಯೇ॒ಷ ವೈ ಛ॑ನ್ದ॒ಸ್ಯಃ॑ ಪ್ರ॒ಜಾಪ॑ತಿ॒ರಾ ಶ್ರಾ॑ವ॒ಯಾ-ಽಸ್ತು॒ ಶ್ರೌಷ॒ಡ್ಯಜ॒ ಯೇ ಯಜಾ॑ಮಹೇ ವಷಟ್ಕಾ॒ರೋ ಯ ಏ॒ವಂ-ವೇಁದ॒ ಪುಣ್ಯೋ॑ ಭವತಿ ವಸ॒ನ್ತ- [ವಸ॒ನ್ತಮ್, ಋ॒ತೂ॒ನಾಂ] 42
-ಮೃ॑ತೂ॒ನಾ-ಮ್ಪ್ರೀ॑ಣಾ॒ಮೀತ್ಯಾ॑ಹ॒ರ್ತವೋ॒ ವೈ ಪ್ರ॑ಯಾ॒ಜಾ ಋ॒ತೂನೇ॒ವ ಪ್ರೀ॑ಣಾತಿ॒ ತೇ᳚-ಽಸ್ಮೈ ಪ್ರೀ॒ತಾ ಯ॑ಥಾಪೂ॒ರ್ವ-ಙ್ಕ॑ಲ್ಪನ್ತೇ॒ ಕಲ್ಪ॑ನ್ತೇ-ಽಸ್ಮಾ ಋ॒ತವೋ॒ ಯ ಏ॒ವಂ-ವೇಁದಾ॒ಗ್ನೀಷೋಮ॑ಯೋರ॒ಹ-ನ್ದೇ॑ವಯ॒ಜ್ಯಯಾ॒ ಚಖ್ಷು॑ಷ್ಮಾ-ನ್ಭೂಯಾಸ॒ಮಿತ್ಯಾ॑-ಹಾ॒ಗ್ನೀಷೋಮಾ᳚ಭ್ಯಾಂ॒-ವೈಁ ಯ॒ಜ್ಞಶ್ಚಖ್ಷು॑ಷ್ಮಾ॒-ನ್ತಾಭ್ಯಾ॑ಮೇ॒ವ ಚಖ್ಷು॑ರಾ॒ತ್ಮ-ನ್ಧ॑ತ್ತೇ॒ ಽಗ್ನೇರ॒ಹ-ನ್ದೇ॑ವಯ॒ಜ್ಯಯಾ᳚-ಽನ್ನಾ॒ದೋ ಭೂ॑ಯಾಸ॒ಮಿತ್ಯಾ॑ಹಾ॒ಗ್ನಿರ್ವೈ ದೇ॒ವಾನಾ॑-ಮನ್ನಾ॒ದಸ್ತೇ ನೈ॒ವಾ- [ಮನ್ನಾ॒ದಸ್ತೇ ನೈ॒ವಾ, ಅ॒ನ್ನಾದ್ಯ॑ಮಾ॒ತ್ಮನ್] 43
-ಽನ್ನಾದ್ಯ॑ಮಾ॒ತ್ಮ-ನ್ಧ॑ತ್ತೇ॒ ದಬ್ಧಿ॑ರ॒ಸ್ಯದ॑ಬ್ಧೋ ಭೂಯಾಸಮ॒ಮು-ನ್ದ॑ಭೇಯ॒ಮಿತ್ಯಾ॑ಹೈ॒ತಯಾ॒ ವೈ ದಬ್ದ್ಧ್ಯಾ॑ ದೇ॒ವಾ ಅಸು॑ರಾನದಭ್ನುವ॒ನ್ತಯೈ॒ವ ಭ್ರಾತೃ॑ವ್ಯ-ನ್ದಭ್ನೋತ್ಯ॒ಗ್ನೀಷೋಮ॑ಯೋರ॒ಹ-ನ್ದೇ॑ವಯ॒ಜ್ಯಯಾ॑ ವೃತ್ರ॒ಹಾ ಭೂ॑ಯಾಸ॒ಮಿತ್ಯಾ॑ಹಾ॒-ಽಗ್ನೀಷೋಮಾ᳚ಭ್ಯಾಂ॒-ವಾಁ ಇನ್ದ್ರೋ॑ ವೃ॒ತ್ರಮ॑ಹ॒ನ್ತಾಭ್ಯಾ॑ಮೇ॒ವ ಭ್ರಾತೃ॑ವ್ಯಗ್ಗ್ ಸ್ತೃಣುತ ಇನ್ದ್ರಾಗ್ನಿ॒ಯೋರ॒ಹ-ನ್ದೇ॑ವಯ॒ಜ್ಯಯೇ᳚ನ್ದ್ರಿಯಾ॒ವ್ಯ॑ನ್ನಾ॒ದೋ ಭೂ॑ಯಾಸ॒ಮಿತ್ಯಾ॑ಹೇನ್ದ್ರಿಯಾ॒ವ್ಯೇ॑ವಾನ್ನಾ॒ದೋ ಭ॑ವ॒ತೀನ್ದ್ರ॑ಸ್ಯಾ॒- [ಭ॑ವ॒ತೀನ್ದ್ರ॑ಸ್ಯ, ಅ॒ಹ-ನ್ದೇ॑ವಯ॒ಜ್ಯಯೇ᳚ನ್ದ್ರಿಯಾ॒ವೀ] 44
-ಽಹ-ನ್ದೇ॑ವಯ॒ಜ್ಯಯೇ᳚ನ್ದ್ರಿಯಾ॒ವೀ ಭೂ॑ಯಾಸ॒ಮಿತ್ಯಾ॑ಹೇನ್ದ್ರಿಯಾ॒ವ್ಯೇ॑ವ ಭ॑ವತಿ ಮಹೇ॒ನ್ದ್ರಸ್ಯಾ॒-ಽಹ-ನ್ದೇ॑ವಯ॒ಜ್ಯಯಾ॑ ಜೇ॒ಮಾನ॑-ಮ್ಮಹಿ॒ಮಾನ॑-ಙ್ಗಮೇಯ॒ಮಿತ್ಯಾ॑ಹ ಜೇ॒ಮಾನ॑ಮೇ॒ವ ಮ॑ಹಿ॒ಮಾನ॑-ಙ್ಗಚ್ಛತ್ಯ॒ಗ್ನೇ-ಸ್ಸ್ವಿ॑ಷ್ಟ॒ಕೃತೋ॒-ಽಹ-ನ್ದೇ॑ವಯ॒ಜ್ಯಯಾ ಽಽಯು॑ಷ್ಮಾನ್. ಯ॒ಜ್ಞೇನ॑ ಪ್ರತಿ॒ಷ್ಠಾ-ಙ್ಗ॑ಮೇಯ॒ಮಿತ್ಯಾ॒-ಹಾಯು॑ರೇ॒ವಾತ್ಮ-ನ್ಧ॑ತ್ತೇ॒ ಪ್ರತಿ॑ ಯ॒ಜ್ಞೇನ॑ -ತಿಷ್ಠತಿ ॥ 45 ॥
( ಪ್ರ॒ತಿ॒ಷ್ಠಾ-ಮ॑ಹ್ವ॒ದಸ್ತು॑-ವಿ॒ದ್ಯುತಂ॑ವಁಸ॒ನ್ತನ್-ತೇನೈ॒ವೇ-ನ್ದ್ರ॑ಸ್ಯಾ॒-ಽಷ್ಟಾತ್ರಿಗ್ಂ॑ಶಚ್ಚ) (ಅ. 11)
ಇನ್ದ್ರಂ॑-ವೋಁ ವಿ॒ಶ್ವತ॒ಸ್ಪರಿ॒ ಹವಾ॑ಮಹೇ॒ ಜನೇ᳚ಭ್ಯಃ । ಅ॒ಸ್ಮಾಕ॑ಮಸ್ತು॒ ಕೇವ॑ಲಃ ॥ ಇನ್ದ್ರ॒-ನ್ನರೋ॑ ನೇ॒ಮಧಿ॑ತಾ ಹವನ್ತೇ॒ ಯತ್ಪಾರ್ಯಾ॑ ಯು॒ನಜ॑ತೇ॒ ಧಿಯ॒ಸ್ತಾಃ । ಶೂರೋ॒ ನೃಷಾ॑ತಾ॒ ಶವ॑ಸಶ್ಚಕಾ॒ನ ಆ ಗೋಮ॑ತಿ ವ್ರ॒ಜೇ ಭ॑ಜಾ॒ ತ್ವನ್ನಃ॑ ॥ ಇ॒ನ್ದ್ರಿ॒ಯಾಣಿ॑ ಶತಕ್ರತೋ॒ ಯಾ ತೇ॒ ಜನೇ॑ಷು ಪ॒ಞ್ಚಸು॑ ॥ ಇನ್ದ್ರ॒ ತಾನಿ॑ ತ॒ ಆ ವೃ॑ಣೇ ॥ ಅನು॑ ತೇ ದಾಯಿ ಮ॒ಹ ಇ॑ನ್ದ್ರಿ॒ಯಾಯ॑ ಸ॒ತ್ರಾ ತೇ॒ ವಿಶ್ವ॒ಮನು॑ ವೃತ್ರ॒ಹತ್ಯೇ᳚ । ಅನು॑ [ ] 46
ಖ್ಷ॒ತ್ರಮನು॒ ಸಹೋ॑ ಯಜ॒ತ್ರೇನ್ದ್ರ॑ ದೇ॒ವೇಭಿ॒ರನು॑ ತೇ ನೃ॒ಷಹ್ಯೇ᳚ ॥ ಆಯಸ್ಮಿ᳚ನ್-ಥ್ಸ॒ಪ್ತವಾ॑ಸ॒ವಾ ಸ್ತಿಷ್ಠ॑ನ್ತಿ ಸ್ವಾ॒ರುಹೋ॑ ಯಥಾ । ಋಷಿ॑ರ್ಹ ದೀರ್ಘ॒ಶ್ರುತ್ತ॑ಮ॒ ಇನ್ದ್ರ॑ಸ್ಯ ಘ॒ರ್ಮೋ ಅತಿ॑ಥಿಃ ॥ ಆ॒ಮಾಸು॑ ಪ॒ಕ್ವಮೈರ॑ಯ॒ ಆ ಸೂರ್ಯಗ್ಂ॑ ರೋಹಯೋ ದಿ॒ವಿ । ಘ॒ರ್ಮ-ನ್ನ ಸಾಮ॑-ನ್ತಪತಾ ಸುವೃ॒ಕ್ತಿಭಿ॒-ರ್ಜುಷ್ಟ॒-ಙ್ಗಿರ್ವ॑ಣಸೇ॒ ಗಿರಃ॑ ॥ ಇನ್ದ್ರ॒ಮಿ-ದ್ಗಾ॒ಥಿನೋ॑ ಬೃ॒ಹದಿನ್ದ್ರ॑-ಮ॒ರ್ಕೇಭಿ॑-ರ॒ರ್ಕಿಣಃ॑ । ಇನ್ದ್ರಂ॒-ವಾಁಣೀ॑ರನೂಷತ ॥ ಗಾಯ॑ನ್ತಿ ತ್ವಾ ಗಾಯ॒ತ್ರಿಣೋ- [ಗಾಯ॒ತ್ರಿಣಃ॑, ಅರ್ಚ॑ನ್ತ್ಯ॒ರ್ಕ-ಮ॒ರ್ಕಿಣಃ॑ ।] 47
-ಽರ್ಚ॑ನ್ತ್ಯ॒ರ್ಕ-ಮ॒ರ್ಕಿಣಃ॑ । ಬ್ರ॒ಹ್ಮಾಣ॑ಸ್ತ್ವಾ ಶತಕ್ರತ॒ವು-ದ್ವ॒ಗ್ಂ॒ಶ-ಮಿ॑ವ ಯೇಮಿರೇ ॥ ಅ॒ಗ್ಂ॒ಹೋ॒ಮುಚೇ॒ ಪ್ರ ಭ॑ರೇಮಾ ಮನೀ॒ಷಾಮೋ॑ಷಿಷ್ಠ॒ದಾವಂನೇ॑ ಸುಮ॒ತಿ-ಙ್ಗೃ॑ಣಾ॒ನಾಃ । ಇ॒ದಮಿ॑ನ್ದ್ರ॒ ಪ್ರತಿ॑ ಹ॒ವ್ಯ-ಙ್ಗೃ॑ಭಾಯ ಸ॒ತ್ಯಾ-ಸ್ಸ॑ನ್ತು॒ ಯಜ॑ಮಾನಸ್ಯ॒ ಕಾಮಾಃ᳚ ॥ ವಿ॒ವೇಷ॒ ಯನ್ಮಾ॑ ಧಿ॒ಷಣಾ॑ ಜ॒ಜಾನ॒ ಸ್ತವೈ॑ ಪು॒ರಾ ಪಾರ್ಯಾ॒ದಿನ್ದ್ರ॒-ಮಹ್ನಃ॑ । ಅಗ್ಂಹ॑ಸೋ॒ ಯತ್ರ॑ ಪೀ॒ಪರ॒ದ್ಯಥಾ॑ ನೋ ನಾ॒ವೇವ॒ ಯಾನ್ತ॑ ಮು॒ಭಯೇ॑ ಹವನ್ತೇ ॥ ಪ್ರ ಸ॒ಮ್ರಾಜ॑-ಮ್ಪ್ರಥ॒ಮ-ಮ॑ದ್ಧ್ವ॒ರಾಣಾ॑- [ಮ॑ದ್ಧ್ವ॒ರಾಣಾ᳚ಮ್, ಅ॒ಗ್ಂ॒ಹೋ॒ಮುಚಂ॑] 48
-ಮಗ್ಂಹೋ॒ಮುಚಂ॑-ವೃಁಷ॒ಭಂ-ಯಁ॒ಜ್ಞಿಯಾ॑ನಾಮ್ । ಅ॒ಪಾ-ನ್ನಪಾ॑ತಮಶ್ವಿನಾ॒ ಹಯ॑ನ್ತ-ಮ॒ಸ್ಮಿನ್ನ॑ರ ಇನ್ದ್ರಿ॒ಯ-ನ್ಧ॑ತ್ತ॒ಮೋಜಃ॑ ॥ ವಿ ನ॑ ಇನ್ದ್ರ॒ ಮೃಧೋ॑ ಜಹಿ ನೀ॒ಚಾ ಯ॑ಚ್ಛ ಪೃತನ್ಯ॒ತಃ । ಅ॒ಧ॒ಸ್ಪ॒ದ-ನ್ತಮೀ᳚-ಙ್ಕೃಧಿ॒ ಯೋ ಅ॒ಸ್ಮಾಗ್ಂ ಅ॑ಭಿ॒ದಾಸ॑ತಿ ॥ ಇನ್ದ್ರ॑ ಖ್ಷ॒ತ್ರಮ॒ಭಿ ವಾ॒ಮಮೋಜೋ ಽಜಾ॑ಯಥಾ ವೃಷಭ ಚರ್ಷಣೀ॒ನಾಮ್ । ಅಪಾ॑ನುದೋ॒ ಜನ॑-ಮಮಿತ್ರ॒ಯನ್ತ॑-ಮು॒ರು-ನ್ದೇ॒ವೇಭ್ಯೋ॑ ಅಕೃಣೋ-ರು ಲೋ॒ಕಮ್ ॥ ಮೃ॒ಗೋ ನ ಭೀ॒ಮಃ ಕು॑ಚ॒ರೋ ಗಿ॑ರಿ॒ಷ್ಠಾಃ ಪ॑ರಾ॒ವತ [ಪ॑ರಾ॒ವತಃ॑, ಆ ಜ॑ಗಾಮಾ॒ ಪರ॑ಸ್ಯಾಃ ।] 49
ಆ ಜ॑ಗಾಮಾ॒ ಪರ॑ಸ್ಯಾಃ । ಸೃ॒ಕಗ್ಂ ಸ॒ಗ್ಂ॒ಶಾಯ॑ ಪ॒ವಿಮಿ॑ನ್ದ್ರ ತಿ॒ಗ್ಮಂ-ವಿಁ ಶತ್ರೂ᳚-ನ್ತಾಢಿ॒ ವಿಮೃಧೋ॑ ನುದಸ್ವ ॥ ವಿ ಶತ್ರೂ॒ನ್॒. ವಿ ಮೃಧೋ॑ ನುದ॒ ವಿವೃ॒ತ್ರಸ್ಯ॒ ಹನೂ॑ ರುಜ । ವಿ ಮ॒ನ್ಯುಮಿ॑ನ್ದ್ರ ಭಾಮಿ॒ತೋ॑-ಽಮಿತ್ರ॑ಸ್ಯಾ-ಽಭಿ॒ದಾಸ॑ತಃ ॥ ತ್ರಾ॒ತಾರ॒-ಮಿನ್ದ್ರ॑-ಮವಿ॒ತಾರ॒-ಮಿನ್ದ್ರ॒ಗ್ಂ॒ ಹವೇ॑ಹವೇ ಸು॒ಹವ॒ಗ್ಂ॒ ಶೂರ॒ಮಿನ್ದ್ರ᳚ಮ್ । ಹು॒ವೇ ನು ಶ॒ಕ್ರ-ಮ್ಪು॑ರುಹೂ॒ತಮಿನ್ದ್ರಗ್ಗ್॑ ಸ್ವ॒ಸ್ತಿ ನೋ॑ ಮ॒ಘವಾ॑ ಧಾ॒ತ್ವಿನ್ದ್ರಃ॑ ॥ ಮಾ ತೇ॑ ಅ॒ಸ್ಯಾಗ್ಂ [ಅ॒ಸ್ಯಾಗ್ಂ, ಸ॒ಹ॒ಸಾ॒ವ॒-ನ್ಪರಿ॑ಷ್ಟಾವ॒ಘಾಯ॑] 50
ಸ॑ಹಸಾವ॒-ನ್ಪರಿ॑ಷ್ಟಾವ॒ಘಾಯ॑ ಭೂಮ ಹರಿವಃ ಪರಾ॒ದೈ । ತ್ರಾಯ॑ಸ್ವ ನೋ ಽವೃ॒ಕೇಭಿ॒-ರ್ವರೂ॑ಥೈ॒-ಸ್ತವ॑ ಪ್ರಿ॒ಯಾಸ॑-ಸ್ಸೂ॒ರಿಷು॑ ಸ್ಯಾಮ ॥ ಅನ॑ವಸ್ತೇ॒ ರಥ॒ಮಶ್ವಾ॑ಯ ತಖ್ಷ॒-ನ್ತ್ವಷ್ಟಾ॒ ವಜ್ರ॑-ಮ್ಪುರುಹೂತ ದ್ಯು॒ಮನ್ತ᳚ಮ್ । ಬ್ರ॒ಹ್ಮಾಣ॒ ಇನ್ದ್ರ॑-ಮ್ಮ॒ಹಯ॑ನ್ತೋ ಅ॒ರ್ಕೈರವ॑ರ್ಧಯ॒ನ್ನಹ॑ಯೇ॒ ಹನ್ತ॒ವಾ ಉ॑ ॥ ವೃಷ್ಣೇ॒ ಯ-ತ್ತೇ॒ ವೃಷ॑ಣೋ ಅ॒ರ್ಕಮರ್ಚಾ॒ನಿನ್ದ್ರ॒ ಗ್ರಾವಾ॑ಣೋ॒ ಅದಿ॑ತಿ-ಸ್ಸ॒ಜೋಷಾಃ᳚ । ಅ॒ನ॒ಶ್ವಾಸೋ॒ ಯೇ ಪ॒ವಯೋ॑-ಽರ॒ಥಾ ಇನ್ದ್ರೇ॑ಷಿತಾ ಅ॒ಭ್ಯವ॑ರ್ತ ನ್ತ॒ ದಸ್ಯೂನ್॑ ॥ 51 ॥
(ವೃ॒ತ್ರ॒ಹತ್ಯೇ-ಽನು॑-ಗಾಯ॒ತ್ರಿಣೋ᳚-ಽದ್ಧ॒ರಾಣಾಂ᳚-ಪರಾ॒ವತೋ॒-ಽಸ್ಯಾ-ಮ॒ಷ್ಟಾಚ॑ತ್ವಾರಿಗ್ಂಶಚ್ಚ) (ಅ. 12)
(ಸನ್ತ್ವಾ॑ ಸಿಞ್ಚಾಮಿ-ಧ್ರು॒ವೋ᳚-ಽಸ್ಯ॒ಗ್ನಿರ್ಮಾ॑-ಬ॒ರ್॒ಹಿಷೋ॒-ಽಹ-ಮಾ ಪ್ಯಾ॑ಯತಾ॒-ಮಗ॑ನ್ಮ॒-ಯಥಾ॒ ವೈ-ಯೋ ವೈ ಶ್ರ॒ದ್ಧಾಂ- ಪ್ರ॒ಜಾಪ॑ತಿ॒-ರ್ಯಜ್ಞಾನ್-ಧ್ರು॒ವೋ॑-ಽಸೀತ್ಯಾ॑ಹ॒-ಯೋ ವೈ ಸ॑ಪ್ತದ॒ಶ-ಮಿನ್ದ್ರಂ॑-ವೋಁ॒-ದ್ವಾದ॑ಶ । )
(ಸನ್ತ್ವಾ॑-ಬ॒ರ್॒ಹಿಷೋ॒-ಽಹಂಯಁಥಾ॒ ವಾ-ಏ॒ವಂ-ವಿಁ॒ದ್ವಾ-ಞ್ಛ್ರೌಷ॑ಟ್-ಥ್ಸಾಹಸಾವ॒-ನ್ನೇಕ॑ಪಞ್ಚಾ॒ಶತ್ ।)
(ಸನ್ತ್ವಾ॑, ಸಿಞ್ಚಾಮಿ॒ ದಸ್ಯೂನ್॑)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ಷಷ್ಠಃ ಪ್ರಶ್ನ-ಸ್ಸಮಾಪ್ತಃ ॥