ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ಪ್ರಥಮಃ ಪ್ರಶ್ನಃ – ಪಶುವಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ವಾ॒ಯ॒ವ್ಯಗ್ಗ್॑ ಶ್ವೇ॒ತಮಾ ಲ॑ಭೇತ॒ ಭೂತಿ॑ಕಾಮೋ ವಾ॒ಯುರ್ವೈ ಖ್ಷೇಪಿ॑ಷ್ಠಾ ದೇ॒ವತಾ॑ವಾ॒ಯುಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ಮ್ಭೂತಿ॑-ಙ್ಗಮಯತಿ॒ ಭವ॑ತ್ಯೇ॒ವಾ-ತಿ॑ಖ್ಷಿಪ್ರಾ ದೇ॒ವತೇತ್ಯಾ॑ಹು॒-ಸ್ಸೈನ॑ಮೀಶ್ವ॒ರಾ ಪ್ರ॒ದಹ॒ ಇತ್ಯೇ॒ತಮೇ॒ವ ಸನ್ತಂ॑-ವಾಁ॒ಯವೇ॑ ನಿ॒ಯುತ್ವ॑ತ॒ ಆ ಲ॑ಭೇತ ನಿ॒ಯುದ್ವಾ ಅ॑ಸ್ಯ॒ ಧೃತಿ॑ರ್ಧೃ॒ತ ಏ॒ವ ಭೂತಿ॒ಮುಪೈ॒ತ್ಯ ಪ್ರ॑ದಾಹಾಯ॒ ಭವ॑ತ್ಯೇ॒ವ [ ] 1
ವಾ॒ಯವೇ॑ ನಿ॒ಯುತ್ವ॑ತ॒ ಆ ಲ॑ಭೇತ॒ ಗ್ರಾಮ॑ಕಾಮೋ ವಾ॒ಯುರ್ವಾ ಇ॒ಮಾಃ ಪ್ರ॒ಜಾ ನ॑ಸ್ಯೋ॒ತಾ ನೇ॑ನೀಯತೇ ವಾ॒ಯುಮೇ॒ವ ನಿ॒ಯುತ್ವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ᳚ ಪ್ರ॒ಜಾ ನ॑ಸ್ಯೋ॒ತಾ ನಿಯ॑ಚ್ಛತಿ ಗ್ರಾ॒ಮ್ಯೇ॑ವ ಭ॑ವತಿ ನಿ॒ಯುತ್ವ॑ತೇ ಭವತಿ ಧ್ರು॒ವಾ ಏ॒ವಾಸ್ಮಾ॒ ಅನ॑ಪಗಾಃ ಕರೋತಿ ವಾ॒ಯವೇ॑ ನಿ॒ಯುತ್ವ॑ತ॒ ಆ ಲ॑ಭೇತ ಪ್ರ॒ಜಾಕಾ॑ಮಃ ಪ್ರಾ॒ಣೋ ವೈ ವಾ॒ಯುರ॑ಪಾ॒ನೋ ನಿ॒ಯು-ತ್ಪ್ರಾ॑ಣಾಪಾ॒ನೌ ಖಲು॒ ವಾ ಏ॒ತಸ್ಯ॑ ಪ್ರ॒ಜಾಯಾ॒ [ಪ್ರ॒ಜಾಯಾಃ᳚, ಅಪ॑] 2
ಅಪ॑ ಕ್ರಾಮತೋ॒ ಯೋ-ಽಲ॑-ಮ್ಪ್ರ॒ಜಾಯೈ॒ ಸ-ನ್ಪ್ರ॒ಜಾ-ನ್ನ ವಿ॒ನ್ದತೇ॑ ವಾ॒ಯುಮೇ॒ವ ನಿ॒ಯುತ್ವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ᳚ ಪ್ರಾಣಾಪಾ॒ನಾಭ್ಯಾ᳚-ಮ್ಪ್ರ॒ಜಾ-ಮ್ಪ್ರ ಜ॑ನಯತಿ ವಿ॒ನ್ದತೇ᳚ ಪ್ರ॒ಜಾಂ-ವಾಁ॒ಯವೇ॑ ನಿ॒ಯುತ್ವ॑ತ॒ ಆ ಲ॑ಭೇತ॒ ಜ್ಯೋಗಾ॑ಮಯಾವೀ ಪ್ರಾ॒ಣೋ ವೈ ವಾ॒ಯುರ॑ಪಾ॒ನೋ ನಿ॒ಯು-ತ್ಪ್ರಾ॑ಣಾಪಾ॒ನೌ ಖಲು॒ ವಾ ಏ॒ತಸ್ಮಾ॒ ದಪ॑ಕ್ರಾಮತೋ॒ ಯಸ್ಯ॒ ಜ್ಯೋಗಾ॒ಮಯ॑ತಿ ವಾ॒ಯುಮೇ॒ವ ನಿ॒ಯುತ್ವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ – [ಭಾಗ॒ಧೇಯೇ॒ನೋಪ॑, ಧಾ॒ವ॒ತಿ॒ ಸ] 3
ಧಾವತಿ॒ ಸ ಏ॒ವಾ-ಽಸ್ಮಿ॑-ನ್ಪ್ರಾಣಾಪಾ॒ನೌ ದ॑ಧಾತ್ಯು॒ತ ಯದೀ॒ತಾಸು॒ರ್ಭವ॑ತಿ॒ ಜೀವ॑ತ್ಯೇ॒ವ ಪ್ರ॒ಜಾಪ॑ತಿ॒ರ್ವಾ ಇ॒ದಮೇಕ॑ ಆಸೀ॒-ಥ್ಸೋ॑-ಽಕಾಮಯತ ಪ್ರ॒ಜಾಃ ಪ॒ಶೂನ್-ಥ್ಸೃ॑ಜೇ॒ಯೇತಿ॒ ಸ ಆ॒ತ್ಮನೋ॑ ವ॒ಪಾಮುದ॑ಕ್ಖಿದ॒-ತ್ತಾಮ॒ಗ್ನೌ ಪ್ರಾಗೃ॑ಹ್ಣಾ॒-ತ್ತತೋ॒-ಽಜಸ್ತೂ॑ಪ॒ರ-ಸ್ಸಮ॑ಭವ॒-ತ್ತಗ್ಗ್ ಸ್ವಾಯೈ॑ ದೇ॒ವತಾ॑ಯಾ॒ ಆ ಽಲ॑ಭತ॒ ತತೋ॒ ವೈ ಸ ಪ್ರ॒ಜಾಃ ಪ॒ಶೂನ॑ಸೃಜತ॒ ಯಃ ಪ್ರ॒ಜಾಕಾ॑ಮಃ [ ] 4
ಪ॒ಶುಕಾ॑ಮ॒-ಸ್ಸ್ಯಾ-ಥ್ಸ ಏ॒ತ-ಮ್ಪ್ರಾ॑ಜಾಪ॒ತ್ಯಮ॒ಜ-ನ್ತೂ॑ಪ॒ರಮಾ ಲ॑ಭೇತ ಪ್ರ॒ಜಾಪ॑ತಿಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ᳚ ಪ್ರ॒ಜಾ-ಮ್ಪ॒ಶೂ-ನ್ಪ್ರಜ॑ನಯತಿ॒ ಯಚ್ಛ್ಮ॑ಶ್ರು॒ಣಸ್ತ-ತ್ಪುರು॑ಷಾಣಾಗ್ಂ ರೂ॒ಪಂ-ಯಁ-ತ್ತೂ॑ಪ॒ರಸ್ತದಶ್ವಾ॑ನಾಂ॒-ಯಁದ॒ನ್ಯತೋ॑ದ॒-ನ್ತ-ದ್ಗವಾಂ॒-ಯಁದವ್ಯಾ॑ ಇವ ಶ॒ಫಾಸ್ತದವೀ॑ನಾಂ॒-ಯಁದ॒ಜಸ್ತ-ದ॒ಜಾನಾ॑-ಮೇ॒ತಾವ॑ನ್ತೋ॒ ವೈ ಗ್ರಾ॒ಮ್ಯಾಃ ಪ॒ಶವ॒ಸ್ತಾ- [ಪ॒ಶವ॒ಸ್ತಾನ್, ರೂ॒ಪೇಣೈ॒ವಾವ॑ ರುನ್ಧೇ] 5
-ನ್ರೂ॒ಪೇಣೈ॒ವಾವ॑ ರುನ್ಧೇ ಸೋಮಾಪೌ॒ಷ್ಣ-ನ್ತ್ರೈ॒ತಮಾ ಲ॑ಭೇತ ಪ॒ಶುಕಾ॑ಮೋ॒ದ್ವೌ ವಾ ಅ॒ಜಾಯೈ॒ ಸ್ತನೌ॒ ನಾನೈ॒ವ ದ್ವಾವ॒ಭಿ ಜಾಯೇ॑ತೇ॒ ಊರ್ಜ॒-ಮ್ಪುಷ್ಟಿ॑-ನ್ತೃ॒ತೀಯ॑ಸ್ಸೋಮಾಪೂ॒ಷಣಾ॑ವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮೈ॑ ಪ॒ಶೂ-ನ್ಪ್ರಜ॑ನಯತ॒-ಸ್ಸೋಮೋ॒ ವೈ ರೇ॑ತೋ॒ಧಾಃ ಪೂ॒ಷಾ ಪ॑ಶೂ॒ನಾ-ಮ್ಪ್ರ॑ಜನಯಿ॒ತಾ ಸೋಮ॑ ಏ॒ವಾಸ್ಮೈ॒ ರೇತೋ॒ ದಧಾ॑ತಿ ಪೂ॒ಷಾ ಪ॒ಶೂ-ನ್ಪ್ರ ಜ॑ನಯ॒ತ್ಯೌದು॑ಮ್ಬರೋ॒ ಯೂಪೋ॑ ಭವ॒ತ್ಯೂರ್ಗ್ವಾ ಉ॑ದು॒ಮ್ಬರ॒ ಊರ್ಕ್ಪ॒ಶವ॑ ಊ॒ರ್ಜೈವಾಸ್ಮಾ॒ ಊರ್ಜ॑-ಮ್ಪ॒ಶೂನವ॑ ರುನ್ಧೇ ॥ 6 ॥
(ಅಪ್ರ॑ದಾಹಾಯ॒ ಭವ॑ತ್ಯೇ॒ವ – ಪ್ರ॒ಜಾಯಾ॑ – ಆ॒ಮಯ॑ತಿ ವಾ॒ಯುಮೇ॒ವ ನಿ॒ಯುತ್ವ॑ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ – ಪ್ರ॒ಜಾಕ॑ಮ॒ – ಸ್ತಾನ್ – ಯೂಪ॒ – ಸ್ತ್ರಯೋ॑ದಶ ಚ ) (ಅ. 1)
ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ॒ ತಾ ಅ॑ಸ್ಮಾ-ಥ್ಸೃ॒ಷ್ಟಾಃ ಪರಾ॑ಚೀರಾಯ॒-ನ್ತಾ ವರು॑ಣಮಗಚ್ಛ॒-ನ್ತಾ ಅನ್ವೈ॒-ತ್ತಾಃ ಪುನ॑ರಯಾಚತ॒ ತಾ ಅ॑ಸ್ಮೈ॒ ನ ಪುನ॑ರದದಾ॒-ಥ್ಸೋ᳚-ಽಬ್ರವೀ॒-ದ್ವರಂ॑-ವೃಁಣೀ॒ಷ್ವಾಥ॑ ಮೇ॒ ಪುನ॑ರ್ದೇ॒ಹೀತಿ॒ ತಾಸಾಂ॒-ವಁರ॒ಮಾ ಽಲ॑ಭತ॒ ಸ ಕೃ॒ಷ್ಣ ಏಕ॑ಶಿತಿಪಾದ-ಭವ॒ದ್ಯೋ ವರು॑ಣ ಗೃಹೀತ॒-ಸ್ಸ್ಯಾ-ಥ್ಸ ಏ॒ತಂ-ವಾಁ॑ರು॒ಣ-ಙ್ಕೃ॒ಷ್ಣ-ಮೇಕ॑ಶಿತಿಪಾದ॒ಮಾ-ಲ॑ಭೇತ॒ ವರು॑ಣ- [ವರು॑ಣಮ್, ಏ॒ವ ಸ್ವೇನ॑] 7
-ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನಂ॑-ವಁರುಣಪಾ॒ಶಾ-ನ್ಮು॑ಞ್ಚತಿ ಕೃ॒ಷ್ಣ ಏಕ॑ಶಿತಿಪಾ-ದ್ಭವತಿ ವಾರು॒ಣೋ ಹ್ಯೇ॑ಷ ದೇ॒ವತ॑ಯಾ॒ ಸಮೃ॑ದ್ಧ್ಯೈ॒ ಸುವ॑ರ್ಭಾನುರಾಸು॒ರ-ಸ್ಸೂರ್ಯ॒-ನ್ತಮ॑ಸಾ-ಽವಿದ್ಧ್ಯ॒ತ ತಸ್ಮೈ॑ದೇ॒ವಾಃ ಪ್ರಾಯ॑ಶ್ಚಿತ್ತಿ-ಮೈಚ್ಛ॒-ನ್ತಸ್ಯ॒ ಯ-ತ್ಪ್ರ॑ಥ॒ಮ-ನ್ತಮೋ॒-ಽಪಾಘ್ನ॒ನ್-ಥ್ಸಾ ಕೃ॒ಷ್ಣಾ-ಽವಿ॑ರಭವ॒-ದ್ಯ-ದ್ದ್ವಿ॒ತೀಯ॒ಗ್ಂ॒ ಸಾ ಫಲ್ಗು॑ನೀ॒ ಯತ ತೃ॒ತೀಯ॒ಗ್ಂ॒ ಸಾ ಬ॑ಲ॒ಖ್ಷೀ ಯದ॑ದ್ಧ್ಯ॒ಸ್ಥಾ-ದ॒ಪಾಕೃ॑ನ್ತ॒ನ್-ಥ್ಸಾ ಽವಿ॑ರ್ವ॒ಶಾ [ ] 8
ಸಮ॑ಭವ॒-ತ್ತೇ ದೇ॒ವಾ ಅ॑ಬ್ರುವ-ನ್ದೇವಪ॒ಶುರ್ವಾ ಅ॒ಯಗ್ಂ ಸಮ॑ಭೂ॒-ತ್ಕಸ್ಮಾ॑ ಇ॒ಮಮಾ ಲ॑ಫ್ಸ್ಯಾಮಹ॒ ಇತ್ಯಥ॒ ವೈ ತರ್ಹ್ಯಲ್ಪಾ॑ ಪೃಥಿ॒ವ್ಯಾಸೀ॒-ದಜಾ॑ತಾ॒ ಓಷ॑ಧಯ॒ಸ್ತಾಮವಿಂ॑-ವಁ॒ಶಾಮಾ॑ದಿ॒ತ್ಯೇಭ್ಯಃ॒ ಕಾಮಾ॒ಯಾ-ಽಲ॑ಭನ್ತ॒ ತತೋ॒ ವಾ ಅಪ್ರ॑ಥತ ಪೃಥಿ॒ವ್ಯ-ಜಾ॑ಯ॒ನ್ತೌಷ॑ಧಯೋ॒ ಯಃ ಕಾ॒ಮಯೇ॑ತ॒ ಪ್ರಥೇ॑ಯ ಪ॒ಶುಭಿಃ॒ ಪ್ರ ಪ್ರ॒ಜಯಾ॑ ಜಾಯೇ॒ಯೇತಿ॒ ಸ ಏ॒ತಾಮವಿಂ॑-ವಁ॒ಶಾಮಾ॑ದಿ॒ತ್ಯೇಭ್ಯಃ॒ ಕಾಮಾ॒ಯಾ- [ಕಾಮಾ॑ಯ, ಆಲ॑ಭೇತಾ ಽಽದಿ॒ತ್ಯಾನೇ॒ವ] 9
-ಽಽಲ॑ಭೇತಾ ಽಽದಿ॒ತ್ಯಾನೇ॒ವ ಕಾಮ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವೈನ॑-ಮ್ಪ್ರ॒ಥಯ॑ನ್ತಿ ಪ॒ಶುಭಿಃ॒ ಪ್ರ ಪ್ರ॒ಜಯಾ॑ ಜನಯನ್ತ್ಯ॒-ಸಾವಾ॑ದಿ॒ತ್ಯೋ ನ ವ್ಯ॑ರೋಚತ॒ ತಸ್ಮೈ॑ ದೇ॒ವಾಃ ಪ್ರಾಯ॑ಶ್ಚಿತ್ತಿಮೈಚ್ಛ॒-ನ್ತಸ್ಮಾ॑ ಏ॒ತಾ ಮ॒ಲ್॒ಹಾ ಆಲ॑ಭನ್ತಾ-ಽಽಗ್ನೇ॒ಯೀ-ಙ್ಕೃ॑ಷ್ಣಗ್ರೀ॒ವೀಗ್ಂ ಸಗ್ಂ॑ಹಿ॒ತಾಮೈ॒ನ್ದ್ರೀಗ್ ಶ್ವೇ॒ತಾ-ಮ್ಬಾ॑ರ್ಹಸ್ಪ॒ತ್ಯಾ-ನ್ತಾಭಿ॑ರೇ॒ವಾಸ್ಮಿ॒-ನ್ರುಚ॑ಮದಧು॒ರ್ಯೋ ಬ್ರ॑ಹ್ಮವರ್ಚ॒ಸ-ಕಾ॑ಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತಾ ಮ॒ಲ್॒ಹಾ ಆ ಲ॑ಭೇತಾ- [ಆ ಲ॑ಭೇತ, ಆ॒ಗ್ನೇ॒ಯೀ-ಙ್ಕೃ॑ಷ್ಣಗ್ರೀ॒ವೀಗ್ಂ] 10
(ಶಿಖಣ್ಡಿ ಪಞ್ಚತಿ)
-ಽಽಗ್ನೇ॒ಯೀ-ಙ್ಕೃ॑ಷ್ಣಗ್ರೀ॒ವೀಗ್ಂ ಸಗ್ಂ॑ಹಿ॒ತಾಮೈ॒ನ್ದ್ರೀಗ್ ಶ್ವೇ॒ತಾ-ಮ್ಬಾ॑ರ್ಹಸ್ಪ॒ತ್ಯಾಮೇ॒ತಾ ಏ॒ವ ದೇ॒ವತಾ॒-ಸ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾ ಏ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ನ್ದ॑ಧತಿ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತಿ ವ॒ಸನ್ತಾ᳚ ಪ್ರಾ॒ತರಾ᳚ಗ್ನೇ॒ಯೀ-ಙ್ಕೃ॑ಷ್ಣ ಗ್ರೀ॒ವೀಮಾ ಲ॑ಭೇತ ಗ್ರೀ॒ಷ್ಮೇ ಮ॒ದ್ಧ್ಯನ್ದಿ॑ನೇ ಸಗ್ಂಹಿ॒ತಾಮೈ॒ನ್ದ್ರೀಗ್ಂ ಶ॒ರದ್ಯ॑ಪರಾ॒ಹ್ಣೇ ಶ್ವೇ॒ತಾ-ಮ್ಬಾ॑ರ್ಹಸ್ಪ॒ತ್ಯಾ-ನ್ತ್ರೀಣಿ॒ ವಾ ಆ॑ದಿ॒ತ್ಯಸ್ಯ॒ ತೇಜಾಗ್ಂ॑ಸಿ ವ॒ಸನ್ತಾ᳚ ಪ್ರಾ॒ತರ್ಗ್ರೀ॒ಷ್ಮೇ ಮ॒ದ್ಧ್ಯನ್ದಿ॑ನೇ ಶ॒ರದ್ಯ॑ಪರಾ॒ಹ್ಣೇ ಯಾವ॑ನ್ತ್ಯೇ॒ವ ತೇಜಾಗ್ಂ॑ಸಿ॒ ತಾನ್ಯೇ॒ವಾ- [ತಾನ್ಯೇ॒ವ, ಅವ॑ ರುನ್ಧೇ] 11
-ಽವ॑ ರುನ್ಧೇ ಸಂವಁಥ್ಸ॒ರ-ಮ್ಪ॒ರ್ಯಾಲ॑ಭ್ಯನ್ತೇ ಸಂವಁಥ್ಸ॒ರೋ ವೈ ಬ್ರ॑ಹ್ಮವರ್ಚ॒ಸಸ್ಯ॑ ಪ್ರದಾ॒ತಾ ಸಂ॑ವಁಥ್ಸ॒ರ ಏ॒ವಾಸ್ಮೈ᳚ ಬ್ರಹ್ಮವರ್ಚ॒ಸ-ಮ್ಪ್ರ ಯ॑ಚ್ಛತಿ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತಿ ಗ॒ರ್ಭಿಣ॑ಯೋ ಭವನ್ತೀನ್ದ್ರಿ॒ಯಂ-ವೈಁ ಗರ್ಭ॑ ಇನ್ದ್ರಿ॒ಯಮೇ॒ವಾಸ್ಮಿ॑-ನ್ದಧತಿ ಸಾರಸ್ವ॒ತೀ-ಮ್ಮೇ॒ಷೀಮಾ ಲ॑ಭೇತ॒ ಯ ಈ᳚ಶ್ವ॒ರೋ ವಾ॒ಚೋ ವದಿ॑ತೋ॒-ಸ್ಸನ್ ವಾಚ॒-ನ್ನ ವದೇ॒-ದ್ವಾಗ್ವೈ ಸರ॑ಸ್ವತೀ॒ ಸರ॑ಸ್ವತೀಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸೈವಾಸ್ಮಿ॒- [ಸೈವಾಸ್ಮಿನ್ನ್॑, ವಾಚ॑-ನ್ದಧಾತಿ] 12
-ನ್ವಾಚ॑-ನ್ದಧಾತಿ ಪ್ರವದಿ॒ತಾ ವಾ॒ಚೋ ಭ॑ವ॒ತ್ಯಪ॑ನ್ನದತೀ ಭವತಿ॒ ತಸ್ಮಾ᳚-ನ್ಮನು॒ಷ್ಯಾ᳚-ಸ್ಸರ್ವಾಂ॒-ವಾಁಚಂ॑-ವಁದನ್ತ್ಯಾಗ್ನೇ॒ಯ-ಙ್ಕೃ॒ಷ್ಣಗ್ರೀ॑ವ॒ಮಾ ಲ॑ಭೇತ ಸೌ॒ಮ್ಯ-ಮ್ಬ॒ಭ್ರು-ಞ್ಜ್ಯೋಗಾ॑ಮಯಾವ್ಯ॒ಗ್ನಿಂ-ವಾಁ ಏ॒ತಸ್ಯ॒ ಶರೀ॑ರ-ಙ್ಗಚ್ಛತಿ॒ ಸೋಮ॒ಗ್ಂ॒ ರಸೋ॒ ಯಸ್ಯ॒ ಜ್ಯೋಗಾ॒ಮಯ॑ತ್ಯ॒ಗ್ನೇರೇ॒ವಾಸ್ಯ॒ ಶರೀ॑ರ-ನ್ನಿಷ್ಕ್ರೀ॒ಣಾತಿ॒ ಸೋಮಾ॒-ದ್ರಸ॑ಮು॒ತ ಯದೀ॒ತಾಸು॒ರ್ಭವ॑ತಿ॒ ಜೀವ॑ತ್ಯೇ॒ವ ಸೌ॒ಮ್ಯ-ಮ್ಬ॒ಭ್ರುಮಾ ಲ॑ಭೇತಾ-ಽಽಗ್ನೇ॒ಯ-ಙ್ಕೃ॒ಷ್ಣಗ್ರೀ॑ವ-ಮ್ಪ್ರ॒ಜಾಕಾ॑ಮ॒-ಸ್ಸೋಮೋ॒ [ಸೋಮಃ॑, ವೈ ರೇ॑ತೋ॒ಧಾ] 13
ವೈ ರೇ॑ತೋ॒ಧಾ ಅ॒ಗ್ನಿಃ ಪ್ರ॒ಜಾನಾ᳚-ಮ್ಪ್ರಜನಯಿ॒ತಾ ಸೋಮ॑ ಏ॒ವಾಸ್ಮೈ॒ ರೇತೋ॒ ದಧಾ᳚ತ್ಯ॒ಗ್ನಿಃ ಪ್ರ॒ಜಾ-ಮ್ಪ್ರಜ॑ನಯತಿ ವಿ॒ನ್ದತೇ᳚ ಪ್ರ॒ಜಾಮಾ᳚ಗ್ನೇ॒ಯ-ಙ್ಕೃ॒ಷ್ಣಗ್ರೀ॑ವ॒ಮಾ ಲ॑ಭೇತ ಸೌ॒ಮ್ಯ-ಮ್ಬ॒ಭ್ರುಂ-ಯೋಁ ಬ್ರಾ᳚ಹ್ಮ॒ಣೋ ವಿ॒ದ್ಯಾಮ॒ನೂಚ್ಯ॒ ನ ವಿ॒ರೋಚೇ॑ತ॒ ಯದಾ᳚ಗ್ನೇ॒ಯೋ ಭವ॑ತಿ॒ ತೇಜ॑ ಏ॒ವಾಸ್ಮಿ॒-ನ್ತೇನ॑ ದಧಾತಿ॒ ಯ-ಥ್ಸೌ॒ಮ್ಯೋ ಬ್ರ॑ಹ್ಮವರ್ಚ॒ಸ-ನ್ತೇನ॑ ಕೃ॒ಷ್ಣಗ್ರೀ॑ವ ಆಗ್ನೇ॒ಯೋ ಭ॑ವತಿ॒ ತಮ॑ ಏ॒ವಾಸ್ಮಾ॒ದಪ॑ ಹನ್ತಿ ಶ್ವೇ॒ತೋ ಭ॑ವತಿ॒ [ಭ॑ವತಿ, ರುಚ॑ಮೇ॒ವಾಸ್ಮಿ॑-ನ್ದಧಾತಿ] 14
ರುಚ॑ಮೇ॒ವಾಸ್ಮಿ॑-ನ್ದಧಾತಿ ಬ॒ಭ್ರು-ಸ್ಸೌ॒ಮ್ಯೋ ಭ॑ವತಿ ಬ್ರಹ್ಮವರ್ಚ॒ಸಮೇ॒ವಾಸ್ಮಿ॒-ನ್ತ್ವಿಷಿ॑-ನ್ದಧಾತ್ಯಾ-ಗ್ನೇ॒ಯ-ಙ್ಕೃ॒ಷ್ಣಗ್ರೀ॑ವ॒ಮಾ ಲ॑ಭೇತ ಸೌ॒ಮ್ಯ-ಮ್ಬ॒ಭ್ರುಮಾ᳚ಗ್ನೇ॒ಯ-ಙ್ಕೃ॒ಷ್ಣಗ್ರೀ॑ವ-ಮ್ಪುರೋ॒ಧಾಯಾ॒ಗ್॒ ಸ್ಪರ್ಧ॑ಮಾನ ಆಗ್ನೇ॒ಯೋ ವೈ ಬ್ರಾ᳚ಹ್ಮ॒ಣ-ಸ್ಸೌ॒ಮ್ಯೋ ರಾ॑ಜ॒ನ್ಯೋ॑-ಽಭಿತ॑-ಸ್ಸೌ॒ಮ್ಯಮಾ᳚ಗ್ನೇ॒ಯೌ ಭ॑ವತ॒-ಸ್ತೇಜ॑ಸೈ॒ವ ಬ್ರಹ್ಮ॑ಣೋಭ॒ಯತೋ॑ ರಾ॒ಷ್ಟ್ರ-ಮ್ಪರಿ॑ ಗೃಹ್ಣಾತ್ಯೇಕ॒ಧಾ ಸ॒ಮಾ ವೃ॑ಙ್ಕ್ತೇ ಪು॒ರ ಏ॑ನ-ನ್ದಧತೇ ॥ 15 ॥
(ಲ॒ಭೇ॒ತ॒ ವರು॑ಣಂ – ವಁ॒ಶೈ – ತಾಮವಿಂ॑-ವಁ॒ಶಾಮಾ॑ದಿ॒ತ್ಯೇಭ್ಯಃ॒ ಕಾಮಾ॑ಯ – ಮ॒ಲ್ಹಾ ಆ ಲ॑ಭೇತ॒ – ತಾನ್ಯೇ॒ವ – ಸೈವಾಸ್ಮಿ॒ನ್ಥ್ – ಸೋಮಃ॑ – ಸ್ವೇ॒ತೋ ಭ॑ವತಿ॒ – ತ್ರಿಚ॑ತ್ವಾರಿಗ್ಂಶಚ್ಚ ) (ಅ. 2)
ದೇ॒ವಾ॒ಸು॒ರಾ ಏ॒ಷು ಲೋ॒ಕೇಷ್ವ॑ಸ್ಪರ್ಧನ್ತ॒ ಸ ಏ॒ತಂ-ವಿಁಷ್ಣು॑-ರ್ವಾಮ॒ನಮ॑ಪಶ್ಯ॒-ತ್ತಗ್ಗ್ ಸ್ವಾಯೈ॑ ದೇ॒ವತಾ॑ಯಾ॒ ಆ-ಽಲ॑ಭತ॒ ತತೋ॒ ವೈ ಸ ಇ॒ಮಾಂ-ಲೋಁ॒ಕಾನ॒ಭ್ಯ॑ಜಯದ್- ವೈಷ್ಣ॒ವಂ-ವಾಁ॑ಮ॒ನಮಾ ಲ॑ಭೇತ॒ ಸ್ಪರ್ಧ॑ಮಾನೋ॒ ವಿಷ್ಣು॑ರೇ॒ವ ಭೂ॒ತ್ವೇಮಾ-ಲ್ಲೋಁ॒ಕಾನ॒ಭಿ ಜ॑ಯತಿ॒ ವಿಷ॑ಮ॒ ಆ ಲ॑ಭೇತ॒ ವಿಷ॑ಮಾ ಇವ॒ ಹೀಮೇ ಲೋ॒ಕಾ-ಸ್ಸಮೃ॑ದ್ಧ್ಯಾ॒ ಇನ್ದ್ರಾ॑ಯ ಮನ್ಯು॒ಮತೇ॒ ಮನ॑ಸ್ವತೇ ಲ॒ಲಾಮ॑-ಮ್ಪ್ರಾಶೃ॒ಙ್ಗಮಾ ಲ॑ಭೇತ ಸಙ್ಗ್ರಾ॒ಮೇ [ ] 16
ಸಂಯಁ॑ತ್ತ ಇನ್ದ್ರಿ॒ಯೇಣ॒ ವೈ ಮ॒ನ್ಯುನಾ॒ ಮನ॑ಸಾ ಸಙ್ಗ್ರಾ॒ಮ-ಞ್ಜ॑ಯ॒ತೀನ್ದ್ರ॑ಮೇ॒ವ ಮ॑ನ್ಯು॒ಮನ್ತ॒-ಮ್ಮನ॑ಸ್ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑ನ್ನಿನ್ದ್ರಿ॒ಯ-ಮ್ಮ॒ನ್ಯು-ಮ್ಮನೋ॑ ದಧಾತಿ॒ ಜಯ॑ತಿ॒ ತಗ್ಂ ಸ॑ಗ್ರಾ॒ಮ್ಮಮಿನ್ದ್ರಾ॑ಯ ಮ॒ರುತ್ವ॑ತೇ ಪೃಶ್ಞಿಸ॒ಕ್ಥಮಾ ಲ॑ಭೇತ॒ ಗ್ರಾಮ॑ಕಾಮ॒ ಇನ್ದ್ರ॑ಮೇ॒ವ ಮ॒ರುತ್ವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಸ ಜಾ॒ತಾ-ನ್ಪ್ರಯ॑ಚ್ಛತಿ ಗ್ರಾ॒ಮ್ಯೇ॑ವ ಭ॑ವತಿ॒ ಯದೃ॑ಷ॒ಭಸ್ತೇನೈ॒- [ಯದೃ॑ಷ॒ಭಸ್ತೇನ॑, ಐ॒ನ್ದ್ರೋ ಯ-ತ್ಪೃಶ್ಞಿ॒ಸ್ತೇನ॑] 17
-ನ್ದ್ರೋ ಯ-ತ್ಪೃಶ್ಞಿ॒ಸ್ತೇನ॑ ಮಾರು॒ತ-ಸ್ಸಮೃ॑ದ್ಧ್ಯೈ ಪ॒ಶ್ಚಾ-ತ್ಪೃ॑ಶ್ಞಿಸ॒ಕ್ಥೋ ಭ॑ವತಿ ಪಶ್ಚಾದನ್ವ-ವಸಾ॒ಯಿನೀ॑ಮೇ॒ವಾಸ್ಮೈ॒ ವಿಶ॑-ಙ್ಕರೋತಿ ಸೌ॒ಮ್ಯ-ಮ್ಬ॒ಭ್ರುಮಾ ಲ॑ಭೇ॒ತಾನ್ನ॑ಕಾಮ-ಸ್ಸೌ॒ಮ್ಯಂ-ವಾಁ ಅನ್ನ॒ಗ್ಂ॒ ಸೋಮ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॒ ಅನ್ನ॒-ಮ್ಪ್ರಯ॑॑ಚ್ಛತ್ಯನ್ನಾ॒ದ ಏ॒ವ ಭ॑ವತಿ ಬ॒ಭ್ರುರ್ಭ॑ವತ್ಯೇ॒ತದ್ವಾ ಅನ್ನ॑ಸ್ಯ ರೂ॒ಪಗ್ಂ ಸಮೃ॑ದ್ಧ್ಯೈ ಸೌ॒ಮ್ಯ-ಮ್ಬ॒ಭ್ರುಮಾ ಲ॑ಭೇತ॒ ಯಮಲಗ್ಂ॑ [ಯಮಲ᳚ಮ್, ರಾ॒ಜ್ಯಾಯ॒] 18
ರಾ॒ಜ್ಯಾಯ॒ ಸನ್ತಗ್ಂ॑ ರಾ॒ಜ್ಯ-ನ್ನೋಪ॒ನಮೇ᳚-ಥ್ಸೌ॒ಮ್ಯಂ-ವೈಁ ರಾ॒ಜ್ಯಗ್ಂ ಸೋಮ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ರಾ॒ಜ್ಯ-ಮ್ಪ್ರಯ॑ಚ್ಛ॒ತ್ಯುಪೈ॑ನಗ್ಂ ರಾ॒ಜ್ಯ-ನ್ನ॑ಮತಿ ಬ॒ಭ್ರುರ್ಭ॑ವತ್ಯೇ॒ತ-ದ್ವೈ ಸೋಮ॑ಸ್ಯ ರೂ॒ಪಗ್ಂ ಸಮೃ॑ದ್ಧ್ಯಾ॒ ಇನ್ದ್ರಾ॑ಯ ವೃತ್ರ॒ತುರೇ॑ ಲ॒ಲಾಮ॑-ಮ್ಪ್ರಾಶೃ॒ಙ್ಗಮಾ ಲ॑ಭೇತ ಗ॒ತಶ್ರೀಃ᳚ ಪ್ರತಿ॒ಷ್ಠಾಕಾ॑ಮಃ ಪಾ॒ಪ್ಮಾನ॑ಮೇ॒ವ ವೃ॒ತ್ರ-ನ್ತೀ॒ರ್ತ್ವಾ ಪ್ರ॑ತಿ॒ಷ್ಠಾ-ಙ್ಗ॑ಚ್ಛ॒ತೀನ್ದ್ರಾ॑ಯಾಭಿಮಾತಿ॒ಘ್ನೇ ಲ॒ಲಾಮ॑-ಮ್ಪ್ರಾಶೃ॒ಙ್ಗಮಾ [ಲ॒ಲಾಮ॑-ಮ್ಪ್ರಾಶೃ॒ಙ್ಗಮಾ, ಲ॒ಭೇ॒ತ॒ ಯಃ ಪಾ॒ಪ್ಮನಾ॑] 19
ಲ॑ಭೇತ॒ ಯಃ ಪಾ॒ಪ್ಮನಾ॑ ಗೃಹೀ॒ತ-ಸ್ಸ್ಯಾ-ತ್ಪಾ॒ಪ್ಮಾ ವಾ ಅ॒ಭಿಮಾ॑ತಿ॒ರಿನ್ದ್ರ॑ಮೇ॒ವಾ- ಭಿ॑ಮಾತಿ॒ಹನ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ᳚-ತ್ಪಾ॒ಪ್ಮಾನ॑ಮ॒ಭಿಮಾ॑ತಿ॒-ಮ್ಪ್ರಣು॑ದತ॒ ಇನ್ದ್ರಾ॑ಯ ವ॒ಜ್ರಿಣೇ॑ ಲ॒ಲಾಮ॑-ಮ್ಪ್ರಾಶೃ॒ಙ್ಗಮಾ ಲ॑ಭೇತ॒ ಯಮಲಗ್ಂ॑ ರಾ॒ಜ್ಯಾಯ॒ ಸನ್ತಗ್ಂ॑ ರಾ॒ಜ್ಯ-ನ್ನೋಪ॒ನಮೇ॒ದಿನ್ದ್ರ॑ಮೇ॒ವ ವ॒ಜ್ರಿಣ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॒ ವಜ್ರ॒-ಮ್ಪ್ರ ಯ॑ಚ್ಛತಿ॒ ಸ ಏ॑ನಂ॒ ವಁಜ್ರೋ॒ ಭೂತ್ಯಾ॑ ಇನ್ಧ॒ ಉಪೈ॑ನಗ್ಂ ರಾ॒ಜ್ಯ-ನ್ನ॑ಮತಿ ಲ॒ಲಾಮಃ॑ ಪ್ರಾಶೃ॒ಙ್ಗೋ ಭ॑ವತ್ಯೇ॒ತದ್ವೈ ವಜ್ರ॑ಸ್ಯ ರೂ॒ಪಗ್ಂ ಸಮೃ॑ದ್ಧ್ಯೈ ॥ 20
(ಸ॒ಗ್ರಾ॒ಮ್ಮೇ – ತೇನಾ – ಲ॑ – ಮಭಿಮಾತಿ॒ಘ್ನೇ ಲ॒ಲಾಮ॑-ಮ್ಪ್ರಾಶೃ॒ಙ್ಗಮೈ – ನಂ॒ – ಪಞ್ಚ॑ದಶ ಚ ) (ಅ. 3)
ಅ॒ಸಾವಾ॑ದಿ॒ತ್ಯೋ ನ ವ್ಯ॑ರೋಚತ॒ ತಸ್ಮೈ॑ ದೇ॒ವಾಃ ಪ್ರಾಯ॑ಶ್ಚಿತ್ತಿಮೈಚ್ಛ॒-ನ್ತಸ್ಮಾ॑ ಏ॒ತಾ-ನ್ದಶ॑ರ್ಷಭಾ॒ಮಾ-ಽಲ॑ಭನ್ತ॒ ತಯೈ॒ವಾಸ್ಮಿ॒-ನ್ರುಚ॑ಮದಧು॒ರ್ಯೋ ಬ್ರ॑ಹ್ಮವರ್ಚ॒ಸಕಾ॑ಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತಾ-ನ್ದಶ॑ರ್ಷಭಾ॒ಮಾ ಲ॑ಭೇತಾ॒-ಮುಮೇ॒ವಾ-ಽಽದಿ॒ತ್ಯಗ್ಗ್ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ನ್ದ॑ಧಾತಿ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತಿ ವ॒ಸನ್ತಾ᳚ ಪ್ರಾ॒ತಸ್ತ್ರೀ-ಲ್ಲಁ॒ಲಾಮಾ॒ನಾ ಲ॑ಭೇತ ಗ್ರೀ॒ಷ್ಮೇ ಮ॒ದ್ಧ್ಯನ್ದಿ॑ನೇ॒ – [ಮ॒ದ್ಧ್ಯನ್ದಿ॑ನೇ, ತ್ರೀಞ್ಛಿ॑ತಿ ಪೃ॒ಷ್ಠಾಞ್ಛ॒ರದ್ಯ॑ಪರಾ॒ಹ್ಣೇ] 21
ತ್ರೀಞ್ಛಿ॑ತಿ ಪೃ॒ಷ್ಠಾಞ್ಛ॒ರದ್ಯ॑ಪರಾ॒ಹ್ಣೇ ತ್ರೀಞ್ಛಿ॑ತಿ॒ವಾರಾ॒-ನ್ತ್ರೀಣಿ॒ ವಾ ಆ॑ದಿ॒ತ್ಯಸ್ಯ॒ ತೇಜಾಗ್ಂ॑ಸಿ ವ॒ಸನ್ತಾ᳚ ಪ್ರಾ॒ತರ್ಗ್ರೀ॒ಷ್ಮೇ ಮ॒ದ್ಧ್ಯನ್ದಿ॑ನೇ ಶ॒ರದ್ಯ॑ಪರಾ॒ಹ್ಣೇ ಯಾವ॑ನ್ತ್ಯೇ॒ವ ತೇಜಾಗ್ಂ॑ಸಿ॒ ತಾನ್ಯೇ॒ವಾವ॑ ರುನ್ಧೇ॒ ತ್ರಯ॑ಸ್ತ್ರಯ॒ ಆ ಲ॑ಭ್ಯನ್ತೇ-ಽಭಿ ಪೂ॒ರ್ವಮೇ॒ವಾಸ್ಮಿ॒-ನ್ತೇಜೋ॑ ದಧಾತಿ ಸಂವಁಥ್ಸ॒ರ-ಮ್ಪ॒ರ್ಯಾಲ॑ಭ್ಯನ್ತೇ ಸಂವಁಥ್ಸ॒ರೋ ವೈ ಬ್ರ॑ಹ್ಮವರ್ಚ॒ಸಸ್ಯ॑ ಪ್ರದಾ॒ತಾ ಸಂ॑ವಁಥ್ಸ॒ರ ಏ॒ವಾಸ್ಮೈ᳚ ಬ್ರಹ್ಮವರ್ಚ॒ಸ-ಮ್ಪ್ರ ಯ॑ಚ್ಛತಿ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತಿ ಸಂವಁಥ್ಸ॒ರಸ್ಯ॑ ಪ॒ರಸ್ತಾ᳚-ತ್ಪ್ರಾಜಾಪ॒ತ್ಯ-ಙ್ಕದ್ರು॒- [ ಪ್ರಾಜಾಪ॒ತ್ಯ-ಙ್ಕದ್ರು᳚ಮ್, ಆ ಲ॑ಭೇತ] 22
-ಮಾ ಲ॑ಭೇತ ಪ್ರ॒ಜಾಪ॑ತಿ॒-ಸ್ಸರ್ವಾ॑ ದೇ॒ವತಾ॑ ದೇ॒ವತಾ᳚ಸ್ವೇ॒ವ ಪ್ರತಿ॑ತಿಷ್ಠತಿ॒ ಯದಿ॑ ಬಿಭೀ॒ಯಾ-ದ್ದು॒ಶ್ಚರ್ಮಾ॑ ಭವಿಷ್ಯಾ॒ಮೀತಿ॑ ಸೋಮಾಪೌ॒ಷ್ಣಗ್ಗ್ ಶ್ಯಾ॒ಮಮಾ ಲ॑ಭೇತ ಸೌ॒ಮ್ಯೋ ವೈ ದೇ॒ವತ॑ಯಾ॒ ಪುರು॑ಷಃ ಪೌ॒ಷ್ಣಾಃ ಪ॒ಶವ॒-ಸ್ಸ್ವಯೈ॒ವಾಸ್ಮೈ॑ ದೇ॒ವತ॑ಯಾ ಪ॒ಶುಭಿ॒ಸ್ತ್ವಚ॑-ಙ್ಕರೋತಿ॒ ನ ದು॒ಶ್ಚರ್ಮಾ॑ ಭವತಿ ದೇ॒ವಾಶ್ಚ॒ ವೈ ಯ॒ಮಶ್ಚಾ॒ಸ್ಮಿ-ಲ್ಲೋಁ॒ಕೇ᳚-ಽಸ್ಪರ್ಧನ್ತ॒ ಸ ಯ॒ಮೋ ದೇ॒ವಾನಾ॑ಮಿನ್ದ್ರಿ॒ಯಂ-ವೀಁ॒ರ್ಯ॑ಮಯುವತ॒ ತದ್ಯ॒ಮಸ್ಯ॑ [ತದ್ಯ॒ಮಸ್ಯ॑, ಯ॒ಮ॒ತ್ವ-ನ್ತೇ] 23
ಯಮ॒ತ್ವ-ನ್ತೇ ದೇ॒ವಾ ಅ॑ಮನ್ಯನ್ತ ಯ॒ಮೋ ವಾ ಇ॒ದಮ॑ಭೂ॒-ದ್ಯ-ದ್ವ॒ಯಗ್ಗ್ ಸ್ಮ ಇತಿ॒ ತೇ ಪ್ರ॒ಜಾಪ॑ತಿ॒ಮುಪಾ॑ಧಾವ॒ನ್-ಥ್ಸ ಏ॒ತೌ ಪ್ರ॒ಜಾಪ॑ತಿರಾ॒ತ್ಮನ॑ ಉಖ್ಷವ॒ಶೌ ನಿರ॑ಮಿಮೀತ॒ ತೇ ದೇ॒ವಾ ವೈ᳚ಷ್ಣಾವರು॒ಣೀಂ-ವಁ॒ಶಾಮಾ-ಽಲ॑ಭನ್ತೈ॒ನ್ದ್ರಮು॒ಖ್ಷಾಣ॒ನ್ತಂ-ವಁರು॑ಣೇನೈ॒ವ ಗ್ರಾ॑ಹಯಿ॒ತ್ವಾ ವಿಷ್ಣು॑ನಾ ಯ॒ಜ್ಞೇನ॒ ಪ್ರಾಣು॑ದನ್ತೈ॒ನ್ದ್ರೇಣೈ॒-ವಾಸ್ಯೇ᳚ನ್ದ್ರಿ॒ಯಮ॑-ವೃಞ್ಜತ॒ ಯೋ ಭ್ರಾತೃ॑ವ್ಯವಾ॒ನ್-ಥ್ಸ್ಯಾ-ಥ್ಸ ಸ್ಪರ್ಧ॑ಮಾನೋ ವೈಷ್ಣಾವರು॒ಣೀಂ- [ವೈಷ್ಣಾವರು॒ಣೀಮ್, ವ॒ಶಾಮಾ] 24
-ವಁ॒ಶಾಮಾ ಲ॑ಭೇತೈ॒ನ್ದ್ರಮು॒ಖ್ಷಾಣಂ॒-ವಁರು॑ಣೇನೈ॒ವ ಭ್ರಾತೃ॑ವ್ಯ-ಙ್ಗ್ರಾಹಯಿ॒ತ್ವಾ ವಿಷ್ಣು॑ನಾ ಯ॒ಜ್ಞೇನ॒ ಪ್ರಣು॑ದತ ಐ॒ನ್ದ್ರೇಣೈ॒ವಾಸ್ಯೇ᳚ನ್ದ್ರಿ॒ಯಂ-ವೃಁ॑ಙ್ಕ್ತೇ॒ ಭವ॑ತ್ಯಾ॒ತ್ಮನಾ॒ ಪರಾ᳚ಸ್ಯ॒ ಭ್ರಾತೃ॑ವ್ಯೋ ಭವ॒ತೀನ್ದ್ರೋ॑ ವೃ॒ತ್ರಮ॑ಹ॒-ನ್ತಂ-ವೃಁ॒ತ್ರೋ ಹ॒ತ-ಷ್ಷೋ॑ಡ॒ಶಭಿ॑-ರ್ಭೋ॒ಗೈರ॑ಸಿನಾ॒-ತ್ತಸ್ಯ॑ ವೃ॒ತ್ರಸ್ಯ॑ ಶೀರ್ಷ॒ತೋ ಗಾವ॒ ಉದಾ॑ಯ॒-ನ್ತಾ ವೈ॑ದೇ॒ಹ್ಯೋ॑-ಽಭವ॒-ನ್ತಾಸಾ॑ಮೃಷ॒ಭೋ ಜ॒ಘನೇ-ಽನೂದೈ॒-ತ್ತಮಿನ್ದ್ರೋ॑- [ಜ॒ಘನೇ-ಽನೂದೈ॒-ತ್ತಮಿನ್ದ್ರಃ॑, ಅ॒ಚಾ॒ಯ॒ಥ್ಸೋ॑-ಽಮನ್ಯತ॒] 25
-ಽಚಾಯ॒ಥ್ಸೋ॑-ಽಮನ್ಯತ॒ ಯೋ ವಾ ಇ॒ಮಮಾ॒ಲಭೇ॑ತ॒ ಮುಚ್ಯೇ॑ತಾ॒ಸ್ಮಾ-ತ್ಪಾ॒ಪ್ಮನ॒ ಇತಿ॒ ಸ ಆ᳚ಗ್ನೇ॒ಯ-ಙ್ಕೃ॒ಷ್ಣಗ್ರೀ॑ವ॒ಮಾ ಲ॑ಭತೈ॒ನ್ದ್ರಮೃ॑ಷ॒ಭ-ನ್ತಸ್ಯಾ॒ಗ್ನಿರೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಸೃತ-ಷ್ಷೋಡಶ॒ಧಾ ವೃ॒ತ್ರಸ್ಯ॑ ಭೋ॒ಗಾನಪ್ಯ॑ದಹದೈ॒ನ್ದ್ರೇಣೇ᳚ನ್ದ್ರಿ॒ಯ- ಮಾ॒ತ್ಮನ್ನ॑ಧತ್ತ॒ ಯಃ ಪಾ॒ಪ್ಮನಾ॑ ಗೃಹೀ॒ತ-ಸ್ಸ್ಯಾ-ಥ್ಸ ಆ᳚ಗ್ನೇ॒ಯ-ಙ್ಕೃ॒ಷ್ಣಗ್ರೀ॑ವ॒ಮಾ ಲ॑ಭೇತೈ॒ನ್ದ್ರಮೃ॑ಷ॒ಭ-ಮ॒ಗ್ನಿರೇ॒ವಾಸ್ಯ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ಸೃತಃ [ ] 26
ಪಾ॒ಪ್ಮಾನ॒ಮಪಿ॑ ದಹತ್ಯೈ॒ನ್ದ್ರೇಣೇ᳚ನ್ದ್ರಿ॒ಯಮಾ॒ತ್ಮ-ನ್ಧ॑ತ್ತೇ॒ ಮುಚ್ಯ॑ತೇ ಪಾ॒ಪ್ಮನೋ॒ ಭವ॑ತ್ಯೇ॒ವ ದ್ಯಾ॑ವಾಪೃಥಿ॒ವ್ಯಾ᳚-ನ್ಧೇ॒ನುಮಾ ಲ॑ಭೇತ॒ ಜ್ಯೋಗ॑ಪರುದ್ಧೋ॒ ಽನಯೋ॒ರ್॒ಹಿ ವಾ ಏ॒ಷೋ-ಽಪ್ರ॑ತಿಷ್ಠಿ॒ತೋ-ಽಥೈ॒ಷ ಜ್ಯೋಗಪ॑ರುದ್ಧೋ॒ ದ್ಯಾವಾ॑ಪೃಥಿ॒ವೀ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತೇ ಏ॒ವೈನ॑-ಮ್ಪ್ರತಿ॒ಷ್ಠಾ-ಙ್ಗ॑ಮಯತಃ॒ ಪ್ರತ್ಯೇ॒ವ ತಿ॑ಷ್ಠತಿ ಪರ್ಯಾ॒ರಿಣೀ॑ ಭವತಿ ಪರ್ಯಾ॒ರೀವ॒ ಹ್ಯೇ॑ತಸ್ಯ॑ ರಾ॒ಷ್ಟ್ರಂ-ಯೋಁ ಜ್ಯೋಗ॑ಪರುದ್ಧ॒-ಸ್ಸಮೃ॑ದ್ಧ್ಯೈ ವಾಯ॒ವ್ಯಂ॑- [ವಾಯ॒ವ್ಯ᳚ಮ್, ವ॒ಥ್ಸಮಾ] 27
-ವಁ॒ಥ್ಸಮಾ ಲ॑ಭೇತ ವಾ॒ಯುರ್ವಾ ಅ॒ನಯೋ᳚ರ್ವ॒ಥ್ಸ ಇ॒ಮೇ ವಾ ಏ॒ತಸ್ಮೈ॑ ಲೋ॒ಕಾ ಅಪ॑ಶುಷ್ಕಾ॒ ವಿಡಪ॑ಶು॒ಷ್ಕಾ-ಽಥೈ॒ಷ ಜ್ಯೋಗಪ॑ರುದ್ಧೋ ವಾ॒ಯುಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॑ ಇ॒ಮಾಂ-ಲೋಁ॒ಕಾನ್. ವಿಶ॒-ಮ್ಪ್ರದಾ॑ಪಯತಿ॒ ಪ್ರಾಸ್ಮಾ॑ ಇ॒ಮೇ ಲೋ॒ಕಾ-ಸ್ಸ್ನು॑ವನ್ತಿಭುಞ್ಜ॒ತ್ಯೇ॑ನಂ॒-ವಿಁಡುಪ॑ತಿಷ್ಠತೇ ॥ 28 ॥
(ಮ॒ಧ್ಯನ್ದಿ॑ನೇ॒ – ಕದ್ರುಂ॑ – ಯಁ॒ಮಸ್ಯ॒ – ಸ್ಪರ್ಧ॑ಮಾನೋ ವೈಷ್ಣಾವರು॒ಣೀಂ -ತಮಿನ್ದ್ರೋ᳚ – ಽಸ್ಯ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ಸೃತೋ – ವಾಯ॒ವ್ಯಂ॑ – ದ್ವಿಚ॑ತ್ವಾರಿಗ್ಂಶಚ್ಚ) (ಅ. 4)
ಇನ್ದ್ರೋ॑ ವ॒ಲಸ್ಯ॒ ಬಿಲ॒ಮಪೌ᳚ರ್ಣೋ॒-ಥ್ಸ ಯ ಉ॑ತ್ತ॒ಮಃ ಪ॒ಶುರಾಸೀ॒-ತ್ತ-ಮ್ಪೃ॒ಷ್ಠ-ಮ್ಪ್ರತಿ॑ ಸ॒ಗೃಂಹ್ಯೋದ॑ಕ್ಖಿದ॒-ತ್ತಗ್ಂ ಸ॒ಹಸ್ರ॑-ಮ್ಪ॒ಶವೋ-ಽನೂದಾ॑ಯ॒ನ್-ಥ್ಸ ಉ॑ನ್ನ॒ತೋ॑-ಽಭವ॒ದ್ಯಃ ಪ॒ಶುಕಾ॑ಮ॒-ಸ್ಸ್ಯಾ-ಥ್ಸ ಏ॒ತಮೈ॒ನ್ದ್ರಮು॑ನ್ನ॒ತಮಾ ಲ॑ಭೇ॒ತೇನ್ದ್ರ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಪ॒ಶೂ-ನ್ಪ್ರಯ॑ಚ್ಛತಿ ಪಶು॒ಮಾನೇ॒ವ ಭ॑ವತ್ಯುನ್ನ॒ತೋ [ಭ॑ವತ್ಯುನ್ನ॒ತಃ, ಭ॒ವ॒ತಿ॒ ಸಾ॒ಹ॒ಸ್ರೀ] 29
ಭ॑ವತಿ ಸಾಹ॒ಸ್ರೀ ವಾ ಏ॒ಷಾ ಲ॒ಖ್ಷ್ಮೀ ಯದು॑ನ್ನ॒ತೋ ಲ॒ಖ್ಷ್ಮಿಯೈ॒ ವ ಪ॒ಶೂನವ॑ ರುನ್ಧೇ ಯ॒ದಾ ಸ॒ಹಸ್ರ॑-ಮ್ಪ॒ಶೂ-ನ್ಪ್ರಾ᳚ಪ್ನು॒ಯಾದಥ॑ ವೈಷ್ಣ॒ವಂ-ವಾಁ॑ ಮ॒ನಮಾ ಲ॑ಭೇತೈ॒ತಸ್ಮಿ॒ನ್. ವೈ ತ-ಥ್ಸ॒ಹಸ್ರ॒ಮದ್ಧ್ಯ॑ತಿಷ್ಠ॒-ತ್ತಸ್ಮಾ॑ದೇ॒ಷ ವಾ॑ಮ॒ನ-ಸ್ಸಮೀ॑ಷಿತಃ ಪ॒ಶುಭ್ಯ॑ ಏ॒ವ ಪ್ರಜಾ॑ತೇಭ್ಯಃ ಪ್ರತಿ॒ಷ್ಠಾ-ನ್ದ॑ಧಾತಿ॒ ಕೋ॑-ಽರ್ಹತಿ ಸ॒ಹಸ್ರ॑-ಮ್ಪ॒ಶೂ-ನ್ಪ್ರಾಪ್ತು॒ಮಿತ್ಯಾ॑ಹು-ರಹೋರಾ॒ತ್ರಾಣ್ಯೇ॒ವ ಸ॒ಹಸ್ರಗ್ಂ॑ ಸ॒ಮ್ಪಾದ್ಯಾ-ಽಽಲ॑ಭೇತ ಪ॒ಶವೋ॒ [ಪ॒ಶವಃ॑, ವಾ ಅ॑ಹೋರಾ॒ತ್ರಾಣಿ॑] 30
ವಾ ಅ॑ಹೋರಾ॒ತ್ರಾಣಿ॑ ಪ॒ಶೂನೇ॒ವ ಪ್ರಜಾ॑ತಾ-ನ್ಪ್ರತಿ॒ಷ್ಠಾ-ಙ್ಗ॑ಮಯ॒-ತ್ಯೋಷ॑ಧೀಭ್ಯೋ ವೇ॒ಹತ॒ಮಾ ಲ॑ಭೇತ ಪ್ರ॒ಜಾಕಾ॑ಮ॒ ಓಷ॑ಧಯೋ॒ ವಾ ಏ॒ತ-ಮ್ಪ್ರ॒ಜಾಯೈ॒ ಪರಿ॑ಬಾಧನ್ತೇ॒ ಯೋ-ಽಲ॑-ಮ್ಪ್ರ॒ಜಾಯೈ॒ ಸ-ನ್ಪ್ರ॒ಜಾ-ನ್ನ ವಿ॒ನ್ದತ॒ ಓಷ॑ಧಯಃ॒ ಖಲು॒ ವಾ ಏ॒ತಸ್ಯೈ॒ ಸೂತು॒ಮಪಿ॑ ಘ್ನನ್ತಿ॒ ಯಾ ವೇ॒ಹ-ದ್ಭವ॒ತ್ಯೋಷ॑ಧೀರೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾ ಏ॒ವಾಸ್ಮೈ॒ ಸ್ವಾದ್ಯೋನೇಃ᳚ ಪ್ರ॒ಜಾ-ಮ್ಪ್ರ ಜ॑ನಯನ್ತಿ ವಿ॒ನ್ದತೇ᳚ [ ] 31
ಪ್ರ॒ಜಾಮಾಪೋ॒ ವಾ ಓಷ॑ಧ॒ಯೋ-ಽಸ॒-ತ್ಪುರು॑ಷ॒ ಆಪ॑ ಏ॒ವಾಸ್ಮಾ॒ ಅಸ॑ತ॒-ಸ್ಸದ್ದ॑ದತಿ॒ ತಸ್ಮಾ॑ದಾಹು॒ರ್ಯಶ್ಚೈ॒ವಂ-ವೇಁದ॒ ಯಶ್ಚ॒ ನಾಪ॒ಸ್ತ್ವಾವಾಸ॑ತ॒-ಸ್ಸದ್ದ॑ದ॒ತೀ-ತ್ಯೈ॒ನ್ದ್ರೀಗ್ಂ ಸೂ॒ತವ॑ಶಾ॒ಮಾ ಲ॑ಭೇತ॒ ಭೂತಿ॑ಕಾ॒ಮೋ-ಽಜಾ॑ತೋ॒ ವಾ ಏ॒ಷ ಯೋ-ಽಲ॒-ಮ್ಭೂತ್ಯೈ॒ ಸ-ನ್ಭೂತಿ॒-ನ್ನ ಪ್ರಾ॒ಪ್ನೋತೀನ್ದ್ರ॒-ಙ್ಖಲು॒ ವಾ ಏ॒ಷಾ ಸೂ॒ತ್ವಾ ವ॒ಶಾ-ಽಭ॑ವ॒- [ವ॒ಶಾ-ಽಭ॑ವತ್, ಇನ್ದ್ರ॑ಮೇ॒ವ] 32
-ದಿನ್ದ್ರ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ಮ್ಭೂತಿ॑-ಙ್ಗಮಯತಿ॒ ಭವ॑ತ್ಯೇ॒ವ ಯಗ್ಂ ಸೂ॒ತ್ವಾ ವ॒ಶಾ ಸ್ಯಾ-ತ್ತಮೈ॒ನ್ದ್ರಮೇ॒ವಾ-ಽಽ ಲ॑ಭೇತೈ॒ತದ್ವಾವ ತದಿ॑ನ್ದ್ರಿ॒ಯಗ್ಂ ಸಾ॒ಖ್ಷಾದೇ॒ವೇನ್ದ್ರಿ॒ಯಮವ॑ ರುನ್ಧ ಐನ್ದ್ರಾ॒ಗ್ನ-ಮ್ಪು॑ನರು-ಥ್ಸೃ॒ಷ್ಟಮಾ ಲ॑ಭೇತ॒ ಯ ಆ ತೃ॒ತೀಯಾ॒-ತ್ಪುರು॑ಷಾ॒-ಥ್ಸೋಮ॒-ನ್ನ ಪಿಬೇ॒-ದ್ವಿಚ್ಛಿ॑ನ್ನೋ॒ ವಾ ಏ॒ತಸ್ಯ॑ ಸೋಮಪೀ॒ಥೋ ಯೋ ಬ್ರಾ᳚ಹ್ಮ॒ಣ-ಸ್ಸನ್ನಾ [ ] 33
ತೃ॒ತೀಯಾ॒-ತ್ಪುರು॑ಷಾ॒-ಥ್ಸೋಮ॒-ನ್ನ ಪಿಬ॑ತೀನ್ದ್ರಾ॒ಗ್ನೀ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮೈ॑ ಸೋಮಪೀ॒ಥ-ಮ್ಪ್ರಯ॑ಚ್ಛತ॒ ಉಪೈ॑ನಗ್ಂ ಸೋಮಪೀ॒ಥೋ ನ॑ಮತಿ॒ ಯದೈ॒ನ್ದ್ರೋ ಭವ॑ತೀನ್ದ್ರಿ॒ಯಂ-ವೈಁ ಸೋ॑ಮಪೀ॒ಥ ಇ॑ನ್ದ್ರಿ॒ಯಮೇ॒ವ ಸೋ॑ಮಪೀ॒ಥಮವ॑ ರುನ್ಧೇ॒ ಯದಾ᳚ಗ್ನೇ॒ಯೋ ಭವ॑ತ್ಯಾಗ್ನೇ॒ಯೋ ವೈ ಬ್ರಾ᳚ಹ್ಮ॒ಣ-ಸ್ಸ್ವಾಮೇ॒ವ ದೇ॒ವತಾ॒ಮನು॒ ಸನ್ತ॑ನೋತಿ ಪುನರುಥ್ಸೃ॒ಷ್ಟೋ ಭ॑ವತಿ ಪುನರುಥ್ಸೃ॒ಷ್ಟ ಇ॑ವ॒ ಹ್ಯೇ॑ತಸ್ಯ॑ [ಹ್ಯೇ॑ತಸ್ಯ॑, ಸೋ॒ಮ॒ಪೀ॒ಥ-ಸ್ಸಮೃ॑ದ್ಧ್ಯೈ] 34
ಸೋಮಪೀ॒ಥ-ಸ್ಸಮೃ॑ದ್ಧ್ಯೈ ಬ್ರಾಹ್ಮಣಸ್ಪ॒ತ್ಯ-ನ್ತೂ॑ಪ॒ರಮಾ ಲ॑ಭೇತಾ-ಭಿ॒ಚರ॒-ನ್ಬ್ರಹ್ಮ॑ಣ॒ಸ್ಪತಿ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಸ್ಮಾ॑ ಏ॒ವೈನ॒ಮಾ ವೃ॑ಶ್ಚತಿ ತಾ॒ಜಗಾರ್ತಿ॒-ಮಾರ್ಚ್ಛ॑ತಿ ತೂಪ॒ರೋ ಭ॑ವತಿ ಖ್ಷು॒ರಪ॑ವಿ॒ರ್ವಾ ಏ॒ಷಾ ಲ॒ಖ್ಷ್ಮೀ ಯ-ತ್ತೂ॑ಪ॒ರ-ಸ್ಸಮೃ॑ದ್ಧ್ಯೈ॒ ಸ್ಫ್ಯೋ ಯೂಪೋ॑ ಭವತಿ॒ ವಜ್ರೋ॒ ವೈ ಸ್ಫ್ಯೋ ವಜ್ರ॑ಮೇ॒ವಾಸ್ಮೈ॒ ಪ್ರಹ॑ರತಿ ಶರ॒ಮಯ॑-ಮ್ಬ॒ರ್॒ಹಿ-ಶ್ಶೃ॒ಣಾತ್ಯೇ॒ವೈನಂ॒-ವೈಁಭೀ॑ದಕ ಇ॒ದ್ಧ್ಮೋ ಭಿ॒ನತ್ತ್ಯೇ॒ವೈನ᳚ಮ್ ॥ 35 ॥
(ಭ॒ವ॒ತ್ಯು॒ನ್ನ॒ತಃ – ಪ॒ಶವೋ॑ – ಜನಯನ್ತಿ ವಿ॒ನ್ದತೇ॑ – ಽಭವ॒ಥ್ – ಸನ್ನೈ – ತಸ್ಯೇ॒ – ಧ್ಮ – ಸ್ತ್ರೀಣಿ॑ ಚ) (ಅ. 5)
ಬಾ॒ರ್॒ಹ॒ಸ್ಪ॒ತ್ಯಗ್ಂ ಶಿ॑ತಿಪೃ॒ಷ್ಠಮಾ ಲ॑ಭೇತ॒ ಗ್ರಾಮ॑ಕಾಮೋ॒ ಯಃ ಕಾ॒ಮಯೇ॑ತ ಪೃ॒ಷ್ಠಗ್ಂ ಸ॑ಮಾ॒ನಾನಾಗ್॑ ಸ್ಯಾ॒ಮಿತಿ॒ ಬೃಹ॒ಸ್ಪತಿ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॑-ಮ್ಪೃ॒ಷ್ಠಗ್ಂ ಸ॑ಮಾ॒ನಾನಾ᳚-ಙ್ಕರೋತಿ ಗ್ರಾ॒ಮ್ಯೇ॑ವ ಭ॑ವತಿ ಶಿತಿಪೃ॒ಷ್ಠೋ ಭ॑ವತಿ ಬಾರ್ಹಸ್ಪ॒ತ್ಯೋ ಹ್ಯೇ॑ಷ ದೇ॒ವತ॑ಯಾ॒ ಸಮೃ॑ದ್ಧ್ಯೈ ಪೌ॒ಷ್ಣಗ್ಗ್ ಶ್ಯಾ॒ಮಮಾ ಲ॑ಭೇ॒ತಾನ್ನ॑ಕಾ॒ಮೋ-ಽನ್ನಂ॒-ವೈಁ ಪೂ॒ಷಾ ಪೂ॒ಷಣ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॒ [ಏ॒ವಾಸ್ಮೈ᳚, ಅನ್ನ॒-ಮ್ಪ್ರ] 36
ಅನ್ನ॒-ಮ್ಪ್ರ ಯ॑ಚ್ಛತ್ಯನ್ನಾ॒ದ ಏ॒ವ ಭ॑ವತಿ ಶ್ಯಾ॒ಮೋ ಭ॑ವತ್ಯೇ॒ತದ್ವಾ ಅನ್ನ॑ಸ್ಯ ರೂ॒ಪಗ್ಂ ಸಮೃ॑ದ್ಧ್ಯೈ ಮಾರು॒ತ-ಮ್ಪೃಶ್ಞಿ॒ಮಾ ಲ॑ಭೇ॒ತಾ-ಽನ್ನ॑-ಕಾ॒ಮೋ-ಽನ್ನಂ॒-ವೈಁ ಮ॒ರುತೋ॑ಮ॒ರುತ॑ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮಾ॒ ಅನ್ನ॒-ಮ್ಪ್ರಯ॑ಚ್ಛನ್ತ್ಯನ್ನಾ॒ದಏ॒ವ ಭ॑ವತಿ॒ ಪೃಶ್ಞಿ॑ ರ್ಭವತ್ಯೇ॒ತದ್ವಾ ಅನ್ನ॑ಸ್ಯ ರೂ॒ಪಗ್ಂ ಸಮೃ॑ದ್ಧ್ಯಾ ಐ॒ನ್ದ್ರಮ॑ರು॒ಣಮಾ ಲ॑ಭೇತೇನ್ದ್ರಿ॒ಯಕಾ॑ಮ॒ ಇನ್ದ್ರ॑ಮೇ॒ವ [ ] 37
ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑ನ್ನಿನ್ದ್ರಿ॒ಯ-ನ್ದ॑ಧಾತೀನ್ದ್ರಿಯಾ॒ವ್ಯೇ॑ವ ಭ॑ವತ್ಯರು॒ಣೋ ಭ್ರೂಮಾ᳚-ನ್ಭವತ್ಯೇ॒ತದ್ವಾ ಇನ್ದ್ರ॑ಸ್ಯ ರೂ॒ಪಗ್ಂ ಸಮೃ॑ದ್ಧ್ಯೈ ಸಾವಿ॒ತ್ರಮು॑ಪದ್ಧ್ವ॒ಸ್ತಮಾ ಲ॑ಭೇತ ಸ॒ನಿಕಾ॑ಮ-ಸ್ಸವಿ॒ತಾ ವೈ ಪ್ರ॑ಸ॒ವಾನಾ॑ಮೀಶೇ ಸವಿ॒ತಾರ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಸ॒ನಿ-ಮ್ಪ್ರಸು॑ವತಿ॒ ದಾನ॑ಕಾಮಾ ಅಸ್ಮೈ ಪ್ರ॒ಜಾ ಭ॑ವನ್ತ್ಯುಪದ್ಧ್ವ॒ಸ್ತೋ ಭ॑ವತಿ ಸಾವಿ॒ತ್ರೋ ಹ್ಯೇ॑ಷ [ಸಾವಿ॒ತ್ರೋ ಹ್ಯೇ॑ಷಃ, ದೇ॒ವತ॑ಯಾ॒ ಸಮೃ॑ದ್ಧ್ಯೈ] 38
ದೇ॒ವತ॑ಯಾ॒ ಸಮೃ॑ದ್ಧ್ಯೈ ವೈಶ್ವದೇ॒ವ-ಮ್ಬ॑ಹುರೂ॒ಪಮಾ ಲ॑ಭೇ॒ತಾ-ಽನ್ನ॑ಕಾಮೋವೈಶ್ವದೇ॒ವಂ-ವಾಁ ಅನ್ನಂ॒-ವಿಁಶ್ವಾ॑ನೇ॒ವ ದೇ॒ವಾನ್-ಥ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ತ ಏ॒ವಾಸ್ಮಾ॒ ಅನ್ನ॒-ಮ್ಪ್ರಯ॑ಚ್ಛನ್ತ್ಯನ್ನಾ॒ದ ಏ॒ವ ಭ॑ವತಿ ಬಹುರೂ॒ಪೋ ಭ॑ವತಿಬಹುರೂ॒ಪಗ್ಗ್ ಹ್ಯನ್ನ॒ಗ್ಂ॒ ಸಮೃ॑ದ್ಧ್ಯೈ ವೈಶ್ವದೇ॒ವ-ಮ್ಬ॑ಹುರೂ॒ಪಮಾ ಲ॑ಭೇತ॒ ಗ್ರಾಮ॑ಕಾಮೋ ವೈಶ್ವದೇ॒ವಾ ವೈ ಸ॑ಜಾ॒ತಾ ವಿಶ್ವಾ॑ನೇ॒ವ ದೇ॒ವಾನ್-ಥ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾ-ಽಸ್ಮೈ॑ [ಏ॒ವಾ-ಽಸ್ಮೈ᳚, ಸ॒ಜಾ॒ತಾ-ನ್ಪ್ರ ಯ॑ಚ್ಛನ್ತಿ] 39
ಸಜಾ॒ತಾ-ನ್ಪ್ರ ಯ॑ಚ್ಛನ್ತಿ ಗ್ರಾ॒ಮ್ಯೇ॑ವ ಭ॑ವತಿ ಬಹುರೂ॒ಪೋ ಭ॑ವತಿ ಬಹುದೇವ॒ತ್ಯೋ᳚(1॒) ಹ್ಯೇ॑ಷ ಸಮೃ॑ದ್ಧ್ಯೈ ಪ್ರಾಜಾಪ॒ತ್ಯ-ನ್ತೂ॑ಪ॒ರಮಾ ಲ॑ಭೇತ॒ ಯಸ್ಯಾನಾ᳚ಜ್ಞಾತಮಿವ॒ ಜ್ಯೋಗಾ॒ಮಯೇ᳚-ತ್ಪ್ರಾಜಾಪ॒ತ್ಯೋ ವೈ ಪುರು॑ಷಃ ಪ್ರ॒ಜಾಪ॑ತಿಃ॒ ಖಲು॒ ವೈ ತಸ್ಯ॑ ವೇದ॒ ಯಸ್ಯಾನಾ᳚ಜ್ಞಾತಮಿವ॒ ಜ್ಯೋಗಾ॒ಮಯ॑ತಿ ಪ್ರ॒ಜಾಪ॑ತಿಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ನ್ತಸ್ಮಾ॒-ಥ್ಸ್ರಾಮಾ᳚-ನ್ಮುಞ್ಚತಿ ತೂಪ॒ರೋ ಭ॑ವತಿ ಪ್ರಾಜಾಪ॒ತ್ಯೋ ಹ್ಯೇ॑ -ಷ ದೇ॒ವತ॑ಯಾ॒ ಸಮೃ॑ದ್ಧ್ಯೈ ॥ 40 ॥
(ಅ॒ಸ್ಮಾ॒ – ಇನ್ದ್ರ॑ಮೇ॒ವೈ – ಷ – ಸ॑ಜಾ॒ತಾ ವಿಶ್ವಾ॑ನೇ॒ವ ದೇ॒ವಾನ್-ಥ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮೈ᳚ – ಪ್ರಾಜಾಪ॒ತ್ಯೋ ಹಿ – ತ್ರೀಣಿ॑ ಚ) (ಅ. 11)
ವ॒ಷ॒ಟ್ಕಾ॒ರೋ ವೈ ಗಾ॑ಯತ್ರಿ॒ಯೈ ಶಿರೋ᳚-ಽಚ್ಛಿನ॒-ತ್ತಸ್ಯೈ॒ ರಸಃ॒ ಪರಾ॑ಪತ॒-ತ್ತ-ಮ್ಬೃಹ॒ಸ್ಪತಿ॒ ರುಪಾ॑-ಽಗೃಹ್ಣಾ॒ಥ್ಸಾ ಶಿ॑ತಿಪೃ॒ಷ್ಠಾ ವ॒ಶಾ-ಽಭ॑ವ॒ದ್ಯೋ ದ್ವಿ॒ತೀಯಃ॑ ಪ॒ರಾ-ಽಪ॑ತ॒-ತ್ತ-ಮ್ಮಿ॒ತ್ರಾವರು॑ಣಾ॒-ವುಪಾ॑ಗೃಹ್ಣೀತಾ॒ಗ್ಂ॒ ಸಾ ದ್ವಿ॑ರೂ॒ಪಾ ವ॒ಶಾ-ಽಭ॑ವ॒-ದ್ಯಸ್ತೃ॒ತೀಯಃ॑ ಪ॒ರಾಪ॑ತ॒-ತ್ತಂ-ವಿಁಶ್ವೇ॑ ದೇ॒ವಾ ಉಪಾ॑ಗೃಹ್ಣ॒ನ್-ಥ್ಸಾ ಬ॑ಹುರೂ॒ಪಾ ವ॒ಶಾ ಭ॑ವ॒ದ್ಯ-ಶ್ಚ॑ತು॒ರ್ಥಃ ಪ॒ರಾಪ॑ತ॒-ಥ್ಸ ಪೃ॑ಥಿ॒ವೀ-ಮ್ಪ್ರಾ-ಽವಿ॑ಶ॒-ತ್ತ-ಮ್ಬೃಹ॒ಸ್ಪತಿ॑ರ॒- [ಬೃಹ॒ಸ್ಪತಿ॑ರ॒ಭಿ, ಅ॒ಗೃ॒ಹ್ಣಾ॒-ದಸ್ತ್ವೇ॒ವಾ-ಽಯಂ-] 41
-ಭ್ಯ॑ಗೃಹ್ಣಾ॒-ದಸ್ತ್ವೇ॒ವಾ-ಽಯ-ಮ್ಭೋಗಾ॒ಯೇತಿ॒ ಸ ಉ॑ಖ್ಷವ॒ಶ-ಸ್ಸಮ॑ಭವ॒-ದ್ಯಲ್ಲೋಹಿ॑ತ-ಮ್ಪ॒ರಾಪ॑ತ॒-ತ್ತ-ದ್ರು॒ದ್ರ ಉಪಾ॑-ಽಗೃಹ್ಣಾ॒-ಥ್ಸಾ ರೌ॒ದ್ರೀ ರೋಹಿ॑ಣೀ ವ॒ಶಾ-ಽಭ॑ವ-ದ್ಬಾರ್ಹಸ್ಪ॒ತ್ಯಾಗ್ಂ ಶಿ॑ತಿಪೃ॒ಷ್ಠಾಮಾ ಲ॑ಭೇತ ಬ್ರಹ್ಮವರ್ಚ॒ಸಕಾ॑ಮೋ॒ ಬೃಹ॒ಸ್ಪತಿ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ನ್ದ॑ಧಾತಿ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತಿ॒ ಛನ್ದ॑ಸಾಂ॒-ವಾಁ ಏ॒ಷ ರಸೋ॒ ಯದ್ವ॒ಶಾ ರಸ॑ ಇವ॒ ಖಲು॒ [ಖಲು॑, ವೈ] 42
ವೈ ಬ್ರ॑ಹ್ಮವರ್ಚ॒ಸ-ಞ್ಛನ್ದ॑ಸಾಮೇ॒ವ ರಸೇ॑ನ॒ ರಸ॑-ಮ್ಬ್ರಹ್ಮವರ್ಚ॒ಸಮವ॑ ರುನ್ಧೇ ಮೈತ್ರಾವರು॒ಣೀ-ನ್ದ್ವಿ॑ರೂ॒ಪಾಮಾ ಲ॑ಭೇತ॒ ವೃಷ್ಟಿ॑ಕಾಮೋ ಮೈ॒ತ್ರಂ-ವಾಁ ಅಹ॑ರ್ವಾರು॒ಣೀ ರಾತ್ರಿ॑ರಹೋರಾ॒ತ್ರಾಭ್ಯಾ॒-ಙ್ಖಲು॒ ವೈ ಪ॒ರ್ಜನ್ಯೋ॑ ವರ್ಷತಿ ಮಿ॒ತ್ರಾವರು॑ಣಾವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಾ॑ ಅಹೋರಾ॒ತ್ರಾಭ್ಯಾ᳚-ಮ್ಪ॒ರ್ಜನ್ಯಂ॑-ವಁರ್ಷಯತ॒-ಶ್ಛನ್ದ॑ಸಾಂ॒-ವಾಁ ಏ॒ಷ ರಸೋ॒ ಯದ್ವ॒ಶಾ ರಸ॑ ಇವ॒ ಖಲು॒ ವೈ ವೃಷ್ಟಿ॒-ಶ್ಛನ್ದ॑ಸಾಮೇ॒ವ ರಸೇ॑ನ॒ [ರಸೇ॑ನ, ರಸಂ॒-ವೃಁಷ್ಟಿ॒ಮವ॑ ರುನ್ಧೇ] 43
ರಸಂ॒-ವೃಁಷ್ಟಿ॒ಮವ॑ ರುನ್ಧೇ ಮೈತ್ರಾವರು॒ಣೀ-ನ್ದ್ವಿ॑ರೂ॒ಪಾಮಾ ಲ॑ಭೇತ ಪ್ರ॒ಜಾಕಾ॑ಮೋ ಮೈ॒ತ್ರಂ-ವಾಁ ಅಹ॑ರ್ವಾರು॒ಣೀ ರಾತ್ರಿ॑ರಹೋರಾ॒ತ್ರಾಭ್ಯಾ॒-ಙ್ಖಲು॒ ವೈ ಪ್ರ॒ಜಾಃ ಪ್ರಜಾ॑ಯನ್ತೇ ಮಿ॒ತ್ರಾವರು॑ಣಾವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಾ॑ ಅಹೋರಾ॒ತ್ರಾಭ್ಯಾ᳚-ಮ್ಪ್ರ॒ಜಾ-ಮ್ಪ್ರಜ॑ನಯತ॒-ಶ್ಛನ್ದ॑ಸಾಂ॒-ವಾಁ ಏ॒ಷ ರಸೋ॒ ಯದ್ವ॒ಶಾ ರಸ॑ ಇವ॒ ಖಲು॒ ವೈ ಪ್ರ॒ಜಾ ಛನ್ದ॑ಸಾಮೇ॒ವ ರಸೇ॑ನ॒ ರಸ॑-ಮ್ಪ್ರ॒ಜಾಮವ॑- [ರಸ॑-ಮ್ಪ್ರ॒ಜಾಮವ॑, ರು॒ನ್ಧೇ॒ ವೈ॒ಶ್ವ॒ದೇ॒ವೀಂ-] 44
-ರುನ್ಧೇ ವೈಶ್ವದೇ॒ವೀ-ಮ್ಬ॑ಹುರೂ॒ಪಾಮಾ ಲ॑ಭೇ॒ತಾನ್ನ॑ಕಾಮೋ ವೈಶ್ವದೇ॒ವಂ-ವಾಁ ಅನ್ನಂ॒-ವಿಁಶ್ವಾ॑ನೇ॒ವ ದೇ॒ವಾನ್-ಥ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮಾ॒ ಅನ್ನಂ॒ ಪ್ರಯ॑ಚ್ಛನ್ತ್ಯನ್ನಾ॒ದ ಏ॒ವ ಭ॑ವತಿ॒ ಛನ್ದ॑ಸಾಂ॒-ವಾಁ ಏ॒ಷ ರಸೋ॒ ಯದ್ವ॒ಶಾ ರಸ॑ ಇವ॒ ಖಲು॒ ವಾ ಅನ್ನ॒-ಞ್ಛನ್ದ॑ಸಾಮೇ॒ವ ರಸೇ॑ನ॒ ರಸ॒ಮನ್ನ॒ಮವ॑ ರುನ್ಧೇ ವೈಶ್ವದೇ॒ವೀ-ಮ್ಬ॑ಹುರೂ॒ಪಾಮಾ ಲ॑ಭೇತ॒ ಗ್ರಾಮ॑ಕಾಮೋ ವೈಶ್ವದೇ॒ವಾ ವೈ [ವೈ, ಸ॒ಜಾ॒ತಾ ವಿಶ್ವಾ॑ನೇ॒ವ] 45
ಸ॑ಜಾ॒ತಾ ವಿಶ್ವಾ॑ನೇ॒ವ ದೇ॒ವಾನ್-ಥ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮೈ॑ ಸಜಾ॒ತಾ-ನ್ಪ್ರ ಯ॑ಚ್ಛನ್ತಿ ಗ್ರಾ॒ಮ್ಯೇ॑ವ ಭ॑ವತಿ॒ ಛನ್ದ॑ಸಾಂ॒-ವಾಁ ಏ॒ಷ ರಸೋ॒ ಯದ್ವ॒ಶಾ ರಸ॑ ಇವ॒ ಖಲು॒ ವೈ ಸ॑ಜಾ॒ತಾ-ಶ್ಛನ್ದ॑ಸಾಮೇ॒ವ ರಸೇ॑ನ॒ ರಸಗ್ಂ॑ ಸಜಾ॒ತಾನವ॑ ರುನ್ಧೇ ಬಾರ್ಹಸ್ಪ॒ತ್ಯ- ಮು॑ಖ್ಷವ॒ಶಮಾ ಲ॑ಭೇತ ಬ್ರಹ್ಮವರ್ಚ॒ಸಕಾ॑ಮೋ॒ ಬೃಹ॒ಸ್ಪತಿ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾ-ಽಸ್ಮಿ॑-ನ್ಬ್ರಹ್ಮವರ್ಚ॒ಸಂ- [ಏ॒ವಾ-ಽಸ್ಮಿ॑-ನ್ಬ್ರಹ್ಮವರ್ಚ॒ಸಮ್, ದ॒ಧಾ॒ತಿ॒ ಬ್ರ॒ಹ್ಮ॒ವ॒ರ್ಚ॒ಸ್ಯೇ॑ವ] 46
-ದ॑ಧಾತಿ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತಿ॒ ವಶಂ॒-ವಾಁ ಏ॒ಷ ಚ॑ರತಿ॒ ಯದು॒ಖ್ಷಾವಶ॑ ಇವ॒ ಖಲು॒ ವೈ ಬ್ರ॑ಹ್ಮವರ್ಚ॒ಸಂ-ವಁಶೇ॑ನೈ॒ವ ವಶ॑-ಮ್ಬ್ರಹ್ಮವರ್ಚ॒ಸಮವ॑ ರುನ್ಧೇರೌ॒ದ್ರೀಗ್ಂರೋಹಿ॑ಣೀ॒ಮಾ ಲ॑ಭೇತಾಭಿ॒ಚರ॑-ನ್ರು॒ದ್ರಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಸ್ಮಾ॑ ಏ॒ವೈನ॒ಮಾ ವೃ॑ಶ್ಚತಿ ತಾ॒ಜಗಾರ್ತಿ॒ಮಾರ್ಚ್ಛ॑ತಿ॒ ರೋಹಿ॑ಣೀ ಭವತಿ ರೌ॒ದ್ರೀ ಹ್ಯೇ॑ಷಾ ದೇ॒ವತ॑ಯಾ॒ ಸಮೃ॑ದ್ಧ್ಯೈ॒ ಸ್ಫ್ಯೋ ಯೂಪೋ॑ ಭವತಿ॒ ವಜ್ರೋ॒ ವೈ ಸ್ಫ್ಯೋ ವಜ್ರ॑ಮೇ॒ವಾಸ್ಮೈ॒ ಪ್ರ ಹ॑ರತಿ ಶರ॒ಮಯ॑-ಮ್ಬ॒ರ್॒ಹಿ-ಶ್ಶೃ॒ಣಾತ್ಯೇ॒ವೈನಂ॒-ವೈಁಭೀ॑ದಕ ಇ॒ದ್ಧ್ಮೋ ಭಿ॒ನತ್ತ್ಯೇ॒ವೈನ᳚ಮ್ ॥ 47 ॥
(ಅ॒ಭಿ – ಖಲು॒ – ವೃಷ್ಟಿ॒-ಶ್ಛನ್ದ॑ಸಾಮೇ॒ವ ರಸೇ॑ನ – ಪ್ರ॒ಜಾಮವ॑ – ವೈಶ್ವದೇ॒ವಾ ವೈ – ಬ್ರ॑ಹ್ಮವರ್ಚ॒ಸಂ – ಯೂಁಪ॒ – ಏಕಾ॒ನ್ನವಿಗ್ಂ॑ಶ॒ತಿಶ್ಚ॑) (ಅ. 7)
ಅ॒ಸಾವಾ॑ದಿ॒ತ್ಯೋ ನ ವ್ಯ॑ರೋಚತ॒ ತಸ್ಮೈ॑ ದೇ॒ವಾಃ ಪ್ರಾಯ॑ಶ್ಚಿತ್ತಿಮೈಚ್ಛ॒-ನ್ತಸ್ಮಾ॑ ಏ॒ತಾಗ್ಂ ಸೌ॒ರೀಗ್ ಶ್ವೇ॒ತಾಂ-ವಁ॒ಶಾಮಾ-ಽಲ॑ಭನ್ತ॒ ತಯೈ॒ವಾಸ್ಮಿ॒-ನ್ರುಚ॑ಮದಧು॒ರ್ಯೋ ಬ್ರ॑ಹ್ಮವರ್ಚ॒ಸಕಾ॑ಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತಾಗ್ಂ ಸೌ॒ರೀಗ್ ಶ್ವೇ॒ತಾಂ-ವಁ॒ಶಾಮಾ ಲ॑ಭೇತಾ॒ಮುಮೇ॒ವಾ ಽಽದಿ॒ತ್ಯಗ್ಗ್ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ನ್ದ॑ಧಾತಿ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತಿ ಬೈ॒ಲ್॒ವೋ ಯೂಪೋ॑ ಭವತ್ಯ॒ಸೌ [ ] 48
ವಾ ಆ॑ದಿ॒ತ್ಯೋ ಯತೋ-ಽಜಾ॑ಯತ॒ ತತೋ॑ ಬಿ॒ಲ್ವ॑ ಉದ॑ತಿಷ್ಠ॒-ಥ್ಸಯೋ᳚ನ್ಯೇ॒ವ ಬ್ರ॑ಹ್ಮವರ್ಚ॒ಸಮವ॑ ರುನ್ಧೇ ಬ್ರಾಹ್ಮಣಸ್ಪ॒ತ್ಯಾ-ಮ್ಬ॑ಭ್ರುಕ॒ರ್ಣೀಮಾ ಲ॑ಭೇತಾ-ಭಿ॒ಚರ॑ನ್-ವಾರು॒ಣ-ನ್ದಶ॑ಕಪಾಲ-ಮ್ಪು॒ರಸ್ತಾ॒-ನ್ನಿರ್ವ॑ಪೇ॒-ದ್ವರು॑ಣೇನೈ॒ವ ಭ್ರಾತೃ॑ವ್ಯ-ಙ್ಗ್ರಾಹಯಿ॒ತ್ವಾ ಬ್ರಹ್ಮ॑ಣಾ ಸ್ತೃಣುತೇ ಬಭ್ರುಕ॒ರ್ಣೀ ಭ॑ವತ್ಯೇ॒ತದ್ವೈ ಬ್ರಹ್ಮ॑ಣೋ ರೂ॒ಪಗ್ಂ ಸಮೃ॑ದ್ಧ್ಯೈ॒ ಸ್ಫ್ಯೋ ಯೂಪೋ॑ ಭವತಿ॒ ವಜ್ರೋ॒ ವೈ ಸ್ಫ್ಯೋ ವಜ್ರ॑ಮೇ॒ವಾಸ್ಮೈ॒ ಪ್ರ ಹ॑ರತಿ ಶರ॒ಮಯ॑-ಮ್ಬ॒ರ್॒ಹಿ-ಶ್ಶೃ॒ಣಾ- [-ಬ॒ರ್॒ಹಿ-ಶ್ಶೃ॒ಣಾತಿ॑, ಏ॒ವೈನಂ॒-ವೈಁಭೀ॑ದಕ] 49
-ತ್ಯೇ॒ವೈನಂ॒-ವೈಁಭೀ॑ದಕ ಇ॒ದ್ಧ್ಮೋ ಭಿ॒ನತ್ತ್ಯೇ॒ವೈನಂ॑-ವೈಁಷ್ಣ॒ವಂ-ವಾಁ॑ಮ॒ನಮಾ ಲ॑ಭೇತ॒ ಯಂ-ಯಁ॒ಜ್ಞೋ ನೋಪ॒ನಮೇ॒-ದ್ವಿಷ್ಣು॒ರ್ವೈ ಯ॒ಜ್ಞೋ ವಿಷ್ಣು॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಯ॒ಜ್ಞ-ಮ್ಪ್ರ ಯ॑ಚ್ಛ॒ತ್ಯುಪೈ॑ನಂ-ಯಁ॒ಜ್ಞೋ ನ॑ಮತಿ ವಾಮ॒ನೋ ಭ॑ವತಿ ವೈಷ್ಣ॒ವೋ ಹ್ಯೇ॑ಷ ದೇ॒ವತ॑ಯಾ॒ ಸಮೃ॑ದ್ಧ್ಯೈ ತ್ವಾ॒ಷ್ಟ್ರಂ-ವಁ॑ಡ॒ಬ ಮಾ ಲ॑ಭೇತ ಪ॒ಶುಕಾ॑ಮ॒ಸ್ತ್ವಷ್ಟಾ॒ ವೈ ಪ॑ಶೂ॒ನಾ-ಮ್ಮಿ॑ಥು॒ನಾನಾಂ᳚- [ವೈ ಪ॑ಶೂ॒ನಾ-ಮ್ಮಿ॑ಥು॒ನಾನಾ᳚ಮ್, ಪ್ರ॒ಜ॒ನ॒ಯಿ॒ತಾ] 50
ಪ್ರಜನಯಿ॒ತಾ ತ್ವಷ್ಟಾ॑ರಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಪ॒ಶೂ-ನ್ಮಿ॑ಥು॒ನಾ-ನ್ಪ್ರ ಜ॑ನಯತಿ ಪ್ರ॒ಜಾ ಹಿ ವಾ ಏ॒ತಸ್ಮಿ॑-ನ್ಪ॒ಶವಃ॒ ಪ್ರವಿ॑ಷ್ಟಾ॒ ಅಥೈ॒ಷ ಪುಮಾ॒ನ್ಥ್ಸನ್ ವ॑ಡ॒ಬ-ಸ್ಸಾ॒ಖ್ಷಾದೇ॒ವ ಪ್ರ॒ಜಾ-ಮ್ಪ॒ಶೂನವ॑ ರುನ್ಧೇ ಮೈ॒ತ್ರಗ್ಗ್ ಶ್ವೇ॒ತಮಾ ಲ॑ಭೇತ ಸಙ್ಗ್ರಾ॒ಮೇ ಸಂಯಁ॑ತ್ತೇ ಸಮ॒ಯಕಾ॑ಮೋ ಮಿ॒ತ್ರಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॑-ಮ್ಮಿ॒ತ್ರೇಣ॒ ಸ-ನ್ನ॑ಯತಿ – [ಅ-ನ್ನ॑ಯತಿ, ವಿ॒ಶಾ॒ಲೋ ಭ॑ವತಿ॒] 51
ವಿಶಾ॒ಲೋ ಭ॑ವತಿ॒ ವ್ಯವ॑ಸಾಯಯತ್ಯೇ॒ವೈನ॑-ಮ್ಪ್ರಾಜಾಪ॒ತ್ಯ-ಙ್ಕೃ॒ಷ್ಣಮಾ ಲ॑ಭೇತ॒ ವೃಷ್ಟಿ॑ಕಾಮಃ ಪ್ರ॒ಜಾಪ॑ತಿ॒ರ್ವೈ ವೃಷ್ಟ್ಯಾ॑ ಈಶೇ ಪ್ರ॒ಜಾಪ॑ತಿಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಪ॒ರ್ಜನ್ಯಂ॑-ವಁರ್ಷಯತಿ ಕೃ॒ಷ್ಣೋ ಭ॑ವತ್ಯೇ॒ತದ್ವೈ ವೃಷ್ಟ್ಯೈ॑ ರೂ॒ಪಗ್ಂ ರೂ॒ಪೇಣೈ॒ವ ವೃಷ್ಟಿ॒ಮವ॑ ರುನ್ಧೇ ಶ॒ಬಲೋ॑ ಭವತಿ ವಿ॒ದ್ಯುತ॑ಮೇ॒ವಾಸ್ಮೈ॑ ಜನಯಿ॒ತ್ವಾ ವ॑ರ್ಷಯತ್ಯವಾಶೃ॒ಙ್ಗೋ ಭ॑ವತಿ॒ ವೃಷ್ಟಿ॑ಮೇ॒ವಾಸ್ಮೈ॒ ನಿ ಯ॑ಚ್ಛತಿ ॥ 52 ॥
(ಅ॒ಸೌ – ಶೃ॒ಣಾತಿ॑ – ಮಿಥು॒ನಾನಾಂ᳚ – ನಯತಿ – ಯಚ್ಛತಿ) (ಅ. 8)
ವರು॑ಣಗ್ಂ ಸುಷುವಾ॒ಣಮ॒ನ್ನಾದ್ಯ॒-ನ್ನೋಪಾ॑ನಮ॒-ಥ್ಸ ಏ॒ತಾಂ-ವಾಁ॑ರು॒ಣೀ-ಙ್ಕೃ॒ಷ್ಣಾಂ-ವಁ॒ಶಾಮ॑ಪಶ್ಯ॒-ತ್ತಾಗ್ ಸ್ವಾಯೈ॑ ದೇ॒ವತಾ॑ಯಾ॒ ಆಲ॑ಭತ॒ ತತೋ॒ ವೈ ತಮ॒ನ್ನಾ-ದ್ಯ॒ಮುಪಾ॑-ಽನಮ॒-ದ್ಯಮಲ॑-ಮ॒ನ್ನಾದ್ಯಾ॑ಯ॒ ಸನ್ತ॑ಮ॒ನ್ನಾದ್ಯ॒-ನ್ನೋಪ॒ನಮೇ॒-ಥ್ಸ ಏ॒ತಾಂ ವಾಁ॑ರು॒ಣೀ-ಙ್ಕೃ॒ಷ್ಣಾಂ-ವಁ॒ಶಾಮಾ ಲ॑ಭೇತ॒ ವರು॑ಣಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॒ ಅನ್ನ॒-ಮ್ಪ್ರ ಯ॑ಚ್ಛತ್ಯನ್ನಾ॒ದ [ಅನ್ನ॒-ಮ್ಪ್ರ ಯ॑ಚ್ಛತ್ಯನ್ನಾ॒ದಃ, ಏ॒ವ ಭ॑ವತಿ] 53
ಏ॒ವ ಭ॑ವತಿ ಕೃ॒ಷ್ಣಾ ಭ॑ವತಿ ವಾರು॒ಣೀ ಹ್ಯೇ॑ಷಾ ದೇ॒ವತ॑ಯಾ॒ ಸಮೃ॑ದ್ಧ್ಯೈ ಮೈ॒ತ್ರಗ್ಗ್ ಶ್ವೇ॒ತಮಾ ಲ॑ಭೇತ ವಾರು॒ಣ-ಙ್ಕೃ॒ಷ್ಣಮ॒ಪಾ-ಞ್ಚೌಷ॑ಧೀನಾ-ಞ್ಚ ಸ॒ಧಾಂವಁನ್ನ॑ಕಾಮೋ ಮೈ॒ತ್ರೀರ್ವಾ ಓಷ॑ಧಯೋ ವಾರು॒ಣೀರಾಪೋ॒-ಽಪಾ-ಞ್ಚ॒ ಖಲು॒ ವಾ ಓಷ॑ಧೀನಾ-ಞ್ಚ॒ ರಸ॒ಮುಪ॑ ಜೀವಾಮೋ ಮಿ॒ತ್ರಾವರು॑ಣಾವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಾ॒ ಅನ್ನ॒-ಮ್ಪ್ರಯ॑ಚ್ಛತೋ-ಽನ್ನಾ॒ದ ಏ॒ವ ಭ॑ವ- [ಏ॒ವ ಭ॑ವತಿ, ಅ॒ಪಾ-ಞ್ಚೌಷ॑ಧೀನಾ-ಞ್ಚ] 54
(ಶಿಖಣ್ಡಿ ಪ್ರಚತಿಃ)
-ತ್ಯ॒ಪಾ-ಞ್ಚೌಷ॑ಧೀನಾ-ಞ್ಚ ಸ॒ಧಾಂವಾಁ ಲ॑ಭತ ಉ॒ಭಯ॒ಸ್ಯಾ-ವ॑ರುದ್ಧ್ಯೈ॒ವಿಶಾ॑ಖೋ॒ ಯೂಪೋ॑ ಭವತಿ॒ ದ್ವೇ ಹ್ಯೇ॑ತೇ ದೇ॒ವತೇ॒ ಸಮೃ॑ದ್ಧ್ಯೈ ಮೈ॒ತ್ರಗ್ಗ್ ಶ್ವೇ॒ತಮಾ ಲ॑ಭೇತ ವಾರು॒ಣ-ಙ್ಕೃ॒ಷ್ಣ-ಞ್ಜ್ಯೋಗಾ॑ಮಯಾವೀ॒-ಯ-ನ್ಮೈ॒ತ್ರೋ ಭವ॑ತಿ ಮಿ॒ತ್ರೇಣೈ॒ವಾ-ಽಸ್ಮೈ॒ ವರು॑ಣಗ್ಂ ಶಮಯತಿ॒ ಯ-ದ್ವಾ॑ರು॒ಣ-ಸ್ಸಾ॒ಖ್ಷಾದೇ॒ವೈನಂ॑-ವಁರುಣಪಾ॒ಶಾ-ನ್ಮು॑ಞ್ಚತ್ಯು॒ತ ಯದೀ॒ತಾಸು॒ರ್ಭವ॑ತಿ॒ ಜೀವ॑ತ್ಯೇ॒ವ ದೇ॒ವಾ ವೈ ಪುಷ್ಟಿ॒-ನ್ನಾ-ಽವಿ॑ನ್ದ॒ನ್- [ನಾ-ಽವಿ॑ನ್ದನ್ನ್, ತಾ-ಮ್ಮಿ॑ಥು॒ನೇ॑] 55
-ತಾ-ಮ್ಮಿ॑ಥು॒ನೇ॑ ಽಪಶ್ಯ॒-ನ್ತಸ್ಯಾ॒-ನ್ನ ಸಮ॑ರಾಧಯ॒ನ್ತಾ-ವ॒ಶ್ವಿನಾ॑-ವಬ್ರೂತಾ-ಮಾ॒ವಯೋ॒ರ್ವಾ ಏ॒ಷಾ ಮೈತಸ್ಯಾಂ᳚ ವಁದದ್ಧ್ವ॒ಮಿತಿ॒ ಸಾಶ್ವಿನೋ॑ರೇ॒ವಾಭ॑ವ॒ದ್ಯಃ ಪುಷ್ಟಿ॑ಕಾಮ॒-ಸ್ಸ್ಯಾ-ಥ್ಸ ಏ॒ತಾಮಾ᳚ಶ್ವಿ॒ನೀಂ-ಯಁ॒ಮೀಂ-ವಁ॒ಶಾಮಾ ಲ॑ಭೇತಾ॒-ಽಶ್ವಿನಾ॑ವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॒-ನ್ಪುಷ್ಟಿ॑-ನ್ಧತ್ತಃ॒ ಪುಷ್ಯ॑ತಿ ಪ್ರ॒ಜಯಾ॑ ಪ॒ಶುಭಿಃ॑ ॥ 56 ॥
(ಅ॒ನ್ನಾ॒ದೋ᳚ – ಽನ್ನಾ॒ದ ಏ॒ವ ಭ॑ವತ್ಯ – ವಿನ್ದ॒ನ್ – ಪಞ್ಚ॑ಚತ್ವಾರಿಗ್ಂಶಚ್ಚ) (ಅ. 9)
ಆ॒ಶ್ವಿ॒ನ-ನ್ಧೂ॒ಮ್ರಲ॑ಲಾಮ॒ ಮಾ ಲ॑ಭೇತ॒ ಯೋ ದುರ್ಬ್ರಾ᳚ಹ್ಮಣ॒-ಸ್ಸೋಮ॒-ಮ್ಪಿಪಾ॑ಸೇ-ದ॒ಶ್ವಿನೌ॒ ವೈ ದೇ॒ವಾನಾ॒-ಮಸೋ॑ಮಪಾವಾಸ್ತಾ॒-ನ್ತೌ ಪ॒ಶ್ಚಾ ಸೋ॑ಮಪೀ॒ಥ-ಮ್ಪ್ರಾಪ್ನು॑ತಾ-ಮ॒ಶ್ವಿನಾ॑-ವೇ॒ತಸ್ಯ॑ ದೇ॒ವತಾ॒ ಯೋ ದುರ್ಬ್ರಾ᳚ಹ್ಮಣ॒-ಸ್ಸೋಮ॒-ಮ್ಪಿಪಾ॑ಸತ್ಯ॒ಶ್ವಿನಾ॑ವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒-ತಾ-ವೇ॒ವಾ-ಽಸ್ಮೈ॑ ಸೋಮಪೀ॒ಥ-ಮ್ಪ್ರ ಯ॑ಚ್ಛತ॒ ಉಪೈ॑ನಗ್ಂ ಸೋಮಪೀ॒ಥೋ ನ॑ಮತಿ॒ ಯ-ದ್ಧೂ॒ಮ್ರೋ ಭವ॑ತಿ ಧೂಮ್ರಿ॒ಮಾಣ॑-ಮೇ॒ವಾ-ಽಸ್ಮಾ॒-ದಪ॑ ಹನ್ತಿ ಲ॒ಲಾಮೋ॑ [ಲ॒ಲಾಮಃ॑, ಭ॒ವ॒ತಿ ಮು॒ಖ॒ತ] 57
ಭವತಿ ಮುಖ॒ತ ಏ॒ವಾಸ್ಮಿ॒-ನ್ತೇಜೋ॑ ದಧಾತಿ ವಾಯ॒ವ್ಯ॑-ಙ್ಗೋಮೃ॒ಗಮಾ ಲ॑ಭೇತ॒ ಯಮಜ॑ಘ್ನಿವಾಗ್ಂ ಸಮಭಿ॒ಶಗ್ಂ ಸೇ॑ಯು॒ರಪೂ॑ತಾ॒ ವಾ ಏ॒ತಂ-ವಾಁಗೃ॑ಚ್ಛತಿ॒ ಯಮಜ॑ಘ್ನಿವಾಗ್ಂ ಸಮಭಿ॒ಶಗ್ಂ ಸ॑ನ್ತಿ॒ ನೈಷ ಗ್ರಾ॒ಮ್ಯಃ ಪ॒ಶುರ್ನಾರ॒ಣ್ಯೋ ಯ-ದ್ಗೋ॑ಮೃ॒ಗೋ ನೇವೈ॒ಷ ಗ್ರಾಮೇ॒ ನಾರ॑ಣ್ಯೇ॒ ಯಮಜ॑ಘ್ನಿವಾಗ್ಂ ಸಮಭಿ॒ಶಗ್ಂ ಸ॑ನ್ತಿ ವಾ॒ಯುರ್ವೈ ದೇ॒ವಾನಾ᳚-ಮ್ಪ॒ವಿತ್ರಂ॑-ವಾಁ॒ಯುಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈ- [ಸ ಏ॒ವ, ಏ॒ನ॒-ಮ್ಪ॒ವ॒ಯ॒ತಿ॒ ಪರಾ॑ಚೀ॒] 58
-ನ॑-ಮ್ಪವಯತಿ॒ ಪರಾ॑ಚೀ॒ ವಾ ಏ॒ತಸ್ಮೈ᳚ ವ್ಯು॒ಚ್ಛನ್ತೀ॒ ವ್ಯು॑ಚ್ಛತಿ॒ ತಮಃ॑ ಪಾ॒ಪ್ಮಾನ॒-ಮ್ಪ್ರವಿ॑ಶತಿ॒ ಯಸ್ಯಾ᳚-ಽಽಶ್ವಿ॒ನೇ ಶ॒ಸ್ಯಮಾ॑ನೇ॒ ಸೂರ್ಯೋ॒ ನಾ-ಽಽವಿರ್ಭವ॑ತಿ ಸೌ॒ರ್ಯ-ಮ್ಬ॑ಹುರೂ॒ಪಮಾ ಲ॑ಭೇತಾ॒-ಽಮು-ಮೇ॒ವಾ-ಽಽದಿ॒ತ್ಯಗ್ಗ್ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॒-ತ್ತಮಃ॑ ಪಾ॒ಪ್ಮಾನ॒ಮಪ॑ ಹನ್ತಿ ಪ್ರ॒ತೀಚ್ಯ॑ಸ್ಮೈ ವ್ಯು॒ಚ್ಛನ್ತೀ॒ ವ್ಯು॑ಚ್ಛ॒ತ್ಯಪ॒ ತಮಃ॑ ಪಾ॒ಪ್ಮಾನಗ್ಂ॑ ಹತೇ ॥ 59 ॥
(ಲ॒ಲಾಮಃ॒ – ಸ ಏ॒ವ – ಷಟ್ಚ॑ತ್ವಾರಿಗ್ಂಶಚ್ಚ) (ಅ. 10)
ಇನ್ದ್ರಂ॑-ವೋಁ ವಿ॒ಶ್ವತ॒ಸ್ಪರೀ, ನ್ದ್ರ॒-ನ್ನರೋ॒, ಮರು॑ತೋ॒ ಯದ್ಧ॑ ವೋ ದಿ॒ವೋ, ಯಾ ವ॒-ಶ್ಶರ್ಮ॑ ॥ ಭರೇ॒ಷ್ವಿನ್ದ್ರಗ್ಂ॑ ಸು॒ಹವಗ್ಂ॑ ಹವಾಮಹೇ ಽಗ್ಂಹೋ॒ಮುಚಗ್ಂ॑ ಸು॒ಕೃತ॒-ನ್ದೈವ್ಯ॒-ಞ್ಜನ᳚ಮ್ । ಅ॒ಗ್ನಿ-ಮ್ಮಿ॒ತ್ರಂ-ವಁರು॑ಣಗ್ಂ ಸಾ॒ತಯೇ॒ ಭಗ॒-ನ್ದ್ಯಾವಾ॑ಪೃಥಿ॒ವೀ ಮ॒ರುತ॑-ಸ್ಸ್ವ॒ಸ್ತಯೇ᳚ ॥ ಮ॒ಮತ್ತು॑ ನಃ॒ ಪರಿ॑ಜ್ಮಾ ವಸ॒ರ್॒ಹಾ ಮ॒ಮತ್ತು॒ ವಾತೋ॑ ಅ॒ಪಾಂ-ವೃಁಷ॑ಣ್ವಾನ್ನ್ । ಶಿ॒ಶೀ॒ತಮಿ॑ನ್ದ್ರಾಪರ್ವತಾ ಯು॒ವ-ನ್ನ॒ಸ್ತನ್ನೋ॒ ವಿಶ್ವೇ॑ ವರಿವಸ್ಯನ್ತು ದೇ॒ವಾಃ ॥ ಪ್ರಿ॒ಯಾ ವೋ॒ ನಾಮ॑ – [ಪ್ರಿ॒ಯಾ ವೋ॒ ನಾಮ॑, ಹು॒ವೇ॒ ತು॒ರಾಣಾ᳚ಮ್ ।] 60
ಹುವೇ ತು॒ರಾಣಾ᳚ಮ್ । ಆ ಯ-ತ್ತೃ॒ಪನ್ಮ॑ರುತೋ ವಾವಶಾ॒ನಾಃ ॥ ಶ್ರಿ॒ಯಸೇ॒ ಕ-ಮ್ಭಾ॒ನುಭಿ॒-ಸ್ಸ-ಮ್ಮಿ॑ಮಿಖ್ಷಿರೇ॒ ತೇ ರ॒ಶ್ಮಿಭಿ॒ಸ್ತ ಋಕ್ವ॑ಭಿ-ಸ್ಸುಖಾ॒ದಯಃ॑ । ತೇ ವಾಶೀ॑ಮನ್ತ ಇ॒ಷ್ಮಿಣೋ॒ ಅಭೀ॑ರವೋ ವಿ॒ದ್ರೇ ಪ್ರಿ॒ಯಸ್ಯ॒ ಮಾರು॑ತಸ್ಯ॒ ಧಾಮ್ನಃ॑ ॥ ಅ॒ಗ್ನಿಃ ಪ್ರ॑ಥ॒ಮೋ ವಸು॑ಭಿರ್ನೋ ಅವ್ಯಾ॒-ಥ್ಸೋಮೋ॑ ರು॒ದ್ರೇಭಿ॑ರ॒ಭಿ ರ॑ಖ್ಷತ॒ ತ್ಮನಾ᳚ । ಇನ್ದ್ರೋ॑ ಮ॒ರುದ್ಭಿ॑ರ್-ಋತು॒ಧಾ ಕೃ॑ಣೋತ್ವಾದಿ॒ತ್ಯೈರ್ನೋ॒ ವರು॑ಣ॒-ಸ್ಸಗ್ಂ ಶಿ॑ಶಾತು ॥ ಸ-ನ್ನೋ॑ ದೇ॒ವೋ ವಸು॑ಭಿರ॒ಗ್ನಿ-ಸ್ಸಗ್ಂ [ವಸು॑ಭಿರ॒ಗ್ನಿ-ಸ್ಸಮ್, ಸೋಮ॑ಸ್ತ॒ನೂಭೀ॑ ರು॒ದ್ರಿಯಾ॑ಭಿಃ ।] 61
ಸೋಮ॑ಸ್ತ॒ನೂಭೀ॑ ರು॒ದ್ರಿಯಾ॑ಭಿಃ । ಸಮಿನ್ದ್ರೋ॑ ಮ॒ರುದ್ಭಿ॑ ರ್ಯ॒ಜ್ಞಿಯೈ॒-ಸ್ಸಮಾ॑ದಿ॒ತ್ಯೈರ್ನೋ॒ ವರು॑ಣೋ ಅಜಿಜ್ಞಿಪತ್ ॥ ಯಥಾ॑-ಽಽದಿ॒ತ್ಯಾ ವಸು॑ಭಿ-ಸ್ಸಮ್ಬಭೂ॒ವು-ರ್ಮ॒ರುದ್ಭೀ॑ ರು॒ದ್ರಾ-ಸ್ಸ॒ಮಜಾ॑ನತಾ॒ಭಿ । ಏ॒ವಾ ತ್ರಿ॑ಣಾಮ॒ನ್ನ-ಹೃ॑ಣೀಯಮಾನಾ॒ ವಿಶ್ವೇ॑ ದೇ॒ವಾ-ಸ್ಸಮ॑ನಸೋ ಭವನ್ತು ॥ ಕುತ್ರಾ॑ ಚಿ॒ದ್ಯಸ್ಯ॒ ಸಮೃ॑ತೌ ರ॒ಣ್ವಾ ನರೋ॑ ನೃ॒ಷದ॑ನೇ । ಅರ್ಹ॑ನ್ತಶ್ಚಿ॒-ದ್ಯಮಿ॑ನ್ಧ॒ತೇ ಸ॑ಜ॒ನ್ನಯ॑ನ್ತಿ ಜ॒ನ್ತವಃ॑ ॥ ಸಂ-ಯಁದಿ॒ಷೋ ವನಾ॑ಮಹೇ॒ ಸಗ್ಂ ಹ॒ವ್ಯಾ ಮಾನು॑ಷಾಣಾಮ್ । ಉ॒ತ ದ್ಯು॒ಮ್ನಸ್ಯ॒ ಶವ॑ಸ [ಶವ॑ಸಃ, ಋ॒ತಸ್ಯ॑ ರ॒ಶ್ಮಿಮಾ ದ॑ದೇ ।] 62
ಋ॒ತಸ್ಯ॑ ರ॒ಶ್ಮಿಮಾ ದ॑ದೇ ॥ ಯ॒ಜ್ಞೋ ದೇ॒ವಾನಾ॒-ಮ್ಪ್ರತ್ಯೇ॑ತಿ ಸು॒ಮ್ನಮಾದಿ॑ತ್ಯಾಸೋ॒ ಭವ॑ತಾ ಮೃಡ॒ಯನ್ತಃ॑ । ಆ ವೋ॒-ಽರ್ವಾಚೀ॑ ಸುಮ॒ತಿರ್ವ॑ವೃತ್ಯಾದ॒ಗ್ಂ॒ ಹೋಶ್ಚಿ॒ದ್ಯಾ ವ॑ರಿವೋ॒ವಿತ್ತ॒ರಾ-ಽಸ॑ತ್ ॥ ಶುಚಿ॑ರ॒ಪ-ಸ್ಸೂ॒ಯವ॑ಸಾ ಅದ॑ಬ್ಧ॒ ಉಪ॑ ಖ್ಷೇತಿ ವೃ॒ದ್ಧವ॑ಯಾ-ಸ್ಸು॒ವೀರಃ॑ । ನಕಿ॒ಷ್ಟಂ(2) ಘ್ನ॒ನ್ತ್ಯನ್ತಿ॑ತೋ॒ ನ ದೂ॒ರಾದ್ಯ ಆ॑ದಿ॒ತ್ಯಾನಾ॒-ಮ್ಭವ॑ತಿ॒ ಪ್ರಣೀ॑ತೌ ॥ ಧಾ॒ರಯ॑ನ್ತ ಆದಿ॒ತ್ಯಾಸೋ॒ ಜಗ॒ಥ್ಸ್ಥಾ ದೇ॒ವಾ ವಿಶ್ವ॑ಸ್ಯ॒ ಭುವ॑ನಸ್ಯ ಗೋ॒ಪಾಃ । ದೀ॒ರ್ಘಾಧಿ॑ಯೋ॒ ರಖ್ಷ॑ಮಾಣಾ [ರಖ್ಷ॑ಮಾಣಾಃ, ಅ॒ಸು॒ರ್ಯ॑ಮೃ॒ತಾವಾ॑ನ॒-] 63
ಅಸು॒ರ್ಯ॑ಮೃ॒ತಾವಾ॑ನ॒-ಶ್ಚಯ॑ಮಾನಾ ಋ॒ಣಾನಿ॑ ॥ ತಿ॒ಸ್ರೋ ಭೂಮೀ᳚ರ್ಧಾರಯ॒-ನ್ತ್ರೀಗ್ಂ ರು॒ತ ದ್ಯೂ-ನ್ತ್ರೀಣಿ॑ ವ್ರ॒ತಾ ವಿ॒ದಥೇ॑ ಅ॒ನ್ತರೇ॑ಷಾಮ್ । ಋ॒ತೇನಾ॑-ಽಽದಿತ್ಯಾ॒ ಮಹಿ॑ ವೋ ಮಹಿ॒ತ್ವ-ನ್ತದ॑ರ್ಯಮನ್ ವರುಣ ಮಿತ್ರ॒ ಚಾರು॑ ॥ ತ್ಯಾನ್ನು ಖ್ಷ॒ತ್ರಿಯಾ॒ಗ್ಂ॒ ಅವ॑ ಆದಿ॒ತ್ಯಾನ್. ಯಾ॑ಚಿಷಾಮಹೇ । ಸು॒ಮೃ॒ಡೀ॒ಕಾಗ್ಂ ಅ॒ಭಿಷ್ಟ॑ಯೇ ॥ ನ ದ॑ಖ್ಷಿ॒ಣಾ ವಿಚಿ॑ಕಿತೇ॒ ನ ಸ॒ವ್ಯಾ ನ ಪ್ರಾ॒ಚೀನ॑ಮಾದಿತ್ಯಾ॒ ನೋತ ಪ॒ಶ್ಚಾ । ಪಾ॒ಕ್ಯಾ॑ ಚಿದ್ವಸವೋ ಧೀ॒ರ್ಯಾ॑ ಚಿ- [ಧೀ॒ರ್ಯಾ॑ ಚಿತ್, ಯು॒ಷ್ಮಾನೀ॑ತೋ॒] 64
-ದ್ಯು॒ಷ್ಮಾನೀ॑ತೋ॒ ಅಭ॑ಯ॒-ಞ್ಜ್ಯೋತಿ॑ರಶ್ಯಾಮ್ ॥ ಆ॒ದಿ॒ತ್ಯಾನಾ॒ಮವ॑ಸಾ॒ ನೂತ॑ನೇನ ಸಖ್ಷೀ॒ಮಹಿ॒ ಶರ್ಮ॑ಣಾ॒ ಶನ್ತ॑ಮೇನ । ಅ॒ನಾ॒ಗಾ॒ಸ್ತ್ವೇ ಅ॑ದಿತಿ॒ತ್ವೇ ತು॒ರಾಸ॑ ಇ॒ಮಂ-ಯಁ॒ಜ್ಞ-ನ್ದ॑ಧತು॒ ಶ್ರೋಷ॑ಮಾಣಾಃ ॥ ಇ॒ಮ-ಮ್ಮೇ॑ ವರುಣ ಶ್ರುಧೀ॒ ಹವ॑ಮ॒ದ್ಯಾ ಚ॑ ಮೃಡಯ । ತ್ವಾಮ॑ವ॒ಸ್ಯುರಾ ಚ॑ಕೇ ॥ ತತ್ತ್ವಾ॑ ಯಾಮಿ॒ ಬ್ರಹ್ಮ॑ಣಾ॒ ವನ್ದ॑ಮಾನ॒-ಸ್ತದಾ ಶಾ᳚ಸ್ತೇ॒ ಯಜ॑ಮಾನೋ ಹ॒ವಿರ್ಭಿಃ॑ । ಅಹೇ॑ಡಮಾನೋ ವರುಣೇ॒ಹ ಬೋ॒ದ್ಧ್ಯುರು॑ಶಗ್ಂಸ॒ ಮಾ ನ॒ ಆಯುಃ॒ ಪ್ರಮೋ॑ಷೀಃ ॥ 65 ॥
(ನಾಮಾ॒ – ಽಗ್ನಿ-ಸ್ಸಗ್ಂ – ಶವ॑ಸೋ॒ – ರಖ್ಷ॑ಮಾಣಾ – ಧೀ॒ರ್ಯಾ॑-ಞ್ಚಿ॒ದೇ – ಕಾ॒ನ್ನ ಪ॑ಞ್ಚಾ॒ಶಚ್ಚ॑) (ಅ. 11)
(ವಾ॒ಯ॒ವ್ಯಂ॑ – ಪ್ರಾ॒ಜಪ॑ತಿ॒ಸ್ತಾ ವರು॑ಣಂ – ದೇವಾಸು॒ರಾ ಏ॒ಷ್ವ॑ – ಸಾವಾ॑ದಿ॒ತ್ಯೋ ದಶ॑ರ್ಷಭಾ॒-ಮಿನ್ದ್ರೋ॑ ವ॒ಲಸ್ಯ॑ – ಬಾರ್ಹಸ್ಪ॒ತ್ಯಂ – ವಁ॑ಷಟ್ಕಾ॒ರೋ॑ – ಽಸೌಸೌ॒ರೀಂ॒ – ವಁ॑ರುಣ -ಮಾಶ್ವಿ॒ನ – ಮಿನ್ದ್ರಂ॑-ವೋಁ॒ ನರ॒ – ಏಕಾದ॑ಶ)
(ವಾ॒ಯ॒ವ್ಯ॑ – ಮಾಗ್ನೇ॒ಯೀ-ಙ್ಕೃ॑ಷ್ಣಗ್ರೀ॒ವೀ – ಮ॒ಸಾವಾ॑ದಿ॒ತ್ಯೋ – ವಾ ಅ॑ಹೋರಾ॒ತ್ರಾಣಿ॑ – ವಷಟ್ಕಾ॒ರಃ – ಪ್ರ॑ಜನಯಿ॒ತಾ – ಹು॑ವೇ ತು॒ರಾಣಾಂ॒ – ಪಞ್ಚ॑ಷಷ್ಟಿಃ )
(ವಾ॒ಯ॒ವ್ಯ॑ಮ್, ಪ್ರಮೋ॑ಷೀಃ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ಪ್ರಥಮಃ ಪ್ರಶ್ನ-ಸ್ಸಮಾಪ್ತಃ ॥